魚肉云耳勝瓜湯

今日食得清d、噚晚用鮫魚骨煮咗個湯、煮咗碗米粉、今日继續用魚湯煮云耳勝瓜湯。跟番碗莱飯、好滿足呢！

光波爐餐包

自從焗爐壞咗之後、好耐(差不多半年)冇整過麵包。

今日試吓用光波爐、又Ok喎。

材料

高粉……280gm
自發粉……20gm
吉士粉……10gm
依士……5gm
蛋1隻
糖50gm
水……適量
橄欖油……適量

做法同平時一樣、搓完等發酵至两倍大。之後光波180度(放下層)大约10至11分钟、le個份量做到大約八至九個。

自打鮫魚肉釀茄子

趁重有少少力打番d鮫魚肉嚟釀茄子先！

噚日係街市買咗两條扁鮫嚟打魚肉、今朝釀咗碟茄子比朋友。

留起部份嚟煲生莱魚球粥。

喜馬拉岩盐刁草焗三文魚扒

自從買咗個光波爐、煮嘢健康晒、今晚用喜馬拉岩盐同刁草醃完塊三文魚扒、光波爐230焗七八分鈡就搅掂、跟番個日式沙律(海苔毛茄汁)、十分健康的晚餐。

飯後甜品係麽嚒嚒喳喳。

健康版之。。。。虾多士

我很醜。。。。但夠健康！

今朝買咗d中虾……做咗幾件健康版之虾多士、做法同平時一樣、只不過唔用油炸、改用光波230焗大約十分鈡。

亞婆金句。。。。

霧裡看花不清。。。。人生尤於霧中花。。。。死後方知花美麗、唯有遙看霧花！

那些年。。。。

今天突然好想念一手把我揍大的亞婆！所以摷番和她合照的照片、懷念一番、可能不久的將來、我地可再重聚。

魚湯米粉

噚日係沙田食咗le個魚湯米粉、見佢好清甜、今朝見d紅衫好抵、二碟四十蚊有九條、拎嚟煮咗個魚湯、跟番佢咁煮、正到冇朋友呀。

温馨提示。。。之前的營養師講過、煮魚湯最好唔用头、因為头d胆固醇高。

瀟灑走一會！

難怪我一位退休的朋友係这年紀都移民過去啦！不過好似以前有句話。。。。富不過三代、好的政府會永遠一樣嗎？祝願佢好運吧！

光波燒肉

自從係英國返嚟後、未試過整到脆皮燒肉、諗住做埋今次再唔得就收山！

今次用光波爐都算成功咗八成、唯一唔滿意係嚿肉唔夠鮮味(可能係急凍肉的關係)、因為新鮮的好難搵到五層肉囉！不過。。。。我一定要成功一次至會停手的。

夏威夷白皮紫蕃薯甜品

今日做咗两款紫蕃薯甜品。。。

(1)。。。紫蕃薯軟糕

做法同之前的馬來蕃薯甜糕的份量一樣

(2)。。。特式糖水

配料有蓮子、南北杏、百合、雪耳加埋紫薯茸、最後加入冰糖。

百物高漲的香港

而家生活係香港一d都唔容易。。。。我地d蟻民又可以点呢？？？

光波爐(亞差)叉燒

今日第一次用光波爐整叉燒、可能未能調節到個爐火、嘻嘻。。。焗到變咗亞差添。

等我做多次再post個食譜出嚟啦。

其實調味料離不開。。。。玫瑰露(酒)加糖先醃1/2小時、再加入海鮮醬、蚝油、蘑豉、老抽这幾樣(我今次連乾葱茸都唔記得落)。之所以我喜歡煮中式嘢其中一個原因就係钟意落乜就落乜、份量隨自己喜好、啱晒我d唔受束溥之人囉。

素XO醬炒雞肶菇翠肉瓜

Le輪食得比較雜同多、所以今晚食清d。。。。就係素XO醬炒雞肶菇翠肉瓜。

材料

素XO醬(蘇太名醬)

翠肉瓜切片
雞肶菇切片
云耳(又名老鼠耳)

以上飛水後用素XO酱炒吓就可上碟。

清雪柜午餐

今日又係清雪柜的日子。。。。鮮虾粒蛋炒飯加南瓜栗子湯！

炒飯

白飯、虾粒、蛋、葱花
調味。。。盐同魚露

湯

南瓜、栗子、果皮、瘦肉

搅搅吓都有餐豐富的晏仔食吓呀。

煲仔飯

今晚帶咗朋友去試煲仔飯、老板應承做個特别煲仔飯我地食、果然冇介紹錯。

斑蘭椰汁軟糖(糕)

