兒時家常餸（蕃茄煮红魚）

往往最平凡的食物就是最令人懷念的、時至今天、貓魚都變天價、以前的紅衫魚幾蚊/斤、而家是幾蚊/両、唉！什麼都是回不去「過去」吧！

今天分享的一味家常餸、除了回憶、亦有懷念🤔

蜜汁日式單骨雞翼

昨天買到一包泰國的單骨雞翼（老板講係冇雌激素）、所以比巴西的貴、今早就試醃幾只、用焗爐焗來食😛

今次我用咗檸檬汁、日本清酒、味淋、老抽、魚露同韓國糖漿、醃咗大約1小時、預熱焗爐200度、再边焗边掃上汁液、直到焦焦地、十分惹味👇

隔夜餸炒飯

人會變、月會圓、以前的我完全是不會食隔夜餸的、現在除咗要慳之外、主要是食得少、每餐半碗飯都食唔到、所以無謂浪費食物啦、昨天鄰居比了幾片叉燒我、因沒吃有吃到（因為巳经有餸）、所以將叉燒切粒、加些菜粒、葱粒、雞蛋、炒碗隔夜飯食就算😅

我們英明的政府、政策實施了一天（行不通）、明天又要改了、現在身為香港人實在悲哀、好彩的是：我这個太陽快下山了👏👏👏

脚伤後之後遺症

自從四月後腳痛不停、經過斷斷續續的尋求治療良方、暫時叫做知道是什麼原因導致、其中除了根腱老化之外、是一路以來步履不正確、加上長期拿重嘢、日子有功、正如輛老爺車、一旦机件老化、最終只有一個方法：換掉它（有時真的有咁嘅想法嫁）

本來經過衝激波及針炙的治療、有所改善、以為止了痛便叫復元、点知、原來由於原本巳移了位關節很容易又再次移位（因行路的快慢及未算完全康復）、今次那位治療師推介我用这種肌肉貼來幫助強化根腱的血管（唔知有沒有効）、相信我以後再不能拿重的東西、武功從此要廢掉了😭😭😭

嘻嘻、加咗「心心」的貼紙、我的腳都不致太難看吧😂

今晚的共煮「分食」餐

由於疫情嚴峻、但又不想餐餐碟头飯、今晚煮完两餸一湯後、分了一部份給鄰居吃、菜單：古法蒸黑立（魚尾）、蒸水蛋、肉片滚菜心湯

疫情下的升級管制

疫情持逐加劇、所以由今天起全日只有外賣（对我沒大影响）、由四人聚集減至二人、不過個人相信成效不大、因為一旦在社區爆發了、又怎能容易搜出病患者、本來今天還要去做針炙、但不知開診与否！

由於昨天巳上足糧食、所以今天的午餐是：冬瓜滚魚湯、小棠菜牛肉炒飯

今天的午餐&晚餐

個人本來十分喜愛食粥、奈何咗有糖尿之後、被迫戒了好一段日子、今晚忍不住煮了碗瑤柱魚蓉（蒸咗黃花仔拆肉）粥食、今朝的午餐只吃了碗隔夜米粉同鄰居送給我的湯就算😄

近年的胃口真是很細、所以少吃多餐就是👇

疫情下平、靚、正、一人餐

而家日日都要防疫、唔出得街又要慳住慳住使、今早的西芹炒肉絲食唔晒、今晚去掉西芹加番菜遠、咁又變身了、有時我的「變通」心思都唔錯嫁😋😋😋
今晚的煎米粉、好好味🤤🤤🤤

今早的一人餐

金奇異果果醬

自從搬了過來後未煮過果醬、今日下午因為要去上海街買嘢、順道買咗7個金奇異果返屋企、試吓網友Thomas嘅做法、看看成功与否！

他的配方如下：

金奇異果7個（大size)
檸檬一個揸汁
有机蔗糖160gm

終於完成、但只做到两樽半、相对嚟講都算貴、但自家做的唔會太甜囉💞

湯飯餐

近日的疫情每天都在加劇中、日日過百、社區爆發後、總有一個在左近、六合彩不容易中、但我們这類長期病患者、加上年紀的問題、一旦外出購物或買餸、易中過六合彩吧、不過生活還是要過的😷

正所謂防不勝防、冇得小心与否、看天意就是、今早食得簡單点、雪柜有什麼就煮什麼、反正吃不多、自從星期五做完針炙（雖然只是一次）、覺得比做了兩次的衝激波好好多（至少暫時的感覺）、点到好啦、只要行時不痛、就算感覺良好😳

