紫薯糯米卷

昨天買咗幾隻「越南紫薯」（不過覺得麻麻好食）蒸腍後加入椰汁同糖搓成薯蓉做餡。

之後用一杯椰汁加3 茶匙糖，1/8茶匙盐，一杯糯米粉，開匀後過濾，加入少少生油蒸熟（大约半小時）。凍後用棍轆薄，舖上餡料，捲成長條，再轆上椰絲，雪半小時後拎出來切段。

椰菜紅蘿蔔絲牛肉炒油麵

今早又食雜糧，因為唔想食咁多飯。

材料有:油麵(通常飛吓水可冲走些油)，雞蛋，牛肉切粗條，椰菜同紅蘿蔔切絲。

調味有老抽，蚝油。

沙嗲醬雞肶肉炒「蛋麵」

昨天在商場買咗包很抵食的蛋麵，一包有16個，只是20蚊咋。

噚晚試放湯食，今早就炒嚟食。

糖醋豬手

今日是「元宵」佳節，鄰居過年前買咗隻豬手壓年，叫我幫佢炆咗佢，所以我用糖醋嚟炆，做法同糖醋骨一樣，首先將豬手切大塊，用羗葱酒飛水，之後用老抽捞過，準備大量薑片候用。

落油在煲底，再加入冰糖碎同薑片，炒至焦黄後，加入豬手，豉油，老抽，陳醋，水，炆至水收乾到少量汁液便可上碟。

海鲜腩片煲

早前在YouTube 上睇到这個做法，就是先將五花腩煲腍後切薄片，先放煲底煎香，放入虾球同鮮魷圈(昨天魚販同我劏咗，只好花）(用老抽，蚝油，糖捞過），最后贊酒一圈蓋上蓋五分鈡，加入芫茜葱便可進食。

五香肉卷

上網摷到一個食譜做「五香肉卷」昨天落街市買齊料（肉碎，冬菇，馬蹄，虾仁，五香粉，蛋漿，生料，腐皮）

做完後蒸熟雪一晚，今早切片，用半煎炸的方式做咗一碟，唔錯，但可能虾膠唔夠，沒有预期的「彈牙」，下次會再試多一次。

炒飯

原本的西蘭花苗是今早其中的一碟餸，可能近來的牙齒開始有問题，食起來有点吃力，所以留起今晚用來炒飯。

我除了將西蘭花苗切粒之外，並加入虾仁，魷魚，同雞蛋，所以都幾美味。

每天早上的禱告

我個人沒有特別的信仰，小學讀的是天主教學校，自小家中是「拜神一族」年幼時依稀記得外婆將我契了給「大聖爺」(聽聞我自細就很頑皮）長大後我從未去拜過。

後來母親常去佛堂拜拜，我都只係隨她去（負責拎生果之類等等）

本身認為什麽宗教都是導人向善，若心存「惡念」，什麽神亦不能打救吧!

現在每天臨睡前或早上起牀都會向「天」禱告，就是有生之年能身体健康，平安渡過每一天，希望他日能無痛苦地離開就好了。

和母親的相處就如圖中的玫瑰花一樣，曾經如彩虹一樣，彩虹過後一切歸於平淡，这就是「人生」

(圖片來自網絡）

韓國午餐

今早四人開餐，韓國鄰居煮韓國年糕加餃子，另外加小食，我就煮南乳齋，快樂午餐😘

紅燒划水（红燒鲩魚尾）

我的其中一句「金句」，有斷估，冇辛苦🤣🤣🤣

因為我並未學過这味餸，只係上網左睇睇，右估估，终於完成这個「上海家常餸」

食後的感覺，都有六七成似嘅。

加料魚旦粉

由於屋苑今天洗水缸，没有水煮飯，去商場買了碗魚旦粉，回家後加料:紫菜，炸蒜，生菜。

十分滿意呢!

