譚家莱之補祝生日

今個月係潤六月、所以太后又多個生日、加上菲佣又離開在即(下個月完约)、所以帶佢地一齊試吓近日新開張的>譚家莱<
我地試咗。。。。

燒腩仔
燉湯
走地雞
炒藕片
焗魚腸
豉油皇炒麵

大致上都Ok、除咗焗魚腸太乾、燒腩仔(用新鮮豬最正)、價錢都合理。

素菜荳腐餃

原來比想像中容易、雖然今次個賣相唔太靚、但我都攞到個竅門、應該下次會靓仔d嫁。

餡方面我今次用咗翠肉瓜、紅蘿蔔、冬菇、蘑菇、栗米仔

酥皮奶皇月餅之第一波2017

今年因為有潤月、所以中秋係國慶之後(10月份)、但由於这两年冇乜心情做月餅、而且>Coup<的酥皮月餅頗煩複、故此今年特别提早實習吓、看看可否簡化吓d材料及步驟啦。

雖然賣相不靚、但總算皮薄餡都OK！

收住貨先啦。。。。。

葡國雞

今朝做咗幾隻亞婆瑞士雞翼比朋友個孫、剩低d雞搥、顺便用黄薑粉、椰汁、同花奶、牛油煮埋個葡國雞。

本來諗住跟意粉做午餐的、但後來約了人食晏、所以又pack埋比朋友囉。

梅子蒸鱔

我平時好喜歡食鱔、什麽做法都好like、炆、炸、炒、蒸都唔放過、但越食越貴、拍得住游水魚！

今朝買咗一截、成百幾蚊、得我同太后食、两個工人唔吼、所以我分两餐、一份用荷葉包住蒸、另一份用我自搅的配方(梅子、茄汁、醋、蒜茸、同糖、老抽)去蒸、le個配方不論蒸蟹、排骨都一流、但個汁一定要爆過至惹味嫁。

荷葉蒸滑雞

昨天晚上同老正的部份同學(我地有幾位成立咗個吃喝老友群组)去油麻地食河鮮、点知今次好失望、荷葉蒸雞簡直蒸到不知所謂、半隻雞夠胆死收165、重点係衰個過冰鮮雞的那種千年冰箱雞、我把乞兒身、皇帝囗、又怎能騙得到呢？

估吓边碟係街、边碟係我蒸的呢？

太后出巡日之泰菜午餐

昨天的天气唔穩定、所以冇去覆診、只係同佢拎药、見今日陽光普照、嗱嗱臨同佢外出去扮靚同食lunch.

今日試咗間係佢扮靚的salon附近、新開的泰國食堂、食物都唔錯、工作人員好細心、值得一讚。

蚝士鬆

係我的至愛之一、自細喜歡蚝士、粥、同炆都喜歡、今次用青豆角、馬蹄、紅蘿蔔、同蚝士炒成鬆、最好用生莱、海鮮醬包住食、好味！

八号風球下之午餐

順便清一清雪柜、有南乳齋、咸旦王虾球、蟲草花蒸雞、咸旦四季豆！

全部都係雪柜摷出來的。

双層·芝士蛋糕

自問冇天份做蛋糕、為一嘗心願、失敗咗幾次都盡力去完成個心儀很久的双層芝士蛋糕。

最低的一層清蛋糕(自己搅唔掂要外購)
第一層用cream cheese加蛋、奶油、粉焗的
第二層用意大利芝士、蛋王、奶油、加魚膠片set的、最後贴上用磨碎之蛋糕碎就是。

雖然外表不甚美觀、但口感有七成似、亦颇滿意。

不過相信還有進步之空間的！

節瓜盅

平時多數食冬瓜盅、但人少食就好難搅、所以今天做两個節瓜盅比自己同太后、每人一個。

首先挖出瓜肉、汞水、再放入巳飛水之雞肉、冬菇、瑤柱、上湯、蒸至腍身、食前放埋虾仁便可上枱

>要愛<把握健在時

近年唔知係人老咗、定死得人多、好大的感觸、無論親人、寵物、父母、尤其是父母、寵物(非相提並論)、点解？？

因為年邁父母餘下相聚的日子唔多
寵物只得十多年壽命

对於子女、另一半嚟講、還有漫漫長路(除非突發性病或意外)、以上两者始終係排头位(是個人係这幾年的睇會、可能有人會認為我没有另一半或子女、所以这樣講、不過我相信每個選擇都有他們的想法)。。。。。我只相信因果、今天所做的。。。人在做、天在看、有時可問吓自己個心。。。。最不會騙人的相信是自己個心吧！

哈哈。。。。。癈話又噏完、多謝收看！

(圖片來自網絡)

亞婆搅搅震系列之花甲芽莱鬆

平時炒芽莱鬆一般不外乎大豆芽、豬肉、冬菇、最多加埋韭莱、但今次做碟另類芽莱鬆、就係。。。。登登登登。。。。。

花甲、大豆芽、韭莱、红蘿蔔、蒜茸、葱粒。。。。。好鮮味！

調味方面灑入少許魚露添。。。。好正

靚婆婆左宗棠雞

早前电視報導一種台湾莱係美國颇受歡迎、但做法很多、等我又學吓煮番碟先！

我的配方如下。。。。

雞肶起肉一隻

料头

紅椒、黄椒、葱段、蒜片

調味汁

糖、陳醋、老抽、白醋、塩、麻油(後下)