今早來碗湯飯（有翠肉瓜粒、蕃茄、薑、魚肉粒）

迷你甜餐包仔

好耐冇整過甜餐包、今次做番12個迷你裝的！

材料

高筋粉250gm
酵母5gm（暖鮮奶120ml開勻）
糖30gm
塩1/8茶匙
湯種50gm**（用20gm高筋粉+100ml水（或鮮奶）煮至成軟粉糰）
軟牛油大的15gm(最後加入粉糰）

做法：
先將高筋粉放入深盆、中央開窿、加入粉、盐、湯種、和酵母奶）、搓成粉糰、最後加入軟牛油、再搓至光滑、放入暖柜等發酵至2倍大（要底面蓋上保鮮紙）
大約1小時後、提出分割成12份、搓成圓球做形後再等第二次發酵、預熱焗爐（底面火）焗至全熟！因自己的焗爐沒有風扇、所以火路不太理想、但今次都可以接受

無奈又無奈的人生

我這個人從小就是個「悲觀主義者」、往往少少的事便不停的反思、表面上面看似樂觀、帶笑着面对人群、近日因腳患令我思巧很多早巳放低了的心結、還好、當我每次發洩完心中話、又會重新啟動自己的「亞Q精神」心態去面对、因為每次我都會同自己講、自己不是最不幸的一個、好似昨天做治療時、姑娘对我提及她的中心中來睇病的有不少是「無家者」、甚至有家庭只有$100可以動用作買一星期的食物（因那中心是基督教社區服務的團体經營的）、相對之下我並不是最窮的一個吧🤔

以前我外婆常掛在口边的金句：親生仔不如近身錢、可惜我的個性似「太后」、腦袋生在「屁鼓」上、不過算吧、人算不如天算、做人只要覺得自己問心無愧、曾經擁有過、巳足願了😊

今早我又老師上身、教了韓國鄰居蒸蛋（因為佢之前蒸蛋蒸到好似火山爆發咁）、有時我又會跟她學韓國飪調呢、正所謂「天生我才必有用」、这句話是沒錯的、現在只好笑着看这「無奈又無奈的人生」😊

針炙後之晚餐

今早怱怱食完共食餐後立刻下山去做針炙（因疫情影响只開上午）、由於前两次的衝激波治療有点反覆、昨晚隻腳突然痛至膝头內側、所以醫師建議試吓針炙、做完後覺得暫時停咗內側的痛（當然腳眼還未完全止痛）、相信可能還要做多一两次針炙吧、唉！🤔

今晚是但煮碗湯麵就算了

疫情下之共食餐

本來諗住le輪暫停一吓共食餐、奈何一旦煲湯便不能食一人餐、只好胆粗粗食番一次啦！

不過我都盡量不同枱、煮完自己分開自己那份拎返室內食😷

今天食：老黄瓜赤小豆扁豆同鸭腎、云耳西芹炒班片、爽肉煮四季豆

食完重要落山做了衝激波治療、唉、隻衰腳昨天突然痛到上膝头、真係越窮越見鬼咯😭想唔動用政府的錢都唔得、不過買完雪柜同衣柜都冇咗一半啦😥

疫情下之方便餐

近來疫情越來越嚴重、往後的日子真不知怎樣過、年紀大、机器壞、只有慳住使、今天分享的湯麵用了平時儲埋的虾殼煮湯、再煮了半個拉麵+少許肉同菜（現在胃口十分之細）、便成了碗美味的一人午餐😛

韮菜餅&餃

昨天落街市時買咗一斤餃子皮、今日唔敢外出、所以留在家玩吓用餃子皮做的韮菜餅、在YouTube 上學到的是四片餃子皮（每片搽油）再用棍轆成大片、再放上巳調味之韮菜粒、再覆蓋另一塊相同做法餃子皮、之後像葱油餅的煎法（半煎炸）、最後用剪刀剪開便成！

餘下再包成餃子再煎两面至金黃就是🤤

上湯龍虾伊麵

今日銀行出咗政府的$10000、所以走咗去訂個衣柜同買番個大d嘅雪柜、剩下的就要留起嚟做治療隻腳用、这叫做財散人安樂嘞😅

本來諗住同鄰居慶祝收到政府的錢、合作搅大食會、可惜近日疫情嚴峻、费事接觸太多、所以取消了、但我又想龍虾、於是走了去買咗2隻本地龍虾仔（近日海鮮因沒有生意而平了很多）、做了碟「上湯龍虾伊麵」歎吓囉😊因為鬼知自己會什麽時候「中招」喎🤷

