今天的共食餐（04.30.2020）

今天是佛誕、原本諗住煮碟齋食就算、点知鄰居一早拎定餸出來、所以我又再破戒咯！

今天的共食餐：

蘿蔔炆排骨
鮮露筍百合炒魚球
猴头菇蟲草花煲豬骨湯

日日有食神之「打边爐」

继前晚同韓國鄰居食燒烤餐後、噚晚另一個鄰居放假請我入佢房食打边爐、雖然我巳食飽咗晚餐、不過當「吹吓水」、陪佢食咗一两嚿食物、不是有人請吃東西就是朋友、因為從関懷中睇到「良好」的鄰舍関係、感恩太后留給我最後的礼物、好的鄰舍関係遠比物質還來得珍贵💞

釀茄子

由於昨晚食得太多肉、所以今天中午只釀两條幼身的茄子+少量飯食（個餡料是昨天包燒賣剩低的）、為防過於肥（因平時煎茄子要多油）、今次先將釀好的茄子蒸熟、再放回鑊中煎香表面、贊酒、加少許老抽、糖、兜勻便可上碟、這樣做法會健康好多

Home made 燒烤晚餐

 昨晚原本打算食湯飯、点知臨尾被鄰居（韓國人）邀請同佢一起食晚餐、因為佢準備了大盆牛肉同雜菇、加埋韓式的醬汁、都幾好食、但食完就真的很飽（同為这幾年實在不能吃太多的肉類）

蟹籽燒賣

本來諗住整幾隻正常嘅燒賣食吓嘅😋

点知我附近個街市冇「燒賣皮」賣、要落到去旺角白布街/（黑布街）至有、费事麻煩啦、所以將就吓用餃子皮做一次、當然個皮好厚、但都幾好食😂

午餐+晚餐（28.04.2020）

時間飛逝、好似刚好過完年冇耐、今天又到咗四月尾、午
餐簡單地食埋早幾天醃落的韓式牛仔骨、今晚就準備定個蕃茄豆腐虾丸湯做湯飯😋😋😋

今晚的湯飯

我至愛飲的魚湯

沒有梭欏魚、这個用「青根魚」煲的蕃茄南瓜湯一樣咁美味、通常我比較喜歡用魚代替豬肉嚟煲、有益又好飲、剩低還可以用來煮粉麵之類😋😋😋

人生大舞台

今天我又在此大噏「肺話」、每一個人在他們的一生中扮演着不同的角式、有好人、有壞人、有小人、亦有偉人、孩童、年青貌美的、失意中年的、孤獨老人的、角式不停地轉換、到了劇終時、最終的歸宿都只有一個......（死亡）！

人、隨着年纪的遞增、有人會看得通、亦有人致死還是停留在虛幻的世界中、有人會講過、經歷令覺醒、亦會令沉溺在夢景中、以前的我處於生活無憂、活在「保護傘」中、往往忽略「傘」外之風雨、還好在「傘破」之前巳頓悟、心理上早作準備、所以亦能立足在「無傘」世界中、但願能有一個好的「劇終」吧😳

突然諗起細時同母親「打戲釘」看罷的粵語殘片完場時打出的兩個字：（劇終）、可曾在你們的記憶中出現過呢？

原來四年前的我是这樣子的🤔

回憶有時都值得懷念吓嘅💞

超級慳皮的一人晚餐

今早食完共食午餐、今晚又得番一支公、所以是是但但食埋剩低的冷飯、加少少午餐肉同小棠菜、炒咗碟美味的菜飯食、加埋早上留低一碗湯、食得都好飽呢🤣🤣🤣

有人問怎樣炒菜飯至炒得靚、其實好簡單、首先將小棠菜切粗粒、用油盐炒至半熟、拎起多餘之水份、將飯炒至乾身後放入煮過之菜粒、快手兜匀便成、最後放入少少「尾油」（目的係睇嚟令身d）

