全日一人餐（31.3.2020）

三月份又過完、整整两個多月（自舊歷新年後）、日日忙於抗疫、这世界彷佛定顿了、日子總是要過、每天的早、午、晚還是食的（無論有冇心情而言）！

所以今天做了幾隻特式云吞、同炒咗碟鴛鴦麵、作為加添少少生气吧👇

共食晚餐（30.3.2020）

由於鄰居放假、所以有共食晚餐、我今早買完餸、由中午開始煲定個湯（由於我先煮好魚湯、隔去渣再炒下d蕃茄、洋蔥、红蘿白、同薯仔）、再放入魚湯继續煲、d湯係特別甜同好味嫁！

晚餐除咗梭欏魚湯外、還有炸香嘅冬菜蒸黃花、重有腩肉炒露筍、最後我還焗咗幾隻辣雞翼比自己（因為鄰居不食香口嘢）

雜糧午餐（30.3.2020）

前两天做了餃子同云吞、今天買咗半斤湯河、簡單地食碗雜糧就算（因鄰居早上約了人）、我就買完餸後回家煲咗個抗疫水（魚腥草）、並準備了今晚的蕃茄梭欏魚湯

混醬雞翼尖

近日買到包日本雞翼尖（凍肉舖話）、因為平時買到的是大陸貨、我見又幾平、$20/pack、所以整咗碟混醬雞翼尖攞嚟一路睇电視一路食、十分滋味呢！

我的混醬配方有蚝油、韓式醃肉醬、老抽、糖、少少麻辣汁、盐😋

週日共食餐：3.29.2020

今天用新鮮的南薑來爆香碟雞件、加埋蒜茸煮小棠菜、肉碎煮豆腐、簡簡單單又一餐、可能这两天的天气整日都毛毛雨、又濕又凍、加上好疲倦、搅到心情十分之差呢.

粟米餃子

这两天聽聞食物又開始進入緊張的階段（不知是真定假）、但超市的確多咗人買米糧及生活日用品之類、又再次進入恐懼的時刻、不過要驚都冇得驚、要嚟的始終要嚟吧！

今天自己做了少量的餃子放雪格、以防真的買不到食物時、頂得住兩三餐都好吖（一笑）！

抗疫糖水之杞子銀耳羹

Le輪唔係瞓就食、遲早變肥婆、好彩我在網上學咗一套『拍打』功、我自己加多幾個部位嚟拍打、早晚拍一百下、發覺好似d肌肉實在少少、沒有肌肉流失的風險！

聽說杞子益眼、雪耳補肺、一於整番碗糖水補一補先😅

週末共食午餐&一人晚餐（3.28.2020）

今早整共食午餐時顺便煮定個「咖喱牛肉」比自己今晚食碟头飯、一次過煮定晒、费事洗多幾樣嘢、反正一個人食到時再翻熱就得啦😅

共食午餐（3.27.2020）

一早落何文田街市買餸、今早的午餐：南瓜蒸排骨、紹菜煮粉絲（加少少瑤柱絲）、因為鄰居不吃虾米、自己煮咗少少蛋王醬法豆（佢又係唔食咸旦嘅、所以炒少少比自己）

而家百物都很貴、吓吓都兩三百、不過可能遲d有錢都冇嘢買、因為聽講有些國家都開始唔出口米同雞蛋

桂花椰汁糕

今日無無聊聊清洗完雪柜、見有包桂花在雪柜（都唔知放咗幾耐）、把心一橫、做底細細的桂花椰汁糕（本來平時咁多工序就費鬼事攪）、但而家与其呆在家、就嘥吓時間啦！

我的配方如下：

桂花糖水（先用水浸桂花20分钟、之後隔去桂花、留水約1杯、加入糖（因個人口味）、煮滾後加入10克魚膠粉攪勻候用

椰汁1杯加糖（又係個人口味）、煮至微滾加入10魚膠搅勻候用

之後分層雪至凝固（一層椰汁、凝固後加一層桂花糖水）全部雪至凝固後便甩模切件

共食午餐（3.26.2020）

今天清埋雪柜的食物、為清洗雪柜做定準備🤔

我地的食物係：煎立魚、西芹炒腩片、釀豆卜

當糧食開始短缺時

經過做咗幾十年人之後、當然要學得「適者生存」这個道理（雖然係遲了一点）、世界開始進入大蕭條的道路上、是否需要加以訓練呢？（記得外婆在世曾講過）、打仗時好多人只有樹皮充作食物、當然今時今日應不致这樣（希望）、但總要有心理準備吧！

