生日飯

有位好有心的老朋友、今晚請我去灣仔食飯、慶祝生日、雖然食物唔太好(乳豬除外)、但心意搭夠、心存感激、同時係Fb亦有班好友、送上無盡之祝福、尤如糖蓮子、苦中一点甜。

这幾年在fb同博客中有幸認識到一些素未謀面同幾位交淺言深之朋友、人生若我亦不枉此生！

我的2016生日願望

今天是我進入長者之行列、雖然亦是人生中最不順景之一年、不過都希望身体健康、能继續照顧到太后多一两年、什麽降臨身上都好。。。千萬就不要有腦退化、眼見太后咁、真的很痛心！

身体無病痛巳經係我唯一的生日願望了。

無驚無險、又到終点

(圖片來自網絡)

南乳雞

今日用南乳加糖、酒、1老抽醃雞半天、再用光波焗成南乳吊燒雞、皮香肉滑。。。。yummy！

東施効顰之湯水

昨天見翠兒这湯水幾特别、一於做吓東施啦。

材料有

白鰂魚
馬蹄
合掌瓜

我的晚餐

今晚愛鍚吓自己、煮餐正斗晚餐嘆吓先！

有生拆蟹肉扒荳腐
清蒸游水烏絲班
腐乳煮生莱
西洋莱生魚湯(昨晚的)

薯仔pizza

平時不喜在家吃早点、但係FB見到这魔鬼早餐、不期然又跟番轉啦。

好簡單、刨薯條、捞入芝士、黑椒、煙肉、焗熟後放隻蛋在面再焗就是。

生魚煲西洋莱

開始秋涼、今日見西洋莱當造、買條生魚、又睇吓太后吼唔吼。問咗佢應承咗都冇用、好似噚日叫咗一整天冲涼都冇理我地、但今朝一起身又好合作。。。。真係難估過六合彩。

材料

西洋莱2斤(一定要滚水落、否则會苦)
豬
南北杏(凍水落)
果皮
生魚1條(我先煎吓煮成魚湯、隔渣才落)、 因不喜用魚袋

大火先、轉中火、最後半小時再用大火埋尾、全程约2小時半左右。

我的人生格言

時間的流逝、當年青春無敵的我早巳變得白髮蒼蒼、在幾十年的經歷歲月中、終於明白到自己的格言原來是。。。。。

堂妹同我预祝成為長者的生日。。。2016

富貴午餐

做人好化！今日唔知明天事、行出街都可以比車車死、所以。。。。。得快樂時且快樂就是。。。而且人到了四十歲以後、不用想仰人鼻息、只需要向自己負責。

所以。。。。今天來一客富貴午餐啦、嘻嘻！

韓醬炆花生雞脚

今日又玩吓新嘗試、就是韓國辣醬花生雞腳！

除咗辣醬、加d蚝油、冰糖、老抽、水、就是啦。

觀人於微

近年學識咗用個心去睇人、眼見未為真这道理亦明白到。。。。。

一個人的態度同平時平日的行為好能反映出内心的人性、修為、如果我能在年青時悟出这道理、相信一定成為一個傑出的心理治療師。

學歷的高低並不代表個人的修為同德行、只有從生活的小節上、言談中就能感受得到。。。。當然这是我個人的見解。

正所謂人老精、鬼老靈、人要有經歷才會頓悟、今年係我進入長者之年、亦是(暫時)最不堪的一年、以前的心態一定怨天怨地、但自從開竅以後、我反而用樂觀的心情去面对。

(圖片來自網絡)

雪柜的剩餘物資

近日係fb睇到如果成日嘥嘢、第日落到去(阎府)、要食番晒至可投胎、嚇死我嘞、我至怕食
隔夜餸、重要係積咗幾十年的隔夜餸、由今天開始怕怕、一粒米都唔敢嘥啦。。。。。

所以。。。以上le碟係雪柜的剩餘物資嚟的！

改進中之。。。杏仁餅

今次唔加黑芝麻、改加白芝麻、都一樣咁香！

做法同材料一樣。

光波的度數各不同、自己注意

人生百態

自從廿多年前開始兼職做廚娘、見盡人生百態、不論富定中等人家、都各有特色、有些自幼富貴的當然不知贫苦人的生活、亦有高高在上的强人、由於職業的毛病、往往行使超然的地位、反而有些人從貧窮中成長而致富者、明白到窮人的辛酸。。。

