今天的午餐同晚餐

連續两晚比太后搅到冇得瞓、連电視都襟到冇晒畫面、今早去咗找醫生想吓辨法換葯、否则連自己都要食埋思覺失調药呢。

為咗補番吓、今個午餐食清d。。。。蒸魚、炒芥蘭、云耳蟲草花蒸雞同埋雪梨蘋果水。

晚餐就有粉絲虾粉煮旺菜、蒸魚、咸莱蕃茄煮牛骨髓、同鹵水鵝

白汁蟹肉批

噚日整完蟹粉獅子头、剩低咗d蟹肉、一於搓幾隻白汁蟹肉批派街坊啦。。。

今次皮配方如下

低粉170gm
發粉1/4 茶匙
梳打粉1/4茶匙
糖粉15gm
盐1/8茶匙
鲜奶约1至2湯匙
無盐牛油约70至80gm

搓成粉糰放一旁醒约半小時

餡

蟹肉/洋葱碎/甘笋碎/麵粉/古月粉/盐/牛油/鲜奶/雞湯

慢火煮成餡

用光波焗約12至15分鈡。

桃膠糖水

噚日有朋友問起我怎樣煲桃膠、我至醒起還有半包剩低、所以浸少少煲吓糖水啦。

今次的配搭好適合秋天季節、有百合、杞子、元(龍眼)肉、冰糖水。。。。當然浸發後出過水之桃膠啦。

温馨提示。。。浸少少巳發起好多嘞。

柏金遜与認知障礙(腦退化)

以前我曾經講笑地說、两種現今常見的病症、如果有得選擇、我諗我情願選擇前者。。。其實二選其一都痛苦、分别只是自己本身定家人啫。。。。而且據聞前者最終亦可能同時患上後者(未死的話)

最近發現有两位朋友不约而同都患有这两種病、而年纪亦不是太大、只有七十左右、相談之下、前者自己就苦不堪言、因為病的初期、手脚僵硬、提起脚步都有困難、後者當事人自己不知是病人、但身边的人就辛苦、尤其去到中晚期(正如我家太后)、醫生曾講過这是思覺失調的一種、腦入面的(線路)斷晒、所以全完做乜都冇意識、最終退化到連食也不能、唉！都唔知点解近年咁多这两種病、更趨年輕化添。

個人察覺到这两種病的病人有一個共通点、第一、長期處於抑鬱狀態、第二、社交方面欠缺、第三、長期依賴安眠药。。。。久而久之腦部的某些(机件)失靈、而这類病人的習惯亦是往往將心結屈在心底裡！

雖然自己不是醫務人員、但多年对人的觀察亦算有多少心得吧。

相信樂觀的做人態度亦會对这類病有所幫助。

希望未來的醫術能盡快揾出靈药、死亡並不可怕、怕的只是病痛！

(圈片來自網絡)

蟹粉獅子头

平時蟹粉獅子头用大閘蟹、但我今次用咗膏蟹拆肉嚟做蟹粉、因為我喜歡多膏囉。

而肉我就加咗燕麥代替生粉(因為我的營養師話这樣會滑d同健康d)！

BB 肉做的义燒

唔知係豬的什麽部份、肉檔只講。。。叫BB肉！

試吓啦。

做法先用玫瑰露同糖醃10分鈡、再加义燒醬、蚝油、老抽、蒜茸、再用光波焗。

泰式豬頸肉

自從知道豬頸肉會打荷爾蒙針後巳少食咗！

今次見買到本地豬、應該安全卦。

其實唔係怕死、係怕生癌咋。

歲月不饒人

https://youtu.be/6mZNuqWdbQQ

靚声王亦如是。。。。。。唉！青春不再、健康欠佳！

人生就是如此。。。。。無奈！

燒汁焗茄子

又學人做吓東施、因前天同太后食拉麵時叫咗碟日式燒茄子、見幾好食、所以昨晚又學吓囉。

首先將茄子開边、蒸到半腍、舖上大量蒜茸、掃層油再放焗爐焗约十分鈡、之後搽上燒汁焗多五六分钟便成。

眼光光

唉！真撞鬼、全晚好似飲咗豬肉湯、望吓個钟三点幾還毫無睡意、睇怕都要眼光光、望天光吧！

趁没有睡意、突然舊日的回憶一湧而上、由小學、中學、英倫之三年生活、斷斷續續的生活片段、好似節目重温一樣、最深刻的莫如當年廿一歲的生日派对的場面、歷歷在目。

記得年青時常笑言外婆為什麽昨天發生過之事一点記憶也没有、但陳年舊事反而記憶尤新、原來今時今日竟發生在自己身上、正如花開花落、冬去春來、萬物循環不息、人亦一樣、今天的我、正如昨天的你、明天的你、又如今天的我吧！

