人生無常

刚刚和一位久未联络的朋友通电話，平時佢每逢節日一定會send whatsapp來問候，今天突然心血來潮给佢打個电話閒談。。。点知一通話，原來佢正身處醫院中，消息是「末期肺癌」。。我當堂給这消息嚇到不知如何給反應。。唉！原來這病预先完全沒有病徵，只是在九月份咳出血，至今短短的两個月左右便確認是「末期」。

在这裡我只能叫佢保重，因為實在不知說什麼安慰的話。

其實大家到了这年紀就等如「誰先下車」的時間表。。。。其他真的不知說什麽好了。

😪😪😪

（圖片來自網络

星期日的午餐

今早的午餐食。。。蟲草花蒸龍躉肉，瑤柱煮旺菜，半碗白飯。

蒸魚是我最喜歡的其中一味餸，我可以戒肉，但就戒不到「魚」囉。🤣🤣🤣

玫瑰豉油雞

見好耐冇整過豉油雞嘞、今早見街市有隻$50嘅冰鮮雞、於是買番隻嚟食吓啦！

我用上次做完瑞士雞翼剩低嘅豉油浸熟佢、十分好味😄

龍躉湯米粉

今晚食豪少少、下午落街買咗10両龍躉肉、今晚攞咗幾片加些菠菜煮碗湯米粉食！

明天將餘下的肉蒸云耳蟲草花做晚餐

腩肉炆蘿蔔

昨天做了碟跟網友「雀后」的類似炆蘿蔔，不過我的醬汁調教就是用柱候醬加麵豉醬混合，再加糖，老抽，水。。。十分惹味呢！

韮菜虾仁水晶餃

早幾日係youtube見到这款餃、今日試做吓、個皮用澄麵+薯粉+水開匀搓成皮、份量我斷估、搅咗半日至整到碟嚟試吓、不過不太滿意、可能要試多一兩次才會成功卦？

椰汁斑蘭糕

今天做咗一碟簡易版嘅椰汁斑蘭糕、只用最簡單的材料：

木薯粉200gm

椰汁220gm

水110gm

糖約150gm

斑蘭香精1至2滴

做法：

以上材料開匀後分兩份、一份白色、另一份加入斑蘭香精、再分層蒸約（每層）5分钟、最後那層蒸多5分钟、熄火、凍後才切件！

七彩炒帶子

又到咗月尾，我的抑鬱「冇錢病」又發作，唯有摷吓雪柜找些剩餘物資，做碟餸做晚餐啦。

最后比我找到半個黃椒，少量西蘭花，半條甘笋，幾粒帶子仔，咁又做咗碟七彩繽纷嘅「餸」嘞。

魚香茄子

前两日買到條大茄子，今早煮咗碟「魚香茄子」做午餐。

今次用咗另一方法做，就是先用白醋浸過茄子半小時才煮，这樣我覺得好食d。

咸豬仔包

而家日日踎在家發「吽哣」，諗住整吓麵包啦，点知原來冬天搓麵糰等發酵，要花好多小時呢，下次都係咪搅咯。

做完有成12個迷你size嘅小咸豬仔包，分别送了给鄰居，自己留起三個做早餐。

欖菜肉碎煮翠玉瓜

自從剝完牙之後，開始習慣吓將會面臨牙齒越多越多問题的日子，所以由現在開始食多些腍身嘅食物。

今早再次蒸碗油盐爛飯，再加碟榄菜肉碎煮翠肉瓜。。。。年纪大咗，將會面对更多以前從未發生過之變化。。。这是一個不可避免的逆轉！

蕃茄肉碎燴意粉

这是我昨天的晚餐，本來只是得肉碎同蕃茄，由於太喜歡食海產，所以加入咗少少帶子落去一齊燴。

首先將蒜茸牛肉油醬將肉碎爆香，之後加入去皮後切粒的蕃茄同茄醬煮一陣，再加入巳出水之意粉同雞湯燴片刻，最後加埋巳飛過水之帶子（因帶子不能過火），最后燴至收乾汁液便可上碟。