今晚打算整上海菜之「红燒划水」，不過未學過，又係靠估，睇吓做得似唔似先。

鮑魚雞粥的午餐

過年時收到一罐朋友送的清湯鮑，由於现在年纪大，牙齒不好，所以用咗嚟煲雞粥，加入一碟豉油皇炒油麵，同幾條多春魚（韓國鄰居送的）。

我當然亦礼尚往來，送番碗粥比佢食啦💝

电飯煲焗叉燒

前两天買咗嚿冰鲜嘅梅头肉，我用（玫瑰露＋糖先醃10分钟），之後加入混合醬（叉燒醬，蚝油，老抽，生抽，麻醬，用酒開勻)醃肉過夜，其間互相轉動底面。

用电飯煲焗至跳掣，同汁液收乾，最後加入蜜糖使熄火，凍後便切件上碟。

蒜頭豆豉炒牛丸蜜糖豆彩椒

雪柜還有幾粒牛丸，我切片用來炒埋剩低的蜜糖豆同彩椒。

鄰居比了碗蘋果雪耳湯，我的午餐巳很豐富了。

况且而家年纪大咗，食量十分少，加上現在奉行少食多餐。

用電飯煲的蘋果水

今天試吓用这方法煲蘋果無花果水，因為可以不用睇火兼不用煲太多水。

煲完効果都唔差喎👏👏👏

魚香茄子

雪柜有條茄子，免治豬肉，剁些蒜茸，辣豆板醬，煮咗碟魚香茄子做午餐。

最后臨熄火時加入「陳醋」，这是成碟餸的靈魂。

我的魚香茄子不太油，因為沒有將茄子走油，只是先「白鑊」炒茄子至軟身。

四季盐雞粉焗雞

昨晚過了去另一廚房食飯，一來有伴，二來怕咗自己廚房其中一位鄰居（之前入住時曾經提及佢，一個有妄想症又孤癖的人，本來这两年一路都ok，自從我享食物给其他鄰居後，相对比少咗佢之後，佢處處找我麻烦，唉！不再談及詳细情形嘞）

除咗盐焗雞之外，還有鄰居给予的黄芽白，鄰居就負責蒸飯。

人日的午餐

昨晚另一位鄰居在新界有幅菜地，收成了很多有机菜，比了些A菜，黄芽白同觀達菜比我，我分了部份给鄰居，自己留番少少。

今早煮咗一碟觀達莱同牛仔骨做午餐。

菜遠牛肉煎米粉

雪柜剩低一包牛柳，先煎碟米粉，再用菜遠牛肉炒完舖在米粉面到，一碟美味嘅晚餐即成。

牛丸湯米

昨晚飲完茶還是很飽，只煮了一碗太埔甚出各的(振X牛丸)米粉食就算。

食完覺得沒有特別好食，加上而家肉類每天都價錢高企，相信質地一定比以前差好多。

廿多年前食過「南記」未入舖時的牛丸，真是差得很呢。

新春團拜

今早同親戚在皇室堡的酒樓飲茶同團拜，之後行了一陣，再去鹅頸橋的「友利」買腐乳，分手後搭109回家去。

久違了的维園

今早同親戚團拜，所以搭車過了銅鑼湾的皇室堡飲茶。

由於早咗到達，顺便在维園外圍拍攝了數張照片，这是三年來第一次近距離接觸维園嘞。😀

滑蛋帶子炆米

中午契細佬開車來接我去MegaBox飲茶兼同我拜年，他們三個人加埋我共四個，坐咗張中間有膠板的枱，自從疫情再次「二人限聚令」之後，这是第一次再飲茶咋，都好驚呢。

今晚見重係好飽，只炆咗碟「滑蛋帶子米粉」食就算。

湯米晚餐

昨天晚上簡單地煮咗碗「龍躉魚片湯米」食就算。

新年期間街市沒有太多嘢賣，加上價錢亦貴，一朿生莱都可以賣13蚊，反而龍躉肉沒加價，都一樣10蚊／両，買咗10両可以分三餐食。

西方情人節的甜湯

今早有網友post咗幅「百合花」的照片上fb打趣說情人節收「百合花」我笑着回答佢，老人家冇花收就煮碗甜甜的「蓮子百合」甜湯嚟應吓節吧。

赤口的(午餐)

為免有「口舌」之爭，今日的午餐都係一個人食好嘞。

回想起好多年前曾在「赤口」之日同母親曾發過口角，点知那年衰足成年，所以迷信也好，咁啱也好，可免則免吧。

見雪柜還有剩低的材料，再煮多煲「南乳齋」，加多碟燒味(豉油雞&燒肉）。一樂也😋😋😋

一人边爐窩

今晚本來同鄰居食椰青雞窩，我連窩都買埋，点知佢突然牙痛，唯有摷個一人窩自己食啦。

今日係實惠買咗個三合一嘅窩，可蒸，打边爐，同韓燒，迷你size，刚好两人用，不過而家又要等下次再開封嘞。😅

一人午餐之生炒牛肉飯

今早各鄰居都有節目，我只好食碟生炒牛肉飯做午餐。

由於今晚同隔鄰離師奶食雞窩，所以買咗生菜，那生炒牛肉飯加入生菜絲，特别好味呢。

韭菜餃

下午包咗幾只餃(韭菜，蛋，虾仁）做下午茶。自己搓皮，钟意食幾多搓幾多，方便。

年初一拜年篇

祝各位網友「牛年行大運」，身体健康，萬事勝意，快樂每一天🥰🥰🥰

💕💕💕

團年飯（09.Feb.2021)

