臘鸭芋头煲

本來这味餸應該用煲上枱的、奈何而家用晒電磁爐、唯有
「深碗」上桌啦！

Le味是我喜歡其中的一味餸、尤於現時年纪大咗、食方面都要小心、所以每年我只煮一次咁大把、这味餸就算在茶餐廳食分分钟都要七八十蚊、自己整三十蚊左右咋.

这碟餸主要係芋头要靚、臘鸭一定要飛水才煮😘

南乳炒豬頸肉蓮藕片

南乳同蓮藕是我平時甚少食的一種食物、只有在臨近過年時用來炆腩肉比母親食（因这是她的偏愛）、但近幾年由於她牙齒不好巳少煮了、去年完全沒煮過添！

今天突然想起佢（因為她離開了巳經一年了）、所以今天再煮一次以作懷念、但由於我不想食腩肉的關係、所以改用咗「豬頸肉」

週末巡礼之『輕食』

經過早幾天的大魚大肉、加上月尾、今早的午餐就不如『輕食』吓啦😂

昨天係土瓜灣買到半斤芫茜馬蹄云吞、覺得幾清爽同特別、昨晚巳吃了一次、今早又吃埋餘下的幾只、加少許西洋菜伴食就算！

聖誕自助晚餐

昨晚應契细佬的邀請,參加咗佢的家庭同樂日(在酒店的自助晚餐),本來自九月後我完全沒有出過夜街,加上前兩天又有TG放題,好想甩底的,点知佢地巳經比晒錢,只好戰戰驚驚的乘巴士外出一次啦😅

從短短的十多分钟車程中,從車上看到從窩打老道至彌敦道再經過佐敦的車程中,街上全無節日气氛,食店只得兩三枱客人,街上(原本人來人往的路上,寥寥可數),因為在彌敦道另一边(在电視中看見的戰場),2020都相信很難樂觀吧.

所以忽忽吃完我便快速乘「的的」回家了.

不過都多謝契細佬对我之關心,不想我一個人獨自渡過这（本來應該歡樂）的節日！

聖誕午餐

今天花点心思做咗棵「聖誕樹」

做午餐、加多碟蒸魚同椰子烏雞湯、大滿足！

家庭式布拉腸粉

我自細都好喜歡食腸粉、年青時不斷研究去做腸粉同虾餃、甚至買埋（腸粉蒸箱）同虾餃（拍皮刀）、不過往往都係三分钟熱度（这是太后对的評語）、因為要做到又滑又薄的腸粉的確唔易、記得我過咗世的点心師傅曾对我講過：点心这門手藝是難學難精的、妳都係鑽研煮餸罷啦！

今天我（相信）距離成功不遠、但還是差一截、一於再接再勵😄希望在明天

三年前的平安夜回顧

今天我的fb又彈出一張照片、把我遺忘了的記憶勾起出來、內容我的確是忘記了、但從照片中我可想像當晚我和太后曾經有個溫馨的晚餐（當然以佢當日的思維是一定感受不到）、其實自2010開始我選擇寫網誌（可以講是日記）、其中的一個原因是為咗預防有一天我不幸地患上同太后一樣的病時、起碼我還知『我是誰？』

記得年青時我常常笑談先父及外婆的「當年輪」、今天不得不承認、真的😂😂😂

「老了」、这便是人生的寫照、有句話我常常在fb見到的：身边至親的人及至好的朋友越見越少、珍惜每一天就是！🤗🤗🤗

Merry X'mas 2019 to all my friends

雖然2019唔係好開心、但亦在此祝願2020各位有個新的開始、世界和平、今天是冬至、祝各位身体健康🎉🎉🎉

💞💞💞💞💞💞💞💞💞💞💞💞💞💞💞💞💞💞💞

臘肉炆大芥菜头

人的口味自細培養出來、由於家人偏愛重口味的食物、不知不覺便養成習慣、就算而家做了「廚娘」、輕手極都帶有点濃味的感覺！

今早用咗幾片早幾天買到的自家曬臘肉嚟炆大芥菜头、很多人不喜歡食的原因、就因為大芥菜这菜蔬煮完後帶点苦苦地的口感、我就反而喜歡这種感覺、我成日同別人講食物各人口味不同、價值觀亦一樣、所以常爭拗就最無謂囉、好似我同師奶的口味大不同、合時就一齊吃、不合時就各自各煮🤔

