虾醬豬頸肉配荳苗（豆杯）

昨天買了半斤「荳杯」、今年還未算太貴、一個人都食唔晒、昨天用了一半煮魚肚肉碎、今天煮了一些虾醬豬頸肉放在面、又一餐了！

慢活的一天

昨天又要過北角做点事、雖然紅隧復活咗、但搭過渡輪之後、竟然愛上了「它」....過往的幾十年、一直衝、衝、衝的生活着、巳經不知何謂：慢活！

自從有了地铁後、一直在不見天日的地洞中溜走着、忽略很多美好的景物、昨天在陽光普照之天气下游走了數小時、原來發覺「香港」還是很美丽、生於斯而長於斯、若能可以的話又怎會離「它」而去呢？

可能現在年紀大咗、又冇咗壓力、真真正正体會到什麼叫做『慢活』吧！

眉豆糕

記得多年前試過蒸眉豆糕、材料&做法同蒸芋头糕差不多、不過今次太心急、眉豆發覺煲得唔夠爛、我意思是唔夠『綿』、有点失色、但味道唔錯、我的做法如下：

粘米粉150gm
粟粉50gm
水600gm
以上開勻

浸發過之眉豆約200gm(先煲腍、最好部份煲至起沙）

配料：臘腸半條切粒（蒸熟）、瑤柱浸軟（2湯匙）、虾米浸過（2湯匙）
調味：塩、糖、古月粉、雞、五香粉各適量
以上加入干葱茸用油爆過、再撞入粉漿搅至杰身、再放入蒸盆蒸约一小時、候凍切片煎食！

蒜茸牛油焗雞

昨晚同今早都食西餐、昨晚吃红炆牛肋條、今早就食蒜茸牛油焗雞跟蕃茄沙律！

做法很簡單、先用牛油蒜茸汁（日式超市有售）加紅甜椒粉先醃約兩小時、再预熱焗爐200度、焗熟後再跟沙律.

渡輪上

做過老襯之後、今次學精咗、今早搭小巴落九龍城碼头乘船去北角、再行去天后辦些事、回程亦行同樣的路、方便咗好多（雖然回程時送船尾、要等半小時才有一班）但至少唔駛坐在巴士呆等同塞車）！

去時叫鄰座的外國人幫我拍了張照片、这是近三十年來的『渡輪』上回憶.

哈哈哈！

平安钟

自從搬了來長者屋之後、眨吓眼又差不多一年、幸好遇上好的鄰居及宿舍的舍監、十分關照、所以住得好快樂.

由於我是長者的原故、每個房間都分發咗一部『平安钟』、今朝換床單時（第一次失誤按到）、唔夠十五分钟立刻有人到達、看看是否出了事、十分專業.所以一旦唔舒服可以按動那個钟、担保唔會做「咸魚」嫁！

今早無意中見到第一次做「銀髮毛豆」的照片、原來巳經係三年前嘅事嚟.那時我是肥一點的.

焗雞翼+滋潤糖水

昨晚冇煮飯食、只食雞翼同糖水、例牌只係食少少、之後全部送晒比人吃、因為我点到即止、唔想加深我的糖尿病、現在我學會管制吓自己的身体、因為一旦病咗就大件事、躺在病床的情況我從母親的個案
体會過之後、記憶難忘.

中國諺語

從小到大我是一個懶惰的人、讀書不成、一事無成、亦在某些人口中（心中）的所謂被寵愛得任性妄為嘅人！我曾經很介意、但經過思巧之下、發覺說話在人口中、只要自己对得住良心的、那些所謂垃圾人的垃圾說話、不屑回應！

從这近十年的網誌生涯下、發覺學了不少「中國諺語」、例如『夫妻本是同林鳥、大難臨頭各自飛』、『久病床前無孝子』、『近朱者赤、近墨者黑』等等之類.

從以上的諺語中体會到人生百態、亦在近期的事件中、看到人的醜態.相信近來我所聽過的粗言、是我暫時（六十多年）的總冠軍、是人變得太憤怒定德育方面的教學早巳蕩然無存？我常常掛在口边的一句話：冰封三呎、非一日之寒、諗深一層、「貪婪」令人腐化.这两個字從古到今都一直存在！唉、但願能如圖中之小鳥（雖然是假的）亦能唱出美好的明天啦.

