年初三團拜晚餐

今年又去做幫手、年初三的團拜晚餐。

我做咗上海烤夫、東坡肉、酒粮虾、炸春卷、生炒糯米飯、羅漢齋、甜酸魚、

菲佣煲咗蓮藕湯、咖喱雞、炆豬手、同街買的鵝掌

最後桃膠糖水做甜品

赤囗。。。抖一抖

唉！一过完年太后的新年候群症又發作、噚日整日問包利是、换神紅、團年。。。。(全部都是過年前要做的)、停唔到口、唔答又比佢鬧、今日赤口、我比錢菲佣留低、出去鬆一鬆、一於閃、閃、閃。

(借圖)

金雞年之開年飯

今早最細的妹子一家五囗回來同太后吃開年飯、一如既往的一般莱式。。。。蓮藕湯、南乳齋、白切雞、燒肉、金蚝冬菇發菜、同蘿蔔煮壓年魚。

金雞報喜

靚婆婆在此祝各位網友新春愉快、身壯力健、萬事勝意！

笑囗常開。。。。。。

收爐前之炸物。。素春卷

年初三幫人做春卷、所以要試吓味先、因為素來都唔喜歡用幾多匙做調味、什麽都捞完試少少為準確呢！

今次素春卷的餡係。。。紅蘿蔔、翠肉瓜、冬菇、云耳、馬蹄、粟米仔

加蚝油煮就是。

炆柚皮

今晚又煮太后至愛的餸莱之一。。。魚肉炆柚皮。

做法係先去皮、浸過夜、再出水。

再用魚湯(鲮魚煮湯)炆至入味、加入鯪魚肉便是。

加埋今天有人送的青魚(咸鮮魚)、煎香送飯食

豬皮煮魚肉

今晚的主角係豬皮煮魚肉、太后欽点的、再煲多個北旗黨参牛湯、希望佢肥番幾磅啦。

同佢去覆診見上番70磅都放心d、希望keep住肥落去、只要佢欽点都盡量配合、明天就煮柚皮魚肉(佢的至愛)！

猴年。。。2017的團年飯

昨天晚上(年廿六)、邀請咗太后的兒媳回家同佢團年。

雖然佢食完两秒就忘記、盡咗本位就是啦。

晚餐都算OK、有蒸游水黄花魚、西洋莱湯、燒肉、白切雞、金蚝炆冬菇、鹅掌扒生菜。

虾醬蒸肉眼根

以前肉眼根(豬扒後面塊皮)係下欄嘢、冇人要、而家打边爐成大紅人、所以要買都唔一定有得賣、用佢蒸虾醬、送飯一流！

廣東及上海云吞

心血來潮、做咗两款云吞、饀係西洋莱、梅头、虾仁、滑蛋(以前看我老豆的天津姑娘教我包餃子加入的方法)、我而家次次都加这滑蛋入餡料内、正！

这滑蛋係加油在镬、快手推入、立刻熄火、凍後捞入任何馅料。

駌鴦小煎堆

見重有芝麻同糯米粉剩、又做d小煎堆派吓街坊啦、今年唔蒸糕、冇得步步高升、就嚟個煎堆碌碌、金銀滿屋吧！

材料

椰汁小煎堆
椰汁適量
糯米粉150gm
糖60gm、先用少少水開匀
發粉及食用梳打粉各1gm

紫薯小煎堆

水適量
糯米粉150gm
紫薯粉1湯匙
糖60gm、先用少少水開匀
發粉及食用梳打粉各1gm

以上分别搓成小粒、先轆過水、再轆上芝麻、放滚油边炸边按、便能漲成波波狀。

不過發覺紫薯粉遇滚油後變綠色、唔靚！

籮蔔虾鬆

太后刚做完副臨時假牙托、唔敢煮硬嘢比佢食、唯有煮d腍腍地(或者佢會食)的餸佢試吓、再唔食都冇計、佢要等收工、我都要等開工啦。

紫薯笑口棗

继續紫薯系列！

紫薯煎堆仔

噚日買咗两個夏威夷紫心蕃薯、今早做咗d紫薯餡、先做少少煎堆仔、再試笑口棗。

今次個皮的做法同配方如下。。。。。

糯米粉。。。。110gm
食用蘇打粉1/8茶匙
糖2茶匙
水適量

芝麻適量

做法

將皮搓成粉糰、再分割小粒、包入紫薯餡、再轆過水同芝麻、用中火炸。

七味粉炸九肚魚

本來係用椒盐炸的、揾唔到就用日式的七味粉、我覺得重好味。

其實炸九肚魚、竅門就係要起肉後用廚紙吸乾水、才用盐、古月粉醃吓、捞入乾粉、大火炸至乾身、再灑上七味粉同炸蒜就是。

Dinner Time

經過昨天跌完唔死得之後、今天冇特别煮嘢、只煲咗個利尿湯。。。。就係紅蘿蔔、粟米、豬骨同豬横脷(豬的横隔膜)、加埋准山添。

其他係印姐出品。

父親生忌的礼物

今日老豆送咗層樓比我、(可能佢見我日曰上香就哦佢)、可惜唔住得、係起在我头頂啫。

越忙越出錯、今天老豆生忌、怱怱在家燒咗衣包比佢、又要同太后去睇眼、返到屋企諗住係神枱拎回祭品(雞同叉燒)做午餐。。。。唔知係唔係話我咁快拎走呢。。。。一脚伸鬼咗我落地、头着地、嚇到我以為流蚊飯添、成五分鈡至起到身、唉！头上立刻起咗間幾層高的樓。。。。。不幸中之幸。。。。冇嘔！否則我從此可在这講拜拜嘞。