椰汁紅荳糕

这個食譜之前係Youtube學的(原食譜只是椰汁糕）！

材料：

紅荳（煲腍約100gm)先浸一晚、再蒸約一小時半）

魚膠粉26gm

糖125gm

(以上全部捞匀）

椰汁400gm

鮮奶250gm

水250ml

全部開勻後煮到微滾、過濾、加入紅荳、之後坐冰水至杰身（这樣紅荳不會浸底）

最後放入器皿雪約2小時、便可切件😄

梅菜蒸紅衫仔+油盐爛飯

食咗幾日流質嘢、今日見個伤口好似無乜痛、所以煮咗碗油盐爛飯+蒸兩條红衫仔食（可以飽肚一些）！

而家連红衫仔都唔平、買咗四條分兩餐（都要$60）、唉、生活艱難啦😢

我將梅菜加入薑蒜剁爛加入調味煮過（放入樽内、再放入雪柜備用）、方便隨拎出嚟蒸魚、茄子、豆腐、十分方便！

蘑菇炆雞翼

今次这碟餸不是炆嚟自己食，原因是暫時都要食多幾日流質的食物，但又怕放在雪格的雞翼留得太耐，所以顺便炆咗嚟比鄰居啦。

先將蘑菇切塊飛水，用蒜片爆香，加入用醃料醃過之雞翼，贊酒，加入老抽，糖，蚝油兜匀，加入刚蓋上肉面之水，大中火炆至汁收杰身便可。

一湯兩味

今晚又煮咗個忌廉西蘭花帶湯、諗諗吓可能會肚餓、所以就煮多碟快熟通粉、用一半西蘭花湯燴咗佢、咁又多咗樣食、而且又可以頂囉肚囉😄

南瓜牛肉碎粥

今早继續食流質，因為塊面又腫番，唔知是否發炎。食流質來來去去不是湯就是粥，想落真是減肥的新方法，不過有人講過，人老咗太肥或太瘦对健康都不好呢。

今朝先食南瓜牛肉碎粥，今晚或者又推碗忌亷湯跟麵包食。

南瓜忌廉湯

继今早外賣白粥腸粉做午餐，今晚煮咗碗南瓜忌廉湯配麵包做晚餐。

相信未來的數天我都會盡量食流質嘅食物，直至拆線後才進食有渣的東西嘞。

剝牙後的翌日

經過一晚的休息後，面部是消咗腫，但吞口水還是痛，因為要去到縫針，相信伤口一定唔細（我還未有心理準備去睇吓個伤口）。

今天我還是食吓流質的食物會好一点，一陣去超市買齊料煮個南瓜忌廉湯吧。

釀節瓜

今次的消炎止痛药好似未能發揮到它的功效，下午還是约咗牙醫照吓X-ray，確定實在發生了什麽問题，真係越窮越見鬼啦。

今早巳食咗一次粥，今晚再食多次。

刚刚看完牙醫，原來我搭橋的大牙註得很深，影响到神經線，所以痛到飛起，唯今之計只好即剝咗佢(2隻）再等報價，看看点做(反正都要二至三個之後嘅事)若然唔剝什麽止痛药都没有功效喎（那牙醫話）。。。。唉！

人生七十古來稀

这是以前一句老人家常常套用的話、雖然現今社會發達、科技先進、人的壽命往往能去到八九十歲(甚至過百)、個人認為、無病無痛能自理就無所謂、說得明確一点、通常年紀去到七十歲又点會無病無痛吖、正如我曾經說過『梗有一間係左近』不論貧或富、當身患疾病時、差別只在乎身處富貴的監房定公共的監房吧！

近來流年不順、病痛一件接一件、是有感而發、不過一切都是「命」、只要唔辛苦、若能活到七十之歲數亦心滿意足（明年將是古來稀之年）、且看近日的新聞、幾多人都不能活得過六十呢？

