沙翁

昨天見網友整沙翁、又名>冰花蛋球<、心思思又玩番轉、本來之前都整過、但不甚成功、今日心心不息再玩過、去到接近成功的階段、希望下一次會再靚仔少少啦。

心靈的朋友

近日同網友閒談中、又勾起我对以前寵兒無限的思憶。。。。由於性格方面較為黑白分明、自覺同動物在溝通这方面較為合拍、因為牠們思想比較簡單、只要主人全心全意地去愛牠們、佢地亦全心投入、忠心不二、不似人類般互相計算、表裡不一、有人形容貓狗的心智尤如一位孩童、所以每一個孩童是最快樂的(當然不包括戰火中及貧窮中)。

婆婆一生(記憶中)曾有三貓、四狗、三龟龟陪伴成長至2010(最後的samsam)。。。終於畫上句號！

平民版XO醬

自從日本瑶柱價格標升後、巳經好耐冇整私房XO醬嘞。

今次同>老媽<買咗d青岛紅貝仔、一於做番幾樽>平民版<亞婆超級私房XO醬啦。

材料有。。。。

樱花虾/紅貝仔/虾子/大地魚粉/乾葱/蒜头/指天椒/荳板醬/塩/糖/雞粉

做法。。。。

先浸紅貝仔、蒸完撕閞、用油先炸過樱花虾同红貝仔、拎起、放入乾葱蓉、蒜蓉、指天椒、推煮至冇水份、加入之前之樱花虾同紅貝仔、調味、推煮至冇水份、熄火、候凍、放入巳消毒之玻璃樽、再放入雪柜。

(>一個月内要吃完<)

青边鮑湯

上網買咗d52头青边鮑、原來好正、又溏心、又易腍、真係買得過。

今日材料有准山、恣實、圓肉、果皮、雞肉、瘦肉、青边鮑、好清甜。

亞婆小籠包

今日學人整小籠包、賣相超肉酸、但勝在好味。

等我再改善個賣相、再post食譜出來啦。

孜然、香茅檸檬塩燒雞肶

早前網購咗d調味料、昨日mix and match醃咗隻雞肶、用光波焗咗嚟食！効果唔錯。

午餐

今日太后去半日物理治療、例牌又係老油條陪行、佢越來越變態、明知菲佣唔續約、重要成日>bully<佢、明明吩咐佢跟太后落街等車接去做物理治療、偏偏唔比佢跟住、又大声鬧人、又向太后說三道四、但太后而家对住佢講乜都冇反應。

當然唔係菲佣報寸、因為佢做咗幾年山寨王、連我都唔驚、最钟意做藝人(偽人)、總知佢唔係我面前鬧partner我當唔知、至緊要佢唔比我睇到佢鬧太后、否則天皇都冇面比。。。。。因為之前有人对我講佢曾大声地喝太后。

尤於太后而家食唔多、成日唔夠血、醫生話再唔食嘢打宝血針都冇用、唔希望佢要用胃喉。

唯有餐餐監場。。。。佢所以日日黑我面、我就當佢透明、顶唔顺一齊走都末驚過。。。。但佢点捨得份長期服務金吖、成人博我地炒、我就唔會咁易上佢當、一於鬥拖、唔駛勞气。

芝麻奶湯種餐包

懵成成原來開咗包芝麻盒裝奶煮湯種、是鬼但將錯就錯、估唔到焗完又幾好喎。

其中有一两個中間捲咗d肉鬆沙律醬添。。。。好味！

陳年舊照之炆青边鮑

相机太多照片、搅到行得好慢、所以準備删除多餘冇用的照片、無意中摷到这張。。。唔記得何月何月整過的青边鲍、見又幾好、不妨又重post多一次啦。

自從太后身体差咗之後、好多平時喜歡吃的食物、如今亦無能為力吃了、一來牙齒問题、二來口味全轉了、加上早幾年比工人全職改變晒佢之口味、相信有生之年都唔會再食嘞。。。。不過佢其實亦歎夠、去到今時今日的環境、就算有十億放在她面前都唔識駛啦。。。所以我更立心在未腦退化前盡做自己想做的事、否则後悔莫及呢！

醉雞

噚日做完醉鲍魚、今日買半隻雞消滅埋d醉雞汁。

加入當歸片的醉雞料零舍好味嫁。

清清白白

本來個名唔係咁嫁、点知登咗係fb、網友Stella話这味叫>清清白白<喎！

果然好文采。。。。嘻嘻！

首先買咗d鯪魚膠(經過後期加工、加入虾米茸、果皮茸) 、釀入巳開窿(又用上湯蒸過之白蘿蔔)、之後再蒸熟魚肉、用番d湯打番個玻璃獻淋上面、最後灑入葱花就是。

湯種甜餐包

前一陣係fb見有人捲嚿細細的牛油在麵糰中間做的甜餐包、今日見整日落雨冇嘢做、费事对住两件癈柴(落雨都唔會去關窗)、走返上自己屋企焗麵包啦。。。。否则对住佢地會爆血管。

