我的晚餐

乜嘢公平都係假、我話至公平係個肚就真。。。。。因為煮咗大大碟魚同莱、每樣只能吃一两嚿。唉！今日去完醫院覆診、醫生話個報告出咗、因唔知血管定周边的肌肉壞死(其實我都聽唔明？？？)所以通波波都冇作用、唯有keep住食药同定期檢查、少食多餐、keep住血壓、血糖同胆固醇唔過高就算、若然翳多咗再check喎、是但啦。。。。只要唔好死咗變腐屍就得嘞、因為死得肉酸就冇面見番我两隻宝貝呀！

蚬肉生莱包

Le輪日日做。。。Copycat！

今次係跟Angel的、但改咗少少材料。。。。
除咗蜆肉同沙葛之外、加咗紅椒同洋葱、調味落多咗荳板醬、相信會更加惹味囉。

蟹肉伊麵

曾經是兒時飲宴必叫的湯麵、那時屬於好名貴的食物、不過家人要自己擺酒才可……order、否则就冇家教嫁。

材料

伊麵一個出水後放碗中

蟹蒸熟後拆肉候用
九黄切段
草菇切片飛水

预備高湯(我用史云生)、滚起後放一半落伊麵、另一半放入草菇、蟹肉、加入調味、用生粉水煮杰身、放入九黄、熄火、推入蛋白、扒在伊麵面便可。

黄金炒飯

我的黄金配搭係是但有乜加乜。。。。。

白飯、莱蕊、蛋皮、三文魚肉、南瓜、金蒜、七味粉

以上加少許盐炒匀一碟就Ok！

去皮膚濕毒湯

Le輪真黑仔、唔探我好耐的老朋友(風疹)又重臨、可能係血熱、西醫就話免疫系統失調、anyway、噚日走去湾仔執咗le隻湯水煲吓啦、我希望盡量唔食咁多敏感药。。。唉！

材料

鑽地老鼠、土茯苓、大山地、牛大力、果皮、蜜棗、豬尾骨

以上出水後大火滚半小時、中细火煲多两小時、再大火煲多半小時。。。(全部共三小時)、若素食免肉、加多幾粒蜜棗(最好用金絲棗或改用無花果乾)、希望飲幾次佢走人啦。

苦瓜煎肉餅

早前見袁太做咗le肉餅幾吸引、於是又走去跟吓風！但為咗怕太油、於是用片生莱夾住一齊食、好似生菜包咁囉！

唉！話分两头、明明噚晚至燒街衣、竟然又忘記咗今日十五(齋期)。。。。唔通快腦退化？？？

梅子蒸奄仔蟹

好耐冇整le樣蟹、我實在忍唔住。。。。

材料

奄仔两隻

我的皇牌酸梅醬

奄仔洗淨斬件、上粉、捞入酸梅醬、蒸熟就Ok。

青檸Muffin

再接再勵。。。。接近完美的青檸Muffin。。。。

材料

低粉200gm
泡打(baking)10gm
糖粉90gm
蛋黄2隻
鮮奶100gm
蛋白两隻分開打發
青檸皮茸2個
青檸汁15gm

牛油溶液70gm

做法

低粉、泡打、糖粉。。。篩過

蛋黄、青檸皮茸、汁、鮮奶。。。搅匀、篩入粉類、之後加入牛油溶液、最後巳打發起之蛋白、放入光波用180度焗15至16分钟！

这份量可做八小杯、刚刚好、唔太硬、唔太軟。

青檸蛋糕仔

不一樣的配方、做出同一囗味的青檸小蛋糕、囗感截然不同、個人比較喜歡輕身的、但fold蛋白時的手勢要加以改良、否則容易凹入、但重粉少蛋似牛油蛋糕的賣相就相对嚟講好睇d囉！