坐在家中等咗幾個钟、樓就好似縮咗水。。。。今晚食碗粉就算啦。

太后的晚餐

今天同太后去牙醫處印牙模、做個臨時牙托、所以今晚冇了下面的牙、便叫工人煲白粥比佢、再做咗碟荳腐虾餅同炒咗碟麵、可惜都食唔到、唯有記望星期五可以食番飯啦。

我自己就食魚旦煮蘿蔔。

紅棗馬蹄糕

本來今年話過唔蒸糕、但双手好似有蟻咁、手痕痕做底紅棗馬蹄糕玩吓啦、咁啱又比我揾番豬头丙班仔女、一於搅搅震啦。

美利堅的生日晚飯

今晚朋友生日、在湾仔的美利堅請食飯。

講起这外省飯店、同尖沙咀的鹿鳴春都是超過五十年的老店、還記得小時候太后常常帶我去美利堅食>童子雞<(依稀記得當時的店是在灣仔道近現今的英皇中心附近)、回头想想、轉眼間亦過了數十年。

話說回头、現在的出品亦是每况越下、不知是食材差了還是廚房的廚師不同咗、廚藝亦有所改變、始終吃不到兒時的味道。

相信有可能是人的囗味改變了也不足為奇吧！

猴年之感恩篇

猴年即將過去、金雞又再重臨香江、不知下個新年又會如何、新的一年將會是我人生一大考驗、值这將盡的猴年來感恩一吓吧！

首先

感恩、我(過世的)外祖母照顧我的成長

感恩、我(過世的)父親对我養育之恩

感恩、太后過去的六十多年陪伴我

感恩、我的知己好朋友一路对我的扶持

感恩、我的至愛亞宝/Sam Sam多年的陪伴

感恩、一班好(blog/fb朋友)日日聽我吐苦水

最後更感謝一些曾伤害過我的朋友

感恩、有你們的出現、令我成長了！

謝謝！ 

(圖片來自網络)

潤腸煀乳鴿

原理好簡單、其實同釀禾花雀一樣、而家禾花雀禁食、就算有都係假(麻雀代替品)、今次係亞爺廚房到偷師、之前跟足釀完焗飯、所以今天玩吓釀完煀煮、一樣咁好味。

材料:

乳鴿一隻

潤腸一條

料头:

干葱、薑片、葱

搽乳鴿(老抽上色)

做法:

先將乳鴿上色、釀入潤腸、用牙簽拮pat pat以防漏出潤腸、之後用油爆香料头、放入乳鴿煎香表皮、赞酒、加入少量老抽、糖、水、煀乳鴿至熟、凍後斬件、再淋上汁。

盐焗雞肶+虾餅

今日雖然係齋期、但雪柜太多物資要清。。。。唯有。。。。又借齋啦！

嘻嘻。。。酒肉都係穿腸過、只要。。。佛祖心中留！

紫薯曲奇

玩到冇嘢玩、近日個個玩紫薯年糕、我唔玩就玩吓紫薯曲奇、容易d、雖然冇乜驚喜、勝在加埋脆米(cornflakes)、焗完脆卜卜(哈、好似我d骨咁囉)！

個食譜同份量我用番朱古力脆脆曲奇那個做法、只係今次用咗金桶牛油、其他冇變。

釀節瓜之豪華版

亞爺廚房又學到嘢！

今次係豪華版之釀節瓜甫、當然罐头鲍魚係主角啦。。。。。

蕃茄两食

今日因為要去九龍城約人食晏、所以煮定lunch等太后由物理治療返來吃。

除咗煲個油盐爛飯、重用蕃茄煮咗碟咖喱雞同蕃茄雞絲添。

别人的故事。。。種花

很久很久以前、有個年青人很喜歡種花、不停地種植各類的花、但由於佢是個没有耐性的人、基於種種的原因、一時數天不澆水、一時又天天的澆水、終於搞到不停地種花、澆水、死花、再種花、、、、停不了！

最後佢决定不再種花、改種鐵樹、不過性格的問题、佢還是個没有耐性的人。。。。等呀等、等極鐵樹都未開花、終於下定决心、不再學人種花、扔走了。。。。点知。。。。。最后？

從此不再迷戀種花这玩意嘞。

多謝收看完畢！哈哈哈。。。真無聊

(圖片來自網絡)