改良後之蒸包

今日試吓用網友介绍的「美玫牌」麵粉嚟做咗3個蒸素肉包，目测下的包皮好似比較「白淨」一些，那天在焙烘舖的老板曾对我講点解街外賣的包包咁白，因為那些麵粉是漂白過的，坊間難買到，这牌子巳經是蒸起嚟最白的。

素晚餐

原來用素免治豬肉（新豬肉)加入冬菇嚟釀豆卜，真係唔講冇人知是素食，加多碟蒜茸莧菜，咁又完成一天的素食餐嘞。

2021第一個觀音誕（二月十九）

趁今天記得是觀音誕，所以準備「全日素」。

上午食「南乳齋」及「素炒云耳藕片」，今晚就食「素肉釀荳卜」同「蒜茸莧菜」。

March.30.2021晚餐

今日在瑪丽覆診完入咗鴨脷洲買梭椤魚返屋企煲蕃茄薯仔，見到有海黄脚立，當然唔執輸啦。。。所以今晚除咗这兩餸湯之外，加多碟灼菜同豆角炒雞。

生日点心餐

今天其中一位鄰居生日，我地同佢慶生，而家我們奉行「罗漢請觀音」制度，誰個生日，另外的就夾錢請飲茶.，如此類推，大家都公平。

这間点心專門店唔錯，三個人食咗200蚊，两人夾錢都只係100蚊／位咋。

日有所思。。。

。。。夜有所夢!

自知是一個容易被呃的人，但估唔到連發夢都被同一個人所呃，重要係連继两天都發同一個夢添。

今早起床望吓個鏡，看看鏡中的自己是否生得特別蠢或是個樣太善良？😅

雖然今次記不起全部內容，但依稀記得很少出現在夢中的「先父」竟然出現了。莫非佢怪我從未去拜過他？但他實在住得太高了，簡直天梯直達天庭，我只是在他入伙時去過一次咋。

哈。。。又一個無聊的笑話。

祝各位有個美好的一天。

(圖片來自網络)

共享的午餐

今早韓國鄰居煲三文魚头海鲜湯（三文魚头，鲍魚，蕃茄，薯仔，粟米，栗子，唔知重有乜) 我就炒米粉（雞柳，墨魚條，銀芽，椰菜，红蘿蔔)

大家一齊食，十分開心💓💗💕

素菜包

前两天從YouTube 上學咗这種包，但個餡我自己選擇材料，有冬菇，木耳，粉絲，椰菜，調味有蚝油，五香粉，豉油，糖，盐，小小生粉水)

平時我甚少蒸中式包，因為從未成功過，今次巳算很好，但不知怎樣我每次蒸完包都發覺那些很黄，真是不解。

粟米素免治豬肉(新豬肉)

之前開咗罐粟米忌廉嚟做肉粒飯，只用咗一半，咁啱今日是農曆二月十五，又跟吓風食素。

今早買咗包「新豬肉」用咗一半嚟煮埋個粟米忌廉，一於食碟「白汁素免治粟米意粉」。

唔錯，唔錯。

香煎三文魚跟法式蜜糖芥辣

我以煎很少食「熟嘅三文魚」，因為覺得煎完好「鞋身」，口感唔喜歡，不過昨晚經魚檔介绍下，终於試了一片三文魚扒。。由於我細食，所以只煎咗半片，之後跟食少量白飯及烚椰菜，最後還用法國的蜜糖芥辣蘸嚟食，十分美味，原來刚熟之三文魚肉，有入口即溶的感覺，我諗我會從此愛上它了。

沒有「嗅粉」的菠蘿包

这是我從「甜師奶」的YouTube 視频學回來的，簡單又好食。

以前做過幾次，通常天冷我少做麵包，因為我这心急之人沒耐性等發酵麵糰的時間，今日心情靚，又回暖，故此做幾個嚟分享比鄰居們啦。

做完發覺好似不甚完美，可能太耐沒有練習了。😅

餃子餐

今次買到的餃子皮夠薄，所以蒸起嚟十分晶瑩剔透，颜色美丽。

餡料有粟米，红蘿蔔，馬蹄，少量豬肉，調味方面都是一般的豉油，豆粉，糖，麻油。*若然食得雞粉或許加入少少＊

心得:

我通常將調味捞肉，再搅至起膠才加入雜菜(紅蘿蔔，粟米同馬蹄)而且我捞時不會太重手，包完先蒸一两隻試味，才再調節咸度。

回不了的過去

今天fb又彈出一張舊照，原來亞Sam巳經離開咗十一年了。不過这張照片大约拍攝於2005至2006年之間。佢其實足足陪伴了我17年，感恩全赖有牠的陪伴渡過的那些年。

所以我在觀音寺中買了两個位，一個是亞宝和牠，另一個是自己，希望他日可继續相伴吧。

芫茜魚旦

從fb上睇到「許記」的芫茜魚旦唔錯，刚好昨天路經北角，所以買咗半斤試吓。同時聽聞「許記」的魚皮餃在眾多店舖中名列前茅，故此又做一次白老鼠(我從來是個勇於嘗試的人)。

食後感:

芫茜魚旦芫茜味唔夠(個人感覺)，唔腥，亦彈牙，應該唔多添加劑，同時價錢唔贵，可再試。

魚皮云吞，皮夠薄，不會加入太多肥膏，所以滚完不會有油浮面，肉亦新鲜，唯一不喜歡，沒有加入冬菇，唔夠香。

總结嚟講巳經不俗啦。

素餃子同素春卷

今早過了去北角買「振南麵廠」的餃子皮同春卷皮。

回家後開壇製作，做完分了大部份给鄰居，只留了幾嚿比自己試吓。

这個素餡我是從網上學的，本來是做素包，但我從來做蒸包未成功過，唯有做餃子同春卷啦。

有韮菜，粉絲，蛋。

食魚後的啟示

今天又借题發揮吓自己的心情。。前幾天在朋友圈發現咗張截圖，所以又套用落昨天再食同一種魚的感覺，想落不無道理，人的心路歷程除咗不同階段有不同的心態，無論对人，对事，甚至对食物的要求都會改變，未必是食物的變咗，亦可能自己的「要求」不同了。

哈哈。。。今天又到此為止。。要出街啦😅

（朋友的截圖)

蒸魚晚餐。。。瓜子斑

由於今早應承咗鄰居幫佢煲龍躉骨湯，所以一早落山去拎，点知比我見到以前十分喜歡食的「瓜子斑」，雖然都幾貴，但很多年沒吃了，加上近日太多親朋戚友離開咗，一於豁出去，食咗至講吧。。。。食完覺得而家的「瓜子斑」巳不復當年嘞，除咗滑，沒有太多魚味。。。但我還是將佢煎皮拆骨，因為貴！😂😂😂

糯米雞

今天心血來潮，突然好想食糯米雞(雖然骨有事應該唔好食糯米)，但有時都要令自己開心少少，一次半次吧。

平時做開迷你的，今次做八只唔大唔細，餡料只有瑤柱，冬菇，虾米，同臘腸。

蒸完自己先食一只當晚餐，其餘分咗四只比鄰居，今次做得最成功。。。。好好味。

午餐

今天又要外出，所以怱怱同鄰居一齊開餐。

是日的菜式有:

昨天剩下的菜飯。蕃茄蛋。蒜茸波菜苗，蒸青根魚。

不一樣的早餐

昨天忘記了買麵包，所以今早食吓另類早餐。

就是「蝴蝶餅」夾虾餅同手指魚(fish finger)。

上海豬排菜飯

我今次整菜飯時加入虾米，好好食，就算冇豬扒都可以淨食菜飯。

一般嚟講我整菜飯係先煮白飯，之後用蒜茸炒過切碎之小棠菜，再捞埋就得，这樣菜可以保持青綠，又唔會出水。。如好今日咁加埋虾米，先浸虾米，再加油爆香才捞入飯即成。

纸包骨

久違了的「纸包骨」，都不知多少年没有做過这餸，但個人認為「纸包雞」係好食些，而且亦是細時常常跟母親去「沙田酒家」食的名莱之一。現在往事只能回味吧!