所以今天由这碟開始吧😭

盐焗雞翼湯烏冬

昨晚很早吃了碗湯冬做晚餐、先將預先醃過之雞翼在焗爐整熟、再煮碗湯嘅烏冬、这個方便餐都幾好食、不過由於太早吃完、所以十点幾便肚餓、搅到最后要吃片麵包至可以瞓囉🤔

現在我通常每天只吃一餐飯、若中午吃過飯、晚上那餐只會吃吓粉麵之類做晚餐！

命運共同體

近日網上學到这句話、個人嘅理解、當一個大時代的來臨、無論富或貧、大家的命運都會串在一起、所要承担的一切都是一樣、人類若能互相扶持、世界定會重新啟動、雙反嚟講、若某一些別有用心的人攪分化同敵我对立、相信这世界很快就玩完！

由於人類趨向自私自利、大自然天災不斷、气候異常、一切一切的結果、都是上天給人類的教訓、这方面在不同的宗教都有一定的認同、正所謂己所不欲、勿施於人、希望人類能及時的醒覺、否則定後悔莫及的😥

共食晚餐（3.23.2020）

今晚的共食晚餐有：西芹炒鮮魷、韓醬爆雞翼尖、同埋蘿蔔煮牛肉👏👏👏

Monday Lunch(3.23.2020)

今早只得两味餸、一味肉、一味素菜、簡單方便、因為食得两匙飯咁大把、無謂嘥嘢啦、加上又係糧尾嘅時候😅😅😅

牛肋條（切粒）燴意粉

又到咗糧尾、係時候要慳住駛、今日用埋雪柜的剩餘物資、做咗碟西式午餐、首先將牛肋條切粒、用調味先醃、最後撲上少少生粉、候用、落油先爆洋蔥、加入牛肋粒再爆吓、加入茄膏（paste)（目的是增加顏色靚d)、之後加入巳切粒之红蘿蔔、蕃茄、黑椒碎、水、炆到牛肋粒淋身、便可拎起、留回少量汁在煎pan、加入巳灼過之意米、兜勻汁液黐住意粉上便可上碟、咁便成為碟美味的意粉啦😋😋😋

共食的週末午餐（3.21.2020）

昨天下午買定餸、今朝煲個湯、又有個快樂嘅两人午餐、三餸一湯、每人都只係五十幾蚊咋、点都抵過出街食啦😅

通常我負責買同煮、佢就洗、互双合作、買料錢就一人一半

今日的菜單係：

南瓜蕃茄豬骨湯
豉汁蒸烏头
蒜茸莧菜
薯仔炆雞翼

滑蛋虾仁

昨夜吃了这碟头飯、因近日從fb上學到雞蛋若分開蛋黃同蛋白的次序落、炒出來的効果會好一些、又長多一樣知識了、所以成日掛在口边的一句話、活到老、學到老、是沒錯的吧！哈哈

自制叉燒

昨天雪柜有嚿急凍之梅头扒、我醃咗两個钟之後、焗了比朋友、因為自己個冰柜細唔放得太多肉🤣

我的醃法如下：先用玫瑰露加糖先醃10分钟（會令肉香d)、之後加入叉燒醬、蚝油、老抽（上色）、按摩肉一陣、預熱焗爐200度、每边焗約20分钟（是乎肉大小）、最後將叉燒連汁放回煲仔煮到汁收杰、拿出後搽上蜜糖（今次我冇用、目的令身d）、凍咗便切厚片😅