可能嚿牛油太大、焗完流晒上來、不過都唔錯、下次應該會好d卦。

麻辣扎肉絲

朋友從越南回來送咗當地的扎肉比我、煮粉又食唔晒、諗吓新搅作、做碟冷盤啦。

青瓜絲/扎肉絲
以上用冰水浸過、隔去水份、雪凍、食時加入麻辣汁

麻辣汁

陳醋、糖、蒜茸、豉油、麻辣醬、水、煮過熄火加入芫茜碎、炒芝麻、麻油

心如明鏡

前一陣有朋友曾問我。。。。妳會用边四個字來形容自己呢？

我諗咗一陣、回答。。。。換轉以前的我、我會用>生人勿近<嚟形容自己。。。。因為以前往往比戾气充滿着自己的腦袋。

但經過这十多年的体會、我會用>心如明鏡<le四個字嚟形容自己、雖然不是佛教徒、亦無任何宗教信仰、但覺得这四個字对於自己很受用、因為眼睛會近視、老花、白内障、唯獨個心最似塊鏡、往往能反映出真實的一面。

(圖片來自網絡)

櫻花虾云吞

今次又用咗樱花虾做饀、包咗幾隻云吞、都幾特别、又加埋韭菜、豬肉、蛋、鮮虾。

魚肚冬菇虾仁

見好耐冇炆魚肚、今朝又炆番餐啦。

今次先用蚝油炆腍冬菇、魚肚(先飛水)、再加入虾仁、生莱煮片刻便可上碟。

不一樣的芒果糯米糍

噚日係fb睇到一個芒果糯米糍的食譜、今日又試吓啦。

個食譜係cook1cook的。。。。

食譜如下。。。。

材料

(item1)
糯米粉145gm
粟粉14gm

(item2)
糖45gm
椰漿300ml
全脂奶100ml
莱油1湯匙

做法

首先將item(2)煮滚撞入item(1)、快手搅匀、再蓋住蒸20分钟左右(用快筷插入、試吓熟未。

分割數份用棍轆開、包入芒果肉、之後轆過熟糯米便OK。

芝麻糊

好懷念兒時用石蘑做的芝麻糊、隨着時代的進步、此情不再、想食只有用搅拌机囉！

朋友教路加入少許白芝麻、白鑊炒香加入浸過夜之白米一起搅、之後過濾再加冰糖边煮边搅、去到夠杰身便熄火就是。

炆牛筋

噚日鴨脷洲食店個老細送咗嚿牛筋比我、所以我今早炆咗比太后做lunch.

加埋白蘿蔔、送飯一流！

一年一度的blog聚

今次輪到入鴨脷洲食海鮮、趁未休漁期、嗱嗱臨食咗先。

一行九人、連工包料都係每人170蚊、佢地話抵喎。

櫻花虾魚片蒸荳腐

早两日有少許魚片剩低、見冇乜嘢煮、不如又玩吓櫻花虾啦。

嘿！估唔到又有意外驚喜喎。好好送飯呢。

椰汁栗子露

早两天係Sogo的cafe遇到位太太！佢話自己係栗子癡、所以我比咗個blog名佢、叫佢得閒入嚟參觀吓囉。

今日見重有>桂林錐<賣、所以又做多次栗子露比佢睇吓啦(希望佢有入來參觀)

材料

栗子半磅
去皮煲淋、加水
用搅拌机磨
若想滑d就過濾、否则不用、加入冰糖煮溶糖、食時加入椰汁便OK

椒盐蚝仔

昨天做的椒盐蚝仔、効果麻麻、但亦唔太差、需要找個好一些脆漿。再會試多次呢！

搅搅震紫薯包

N年冇整過包、今日落雨兼無聊、見有两隻紫蕃薯、又玩吓啦、不過疏於練習、焗到鬼五馬六咁！冇所謂啦、又唔係做生意嘅。。。哈哈哈。

蜕變中的婆婆

二月時曾拍過一段片、講述人生的蜕變、當然我就是尾声中的人物、今天才有机會看到、當然截圖留作記念啦！我只截回自己的相片、相信不會被人話偷相卦？

(圖片來自STAKKstyle)