紫薯卷

今日巳經係第二次做嘅「紫薯卷」，但還是捲得不夠靚，我通常比自己三次机會，第好d心情再做最後一次，若然還未滿意的話，我餘生不會再做的。😝😝😝

週末的午餐

昨天食剩的龍躉头，今早同鄰居一齊開餐「KO」埋佢。

另一则题外話，今早在自助乾衣舖等候期間，巡視一吓whatsapp的通訊清單時，竟然發覺有很多名字失踪了，不知是「離開」了還是「離世」了，这两年真的很大變化，彷彿世界停顿在某一個時空。

川芎百芷天麻燉龍躉头

今早落山去乾衫，顺便走咗去買龍躉肉，点知魚檔老板叫我試吓蒸龍躉头，誰知半個头都成三斤幾，我突然諗起这個湯（本來是燉大魚头的)，心諗若用龍躉头嚟燉重正啦。

二話不說，留起幾嚿嚟蒸金銀蒜粉絲，之後全部用咗嚟燉湯。

眼見近日咁多朋友走咗，都係食咗至算吧。😉

「燒賣皇后」的冬菇豬肉燒賣

平時我上fb總留意下坊間的小食，最近發現咗芫茜魚肉燒賣同冬菇豬肉燒賣，我都試過了。

今次來一次總结:「各有千秋」。

因為口感不同難於比較，但一定比超市那些好食，不過現在的心態，試過便算，不能沉迷於其中，畢竟心境不同咗。😅

全日的午晚餐

由於昨晚食得「重手点」今日全日個肚都唔太舒服，若明天還好不了都要睇吓醫生啦。

今早食埋隔夜飯(用肉碎虾醬炒)

今晚就食蕃茄豬扒飯加外購湯

最后都食唔晒。

行山初哥

我有兩位鄰居有行開山的習慣，今早被佢地要求陪上山，由於少行的関係。。。。

，行咗一陣巳「气喘如牛」，下次咪搅我。

上到山都見很多人，有幾個亞伯做咗「惜花人」買了不少花卉做咗個花圃，十分靚，並在附近搭了個避雨的帳篷及留下雨傘，方便行山的人，很有心呢。

打冷（蕪湖街)

今晚同朋友去大酒店送別認識咗廿年的另一位朋友，由於疫情的關係，除了至親，我們只係两三個朋友，十分冷清，不過佢巳洗腎十多年，可以講都是一種「解脱」，我們逗留咗大约四十五分钟，摺了袋金銀燒比佢，當是一份心意。

之後同一位朋友路過蕪湖街一間「打冷」的潮州食店，食晚餐再分別回家去。

餃子同樂日

今早同两位鄰居整個餃子同樂日，佢地太懒，唔想自己搓皮，只好外購餃子皮。

兩款餡:

韮菜豬肉

粟米红蘿蔔香芹

豬扒煎蛋飯

今早去了銅鑼湾同朋友食早餐，之後去咗鹅頸橋街市買鲜椰絲，顺便買番两塊新鲜豬扒(这檔是好友移民前介绍的，叫珍宝」。

晚餐整碟「茶餐廳的豬扒煎蛋碟头飯」，一樂也。

这檔的豬扒不用做什麽手腳，只要豉油豆粉糖(加油)醃吓嚟煎巳十分腍滑(雖然係贵少少)值得呀😀

萝境的啟示？

我係個成日有夢發嘅人，昨晚又夢咗個十分完整但又「無厘頭」的夢，雖然唔知為何，但整個過程中又十分詳細，開場時我跟白車送外婆入醫院，但去到時人山人海，在樓梯上迫滿病人，總是找不到見醫生的入口，不知怎樣地我們失散了，但再次找到她時，她在我懷中離世，最後我嘗試離開醫院時總找不到出口，後尾突然唔清醒，醒來後問人借电話比母親來接我，當打通時她正在打麻雀。。。。於是我驚醒咗!

其中過程中的個细節我一一都記得，醒後雖然有些驚嚇，但又可以再見到外婆同母親，又覺得溫馨，那怕她們真的來接我呢？

各位。。。故事聽完就講声早晨吧

这個咁原整嘅「夢景」，真不知是何啟示？🤔🤔🤔

每當變幻時

今天又講講吓話當年。。。这首歌曾是至愛之一，由其流行於七十年代，那是最輝煌的日子，時至今天，不勝感慨，昨天又收到一個壞消息，重病的兩位朋友，其中一位又走了。😪

前两天竟然被我發現了一張年幼時的居所，这是幅網上截圖，希望不會被告偷圖。

拜山日記

因疫情的関係，自去年一月去過拜母親之後，一路都未再去過，今日因朋友的母親去年離世後，咁啱同母親做了鄰居，故此相约一齊去探訪她們，我們之後再去赤柱，原本想探吓我兩隻「宝貝」，点知疫情的原故，觀音寺沒有開放比善信，白走了一次，最後再乘車同地鐵返回旺角吃粥，食完就各自回家去。