腐乳蒸雞+海帶蜆湯

今天又係一人防疫午餐：半边雞分兩種做法、午餐食腐乳蒸雞+海帶蜆湯（韓國鄰居比的）、另外一半雞煲瑤柱雞粥（做晚餐）

蒜茸牛油雞翼配湯拉麵

今日做衝激波治療隻腳（第二次）、加埋三劑中药粉（幫助失眠及內分泌）、同埋姑娘手療手指根腱（彈弓手）半小時、埋單差不多$1000、唉！我的醫療卷好快用完咯😭

所以中午在茶餐廳食少少嘢（快速餐）便急急回家去、晚餐只食了幾隻雞翼配碗拉麵便算、始終近來的胃口真的麻麻😅

防疫一人餐

今天全日都食『一人餐』、因為又創單日新高、今日好似成百人確診、担心呢😭

今早食意粉、晚上就食一餸飯、希望疫情快些過去吧😷

自家制叉燒

很耐冇做過叉燒、因為近日鄰居想學、所以又再做多次、我的方法很簡單、如果根據以前師傅教的方法就複雜許多的🤔

我的配方如下：

首先買一斤梅头豬肉（講明做叉燒用）、根據自己口味、可以叫肉檔給予淋些或爽些的部位

先用糖及玫瑰露醃約1/2小時
再放入預先mix好的醬汁（包括：叉燒醬、蚝油、老抽）分量我是隨意的 、之後放入保鮮盒再入雪柜最少四至五小時、隔夜亦得、之後預熱焗爐、放入去焗起碼45分钟、至於爐火各人的焗爐牌子不同、自己執生、至於有朋友問我為何不拍片放上YouTube、我答我寫網誌的目的係作為分享及日後不在世時還有些東西遺留着、不想拍片給人罵（因為見到有些人在YouTube的留言上、十分之難聽及毫不留情）是我不想看到的後果、反正我的目的不是想得到任何利益吧😅

海南雞飯

今晚突然好想食海南雞飯、所以去咗何文田廣嘅街市買咗半隻龍崗雞、南薑、班蘭葉、同埋香茅、煮咗海南雞、之後灼碟菜心、滚個蕃茄蛋花湯、同另一位沒有返工的鄰居開餐（相信比較安全d卦)😄

外賣的日子

疫情一天比一天嚴峻、自己年紀大、费事中咗招但又唔死得住、都係暫時過吓「獨家村」的日子吧😷

原本今早出去大快活買外賣早餐、点知見到有個大叔（冇帶罩）比成班警察拉、立刻嗱嗱臨轉咗去明星酒樓買外賣回家食、但又一奇景、個個長者都是冇帶罩、重枱同枱之間的距離十分接近、十分佩服他們的勇气呢🤦

暫時我都會停止共食午餐、因為鄰居要返工的原故、接觸到人仕較雜、都係小心d安全為上😅

爵士湯

这個湯的命名是聽聞以前有位有錢人鄧爵士很喜歡这款湯、所以酒家便將这湯命名為「爵士湯」、當然我这冒牌貨只是魚目混珠、嘻嘻！

原裝是用何料就不深究、但主角一定有蜜瓜同螺头、我今次这冒牌貨用咗昨天的蜜瓜、乾螺头、果皮、雞殼、豬展、希望飲起來都有六七成似吧😂😂😂

疫情下之共食餐

近日人心惶惶、疫情變得再嚴峻、為防感染、加上腳患、都係少出街為妙！

不過昨天因要交电話費、所以落了山下一轉、点知又中伏、事緣行過一間新開賣高檔嘢的舖头、又比人氹咗買了一個（佢話日本）蜜瓜、當時我都心大心細、因為記太后平時金句：好嘢冇平嘢、平嘢冇好嘢、不過貪心都係「一定錯」的道理、所以这蜜瓜都係留番明天煲「爵士湯」吧！

分享今日的共食餐：蒸黃花、蟲草花蒸雞、麵醬煮白豆角、蒜茸煮勝瓜

澈底思維的改變

自從搬了去長者屋居住後、我的確遇上了不同種類的鄰居、有互動的、有say hi and bye 的、亦有見面就碎念念的（可能这些都是平時沒朋友、又喜見人就講自己的幾慘、幾不幸的）、今早我決定一次過对那位見面就碎念念不停講過去的老人家開門見山的來一次剖白、我講每一個人都有唔開心的過去、反正過去的巳過去、不要停留在往日的回憶中、我們只有想着未來的餘生要令自己開心、有錢就吃好d、沒錢亦有沒錢的快樂、若有需要的幫忙、我能力的許可下亦可幫忙、但不要見面就碎念念的說自己的過去幾不快樂、我不再回避「不好意思」的明確表態🤔