住家飯

辛勞了整天拍嘢、終於回到家、冲完涼、坐定定、食番餐今早臨出門前安排好的一人前。。。。。

就係。。。。。九杞魚片湯、冬菇梅莱蒸肉餅嘞。

哈哈。。。。唔係賣花讚花香呀、我的蒸肉餅非一般外佣姐姐可比嫁、

欺善怕惡

早年因心理困擾要見心理輔導時、治療師曾对我講、由於家庭之影响下、我自我保護能力好強、像穿上戰衣的刺蝟、往往令人有>生人勿近<發覺若遇上發癫的人、只要比佢地更癫、才可以生存。

話雖如此、心態亦抱住人不犯我、我不犯人的去面对每件事。

好多人往往都是欺善怕惡、若然做人太過良善、只會被大老虎吃掉。

同時近年諗通一個道理、常抱着感恩之心、往往原本心中有任何不快同怨恨都可以化解！

但对於一些表裡不一的人、還是抱着防範之心、所以現在只會用心去看人而不是用眼睛去看呢！

(圖片來自網絡)

櫻花虾之。。。生死戀

今日又玩嘢！

停咗幾天之樱花虾毒、排完毒再继續玩吓先。。。

中虾加樱花虾加入(滑蛋)雞蛋加鲜奶同生粉水

快手炒、熄火後加入炸蒜同炸過之樱花虾便OK。

合桃牛油蛋糕

平時好少食牛油蛋糕、今日突然心血來潮、做番三個迷你版先！

材料

低粉112gm、發粉1茶匙
糖100gm
蛋112gm
牛油溶液112gm

合桃碎適量

做法

糖、蛋、先用打蛋机打匀、加入牛油溶液、再篩入巳捞匀之粉類、最後加入合桃碎。

用光波爐180度焗约20分鈡

这份量可做三小迷你size。

塩酥雞

做咗两日台式塩酥雞、今日做番碟加强版。。。。正呀！

欖莱帶子翠肉瓜

清埋雪柜幾粒帶子、所以用潮州欖菜同翠肉瓜炒佢啦。

上門私房莱之肉燥上海麵

今日派街坊派到比鄰居！

好耐冇做過台灣肉燥、所以昨天去九龍城執齊料煮番劑、顺便留起d比以前契女(去咗彩虹橋)個亞媽啦。

紅桑子馬芬

今日約咗同學仔下午茶、順便做幾隻紅桑子馬芬比佢個孫。

我加咗純乳酪、所以應該好味d卦？

白鹵水雞肶+櫻花虾拌麵醬

今朝趕制咗幾樽櫻花拌麵醬比人、見無無聊聊又浸隻白鹵水雞肶再拌入櫻花虾醬啦、人地就葱油雞、我就。。。。。哈哈哈！

何謂知足常樂

昨天又從墳場呆坐時深深体會到的道理、他(她)們不曾活生生地在这世界上行過一遍嗎？

年青時、以為容貌主宰一切、後來慢慢覺得係金錢、最後發覺。。。。。最快樂莫如知足！

人的一生、匆匆而過、有人以為美貌是無價、但可否想到年華老去、面容不復(就算勉強而為亦由人工打造)、保留到亦只是。。。。有句話>自古美人如名將、不許人間到白头<

講到金錢、眼看坊間及身边的親朋戚友、他(她)們可曾快樂？就算曾經、一旦老去或痴呆時、亦難於享用、耗盡一生的尋尋找找、到头來亦只是夢一場！

無可否認、金錢是萬惡、但没有了它、亦是萬萬不能、不過知足常樂、但永無止境地追追逐逐、到头來都只是繁華夢醒而矣！

共勉之！

(圖片來自網絡)

生死相隨

聽到個名係唔係好淒美呢？我至愛搅鬼搅馬嘅。。。。其實係游水赤米虾+咗我整的櫻花虾拌麵醬炒冷麵。。。。得閒玩玩嘢、唔駛咁快變痴呆呀。

鬼咩！明明约咗人四月二号係墳場見、我竟然今日係墳場等、再唔用吓個腦、就真係快趣同太后齊齊相隨咯。。。。。

櫻花虾拌麵醬

無無聊聊又發明吓先。。。。。。。。今舖係樱花虾拌麵醬。。。。為防失手做住一樽自己歎吓先。

材料硬係主角樱花虾、其他。。。。。蒜茸、干葱、指天椒、豆板醬、大地魚粉、虾子、油。。。。。

新版芽莱鬆

自上次廚娘之作後、沒有煮芽莱鬆一段日子、今日又玩吓新版先。。。。當然係加入近期我日日煮之櫻花虾啦。

除咗傳統之配料(大荳芽、冬菇、肉碎、薑米、九菜、葱花)、加入櫻花虾、最後上碟再灑炸香之樱花虾。。。。絕配呢！