人若能心存「知足」這個原素、相信便不會白白走過这一生💞

（圖片來自網絡）

瑤柱雞絲小米粥

無端端又再牙痛，近日疫情嚴重咗，唔敢睇牙醫，唯有走去药房配住消炎止痛药頂住先，今朝買粥食，今晚就煮瑶柱雞絲小米粥食

百花釀魚肚

自從發现咗有現成的急凍魚肚賣後，我就不再浸發乾身的魚肚了。

今早先做咗粟米魚肚羹，今晚就食「百花釀魚肚」，而明天就蒸「綿花雞」，一於KO晒整包魚肚（因為一旦冰柜拎咗出來，一定要盡快食埋)。

四季豆欖菜炒小帶子

前幾天在超市買咗包迷你小帶子，今早用咗半包炒四季豆，加咗些欖菜嚟炒，特別惹味呢。

蟲草花燉水鴨湯

 自從由中央殺雞鸭後、好耐冇燉過这湯了🤔

昨天行經鵝頸橋街市、見到有間凍肉專門店有售外國入口的野生水鴨賣、一於補一補（聽聞水鸭好滋陰）！

今次除咗水鴨（解凍、飛水及去皮）、加咗蟲草花、准山、百合、蓮子、果皮、圓肉、無花果、豬肉）

燉咗兩小時半、個湯十分清甜😋😋😋

煲仔飯（梅菜冬菇馬蹄肉餅)

原本昨天飲完下午茶都很飽，

唔想煮，但驚半夜肚餓，最终都煮咗少少，加埋灼西蘭花（跟蚝油汁）不過。。。都只係食咗两三匙咁多飯，莱就食晒。

太湖下午茶

刚去完銅鑼湾，约咗契妹去太湖下午茶，而家長者免茶芥，抵食！

食咗好多点心，估吓幾多錢？

「石門」晚飯

今日去完食齋，之後入咗去探契妹(恆安邨)，坐到六点幾再搭馬鐵去石門食晚飯。

我們一行四個亞婆，聚首一堂，天南地北，由細講到老，快快樂樂，現在盡量見得一次得一次。

當呼吸一旦停下來

世上任何東西都不再屬於你（妳）的！

包括錢財、大屋、親人、愛你（妳）的人、你（妳）愛的人😅

所以...........及時行樂、想做就去做、想食就要食（當然能力許可下）......

以前我買到的新衣、新鞋、每每都留到都不知何年何月（甚至忘記了）@@當搬屋時才發覺@@

現在穿的、食的、都會第一時間去做、今天我就第一時間再補吓：骨膠原😋😋😋

花膠蓮子燉鮮奶

今次我試吓用这些鸭泡膠嚟燉吓鲜奶，我亦加了少許白蓮子一齊燉，飲完都覺得個口有少少「立次次」咁。

鸭泡膠（花膠仔之類）&青島貝炆冬菇

昨日去順豐收網購的鸭泡膠同青岛貝、今朝急不及待炆咗碟冬菇試吓🤤

後果良好、而家年紀大、不適宜食大件厚身的花膠（一來贵、二來難消化）、这類薄薄地的巳足夠！

做法要先浸水、飛吓熱水、先炆冬菇同青岛貝、最後炆好冬菇後才落鸭泡膠再炆多六至七分钟便可上碟👏👏👏

炒米粉

今早炒咗碟米粉做午餐，用魚片，瘦肉絲，芽菜，蚝油，簡簡單單又一餐。

籠仔虾飯

今早同契妹在「功夫点心」飲茶，其中最喜歡的是这籠仔虾飯。

而家在这間点心專門店飲茶有八折，十分抵呢。

星期日的午餐

今早本來簡單地吃碗臘腸飯就算，但鄰居晏咗起身，於是乎煮多碟魚肚瑤柱炆雞肶肉，同菜心炒肉片。

一齊開餐囉。

欣然接受的心態

近日有社工（因自從參加咗某机構獨居長者服務、定期有社打电话問候之類）來电話閒談中、說出我並沒有一般獨居者長之抑鬱、我笑着的回答：因為我早期巳開始訓練自己有『欣然接受任何改變之心態』不過當然偶然都會有少少抑鬱的、那便是「糧尾抑鬱症」、哈哈、逗得那社工回答話我：妳都很樂觀喎.