乾鮑仔四神湯

昨天執雪柜、見到重有幾隻之前買落的乾鮑仔、費事雪到晒味（本身都冇乜😂）

所以今早加埋四神料煲埋個湯去啦

再重覆一次、何謂四神湯（材料有：伏神、准山、茨實、同蓮子）、我加埋百合同果皮、當然加幾嚿豬骨啦、（其實这些鮑魚仔没有鮑魚味、只是想消滅佢咋、費事眼冤）🤦

韓式炸雞翼配菜飯

Le輪食韓式食物食得多、今早上網試咗这款韓式炸雞的醃制方法、跟下風炸咗六隻嚟配碗菜飯食吓先！

醃雞翼：
雞翼解凍後吸乾水份、用米酒先醃吓(10分钟)、跟住用鮮奶、黑椒、盐、浸約1/2小時

準備炸粉：生粉+麵粉

汁料回鑊用：

韓國辣椒醬、茄汁、蒜茸、糖、少少老抽（作用係加深個色）、炒香芝麻

做法：雞翼上粉後炸熟、拎起候用

回鑊個汁、滾起後放入雞翼、快手兜勻、灑入芝麻便可上碟😳👇

韓式牛仔骨配讚岐麵

昨天買了包加拿大牛仔骨（都幾貴）、照鄰居（韓國人）的韓式醃肉法去醃牛仔骨（醃過夜）、果然好好味、方法好簡單、只要全部材料（份量隨意）、加入糖同醬油、用搅拌机打成蓉、放雪柜醃過夜、煎時可上少少生粉、煎好可跟意粉、飯、或任何麵條吃、下次我會用这方法醃豬扒同雞扒🤔

簡單的一人午&晚餐

由昨天開始、每天都是一人餐、今早食埋d牛肉、咁啱翠肉瓜剩低少少、所以切成粒粒、用蚝油炒佢、又成一碟平、靚、正嘅碟头飯

今晚的一碗過嘅「蟲草花蒸雞飯」

新配搭之麵醬翠肉瓜片炒素雞

今時今日大部份人都要慳、今早这碟餸十分經濟、翠肉瓜$3、素雞$6、肉（在醃叉燒時抽起少少）
麵醬（之前煮定放雪柜待用）半湯匙、十分方便🤣

Le輪將會暫停共食餐一段日子、因鄰居的濕疹發作、要戒口戒得好清、所以我地各自煮番自己的午餐嘞

今晚的碟头飯

鹵水豬腸炒咸酸菜配潮州粥

以上除咗咸酸菜都是「廚餘」！

因為前日的豬腸食唔晒、加上昨天的白飯又食剩、一來唔嘥嘢、二來又要慳、所以做咗这道「疫情慳家午餐」😂😂😂

一餸两食好創意(今晚的)

自制平價叉燒

而家生活艱難、復工無期、生活上的開支要盡量慳、不過而家好多人都習慣咗食急凍肉、今次實驗吓用急凍巴西梅头扒做碟叉燒🤣🤣🤣

我的配方如下：

巴西梅头扒三塊
先解凍、用淡盐水浸约10分钟（目的去雪味）、之後抹乾水份、加入玫瑰露（酒）同糖先醃半小時、加入蒜茸、叉燒醬、蚝油、老抽、用手按摩後放雪柜雪過夜.

第二天先預熱焗爐220度左右、放入梅头肉焗約（每边）15分钟（是乎肉厚薄）、最後搽上（蜜糖）再焗至焦焦地

煩惱皆因想不通

今天無意中睇到網友（常覺）七年前分享的一幅圖、有所感觸、道理好多人都明白、但能做得到又有幾人？

人的一生中、由嬰孩到老年、不好的經歷又何止千萬件、有人積極去面對、亦有人採取去逃避、我曾經是後者的其中、不過經過無數的變遷、由後者變回前者、當然一切都要個人肯去改變自己的「執着」、同能自我反醒、在此分享「常覺」的圖片