銀芽炒牛河

個人比較喜歡用湯河嚟炒粉、因為口感比較滑、半斤粉我都要分两次、今晚用銀芽滑牛炒、明晚就放湯食😋

今次係凍肉舖買到包幾正的滑牛、分了两次嚟食、都唔錯！

蓋棺定論的真締

從小無論在家庭、學校、社會、甚至成長過程中所得結論就是將心比己、以真待人、自然得到相同的回報、但隨着年齡的增長、日益看見世事之變化、同人心之險惡、人往往為了自身利益、守在身边的至親至愛、表裡不一、摸不清、看不透、沒有机心的人注定失敗、但机関算盡、到头來亦將會是一無所有、以前有句話：人定勝天、但個人就認為、一天未死還未知結局如何、所以：「蓋棺」方能作「定論」是沒錯的🤔

可能近年因太多人離世、一時之間有所頓悟、之前曾看到一段警世之言：人死後曾遇見佛陀：佛陀曾說、人死後一無所有、以往的、如鏡花水月、曾擁有的一切、亦隨着死亡而消逝、所以在世的人又何必執着手中所握着的金錢与權力呢？

一人午餐菜飯+香茅豬扒

前兩天食剩之菠菜、唔嘥做埋菜飯、加入自制之咸肉、煮咗個菜飯、再煎片一早醃好的香茅豬扒、咁又一餐美味的午餐啦💞

茄子牛肉：碟头飯

經過昨晚的豐富晚餐、今晚食得簡單d、昨晚食淨2條茄子、所以用少少牛肉、變成美味的一人餐（碟头飯）😋😋😋

菠菜小籠包/菠菜餃子

昨天買到半斤菠菜餃子皮、今天試吓用餃子皮做小籠包（網上教的）、再做一些蒸同煎嘅餃子、半斤皮可以玩三種不同的配搭、又真係唔錯呢、唯一覺得是個皮厚咗少少囉、至於個餡只係菠菜、肉碎、同埋馬蹄👇

咖哩銀芽炒米粉

今晚得番一個人吃飯、見沒有什麼胃口、便炒碟咖哩米粉、材料十分簡單：只有銀芽、火腿、同米粉就是、咖喱的濃味、將味蕾帶到了另一境界、當堂開胃晒、真的唔錯呢！

早餐+午餐（March.15.2020）

今早炒咗少少雞肉、用來夾「荷葉餅」做早餐、我很喜歡甘薯葉（素食超市）的荷葉餅、平時好少過香港那边、因為九龍的店我又不知在那裡、其實那天落北角買都很驚、因為錦屏街刚刚在中招大廈（美輪大廈）的隔離街咋😅

到咗中午鄰居煲咗蕃薯粥、所以炒咗幾碟小食用來送粥就算囉👇

雞蛋肉碎乾炒河

一包乾嘅泰國河粉我分咗三次食、第一次用云吞做湯河、第二次用魚旦做湯河、而最後的第三次我用少少肉碎、一隻雞蛋、加少許洋蔥絲、估唔到做乾河一樣掂、真係食得過呀👇

黑色星期五之共食午餐

今天是俗稱的黑色星期五、所以唔會出街、同時食得豐富少少當「沖喜」🤣🤣🤣

共食午餐的菜單：

五子毛桃煲雞腳豬展
素炒翠肉瓜（鮮冬菇、鮮腐竹）
蒸黃脚立、同肉碎蒸蛋

March.12.2020的共食午餐

近年唔好記性、常常miss咗齋期、整完餸至知今天是觀音誕、算啦、其如我上一篇所講、只要心中向善、不要在乎形式、一切「隨緣吧」！

今日食：清蒸黃花加入炸冬菜同豉熟油、灼菜、同欖菜肉碎四季豆.