講真、若人未能自我開解、任何药物或醫生都不可能幫得到、只能幫到的還是自己吧？这種亞Q精神我很早已培養出來的😊

所以常抱着欣然接受任何環境之改變的心態是很重要、希望記語大家一同「共勉之」！

你能回答出：選擇那種臉孔作為日後的生活寫照嗎？

（圖片來自網络）

粟米魚肚(瑶柱)羹

今早摷柜桶發现咗包巳開封的鱼肚，為防有蟲蟲，嗱嗱臨浸咗佢，一半拎嚟做湯羹，另外一半今晚做棉花雞

罐头红燒鲍魚

以前我好抗拒買現成的罐头而又煮好的罐头鮑魚，由於现時經濟麻麻，加上又年纪大，而難消化，沒有自己炆鮑魚嘞。

不過偶然心思思都想試吓食嘅！

昨日行經一間海味舖，見有平價又炆好嘅罐头鮑魚(＄70/罐，四只，其實心中巳打定輸數，唔方好嘢嚟)。

食前巳用高速煲再燉多半小時，但都唔係十分腍，好彩還少許鮑魚味。

上午拎咗兩只煮麵食，晚上就煮半碗飯跟西蘭花食。希望食完消化無問题啦。

素湯＋粟米香芹餃子

今日的午餐很簡單：昨天一早包定餃子，用豬肉，粟米，香芹(今次是蒸的関係，所以餃子皮是買的)。

而素湯有:腰果，栗子，红蘿蔔，鲜准山，果皮，粟米。

燒肉

平時我好少做燒肉，主要是買唔到靚嘅五花腩，同埋次次個皮都唔脆身。

今次得網友EE教咗我個方法，又做得幾成功喎！

原來用支「豬針」拮個皮時要斜身落，不要直拮入豬皮，而且要用醋搽面，再用五香粉同盐搽匀成嚿肉，放雪柜雪一晚。

一口牛洋葱炒麵

為咗食埋一口牛，所以今晚將洋葱切絲，加隻蛋，將一口牛切粗條，炒咗碟麵當晚餐就算。

午餐（Nov.4.2020）

摷埋雪柜的存货、有黃花仔五條、十多粒一口牛！

是是但但又一餐、一口牛先用日式三宝（味淋、鰹魚汁、清酒）先醃、再串上洋葱同一口牛、掃上糖漿、放入焗爐焗熟就是,👇

覆診後的晚餐

終於害怕的日子到了，今日回醫院照膀胱鏡，等呀等。。。。。由一点等到三点才輪到我，唔去都唔知，原來真係好多人照膀胱(不分男女)今日大大話話成20人。

照就唔駛五分钟，不過照完血壓升到190度(可想而知我的驚恐情度去到幾誇張)

回到家巳五点，怱怱炆咗碟菠菜雞絲米粉，咁啱韓國鄰居又送咗碗湯比我，感謝晒！

龍骨罗宋湯

平時煲開的罗宋湯、不是牛便是豬、今日又玩吓新搅作：就是用龍躉骨嚟煲🤔

估唔到好好飲呢！

其他配料一如以往、西芹、红萝蔔、洋蔥、椰菜、蕃茄、先將配料切粒、用茄膏（tomato paste)爆過、加入飛過水同爆過之龍躉骨、大火煲约一小時后ok👏👏👏

不一樣的手撕雞

今天試吓用平時煮開海南雞飯的香料，加入塩醃约半小時，再蒸半小時，凍後撕出雞肉，(用灼好的菠菜苗)放在碟底，舖上手撕雞，再淋上巳煮過之汁料便可上菜。

汁料:（薑米，蒜茸，葱花，盐，雞粉，印尼甜豉油，滚油)

共食午餐

好耐冇同鄰居一齊食午餐，因為要幫佢焗叉燒，所以今天又一齊開餐囉。

今日食煎黄花仔，猴头菇煲准山茨實排骨湯，西蘭花炒肉片，焗叉燒，苦瓜炆魚。