我今日又搅搅震。。。。都幾好食、唔太甜！

2015維園花展

冇去咗幾年睇花展、咁啱今年主题係我的至愛。。。跳舞蘭！

今日係第二天、所以特别靚、不少龍友長短镜、我抱着参觀吓的心態、是是但但拍咗幾張啦。

霧鎖香港仔

今天超大霧、由住所往外看、一百米都看不清、唉！这天气又濕又令関節不爽、真不知維持到幾時啦。

素釀大蘑菇飯

今日係二月初一、中午去咗素菜館食、晚上簡單用紅蘿蔔、雞肶菇、芝士片炒咗個飯嚟釀大蘑菇、再用光波爐焗一陣就得。

止咳水

前幾日係电视見中醫教咗le款止咳湯水、我见近日咳到飛起、不妨又試吓囉

心声。。。

昨天偶然在街上遇見一個兒時的玩伴兼小學同學、原來佢近幾年由澳洲回流这土生土長之香港。

從佢囗中得悉佢母親最近仙遊、亦知另一位母親的好朋友亦一樣、心中一涼、回望近日母親的身体狀况、不禁憂心不巳、因為她这一輩的朋友早巳走得八八九九。。。。雖然自己常常对自己講、生老病死、在所難免、但人非草木、自問當年先父去世的時候、為了不想别人看到傷心的一面、盡量將眼淚往肚中流、那種感覺依然歷歷在目、一個曾經服待咗十多年的老人家(雖然我並不是佢心中所愛)、如今一旦母親有事(雖然曾經有段日子恨她、但近年巳將心結放下)。。。真不知能否承受得起。

若然能早她而去、未嘗不是一件好事。

亞婆三杯雞

Le個係我的簡易版！

材料

雞半隻斬件

醃雞用豉油豆粉糖

三杯汁

老抽/陳醋/酒各半杯、糖適量

薑片(連皮)十片、蒜片適量
九層塔(最後才下)

做法……將雞件同薑片、蒜片走油、拎走多餘油爆雞至焦黄、下三杯汁、煮至汁液收至杰身最後加入九層塔、熄火上碟。

英式鬆餅之。。。(2)

今日再做多次比朋友、肯定咗個份量可以分享個食譜。。。(不過同原食譜有少許出入)

材料:

自發粉250gm。。。半茶匙發粉添(Baking)
糖(我用rawsugar)50g
蛋1只
鮮奶50gm
牛油溶液125gm

紅莓適量

蛋液搽面少少

做法:

以上全部輕手按成粉糰、用模吸出形狀、預熱光波180、先放盆底五至六分鈡、再用架承起多五至六分钟(是乎各人之光波爐)！

以上可做迷你鬆餅八至十個

石崇魚湯

自從le隻魚越賣越贵我都好耐冇煲到咯！

今朝見有細條游水的、見又唔太贵、於是買咗一斤煲吓囉、但有少少感冒唔敢煲药材、於是試吓合掌瓜、陳皮、紅蘿蔔同粟米、估唔到又幾清甜噃。

西京黑豚肉

噚日做咗個西京汁醃比目魚、為咗唔嘥嘢、今日拎嚟做埋個黑豚肉粒啦。

我的西京汁配方

日式三宝。。。鰹魚汁/清酒/味淋
日式淡麵豉
亂搅一通的亞婆西京汁

用紫洋葱炒完再炆至汁收至杰身就OK。

红莓Muffin

我今日又試光波爐做Muffin。。。今次試用红莓乾做！

材料

Selfraising  自發粉200gm
糖60gm
原味乳酪一小杯
鲜奶50gm
牛油溶液50gm
紅莓乾適量

可做大约七至八小個

全部混入後放入小纸杯中八分滿、预熱180光波焗12至15分钟。

鴿蛋六宝甜湯

今日叫人留咗24隻白鴿蛋、鬼知爛咗一大半、好彩重用得番嚟炒飯都冇咁肉痛咋。

Le次我的六宝有。。。

蓮子
百合
竹笙
南棗
雪耳
紅棗

好好味！

婆婆金句

人生本無常。。。。常懷感恩心！

这是我金句之一、亦是我近年抱住对人对事的睇法。

英式紅莓鬆餅

前两天教朋友做港式蛋撻、佢教番我英式鬆餅(因為佢係英國返嚟的、一定正宗)。

今晚試整少少、估唔到真係幾鬆又好味、真係多謝晒Lucy的食譜。

棉花糖蕃薯杯

Le輪玩甜品玩上㽼、今朝上網見到人整又東施上身。

我冇用曰本蕃薯、反正整完又係比人食、無謂咁嘥錢啦。過吓手㽼就算咯、平靚正！