今天约了她下午帶佢去電訊公司解決手机的問題、希望幫到佢吧、不再見面重覆又重覆她的問題啦😥


自己是不介意幫別人、但不喜歡別人常在耳边碎念念的重覆着自己的過去😅

現在自己處於平靜的生活中🌷🌷🌷、亦不喜別人打擾我的心境

（圖片來自網絡）

日式雞扒湯米

这幾天每天都有四五十人確診、接觸過的地点包括不少商場、食物店等等、真是防不勝防、只能再唱唱这首歌：再坐一會😭

今晚簡單地煎咗塊日式（味淋、清酒、鲣魚汁醃過）嘅雞扒、煎完切件、再煮些菜+湯米配着食便是！

上海咸肉菜飯

昨天晚上做了一碗咸肉菜飯、这是我喜歡的其中一種美食、簡單的做法、只要將小菜菜的葉除去、只留莖部、切粒、用少許盐同油炒軟候用、上海咸肉蒸熟後切粒、同米齊水一起煲飯、熟後加入小棠菜粒便成🤤

小貼士：菜粒炒熟、等飯好才加入是令菜不變色、保持青綠、若吃不完留待明天再做炒飯、一樣咁美味、这飯巳有咸味、不用再加盐來炒！

叉燒酥

其實叉燒酥個皮有不同的做法、包括有現成的酥皮和自己做的皮、今次我做的叉燒酥是自己做的皮😘

個皮的分量可做8只左右：

水皮

低粉130gm
糖17gm
盐1/4茶匙
白油（豬油）50gm
水45gm（大的）

油皮

低粉
105gm
白油（豬油）50gm

以上两種水皮/油皮分別搓成粉糰、放雪柜雪約半小時、之後取出、用水皮包住油皮、用木棍轆成一大塊、分割成一小塊、包入巳煮好之叉燒餡、做型後掃上蛋王漿、預熱焗爐焗至金黃、（是乎各人的焗爐）、我的焗爐200焗了12至13分钟（以上份量可做到8只左右）

沙白（蜆的一種）滚絲瓜湯

今早約咗睇中醫、原本諗住試吓做針炙、睇完醫師後、佢建議我做一種叫「衝激波」的治療會適合d喎、因為針炙要十次八次才見効、但这治療應該兩三次就知道得唔得、因為據佢講我的情形應該係軟骨組織勞損、点都好啦、咁就约星期四做吓先吧！

睇完醫生成十二点、見又冇乜胃口食午餐、於是買咗少少「沙白」滚碗湯就算咯😋

西班牙彩椒炒虾球

年青時我樣樣都追求完美、近年都開始唔咁執著、是是但但、不過心底裡这個習慣有時都會再浮現！

昨天行過商場的街市、見有間賣高檔菜的舖、眼前一亮比我睇到这顏色美丽的彩椒、忍唔住買了一只（其實當時只比佢的颜色吸引、完全冇諗過点煮嫁）😳

今朝是是但但用咗幾只虾仁、腰果、自制的梅子醬炒咗碟靚靚的『彩椒虾仁』、賣相都幾吸晴吧😘

疫情第二波之共食餐

以為疫情巳過、点知一鬆懈便再次重臨、唯有又再呆在家中防疫、好彩要10月才有覆診、感恩！

今天的共食餐有：炸冬菜蒸黃花、冬瓜魚湯、葱油手絲雞、灼韮菜花😋😋😋

詞彙的認識

自從由2010年開始學人寫網誌、原來这十年間學識了不少詞彙（其實之前我執筆忘字、基本上都唔記得寫這個彙字）、現在諗番起之前真的是讀「屎片」🤣🤣🤣

本來現在就嚟去到「拜拜」的時刻、都冇乜所謂啦、但諗番吓總好過死咗都未醒覺、白白地走過了一生吧！

其中有幾句都令我有所反思、例如：痛極思痛、居安思危（以前太過大意、完全冇想過这四個字）、但世事難料、有些事是亦是意料之外嘅、点都好啦、民以食為先、今早落去飲早茶、三個人都唔駛$140、不過这两天又多番人確診、所以都係停一停好啦😄

新式焗湯

而家科學發達、乜都要講求快速、昨天去朋友的舖買咗幾包方便「焗湯」、湯包的原本用意是方便一個返工人仕、只要將湯包的料及適量水放入「炆焗盅」內四小時便有碗老火湯飲、尤於我並沒有这類焗盅、我便用了自己的高速煲、放入去高速大約15分钟、熄火後焗了三小時、開蓋後再大火滚起、於是乎一碗好正的湯便煲好了👇