今晚係搬了來長者屋的第三個除夕夜、第一年剛搬來幾天便過年、什麼人都不認識、加上母親剛離開、所以只能孤獨地過、第二年又刚開始疫情，鄰居回大陸過年，年初二才回港，没有慶祝，今年刚好鄰居放假，所以一齊食「年夜飯」。

其實自從母親離開後巳沒有特別去過新年，只不過反正每天都要食飯，一齊食就開心点啦。

今天的餸菜十分豐富，有白切湛江雞，青边鮑煲花膠排骨湯，香煎蜜糖金蚝，荷豆炒豬肚絲，煎英䱽魚，海参花膠(青边鮑片）扒生菜。

Homemade海南雞碟头飯

下午過咗去何文田廣場的超市買咗隻冰鮮雞，回家整咗個海南雞飯同鄰居開餐。

後天就是搬了過來的第三個「農曆新年」，時間飛逝。

現在過新年如過日，沒有什麽特别的感覺。

但願疫情早点過去，一切回復正常（相信有点難度吧)🤔

臘腸虾仁炒飯

原本昨天覆完診回家後费事整餸，是但煮咗個臘腸飯食就算。可能煮多咗，所以淨低一碗，今早拎幾隻虾，切粒，加入芫茜葱炒成一碟美味的「午餐」啦。

新年前的一件開心事

昨天是過年前最后一次覆診，本來这次覆診應該是上次(去年）發生八号風球的那一天，但推遲到昨天才有得睇。

本來幾年前的某一次檢查中發現頸部有粒突出之物（原來叫结節，英文叫thyroid nodule），之後轉介了去甲狀腺專科跟進，經過这两三年的覆診，昨天醫生再用儀器照過，覺得暫時沒有病變的情況出現，所以取消了下次的覆診(close file)。

本有五科（講到好似會考咁）😅，暫時剩低四科的病症要继續覆診，都叫做摵甩一科啦。

唉。。世事無常。。暫時開心吓就算吧！

免治肉碎蕃茄芝士焗意粉

昨天晚上唔想食飯，是但煮咗兜意粉，加埋雪柜的免治豬肉，加两隻蕃茄，洋葱，煮咗個汁鋪在意粉面，灑入芝士粉焗咗嚟食就算。

甜豆炒牛柳

自從回復食牛肉之後，不單止豬肉(新鮮）價錢飛升，牛肉更加升到食唔起，不過而家的時勢，偶然一次半次當獎勵吓自己。。

今朝買咗半斤牛柳，(那牛肉檔完全冇人幫襯）分三次，这次當然要食未落雪柜那包啦。😀

花生雞腳蚝士湯

昨天為了清埋冰格入面的雞腳(平時買雞留起的）。

所以用眉豆花生，蚝士，唐排，加隻合掌瓜一齊煲，煲完分享给鄰居們飲，皆大欢喜。

菜飯(小棠莱＋切粒虾餅）

今晚成碟飯都是下欄嘢，冷飯，雪柜剩低的小棠菜，同两塊虾餅(我切粒加埋落菜飯一齊炒）

翠玉瓜炒爽肉

今早去街市買咗條翠玉瓜，炒埋冰箱的爽肉。

醃料都是一般的豉油豆粉糖，先用蒜片炒爽肉，赞洒，兜入翠玉瓜片後，加少許蚝油，水，炒片刻便可上碟。

法國焗春雞

前兩日路經湾仔，見有間凍肉舖新開張，走入去看看有什麽啱食之肉類，無意中發現平時賣開＄58的法國黄皮春雞大特價，＄38巳有一只，所以咪走宝買咗一只嚟歎吓。

今早用蒜茸牛油醬同美極醃到下午，用焗爐每边焗约15分钟

。在焗盆底放入薯仔片及洋葱。

雞煨麵

個人十分喜歡食这個上海麵、但從未學過、我靠想像今天試下做、都覺有六七成似！

主要用一只平既冰鮮雞、煲熟雞、起肉切粗粒、小棠菜又係切成粗粒、之後放回雞煲成雞湯、隔渣、放入鮮奶、讓雞湯變成奶白色、候用😛

之後用水煮開上海麵、放在碗中、將湯放在小煲內再煮滾、放入小棠菜同雞、推入生粉水、最後淋在麵上即成！

云腿冬菇蒸龍躉片

今晚落咗去街市買了

少許龍躉肉回家蒸嚟送飯食。今次用古法蒸，那就是用云腿同冬菇片夾着魚肉蒸熟，再打個獻汁淋在蒸好之魚片上。