Nov.23.2019的午&晚餐

唔開心還唔開心、還是要吃飯嘅、今早同師奶開完餐、今晚就炒定個米粉自己一人餐！

今早我煲咗南瓜红蘿蔔蕃茄洋蔥湯、蒸黃花仔、佢就整咗碟南瓜煮鮮准、我今晚就食七彩炒米粉.

美麗的殞落

以前成日聽到的一句話：花無百日紅、現在深深的体會到、（每次对着鏡中的自己、臉上的皺紋、頭上的白髮）.

加上昨天一次的錯誤（搭錯船）、令我走入一個很久很久沒有經過的地區（尖沙咀）、原來有些地方變到我巳不認識了、圖中美麗的區域（在星光行的对面）、美丽的聖誕裝飾但毫不引起我絲毫的喜悦、沿途乘車經過有些地方滿目瘡痍、心中之不快、澈夜難眠、心中不停地諗、自己生長的地方点解會變成咁？

唯一慶幸的、我巳了無牽掛、沒有下一代、無論明天这世界美麗与否、对我嚟講、影响只有自己（反正都時日無多）.

我們未能改變到什麼（當大部人成魔的時候、相信救世主即將重臨）.

蛋白杏仁茶（昨天的）

今天乜都冇做到、搭車搭到傻、一早八点幾出門（搭咗成二個小時半）去到柴灣casting(重要萬人爭個位、凍過水）、返屋企諗住唔搭隧道車啦（又中伏）、搭8号車去灣仔搭船過海、点知又係錯、原來隻船係去尖沙咀、又要再搭小巴返何文田、簡直搭到黐線、对自己講：老襯不作『第二次』

肉碎瑤柱冬菇炆魚肚

自從早幾天師奶去咗旅行、一日兩餐都要自己食、發覺煮一人的份量真係好難、我個人比較執著、若然餐餐出街吃覺得唔好食之外、又嘥錢、但要餐餐食碟头飯、又覺好悶、所以点都要两餸以上、但要煮得細碟就好似回復細時的『煮飯仔』遊戲咁囉！

Nov.20.2019(午餐&晚餐）

在这裡post文章唔同在fb、所以一次過post晒全日的！


 今早落街市買咗红立仔同豬瘦肉滾湯、煎魚、再包云吞做晚餐、我買咗半斤西洋菜都食唔晒、部份滾湯、部份用嚟包云吞！

綠豆栗子露

昨天由朋友口述、做咗这款糖水、但本身未食過原裝的、所以未能比較煮得似唔似囉！

我將會暫時以这裡為基地、因為由今天起會短暫退出facebook（唔知幾時會開番）、原因近月有兩面的朋友不停轉載有關他（她）們應為啱的新聞、而本人又不想附和某一方面、所以只好選擇離開.有緣再見吧！

獨善其身？

近來由於心情欠佳、晚晚失眠、加上四周情況混亂、外出時心驚胆跳、巳致心臟又開始不太妥（有d似當日太后病重時的情況、希望不用再入急症室吧）.

其實現今世界之紛亂局勢、日日都有各種不同的事發生、何人能夠獨善其身呢？移居外地或留守亦如是、世界之大、有不少地方每天都要面对着戰爭、有人曾对我講我是個「悲觀主義者」、可能是我成長的環境所致.平民百姓可以做到的（尤其是我們这些白髮蒼蒼的老人）、只能引用以下的勉世金句：

                         （圖片來自網絡）

香芋椰汁雞&蒸版蘿蔔糕

今天要過香港辦点事、所以一早煮定晚餐回家吃！


这是我近月第一次過香港、如果唔係窮窮地、打死都唔出街.一路行一路驚、年紀大心血少囉.

由於紅隧「瓜咗」、而家只好搭車經東隧、希望快些回到家就好嘞.但塞車塞到飛起呀.