廢話說完、希望能安然入睡。

(圖片來自網絡)

柱侯醬炆腩肉

厨房一隻薯仔、係佢生芽前用咗佢先。

一於用柱侯醬同腩肉炆咗佢。

材料

腩肉一件

薯仔一個

乾葱少許

柱候醬、老抽、糖、生抽、水

乾葱起鑊、加入巳飛水之腩肉、薯仔、其他、炆至汁收乾便可。

蕃薯麵包

好耐好耐冇做過麵包！

噚日做咗低温24小時麵種、今日手痕痕做幾隻蕃薯餡的餐包仔啦。

我是是但但亂搅一通咋。

野葛莱煲生魚湯

細時成日飲、大咗怕麻烦、因為有根要清洗好多次至去清泥、但聞說对肝好、今天又煲吓啦。

材料

野葛莱一朿(原來都幾貴)
豬骨
生魚(先煎後煲魚湯、隔渣加入)
羅漢果
果皮

煲约三小時加盐便Ok

香辣醬四季豆

昨天趁759有七折、買咗樽香辣醬、今朝試用四季豆來炒！

攞嚟送粥同上海麵一流嫁。

我的童年

眨吓眼、原來巳經過了六十多年、現在珍惜餘下的每一天！

可以的話。。。。時光能夠再轉換多一次就好(只是痴人說夢吧)

以前窮、但開心！

當更的午餐

印姐放假、又係我的當更日！

午餐有。。。。

酸筍蒸大魚头
雪裡紅炒肉絲(加埋蕃茄惹味d)
粉絲虾米煮節瓜
栗子炆雞翼

没有focus的眼神

近日留意到太后的精神狀况、雖然面容飽滿咗、血壓又正常、体重亦回升咗两磅(有35kg)、但神情上双目散漫、眼神没有focus、加上近來晚上食了半粒安眠药都似乎冇乜功効、兜兜轉轉搅到一两点才瞓、思維之亂每况越下、近來改了習慣唔封利是、係不停問住亞媽同老公在那裡同很耐冇見過、毛巾、冲凉皂没有買到之類等等、無論答幾多次都照問、為这改變曾經問過主診醫生、但答覆只是。。。。这類病人的通常情况是如此、唉！

現在唯一可以做的就是不要冷親佢(因冬季又來臨)、防止再跌、全程監察住日常的運作(外佣有冇盡責)就是。其他的只好隨遇而安吧。一切上天自有安排。

(圖片來自網絡)

双檸蜜糖雞

Le個餸係电視學嘅！

即係咸檸檬加鮮檸檬、蜜糖(後下)。

醃料、用薑汁、古月粉、老抽、雞粉、生粉

上海粗炒

前两日係海怡食的上海粗炒就真係把鬼嘞、又冇肉、又冇莱、唉！而家食乜鬼都落晒租金同人工到、真冇計。

我le碟成本唔駛廿皮、巳經係上海姥姥的两碟啦。

卸下風球之晚餐

海馬速來速去、風勢比预期細、因為若以前十月份打風的話、真係勁好多喎。

今晚有生魚煲西洋莱、蕃茄煮蛋、紅燒鯇魚腩

八号風球(海馬)下的午餐

一早巳改掛八号風球、而家天文台學精咗、费事又比人丙(不過現今社會的趨勢、無論点做都一定有人丙)的。。。唉！

冒住冇保險下的危險、一定要去街市嘆杯奶茶、顺便買少少餸啦。。。。今朝有梅莱蒸鲩魚、炒生莱、同咸酸菜炒牛肉、飯後甜品無花果。

芝麻杏仁曲奇酥

烹飪le家嘢、贵又得、平又得、是乎如何配搭啫、今日將Wendy(澳洲個friend)的杏仁餅修修改改變成另一款曲奇！好鬆同好味。。。再謝過。

材料

麵粉150gm
杏仁粉50gm
糖粉60gm
發粉1/8茶匙、梳打粉1/8茶匙、海塩1/8茶匙

以上全部篩過、加入適量杏仁碎、芝麻、最後加入1/2碗莱油、搓成粉糰(要輕手按成、以免起筋)