（Pre）聖誕午餐

今天有朋友請我去北角的城市花園酒店食（提早慶祝聖誕）午餐、雖然太后走咗、但可能佢在天上都眷顧着我、留番一些好朋友伴陪我渡過每一個（沒有媽媽）的節日、感恩有你們！

下星期的聖誕夜又有免費餐、今個星期天（做冬）又會和師奶打边爐慶祝、所以都不愁寂寞呢！

澄碧邨🤔1979

昨天無意中係YouTube見到这張照片、不禁勾起四十年前的回憶（今年刚好是第四十年）！

回想當年不知是上天的安排定神經錯亂、我竟然意外地在这個所謂世外桃源的Reort工作了一年多、還記得當初本來是在sales office做的（當時的田北辰兩兄弟亦買了其中一間house)城中有名之人氏亦不少、因為當時是和記黃埔策劃的一個渡假project、可惜後來因太多問題（例如管理、交通、餐飲多不勝數的因素）、每况越下、最后由於當時負責餐飲（好像是不知什麼管理上問題、而結業）加上交通十分不便、由最近一張會所的照片中看到好像時光停留在八十年代、荒廢得令人唏嘘不巳！

片片的回憶再次在我的腦海浮現（再過幾年、等我好像母親一樣有咗『腦退化』的話、相信連澄碧这三個字是什麼也不知嘞😭

而家說來一切都成為歷史、就算今天香港所發生的事、他日亦只能在歷史中印証、昨天、今天、明天、永遠都是循環不息🤷

餃子皮做的（素韭菜餅）

早前在網上學咗個簡易的韭菜餅、只要用現成的餃子皮叠起浸油後、用棍轆成大片、再包入预先調好味的餡料（我用韭菜、蛋、粉絲、加入盐、糖、古月粉、麻油）、包成春餅型再用鑊底+面煎香就是！

2019最後的一個『觀音誕』

得朋友之通知今天是今年最後的一個觀音誕、由於去年同今年都沒有心情、故一路都沒有踏足赤柱觀音寺探望我兩個宝貝（因在那裡我買兩個長生位給自己同牠們）、今天見天气好好、所以走了一轉、順便舊地重遊吓啦！

2019的回顧

每年的12月（自寫網誌以來）、我都會分享下一年來的体會及感受、今年寫得早一点（因為每天的變化都很大、点知自己還有沒有明天？）

今年是我人生的轉捩点、心情起伏不巳、由悲伤至心情平復、再由平復至驚惶、再由驚惶去到担心、这幾個月心情就好似坐「過山車」一樣、當然、一天還生存着、日子還是要過的、但願2020的日子不太苦吧！

正如去年的生日時、還高高興興的同母親拍照、又怎料到今年的生日只留下自己呢？

祝願2020有新的開始、香港平安、世界和平

😍

一人的午餐（Dec.11.2019）

今早隔離師又有約（去工展會）、故此又得番自己一個人、簡簡單單食埋昨晚的隔夜餸（冬菇炆排骨）、加多個節瓜淡菜湯（这是母親生前的至愛）、其實一個人煲湯好無謂的（一定飲不完、而我又習慣唔飲隔夜湯）、睇嚟又要益吓清潔姐姐啦！

一人的午餐（Dec.10.2019）

今早隔師奶有約、一個人都可以食得好快樂（相信討厭我嘅人又再次失望嘞、以為我一定捱唔到成年啦）、So sorry 囉、再講多一次、我寫網誌其中一個原因除咗分享美食之外、重要證明我還『健在』、哈哈哈！

今早買到久違了的「魚扣+田雞扣」、用鼓椒炒、加埋鰂魚蘿蔔湯、十分好味亦感恩.

發財豬手

自從去年開始这味餸巳絕跡在我的烹飪生活中、因為現在巳沒有新年的慶祝、今年有了新鄰居、加上契妹在澳洲帶回一樽鮑魚醬回來、今早又試吓炆番碟食吓啦、不過原來發菜在这兩年間的價格升得好犀利、原來已經升到$50/両(重唔知是否假的)、因坊間聽說禁止採摘、所以價錢升到很高呢！

不過这是我深愛的其中一種食物（發菜）、久不久都要煮吓嘅.

Crossover的聖誕咭

今早fb突然彈出五年前的一張自制聖誕咭、所以今早（本來不太快樂的一年）、心思思玩番次crossover的自制聖誕咭、除咗令自己心情冇咁苦澀外、亦懷念吓自己的青春歲月、这便是我苦中作樂的其中一項工程！嘻嘻

週末午餐（Dec.7.2019)

近日好少食正常飯餐、平時一個人会煮吓粉粉麵麵之類、今早同隔離師奶一齊開餐、佢出南瓜同魚、我就出湯（眉豆排骨雞腳湯、曾經是亞媽的至愛）、生菜同韭菜煎蛋.

我做煮、佢就做洗、分工合作、食得開心又放心呢.