農曆二月十九（觀音誕）

曾幾何時、我每年每個觀音誕都會去赤柱的觀音寺參拜同探望两個宝貝、轉眼間原來佢地巳分別離開咗16&10年之久嘞😥

隨着時間之過去同淡忘（可能）、我巳沒有去那裡很久了、加上現在搬至九龍區、路途遙遠、加上疫情高危、我只能在心中懷念、以前有位師傅曾講過、只要心中向善、何需在乎形式、（以前外婆曾对我講過她的一位長輩長期跪在佛前拜佛、但口中就咒罵着下人）、所以这是信佛原意嗎？

我自母親走了之後巳回復吃「牛肉」、自問早巳破戒、一切巳「逆轉」、不復初心、算吧！

（圖片來自網络）

簡單的午餐March.11.2020

今天共食的午餐很簡單、我因為唔食涼瓜的關係、同鄰居炆咗碟涼瓜炆馬友、自己就留起一嚿煎嚟食、另外煮多碟露筍炒肉片、同加多個蕃薯飯就是😋

双色西米糕

今日執柜桶、扔咗好多嘢、因為買買埋埋那些豆呀、蓮子百合之類、太多開咗又唔記得食、又再買、搅到一隻隻小昆蟲、終於扔咗成大袋、見到一包西米還好好的、嗱嗱臨做咗幾件糕点去派街坊囉、今次亂咁整是沒有食譜的🤣🤣🤣

紹菜雞片煎脆麵

今日要清下雪柜、準備明天外出買餸、見有些紹菜、雞胸肉、同蟹籽、於是乎煮個蛋麵、將佢煎成脆麵放在碟上、再將紹菜雞片煮好再推個獻汁淋在麵上、放少許蟹籽做裝飾即可上枱😋

全日餐（March.9.2020)

今日生咗大食積、一共食咗三餐、中午的公仔麵餐唔好食（個公仔麵嘅問題）、所以三点幾再煮碟細細的意粉做下午茶、今晚的晚餐煮碗細細的菜飯、加多幾片五香豬扒伴食、所以今晚瞓到半夜應該唔會肚餓卦？

鳳凰奶糊

記憶中小時候很喜歡食舊式茶餐廳的滾水蛋同鳳凰奶糊、隨着年纪漸長、好的食物多不勝數、加上茶餐廳的末落、巳經唔記得那味道嘞！

因近日長期留在家中、無所事事、於是上網摷下这食物的做法、誤打誤撞又比我試到差不多的味道（雖然顏色唔多似、因為本來是要用湖北蛋、因颜色較黃、但今時今日又点敢採用呢）

雖然看似燉蛋、但食落口感是不同的、咁自覺都算頗成功😅

清湯牛肋條

早幾天做了個西式的牛肋條、今天還有半個白蘿蔔、所以做番個中式的、平時係做開清湯腩嘅😋

做法同清湯腩一樣咁做、牛肋條解凍後用薑葱同酒飛水、之後加入薑片、冰糖、花椒八角等等香料、水、盐、雞粉、煲約20至30分钟、（先拎起香料）、最後加入白蘿蔔继續煲至腍身便灑入葱粒上碟

三八婦女節2020

咁多年來從未慶祝過、今年就賀一賀吓啦（其實我煮的時候係唔知今天是3月8号嫁）、煮完鄰居提起至知、所以今天共食的午餐係：西洋菜生魚湯、灼露筍、蒸黄脚立、薯洋蔥炆雞翼、最後加碗飯後糖水:蓮子百合雪耳杞子😋😋😋

週末共食的午餐

因為今天沒有出街、没有買到餸、只好做煮的那個、鄰居供應食物、我只出了碟韮菜煎蛋、其他的食物靠佢嘞🤣🤣🤣

其實近來胃口真的麻麻、可能同心情欠佳吧！

日子還需要過、欠佳都是要继续的過、加油啦

🤷

紅酒蕃茄炆牛肋條

昨天去完送別大佬、在上環落車之後去咗IFC的City Super買牛肋條同香料、番到屋企炆咗这個西式食譜（原作者係網红cooking norma）！

之後晚餐跟意粉、好食、但覺得比較「漏」、偶然一次還可、但唔會常吃囉.