雞用塩、古月粉、糖、生粉醃過走油

用油爆香料头、回镬雞肉、調味汁、煮至收汁、熄火、灑入麻油便可上碟。

米芝蓮午餐

今天有幸地有好友請吃一顿米芝蓮午餐、地点係網友車媽媽曾經介紹過之〉大公館〈

我地三人order咗數碟特式点心、同一碟炒牛河、点心颇有心思、亦不錯、但可惜炒牛河就好失敗嘞！

但午餐期間、反而有則趣闻、对面枱有位(大约我年纪)的父親不停好勞气地責駡佢两個仔(相信佢一定好㷫)、否则男人佬狗好少在大庭廣衆下咁鬧法、内容大概两媳婦關係似仇人、不停换工人(勁過我)、他們怎樣对父親不敬、連生日都冇理(似我家呢)、(看來父親是捱出來的富豪、两個仔係含金所匙出世的)、我心諗这樣的兒子又是誰教出來呢？

唉！相信又是一本>家家難唸的經<吧。

太后的生日晚餐

雖然太后生日对佢來講巳經係一個陌生的名字、所做的只是盡点心思而已啫、有朝不在、就算日日鮑参翅肚去墳前都冇意思啦。

晚餐有。。。。

蒸海火点
釀糯米雞翼
南乳齋
草菇瑶柱扒豆腐*(忘記影相)*
燒鵝(買)
粟米紅蘿蔔煲田雞豬骨

生日蛋糕(双重芝士蛋糕)

杏仁脆片

我le個配方好薄、係我的餅師契细佬給我的、好薄同好脆、但可惜很快就腍、要想吓方法先！

碟头飯

今日太后要番全日物理治療、费事麻烦、只煮咗碗牛筋湯河叫工人拎去、自己就煮碟苦瓜肉片碟头飯同菲佣食。

梅子炆豬手

由於太后要覆診兼扮靚、一早外出、是但炆咗碟梅子豬手做晚餐。

材料

豬手一隻斬件飛水候用

調味

酸梅四粒
冰糖一至两小粒
白醋、老抽、茄汁
水

用蒜头起镬、爆香豬手、赞酒、加入調味、炆至淋身(但不可太淋、否则太膠囗)、约45分鈡左右。

素食日

嘅然今日係舊曆六月十五、又係太后的生日月、記得就食吓素、一來之前承諾逢初一同十五食素、二來算同佢積福保健康啦。

今日两款素食係。。。。素魚香茄子。。。。同埋。。。。上素冬瓜環

蟹肉蘑菇意粉拌孜然豬扒

為咗清埋d蟹肉蘑菇饀、一於煮碟意粉再煎塊用孜然香辣盐醃過之豬扒、都幾夾吖！

草菇雞絲扒荳腐

今早的午餐、其中一味係草菇雞絲扒荳腐、近日太后的胃口每况越下、磅數日見下滑、為咗佢容易入口同吞嚥、一定要諗吓計、佢以前喜歡食草菇、加入雞絲(目的要迫佢食少少肉)、而荳腐就用板荳腐、(灑入盐花)煎吓两面至微黄及焦焦地、上碟。

草菇先飛水、加蒜片及油先爆草菇、雞絲(预先加調味醃吓)、加水、蚝油、糖、老抽、生粉水埋獻便可扒入豆腐中。

蘑菇蟹肉批

見有蟹肉在雪柜、煮咗d餡再用puff pastry做個皮、都唔錯喎。

再搓多幾個牛油皮添。

My lunch

今朝又比條仆街印佣激到飛起、話多佢两句就擺我細佬上枱(明知我炒佢唔到)、吋過貓王、簡直係水鬼升城隍、正人渣！唔通我話佢成幾個礼拜至iron太后d衫都唔啱咩、否則第日個新菲佣有樣學樣咁点教喎。

而家乜都以太后為先、試吓當我耳边風、我一於唔比佢再煮自己的食物、睇吓又吹唔吹得我脹先！

我今日個lunch係客家免治豬肉豆腐、灼莱、牛仔骨、蒸豆腐同柚子沙律。

蟹肉冬茸羹

昨天買咗片冬瓜、今晚蒸腍後加入雞湯用机打成茸、煮滚後推入蟹肉、熄火前用生粉推煮至杰身、再放入蛋白、熄火。

薑葱蟹

今天買咗花蟹、用咗两隻來煮薑葱蟹、原來都唔錯。

材料

花蟹两隻斬件

上生粉後走油

配料

大量薑片、葱段

調味

蚝油、水、糖、老抽

用油先爆配料、回鑊花蟹、贊酒、落調味、收汁後可上碟。

貴德宫素食私房莱

唔經唔覺幫襯咗馮太成七八年、一路都喜歡她的fusion素食、雖然貴一点、但喜歡夠精緻。

今日原本去探吓佢、点知仔仔係澳洲返咗來渡假、没有遇上添。

莊閒不分

我家之印佣除咗莫視cctv之外、更繞過我向弟婦告御狀話菲佣不肯同她对换在廳睡、因太后長期睡在廳、而我同佢(印佣)就左右睡在太后的两旁監睡(目的為咗方便佢半夜起身煮大餐去慶祝佢之新年派对、因7/2是她的放假日)、簡直視自己為我家之主人、真的是細菌上腦、菲佣自然啋佢都儍、人地都九月怕咗佢唔捞咯。

我对我弟婦講、嘅然你們未能親管工人的運作、家中的大小事、該交由我看管、而且工人是否如實的去服待太后、你們看得清楚嗎？这個只䁱人前人後的双面人、我討厭都極点、干萬不要給我找到証明失職服待太後、否则我一定報警拉佢的。

以下証明是她这两天日煮夜煮的東西、絕冇老屈、試問任何一個僱主能容忍呢？莫講没有將正職(服待太后之職責)行先、反而將自己的事行先、還不是莊閒不分？