用光波180度焗12至14分钟即成。

椰汁鴨

進入秋冬、芋头開始靚、今天就炆碟椰汁鴨啦。

材料

米鸭1/4隻斬件

醃料

盐、古月粉、糖、生粉

芋头1/3個切件、用油爆香、侯用

椰汁後下

先用油、蒜片爆過鴨件、落芋头件、水、雞湯煮至芋头開始淋、之後先拎起芋头、继績炆鴨至淋、放回芋头件、炆淋後加入調味同椰汁便成。

打風下的午餐

雖然这個風球只得三号、但感覺上風勢重勁過上次八号風球、所以今天不比太后去中心返學、免生意外。

今早食煎馬友、炒蕃薯葉、同埋梅莱蒸柳梅(黑毛豬)、果然物有所值呢。

本地黑毛豬

經過光波燒肉後、今日行經湾仔又比我發現那檔賣本地豬(協和農場)、原來逢星期一有黑毛豬賣、雖然贵就贵d、但諗吓嘅然活到一把年紀、何必刻薄自己呢。

其實最重要係冇一般豬肉那膻味巳值回票價啦。

今次le排豬排骨我只用日式三宝(味淋、清酒、鰹魚汁)加蜜糖芥末、少少老抽醃二小時、再用光波焗熟、跟蘋果粟米沙律就是嘞。

執輸慘過乜？

人買我又買、行過湾仔大街市、見有本地黑毛豬、咪執輸呀！

買咗豬扒骨、豬排骨、柳梅。。。。。咁就飛咗差不多两條紅衫魚嘞。

蟹粉炒假桂花翅

大榮華的皇牌。。。炒長遠！

我加入蟹粉、變咗亞婆炒假桂花翅

材料有

粉絲……先浸後加入雞粉飛水
银芽白鑊炒乾身
蛋
蟹粉

落油先炒蛋、加入粉絲同银芽、最後加入蟹粉炒至乾身便可。

亞婆蟹粉小籠包

今朝買咗盒蟹粉、順便問豬肉檔攞咗幾塊豬皮嚟煮豬皮凍、豬皮出完水加羗葱同水煲约二小時、之後隔渣留水、凍後放雪柜便成豬皮凍。

免治豬肉加入蟹粉、古月粉、麻油、盐、糖、最後加入豬皮凍(切粒)、便成餡。

放雪柜雪至水份收乾、便可包入皮。

皮的做法

麵粉、塩、水、搓完等醒吓麵糰约半小時便可用。

龍骨煲清補涼湯

以前中醫有句話。。。。太子都飲唔壞嘅湯就是清補涼湯。

之前幫朋友煲湯、今天係最後一次、本想再煲多一次石崇魚、可惜由香港仔去到鴨脷洲、再由鴨脷洲去到灣仔都揾唔到、最後係鵝頸橋個街市、比我揾到一檔刚好劏緊條龍躉、二話不說立刻要咗條骨煲清補涼豬骨、煲完滿室都充滿魚香、d湯重十分膠囗添、由於魚新鮮兼加了陳皮一齊煲、一些腥的感覺都冇呢。

光波燒肉

前日係灣仔無意中揾到檔賣本地豬肉的肉檔！

買咗嚿腩肉學人玩光波燒肉、做出的後果都唔錯添。

醃料好簡單。。。五香粉、盐、玫瑰露。

先將肉飛水、搽上醃料、用豬叉在豬皮上桔窿、放雪柜一晚、不要包住腩肉(目的等抽乾水)。

第二天放光波爐焗至皮脆肉熟、便可斬件上碟。

鮮奶杏汁雪燕

之前講過真燕窩除咗贵、亦对人体無益、自從改用咗雪燕(聞說取自植物之骨膠原)後、不作他選。

昨天無意中買到这隻一級雪燕、全無雜質、浸两條(過夜)、巳可做到五六碗(又可派街坊)。

今次我先煲雪燕(先浸後出水)约半小時、加入冰糖同杏汁(龍皇杏先浸、後蒸、再打汁)、同鮮奶、一滚便熄火、可熱同冷吃。

自家鮫魚肉煮蘿蔔

好耐冇自家打鮫魚肉、今天買咗两條鮫魚、打咗d魚肉！

魚骨拎來滚湯、肉就用來煮白蘿蔔、清清地都唔錯嫁。

雞翼两味

今日用冰鮮雞翼做咗两款餸。。。中段同尖尖做瑞士汁、上段(雞槌)做台式的三杯。。。簡易版。

咖喱三文魚头

摷雪柜又見到宝！

一於咖喱三文魚头

材料

三文魚头。。。先用古月粉、盐、生粉醃
再用油煎香候用

配料

洋葱、蕃茄。。。切絲同角

咖喱粉
椰子粉。。。最後落

做法

洋葱加油、咖喱粉爆香、落蕃茄、調味(塩、糖、雞粉)、水、煮到蕃茄淋身、加入魚头煮到汁杰身、最後加入椰子粉即可上碟。