今晚的晚餐

咖喱雞碟头飯配冬瓜蓮子湯

今日覆診完本想食少少咖喱雞送白飯就算、因為腳患未好加埋又有手患（近日手指不能揸成拳头、十分僵硬）、都冇乜心情、因為早兩日私家驗血証明不是類風濕關節、但由於今日是心臟覆診、醫生只答應轉介骨科（重新排期唉、分分钟要等上兩三年啦、等得嚟怕者都拜拜咯、之前我曾睇過骨科、政府每次都只是給止痛药、照X光或物理治療又分分钟等上三五七個月、除非大手術啫）、所以最終我都取消这科繼續睇落去、痛症这種病、看醫生時未必痛、痛時又未必輪到覆診日、都是算吧！

人生便是这樣無奈、有錢去睇私家症都是一樣的🤔

反而醫生講血壓近日有上升指數、要多加注意喎、唉、人老咗什麽不知明的病友都常來探望嫁啦😅

講完病情又講吓食先、回家後韓國鄰居突然拎咗冬瓜叫我幫佢煲湯（咁啱今日是小暑）、所以我同佢用冬瓜+蓮子、云腿、果皮、青島貝、豬骨、意米、煲咗这款湯（當然又賺咗一碗飲啦、哈哈哈🤤🤤🤤

士多啤梨奶凍&韓式湯配日式麵

今早因為要覆診（心臟科）、所以一早便出門、臨出門時韓國鄰居送了一碗韓式湯給我、所以怱怱煮了碗日式麵用嚟配食（當早餐）、好好味！

順便影埋昨天做定的士多啤梨奶凍😋😋😋

中式雞批

今次我唔做西式、改試下用中式的做法、做完味道都唔錯噃😄

材料：
餡：有雞肶肉（切粒）、火腿（切粒）、洋葱（切粒）、急凍雜菜（紅蘿蔔、粟米、青豆）牛油、麵粉、花奶、雞湯
做法：全部飛水（洋蔥除外）、用牛油炒香洋蔥、加入以上出過水之料、加入雞湯同花奶、麵粉炒至杰身便ok（份量自己執生）

批皮：
低粉220gm
粟粉30gm
發粉1茶匙
砂糖15gm
盐約1/8茶匙
冰水約3茶匙
牛油的120gm（全部搓成粉糰）
以上份量大約做到6至7只雞批
做法：搓成粉糰後醒約1/2小時、分別壓成厚片放入模內、中間放入餡、再放另一片在面、之後用牙簽介花再搽蛋漿、放入預熱焗爐約200度焗至金黃、凍後甩模

手工素餃子

自從二十多年前先父曾經請過大陸護士協助他的起居生活、其中一次請咗位天津的女仕、她包餃子的方法好好、我從她的手勢中學到自己搓皮來包餃子、自此之後我不再買街外的現成餃子皮嘞！

今早我突然心血來潮、包了6隻素餃子（蕃茄、蛋、韮菜）來做早餐、手工餃子的好處就是想吃多就包幾多、不用嘥料囉😊

再做碟煎素餃

瑤柱雞粥

還記得父母親在世時常常談及年青的往事、我總是笑笑他們想「舊事」、時至今天原來自己行回他們的道路、所以今天的我原是昨天的你这句話是沒錯、當然人若能是記得美好的往事、忘記悲伤的往事未嘗不是一件樂事🤔

今我我講的當然是件樂事、因為年青時交往都是疼愛我的朋友、其中一件便是他們常常帶我周圍去吃喝玩樂、最常去的就是：吃沙田乳鴿同大圍雞粥、今天年纪巳大、亦有沒有这麽貼心的朋友、加上物轉星移、一切不同了、想吃嗎、自己煮囉、嘻嘻😘😘😘

沙薑蒸雞

之前在網上學咗这款做法、本來今早整嚟做午餐、点知昨天抽血、醫生擺烏龍、抽漏咗一筒血、叫姑娘急call我再過去灣仔診所抽過（因為我星期一覆診要報告）所以搅到下午两点幾至食到午餐囉！

這個做法十分簡單、首先將沙薑粉同盐搽匀雞的内外、再切片（新鮮沙薑）加埋蒜片放在雞面上蒸約20分钟、凍後斬件、再將新鮮沙薑同蒜片切碎、放回鑊中連同蒸雞之汁煮滾（加入薄獻）、再淋在巳斬之雞中上😛搅掂便食得