雪耳南瓜露

雪柜有嚿用剩之南瓜、用少許雪耳、做碗糖水食吓先。。。。

南瓜蒸熟後用搅拌机打碎、加入巳浸發之雪耳、煲腍雪耳後加入冰糖、試味後推入粟粉水成南瓜露。

若然不喜歡雪耳可改馬碲碎亦可、同樣美味。

蕃茄魚湯米線

日日整埋d高胆固醇食物、久不久都要食清d啦！

今朝五十蚊買咗兜斑仔(游水嫁、有八條)、加咗两隻蕃茄煮d魚湯、加多半斤新鮮米線、又可食两餐、点都好過食大X樂同大X活卦？

皮蛋酥

做咗幾日的中式餅、最正係今次。。。。。皮蛋酥！

材料

蓮蓉、子薑碎(先要烘乾才捞入蓮蓉用、否则容易出水)、每份饀要包入1/6 隻皮蛋候用。

油皮

低粉135gm
白油、我用有机豬油

水皮

高筋粉50gm
低筋粉120gm
糖粉20gm
水约60ml
白油30gm

以上水皮、油皮分别搓好、每份水皮包入油皮、搓圆、按平包入餡、掃上蛋黄、用光波180度先焗大约8分钟、再轉位焗多7至8分钟左右。

瑞士汁雞絲炒河&雞翼

今日整開瑞士雞翼比朋友、顺便炒碟雞絲河！

做法同以前一樣。。。。

老抽
生抽
绍酒
水。。。各一份同等份量
大量冰糖
其他配料。。。香葉、紅蘿白碎、洋葱、八角、香芹或西芹之類
煮出香味後隔渣便可。

涼瓜鮮竹煎蛋

噚晚冇食飯、只係煮咗le碟素莱食就算、因為之前係素莱館食過、自己又試吓、今朝用餘吓之物資煮多碟。。。。。炒埋一碟！

有苦瓜、草菇、洋葱絲、肉絲、用少少沙茶醬炒成一碟比人。

金沙煙腩卷

今日清雪柜又摷到d廚餘做碟創新嘢嚟玩吓先。。。。

材料

煙腩數片

油條/ 虾膠/雞肶菇

將煙腩卷入以上三樣材料、卷好後用光波爐焗香、炒吓剩下的雞肶菇、兜入蒸熟之咸旦黄碎同煙腩卷、赞酒、熄火、上碟！

絲瓜两吃

噚日朋友送咗自家種的絲瓜比我、今朝用一條做两味。。。。

云耳洋葱絲瓜炒虾球

草菇瓜粒湯

又好味又健康！

海鮮餐

今日買開花蟹比亞媽做凍蟹、顺便做餐海鮮宴比自己。。。。。

金銀蒜粉絲蒸貴妃蚌

蕃茄粉絲珍珠蚌海鮮湯

Yummy。。。。yummy。。。。yummy！

虾膠釀油條

由於今晚食粥、買咗一條油條、用唔晒、所以用一半釀d虾膠落去、之後兜番d沙律醬再上芝麻、係一碟不錯的小食呢！

如果做大碟d而又放生莱絲在碟底就成為一碟餸喇。

咖喱小食

好耐冇整我的皇牌咖喱小食嘞。。。。

今日整嚟比朋友！

材料有

炸魚旦、豬皮、魷魚、干葱、蒜片

咖喱汁

咖喱粉、甜醬、沙爹皇(我之前介紹過的)

芒果蒟蒻果凍

今日朋友介紹le隻果凍粉、話冇咁易出水喎！咁我就試吓啦！做完覺得個質感同以往用開有d唔同、等我出完模就知嘞！我跟足佢個份量同水份、睇吓点？

蟲草花貓耳朵蒸雞

今日浸咗d云耳、红棗、蟲草花、蒸碟雞送碗飯就算咯！

醃雞材料

蚝油、豉油、糖、薑汁、古月粉、生粉

红棗切片、蟲草花、云耳浸過後飛水、用薑片爆過、凍後捞入雞件、蒸熟跟白飯食。

剩低的用蚝油炆咗佢。明天送比人吃啦！

Happy Old Baby

終於大徹大悟。。。。由今天開始唔再染髮、与其自欺欺人、就不如get ready做個。。。Happy Old Baby啦！

嘻嘻！為明年的两蚊票作好準備(唔死的話)。。。

健康版之芋蓉潮式月餅

大致上都夠鬆、但可惜捲得唔靚、相信要多d實習吓！

今次個饀用芋头蒸腍再加入龍舌糖漿、椰汁、香芋精及少許糯米粉再蒸熟。

1:水皮

麵粉135gm
龍舌糖漿
米糠油30gm
水70gm

2:油皮

麵粉180gm
牛油80gm
2至3滴香芋精

以上分别搓好、不要太大力、以免起根、再用水皮包油皮、捲好再切片、轆薄包入餡、再用光波180度焗約8至9分鈡。

花雕雞肶飯

今朝買咗隻雞肶用少許四季盐焗粉搽匀、醃半日、留起今晚臨蒸時才放两湯匙花雕酒醃多十五分鈡。

之後跟白飯同雞汁同吃！

蕃薯燕窩糖水&糕

噚日摷嘢又比我揾到幾盞燕碎、突然大胆試做碗用黄蕃薯做的燕窩糖水比亞媽食、点知FB的朋友幫我改咗個名。。。。天價地價糖水、又有人話貧富同体、我就話小姐与妹仔同体(好似亞媽同我咁囉)、点都好啦、碎燕啫！

之後用剩低的糖水加大莱整埋個糕点比佢今日做下午茶。。。。。一於物盡其用啦。

蕃茄煮荳腐蛋+魚湯

下星期又要返瑪丽驗糖尿、所以咪咁大胆亂食嘢！

今日中午魚湯蛋麵而今晚就食蕃茄煮荳腐加半碗飯跟多碗湯就算。

香茅豬肉串

今日又落狗屎、冇嘢做又搅搅貢。。。。做番碟小食先。。。。

先用油炸、再用光波做一次、睇吓边款好食d！

材料

免治豬肉、虾膠

醃味。。魚露、糖、蛋白、古月粉、塩
加埋
蒜茸(炸香)、干葱(炸香)、香茅碎
向同一方向搅至起膠、包入香茅中、上蛋、生粉、炸熟跟雞醬食

靚婆婆特式麵包

今日le個麵包個饀係獨一無二的、原本做月餅饀、点知太軟好難包、特式的原因係蕃薯紅棗味。。。。夠怪未呢？不過。。。。又幾夾喎！哈哈

我今次的分量係亂咁溝、又用高筋粉、自發粉、吉士粉同酵母、用米糠油同龍舌糖漿、應該健康嘅。

日式三宝魚肉炒飯

今日差d比亞媽又嚇死、沖凉又唔比人幫、又自己搅、終於出事、跣低咗。。。。好彩我刚刚落去上香、否则又被人蒙騙了。好彩後尾check過冇事、但点會次次咁好彩吖！

所以都冇乜心情整嘢、是但摷吓雪柜有乜廚餘。。。。

比我發現有塊龍躉肉、於是用洋葱、蛋、日式三宝(味淋、清酒、鰹魚汁)炒碟飯食就算！

話時話le個日式三宝真係好多用途嫁、除咗炒飯、攞佢醃豬扒、雞扒之類再焗或煎都好好食嫁。