圖片來自網友「常覺」

梅菜蒸肉餅

這是一個由细食到大的其中的一種送飯食物、昨天清理雪柜時發現有包「甜梅菜」、所以立刻做咗一碟嚟送飯食、可惜沒有馬蹄、否則更加美味吧😋

好多時有人不知蒸肉餅的重點、往往蒸到很鞋身、原因只有三点：第一、唔夠水、第二、唔夠粉、第三、搅得唔夠、因當加完調味後的肉餅、一定要搅到起膠才好蒸、而且當放入碟中時、千萬不要用匙壓實、只要用筷子輕輕放入中便可、大火蒸約15分钟就ok.

四神湯

前一陣係中醫食療中睇到这個什麼人都啱飲嘅湯水、加上对失眠好好、於是今早試煲吓：

原本的四神係：蓮子、准山、茨實、伏神+肉
菇素的就用腰果代替肉

但我手多多加埋百合、無花果同果皮、相信應該冇問題卦？

其實煲完感覺上同「清補涼」差不多、加埋伏神想必令人靈神安眠吧、以前有句口头禪：清補涼湯、太子都飲唔壞、就是这道理🤣

敷冰消炎法

人老咗、乜都唔記得、好耐之前睇脚痛、醫生曾講過敷冰可消炎、上星期隻腳眼無端端又紅又腫加埋痛、日日貼止痛膠布都冇用、噚晚突然記得醫生講過、有炎就冷敷、有痛就熱敷、所以立刻在冰格拎出「冷包」、敷了10分钟、今早起床、果然退了2/3的紅腫、相信休息多兩三天就會ok!

真係唔好意思、晨早溜溜放上「肉腳」一隻、希望冇影响各位早餐的心情吧🤦😊

共食午餐（18.04.2020）

今早的胃口還是麻麻、简單的煮咗個蚝油肉碎豆腐、灼菜心、薯仔炆腩肉就是！今晚自己一人餐就用昨晚的魚湯煮碗米粉便是😋😋

今晚的：

魚湯+自家麵包的晚餐

昨天太無聊、腳痛都要整、買咗梭欏魚（今次只買到细條的那種）、加2個蕃茄滚咗個魚湯、再跟两片自己做的麵包（今次做得唔係好成功）、费事嘥嘢、焗咗嚟送魚湯啦😭

炸醬捞拉麵

N年前有個好朋友、知道我好钟意食「何洪記」的炸醬撈麵、每晚都定時給我送上🤔

雖然巳成歷史的回憶、還是感謝佢當年的付出🙏

我今天突然好想食、屋企沒有生麵、只能用拉麵代替！

感覺上我的做法、都有五六成相似、就算而家的「何洪記」巳不復當年的味道了😥

洗腦

近日網上流行一句話：「洗腦」、在朋友圈子内不乏黄与藍之爭、真假消息停不了、在这裡我不是講誰对誰錯、亦不講政治、想講的只是「洗腦」这两個字！

因為從小就生活在一個「洗腦」的家庭中、所以十分明白到这是何等能改變人的思維、幸好我的母親是個沒有机心的人、從不灌輸不良的思維給我（個人認為）、套用現今的社會金句、佢的確是個真真正正的「港豬」、從小受到佢的影响、不知不覺中亦做了其中一份子、对於她的離開我亦驚醒了！

「洗腦」思維有分好与壞、好的固然係正確、但若偏向壞的思維、亦是一件危險的事、同時印証一句諺語：近朱赤、近墨者黑.

「洗腦」是要一段頗長的時間才可形成、它是不知不覺中進入人的思想......所以要改變人的思維是不容易、我記得我曾对某人講過一句話：你有你的相信、我亦有我的相信、不要企圖改變我、各有各的腦袋、思維當然不同、忠於自己的思維、有何不妥？

以下的圖片可能出現過在我的網誌中、不過亦好適合今次內容、所以重post多次.