星期天的攪作（11.10.2019）

这段日子每天都在家發霉、一出街就「心慌慌」、好似前幾天外出casting後、回程時遇到防暴、搅到血壓上升、而家冇乜特別事要都唔出街、留在「龟殼」中！

今早買咗隻雞肶做咸雞、之後煮個湯粉做午餐就算.
同時亦炆咗d「混醬炆牛筋蘿蔔」、方便今晚食碟头飯！

龍躉骨煲蕃茄薯仔湯

自從搬咗去九龍後、好少見到有新鮮嘅龍躉骨、一來貴、二來煲完有排飲、今朝同隔離師奶落去土瓜灣買餸、一見到咁新鮮嘅骨、當然唔放過啦.而且煲完有人同我分享、又會放過呢！

所以有朋友問点解我成70歲d皮膚還有彈性、我笑笑回答佢：可能以前我吃得骨膠原多卦、哈哈哈！

黑芝麻曲奇

表妹由加拿大帶來一包有机黑芝麻、我唔知点食、不如做些「黑芝麻」牛油曲奇啦！

我的配方都是從網上學的、自己加加減減、都唔錯.

麵粉210克、粟粉48克、蛋1只、鮮奶25克、盐1/8克、糖90克 、牛油180克、黑芝麻適量

以上全部混合、用唧袋唧出形狀、放入預熱焗爐160度焗至金黃、候凍便可入樽.

肉碎煮大芥菜头

今早買到幾個大芥菜头、切片用肉碎煮咗嚟食、都唔錯的、價錢亦十分抵、下次加些冬菇落去煮、相信更加惹味.

得來不易的友誼

今天的聚首、不知還有多少次？表妹月初回來飲宴後由於局勢混亂未曾有机會約見、另一位又是從加拿大回來探親的好朋友、她們都會分別明天及短期內回加、所以今天抱住「驚恐」的心情相約在觀塘飲茶一敍、雖然短短的两小時、大家都暢談一番、今天一別、希望有朝一天再重聚吧！

除了表妹自小認識外、其他兩人都認識了超過四十年、能夠維持至今的友情實在難得、在这困難的時刻、有这幾位好朋友的「關愛」、上天对我總算不薄、感恩！

銀芽牛柳絲煎米粉

『習慣』係我这一年來的体會、以前我提起「麥皮」就反胃、而家習慣了每天都要食過至安樂、我的適應能力都幾強嫁.

今天平平地又一餐、有錢就食好d、但今餐廿蚊都唔駛、現在係香港做人要做到「能屈能伸」至可生存到.廢話噏完又開餐嘞、嘻嘻！

蘿蔔蒸排骨

这是一個新的做法、平時會用炆的方法、今次我是採用一位網友類似的做法、本來是用柚皮放碟底、上面放排骨的蒸法、尤於我還未買到柚皮（而且做柚皮的工序好多）、但我又心急試做、故此先做一次（切成粗粒的白蘿蔔）代替.

做法簡單、排骨照平時的醃法（糖、蚝油、生油、老抽、生粉、蒜茸、薑絲）、蘿蔔去皮後切粗粒、飛水再用糖+水煲至半熟）隔去水份放在碟底、上面舖上醃過之排骨、大火蒸熟、最後灑上葱粒同红椒粒便ok.

卡邦尼意粉

我平時做人的守則、机會不過『三』、这意粉巳經失敗過一次、今天係第二次但還是不成功、所以下一次若然失敗了我是不會再整的！

我覺得这意粉最難控制的就是當加入蛋王後、而令到意粉不起（蛋花）的情況係十分困難.

虾米韮菜炒米粉

今天終於完成鑲牙的最後一天、帶着從未試過的「活動假牙」、十分不習慣、所以決定以後在去街時才會帶上.

為咗方便吃東西、以後會少食一些較硬的食物、这碟米粉都應該適合吧！

古法拿破崙餅

这是外購（因近日在fb無意中睇到一段介紹、在新蒲崗有間餅店有售竟然是我早幾年跟過佢學整餅嘅師傅開的）、咁啱今日要去casting(相信又是陪跑）、順道去買咗返回家吃、在近期心情十分低落之下、食少少甜品相对總有些幫助吧！