是与非

而家同朋友聚會、坐低第一句：不要談政治、否則立刻離枱！

任何事是沒有对与錯、從在太后事件中領悟到、萬事皆由歷史、深層誤會、人往往選擇自己認為对的事去相信、各方都沒有相討的餘地、我自己覺得有記得利益者、亦有絕望的、各持己見、為免「順得哥時失嫂意」的原則下🤔

我不妨引用幾句朋友的金石良言：

咖喱牛肉

自從食番牛肉後、好多時都會者些唔同做法嘅食譜、上星期買咗樽印度咖喱醬、所以今次用洋蔥薯仔嚟煮、簡單同方便、煮完可跟意粉或飯、甚至法包之亦可！

西洋菜餃子（自己搓皮）

点解我喜歡自己搓皮呢？因為可以自己控制搓幾多隻餃子的份量、如果外購的話、最少要買半斤、一個人吃不完、再放雪柜好快又硬晒、同時亦十分嘥嘢！

而且我喜歡搓皮的另一個原因、手指多d運動、又可防止『彈弓手』的發生.

半天的導遊團

昨天隔離師奶的親戚由湛江來探佢、由於佢還要返工、所以我替佢响導一吓、帶了她的亞嫂同家姐過了香港半日遊、我們先在家吃過早飯、之後乘搭渡輪過北角、帶她們行了一會的「北角匯」下面新開的『一田』、之後再乘車往赤柱、讓她們拍拍照片、我就吃吓雪糕（因她們不習慣这生活習慣、所以我只好獨自品嚐啦）、之後再乘車返回鵝頸橋轉車返回土瓜灣買餸（好彩走得快）、因為之後九龍隧道又有防暴、唉！

難得有人陪我食蟹、所以我買了條游水魚同奄仔蟹、一於享樂一番！

虾醬豬頸肉配荳苗（豆杯）

昨天買了半斤「荳杯」、今年還未算太貴、一個人都食唔晒、昨天用了一半煮魚肚肉碎、今天煮了一些虾醬豬頸肉放在面、又一餐了！

慢活的一天

昨天又要過北角做点事、雖然紅隧復活咗、但搭過渡輪之後、竟然愛上了「它」....過往的幾十年、一直衝、衝、衝的生活着、巳經不知何謂：慢活！

自從有了地铁後、一直在不見天日的地洞中溜走着、忽略很多美好的景物、昨天在陽光普照之天气下游走了數小時、原來發覺「香港」還是很美丽、生於斯而長於斯、若能可以的話又怎會離「它」而去呢？

可能現在年紀大咗、又冇咗壓力、真真正正体會到什麼叫做『慢活』吧！

眉豆糕

記得多年前試過蒸眉豆糕、材料&做法同蒸芋头糕差不多、不過今次太心急、眉豆發覺煲得唔夠爛、我意思是唔夠『綿』、有点失色、但味道唔錯、我的做法如下：

粘米粉150gm
粟粉50gm
水600gm
以上開勻

浸發過之眉豆約200gm(先煲腍、最好部份煲至起沙）

配料：臘腸半條切粒（蒸熟）、瑤柱浸軟（2湯匙）、虾米浸過（2湯匙）
調味：塩、糖、古月粉、雞、五香粉各適量
以上加入干葱茸用油爆過、再撞入粉漿搅至杰身、再放入蒸盆蒸约一小時、候凍切片煎食！

蒜茸牛油焗雞

昨晚同今早都食西餐、昨晚吃红炆牛肋條、今早就食蒜茸牛油焗雞跟蕃茄沙律！

做法很簡單、先用牛油蒜茸汁（日式超市有售）加紅甜椒粉先醃約兩小時、再预熱焗爐200度、焗熟後再跟沙律.

渡輪上

做過老襯之後、今次學精咗、今早搭小巴落九龍城碼头乘船去北角、再行去天后辦些事、回程亦行同樣的路、方便咗好多（雖然回程時送船尾、要等半小時才有一班）但至少唔駛坐在巴士呆等同塞車）！

去時叫鄰座的外國人幫我拍了張照片、这是近三十年來的『渡輪』上回憶.

哈哈哈！

平安钟

自從搬了來長者屋之後、眨吓眼又差不多一年、幸好遇上好的鄰居及宿舍的舍監、十分關照、所以住得好快樂.

由於我是長者的原故、每個房間都分發咗一部『平安钟』、今朝換床單時（第一次失誤按到）、唔夠十五分钟立刻有人到達、看看是否出了事、十分專業.所以一旦唔舒服可以按動那個钟、担保唔會做「咸魚」嫁！

今早無意中見到第一次做「銀髮毛豆」的照片、原來巳經係三年前嘅事嚟.那時我是肥一點的.

焗雞翼+滋潤糖水

昨晚冇煮飯食、只食雞翼同糖水、例牌只係食少少、之後全部送晒比人吃、因為我点到即止、唔想加深我的糖尿病、現在我學會管制吓自己的身体、因為一旦病咗就大件事、躺在病床的情況我從母親的個案
体會過之後、記憶難忘.