素咕咾肉

講明今天全日都茹素，希望清吓d「罪」冇咁容易中招啦🤣🤣

今次見雪柜有包烤夫，試吓用嚟做「素咕咾肉」本來有人用猴头菇做的，不過可能我用錯粉，炸完都ok，但加咗酸甜汁就好快腍嘞。

農曆二月初一素食日

網友刚提起今天巳是二月初一，原來自從沒有再初一同十五菇素後，我早巳忘記了什麽時候是初一或十五了。

其實個人的性格不喜受規條，而且自幼就十分反叛，所以養成明知山有虎，總是「向山行」，往往一步錯，步步錯，到了今天性格依然，与人無關。

似乎有点離题添，今天就破例整個素食「福袋」，希望全年大家都「福福气气」啦。😜

葱油三黄雞

昨天晚上同鄰居分享咗半隻葱油三黄雞，因下午在山下遊盪時，無意中發現又開多咗一間鲜活食品市場，正在做特價。

由於隻雞比較大，清洗完後開边，留起一半，將另一半用盐醃吓，蒸熟後斬件，再用大量的芫茜，薑葱，淋入滚油即成。

「芋苗」炒肥牛

对我嚟講这是一個新名詞，事源早兩天同朋友在九龍城午餐時，無意中係街边一檔賣本地農產品的檔口見到，初初以為係「菜甫」，但檔主講叫「芋苗」並講用嚟炒肉唔錯，於是我買咗十元(半斤)，今早將佢切段，加入肥牛炒嚟食，口感真係幾脆口，相信用嚟送粥唔錯(因為比較咸一点)。

餃子早餐

今早食了數只昨天包定的餃子做早餐。

是次的餃子餡有：木耳，馬蹄，粟米，芫茜，豬肉，味道唔錯，这一次買到的餃子皮是橢圓形，所以幾好包。

健康的晚餐

其實我係「魚精」，只是而家好難食到海魚，變咗少食咗，雖然这條是「瞓教」魚，但是「海魚」，所以我亦不放過。

加多碟蒜茸「辣椒葉」，大滿足啦。

平價薑葱魚露雞

由於这幾日的公共廚房有洗碗盆漏水，沒在廚房煮食數天，見之前買落的「平價冰鮮雞」雪咗幾日，為防變壞，唯有加重口味，做碟「薑葱魚露雞」。

首先將雞用粗盐全身洗刷過(內外)，冲洗後加入薑片，搽上魚露，再淋上紹興酒大火蒸30分钟，之後等雞凍再斬件，將蒸完之汁加入薑葱茸煮滚再淋在雞面上即成。

韓國炒粉絲

今早韓國鄰居又有午餐相贈，韓國炒粉絲是也。

發覺韓國的餸菜，很多時候都很彩色的，而且每次的準備工夫都十分之多，近日「公用廚房」其中有一個洗碗盆漏水，暫時還未修理好，所以自己就少煮咗，最多在房間煮吓「云吞」之類方便餐，费事同人爭用廚房啦。

紫薯糕

早幾天做完南瓜糕，今日又做紫薯糕。

这做法同上次南瓜糕一樣，都係跟YouTube 上的一條link做的，份量一樣，做法一樣，口感都一樣，颜色做完覺得「南瓜」比「紫薯」靚一些。

鮑魚湯米

看起嚟似名貴，其實只是罐迷仔罐头鮑魚仔咋。

今日同朋友在九龍城食晏，佢介绍咗这款平價罐头鮑魚(＄38／罐，罐內有4只）

今晚試吓用來跟湯米食，口感都算夠腍，當然鮑魚味欠奉，不過食起上來点都好過平時在7X9買的那些。

麻醬雞絲青瓜

今天突發性有casting，所以做定碟麻醬雞絲青瓜，準備回家後夾三文治食。

心情欠佳

近这兩三年不斷有親朋戚友相继離去，以前没有多大的感覺，不知怎樣地这種伤感的情懷越嚟越「重」，仿似一嚿大大的石头壓在身上，揮之不去。

这兩天有位認識多年的朋友又因腎病離開了，同一時間又收到消息有另外兩位重病於醫院中，搅到心情十分之沉重，我當然明白人生的過程中總離不開「生老病死」，近年我亦接受到「老同病」，但对「死」總是難於接受，所以想借这「平台」抒發吓心中的鬱结，希望不會影响各位的心情就好了。😓🙏

寫到这裡才察覺今天是「三八婦女」日，但願这張網上的截圖能令自己放鬆一吓心情吧。

（圖片來自網络）