同時又發現这一段好有同感的文章、想分享一下

（文章來自網絡）

一個失眠的晚上之無聊分享😅

牛油曲奇

今天回到舊居附近剪髮、因自從搬了過來後沒有一間剪得合我心意、所以順便回去剪髮兼同舊街坊吹下水😘

回家後便焗咗少許牛油曲奇做下午茶！

花甲蒜茸牛油燴意粉

昨天的晚餐、原來發覺花甲是比蜆貴的、平時一斤蜆只是廿幾蚊、而花甲就要五十幾啦、哈哈、突然又想攪吓爛笑話、唔通正如人一樣（花甲一般形容上咗年纪嘅人、閱歷越多越值錢？）、講吓笑啫！

時光到流的那些年

嘻嘻、今朝又發吓夢、因為摷緊舊物時發現这些照片、最舊那張黑白照都唔記得於何年何月（應該是廿靚歲卦）？反正是年青時的照片、直覺上有d似『靈灰閣』上的照片、不過我一定唔會在那裡出現囉、因為早巳申請咗做「無言老師」呀.

另外彩色的只係六年的前与後、

今天係唔係好無聊呢？哈哈哈、苦中作樂都幾好吖！

蛋花雪耳蓮子糖水

近日秋意正濃、加上空气中瀰漫着太多化學品的殘餘气体、好多人都有咳、这亦是我不願外出之原因之一.

今天在家煲咗一個潤肺的糖水、同大家分享一下吧.同時分享一段網上的貼文、覺得很同感.

（文章來自網絡）

週日的午餐（11/03/2019）

無論有冇胃口、午餐總是要吃的！


这两天隔離師奶因眼睛做咗激光手術、要戒口、所以各有各煮、今天我的午餐係冬菇魷魚蒸肉餅、椰菜炆冬菇魚肚、三色飯、碗隔離師奶重比咗碗湯我飲添

看不見盡头的路

本來以為放下咗包袱、從此可過到一些真正屬於自己的日子、自太后走了之後、曾经对自己講過不再流一滴眼淚、因為之前為咗佢攪到入埋急症室、差d比佢先行一步.

可惜安樂的日子並不長、由今年的六月開始、每晚都失眠、每天在惶恐之下渡過、甚至不再敢乘搭地鉄、最終連唯一的PT唔敢再返.

現在日日留在家中、無所事事、甚至朋友的聚會都盡量不出席、日日寄情於上fb.但唔知幾時連这自由都會失去.

前路茫茫、不知盡头何處？

現在可以做的就要再「堅強」行落去吧！

（圖片來自網絡）

回憶与思念

近日一段封存巳久的回憶又再次湧在腦海中、有人曾經对我講過、原來人在離世後49天内（佛/道家所謂中陰身）、聽講人一旦離開自己的肉身、只有一道強光、遊走人世間、所以那道強光不停在亡者的記憶中將他/她的以往（这一生或唔知幾多生不停地像錄影机重覆地播放着、自己暫時雖然還未体會到、但這段封巳久的記憶再湧現在腦海上（零零碎碎的記憶）、原來突然自覺還未去到『腦退化』的階段.

本來这是一段伤心+憤怒的回憶、我早就封存咗十多年、自從太后走之後、原來不知不覺中我巳將很多往事「放低」、唯一：太后之死、有關參与促成的人、相信在我有生之年都難以「釋懷」!

很喜歡这圖中的格言、因為我对我的母親：真的做到了.

（圖片來自網絡：快樂台）

腸仔麵包（老麵種）

昨天做定個老麵種、今早起身搓定個甜餐包的麵糰、加埋幾條迷你芝士腸、做咗九個迷你腸包！

今次的配方如下：

高筋粉270gm
奶粉15gm
鮮奶135gm
酵母5gm
糖45gm
盐少少
老麵種一份（大約50gm)
軟牛油25gm

以上搓成麵糰放室温候發大一倍 ,之後做型,搽上蛋漿,便可入預熱之焗爐焗約12分钟,出爐後再搽糖水便ok.

日式咖喱牛肉蛋包飯

自從太后走咗之後、我再次食番停咗成廿年的牛肉、近日胃口好差、心情又唔好、晚晚失眠、諗住煮d濃味的嘅食物嚟睇吓有冇幫助（近年其實由於身体變差、本來巳經食得淡口一些）😭

这個配方係跟另一個網友的概念、用自己的配方去煮！