中國諺語

從小到大我是一個懶惰的人、讀書不成、一事無成、亦在某些人口中（心中）的所謂被寵愛得任性妄為嘅人！我曾經很介意、但經過思巧之下、發覺說話在人口中、只要自己对得住良心的、那些所謂垃圾人的垃圾說話、不屑回應！

從这近十年的網誌生涯下、發覺學了不少「中國諺語」、例如『夫妻本是同林鳥、大難臨頭各自飛』、『久病床前無孝子』、『近朱者赤、近墨者黑』等等之類.

從以上的諺語中体會到人生百態、亦在近期的事件中、看到人的醜態.相信近來我所聽過的粗言、是我暫時（六十多年）的總冠軍、是人變得太憤怒定德育方面的教學早巳蕩然無存？我常常掛在口边的一句話：冰封三呎、非一日之寒、諗深一層、「貪婪」令人腐化.这两個字從古到今都一直存在！唉、但願能如圖中之小鳥（雖然是假的）亦能唱出美好的明天啦.

Nov.23.2019的午&晚餐

唔開心還唔開心、還是要吃飯嘅、今早同師奶開完餐、今晚就炒定個米粉自己一人餐！

今早我煲咗南瓜红蘿蔔蕃茄洋蔥湯、蒸黃花仔、佢就整咗碟南瓜煮鮮准、我今晚就食七彩炒米粉.

美麗的殞落

以前成日聽到的一句話：花無百日紅、現在深深的体會到、（每次对着鏡中的自己、臉上的皺紋、頭上的白髮）.

加上昨天一次的錯誤（搭錯船）、令我走入一個很久很久沒有經過的地區（尖沙咀）、原來有些地方變到我巳不認識了、圖中美麗的區域（在星光行的对面）、美丽的聖誕裝飾但毫不引起我絲毫的喜悦、沿途乘車經過有些地方滿目瘡痍、心中之不快、澈夜難眠、心中不停地諗、自己生長的地方点解會變成咁？

唯一慶幸的、我巳了無牽掛、沒有下一代、無論明天这世界美麗与否、对我嚟講、影响只有自己（反正都時日無多）.

我們未能改變到什麼（當大部人成魔的時候、相信救世主即將重臨）.

蛋白杏仁茶（昨天的）

今天乜都冇做到、搭車搭到傻、一早八点幾出門（搭咗成二個小時半）去到柴灣casting(重要萬人爭個位、凍過水）、返屋企諗住唔搭隧道車啦（又中伏）、搭8号車去灣仔搭船過海、点知又係錯、原來隻船係去尖沙咀、又要再搭小巴返何文田、簡直搭到黐線、对自己講：老襯不作『第二次』

肉碎瑤柱冬菇炆魚肚

自從早幾天師奶去咗旅行、一日兩餐都要自己食、發覺煮一人的份量真係好難、我個人比較執著、若然餐餐出街吃覺得唔好食之外、又嘥錢、但要餐餐食碟头飯、又覺好悶、所以点都要两餸以上、但要煮得細碟就好似回復細時的『煮飯仔』遊戲咁囉！

Nov.20.2019(午餐&晚餐）

在这裡post文章唔同在fb、所以一次過post晒全日的！


 今早落街市買咗红立仔同豬瘦肉滾湯、煎魚、再包云吞做晚餐、我買咗半斤西洋菜都食唔晒、部份滾湯、部份用嚟包云吞！

綠豆栗子露

昨天由朋友口述、做咗这款糖水、但本身未食過原裝的、所以未能比較煮得似唔似囉！

我將會暫時以这裡為基地、因為由今天起會短暫退出facebook（唔知幾時會開番）、原因近月有兩面的朋友不停轉載有關他（她）們應為啱的新聞、而本人又不想附和某一方面、所以只好選擇離開.有緣再見吧！

獨善其身？

近來由於心情欠佳、晚晚失眠、加上四周情況混亂、外出時心驚胆跳、巳致心臟又開始不太妥（有d似當日太后病重時的情況、希望不用再入急症室吧）.

其實現今世界之紛亂局勢、日日都有各種不同的事發生、何人能夠獨善其身呢？移居外地或留守亦如是、世界之大、有不少地方每天都要面对着戰爭、有人曾对我講我是個「悲觀主義者」、可能是我成長的環境所致.平民百姓可以做到的（尤其是我們这些白髮蒼蒼的老人）、只能引用以下的勉世金句：

                         （圖片來自網絡）

香芋椰汁雞&蒸版蘿蔔糕

今天要過香港辦点事、所以一早煮定晚餐回家吃！


这是我近月第一次過香港、如果唔係窮窮地、打死都唔出街.一路行一路驚、年紀大心血少囉.

由於紅隧「瓜咗」、而家只好搭車經東隧、希望快些回到家就好嘞.但塞車塞到飛起呀.