（圖片來自網络）

印尼豉油炒公仔麵

見今早冇乜胃口、今晚試吓係雪柜摷d廚餘炒碟公仔麵食吓、就算再冇胃口都唔駛嘥嘢啦😥

我的配搭：蛋絲、火腿、紅蘿蔔、同菜粒、加埋印尼的Abc甜豉油、有朋友講公仔麵好難炒、但我又唔覺喎、可能佢出水太耐、所以炒起上來好濕同好腍啦！

今天的共食午餐（16.04.2020）

今天冇乜胃口、煮完都唔想食、可能同昨晚瞓得唔好卦？其實早瞓有時重衰、瞓到十二点幾就醒、瞓吓醒吓、搅到今早好攰😥

今天煮咗：蒸撻沙、云耳煮合掌瓜、南瓜蒸排骨、同埋麵豉紫菜豆腐湯

冬菇滑肉濕炒河

早前浸咗的乾河粉、費事放在冰箱太耐、今晚見有少少柳梅豬肉在雪柜、於是乎浸幾隻冬菇同加少許菜心、一於炒碟河粉、早d食、早d瞓、希望休息夠隻腳會快d好啦

共食餐（4.15.2020）

这輪真係當黑、刚刚隻牙比較好dd、又輪到隻腳眼痛（本來前一輪巳開始、但當時注意力在隻牙到、昨天又感覺痛了很多、現在每天都要貼着膠布及用按摩器針吓穴位）、希望過幾日有好轉啦！

今天的共食餐簡單就算.

簡約一人午餐

假期過後、一切又回復正常（嘻嘻！其實对我我嚟講日日都是假期）

今天得一個人食飯、所以簡單地煮個蛋麵、再加少少虾籽同外購的云吞就是、感恩又一餐🙏🙏🙏

素食篇之冬菇+素雞

昨晚同今朝分別煮咗两碟素菜：
昨晚：蚝油鮮冬菇炆素雞
今早：彩椒炒鮮冬菇素雞

希望由今天開始我會每星期分享三至四味素菜、盡量少吃肉類啦😊

誰能獨善其身？

答案係冇（個人認為）、近來太得閒的原故、思巧咗很多問題、亦從各路的分析中得出來的見解（我雖然老、亦不會盲從附會的）、加上自己個人的理解、未來的日子無論富定貧、有知識定文盲、將會係場大劫、個人的觀点認為、無論是何種宗教、都是人類自招的結果、亦係上天对我們的懲罰、今時今日、人之初、性本善、是否存在呢？

近日身体各方都欠佳、加上近月不停發了一些從未發生過之奇怪夢、尤其是從未發過親人、排住隊的每晚夢過、想必日子近了吧🤔

因疫情之關係巳沒有剪髮成四個月（因平時剪開的師傅在舊居附近）、昨天終於顶唔順走咗落土瓜灣找到一個後生仔師傅剪了髮（雖然不太似以前的造型、但都勉強合格啦）😂

紫薯麵包

日日踎在家、遲早生菇菇、今日終於忍唔住整咗幾隻紫薯麵包做下午茶、但我沒有特別的份量、全部搓埋一嚿粉糰、發酵至兩倍大、做型後搽上蛋漿、再用230度上下火焗約15分钟就是👇

海南雞飯套餐

今天已經係假期的第三天、亦係食咗抗生素的第三天、如果假期完畢再沒有好轉的話、可能真係要冒險去見牙醫咯😥

見好耐冇整这『偽』海南雞飯、鄰居話好想試吓喎🤣🤣🤣

復活節的第二天（共食餐）

由於牙痛、今早我只食芫茜皮蛋魚片湯+白飯、其他的是鄰居嘅、幫佢整咗蒜茸排骨蒸茄子、灼鮮露筍😅

紫菜牛肉豆腐羹

由於牙痛還未好番、今晚用即食紫菜(之前買咗即食紫菜做零食、剩低咗唔想嘥）嚟做咗碗牛肉豆腐羹送飯食、今天開始要連續食五天抗生素同消炎药、睇吓會唔會好d啦🤔

芫茜皮蛋滚魚片湯

為咗隻牙、今天又滾咗個下火湯、就是芫茜皮蛋魚片（本來是用鯇魚片、但我怕骨、所以改用咗龍躉片）😳

有些人會加入茶瓜添、但我不喜歡茶瓜的怪怪味、故此沒有加到、而且这湯一定要連埋芫茜头（平時我一定切去）、才會下火喎！

皮蛋咸排骨粥

牙痛慘過大病、撞啱疫情嘅非常時刻、又点敢去睇牙醫呢？

唯有暫時食住止痛药同煲d下火嘅湯水同粥止住先、可惜粥又唔可以食太多、因為「糖尿」會升糖快、可能明天滾吓皮蛋芫茜魚片湯啦！

葱油手撕雞

由於而家買乜都貴、今次只買咗两隻冰鮮雞肶做这碟餸、只要做足步驟、都會好好味的！

我的做法：首先將冰鮮雞肶浸淡盐水、再沖去血水、再用薑汁、盐、搽過雞肶、放薑葱在面隔水蒸20分钟、熄火後焗多5至6分钟、拎出候凍再撕出雞肉、薑、葱切碎、加入盐、雞粉（不食可免）再淋上滾油即成葱油、食時放在手撕雞面便是😋

日式叉燒拉麵

昨天買餸時買咗嚿不太大的豬腩肉、學人整日式叉燒、再配一隻源心蛋、又試下有幾成似先🤔

雖然只係第一次試做、都勉勉強強收货嘅、賣相是難看咗少少、但都算ok、因為街外吃一碗点都要七十幾蚊、但雖然腩肉成七十多蚊（但做得很多碗呢）、不過、食完之後發覺成碗嘅最敗筆的地方：竟然係個「拉麵」😂😂😂

週一共食午餐（四月六日）

由於今天宿舍洗水箱、所以一準備定午餐、鄰居放假、落了街市買餸、待她回來便可開餐！

今早食：椰菜煮粉絲、腐皮魚卷、麻婆豆腐（自己）、蚝油豆腐煮肉碎（鄰居的、因佢不吃辣）

槽肥的日子幾時完

唉、現在每天的日子就是食、瞓、再食、再瞓、重覆重覆、不經不覺两個多月、真不知要多少天才完結？

幸好最近從網上學識咗「拍打功」、早晚各做一次（拍打身体每個部位各10吓）（自己訂的）才不致肌肉流失、希望这疫症快些過去、生活才可正常地再運作吧！

今天的共食午餐包括：麵醬蒸烏头、灼韭菜花、薯仔炆爽肉、蕃茄红蘿蔔梭欏魚湯

我的共食午餐（4.4.2020）

今早食完午餐、我立刻拎咗張冷气被同床單落去自助洗衣店到洗、平時我一星期換一次床單都是自己洗的、之後用抽濕机乾衫、但每兩個月我就會洗一次冷气被、由於家中的洗衣机唔夠大、所以我一定要拎出去洗、所以順便拎埋床單一齊洗、其他衣服我就不會啦！

今天食：上湯煮青瓜、炸冬菜蒸黃花、瑞士雞翼、豆腐蒸蛋😋😋😋

五子毛桃湯的共食午餐

昨天鄰居叫我今早煲湯、所以昨天落了街市買豬展、d豬肉超貴、一件细细只的豬展要六十幾蚊、而家除咗煲湯之外、我大多數食急凍肉、魚就食新鮮、咁搅法真係會應驗有些人講可能遲d全球糧食短缺、咁就「大大鑊」嘞😱

今天的餸菜有：
五子毛桃煲紅蘿蔔粟米螺头豬展
葱油雞翼
肉絲炒四季豆