突然記起當年先父駡過我的一句話。。。。人離鄉賤(因為當年還未悟出这道理時、因太后的不悦常对工人呼喝)、人要不停地經過歲月的磨練同常要自我反醒才能開竅。。。。今天的我終於明白先父當年的对人態度是如何的寛容、所以就算他離開咗、曾对他有所認識的人都尊敬他樂善好施同待人不分貴賤的人品。

身教是每個成長中從父母身上學習得來、而不是從課本中得到的知識、但發覺現今很多父母只重視子女們的學業而分略了对人的品德、所以近年發覺大多數人趨向自我為先、亦没有易地而處的心態、人心。。。。。的確變得冷酷了！

花朵美丽、亦需要綠葉襯托、人如何富贵、亦需要善待人之心。。。也我所悟出的道理！

(圖片取自網络)

自制Pizza

噚日手痕痕跟咗肥丁老師其中一個免發酵的的麵糰、做咗一個Pizza！

由於唔知成功与否、不想買太多材料、是但從家中摷些材料做餡就算。。。。。今次我用咗芝士、蟹柳、意粉醬、黑椒、同parma ham。。。第一次都接近成功。

雞油菌飯配豬扒粒

昨天的雞油菌只用咗一半、今天用埋剩下的煲飯、再用光波焗豬扒粒(用日式三宝先醃)

加埋少少莱、又成一碟美味的碟头飯啦、感恩！

光波合桃酥

再接再勵超好味的合桃酥又出場。。。。越做越鬆脆！

材料

低粉200gm、粟粉1-1/2湯匙、發粉(baking)1茶匙、梳打(soda)1茶匙、盐1/8茶匙、糖100gm(以上全篩過)、蛋1隻、最後加入固体莱油(Veg.oil)或豬油(lard)約100gm、
合桃碎同芝麻適量

之後輕手搓成粉糰、分割成小粒、搓圓按扁、再搽上蛋液、灑上芝麻、放粒合桃在中央、用光波焗至香、凍後(一定要凍咗才)入盒便成。

温馨提示。。。各人爐火不同、自己執生

以上份量可做50粒迷你合桃酥以上

梅莱冬菇蒸肉餅

今早做咗le個餸、由細食到老都至愛！

有人成日都話蒸肉餅好鞋、主要係生粉同水唔夠、而家健康食法係由燕麥代替生粉。

沙爹雞串

雪柜重有d雞肶肉、我又做埋d雞串比人！

泰國的沙爹醃料係我一向鈡情開的、加椰汁開匀、再放少許打碎椰糖醃约一小時、入爐焗熟、再搽多少蜜糖再焗多五六分钟便OK。

甜酸黄花魚

買咗條黄花(應該係養魚)、因為三十五蚊、海魚边會咁平吖？

甜酸汁

用雞醬、茄汁、糖、水做成個汁

魚起肉上蛋漿同生粉炸完上碟、再淋上甜酸汁就是。

蘋果炒雞粒

噚日煲完蘋果雪梨水、(点知太后又唔飲)、見重有一個蘋果剩底、费事又嘥嘢、用少許雞肶肉切粒、加青紅椒、同泰國雞醬、又炒埋一小碟、睇吓太后又吼唔吼啦。

Le輪佢日日都話冇胃囗、明明話想食乜乜、轉吓头煮好又唔食、所以有時d朋友話我点解煮咁多味、其實每碟的份量都好細、比佢選擇吓、唉！所以有工比我做、我話有老人家多多錢都咪搅我、自己家人只能硬食。

七彩云石凍

用唔同颜色的啫喱粉、魚膠粉、同鲜奶做成的凍糕、颜色美丽、小朋友開party
首選。

太后出巡日之洗头兼午餐

昨天見天气好、所以又同佢出去洗头兼食午餐、雖然佢食唔多、但自從佢肯坐私家車(輪椅)後、方便很多、亦多咗同佢外出、因為唔想佢日日坐在家中。。。等死呢！而我能做得到的。。。亦只可如此。

和她相聚的日子越來越少、我亦同時覺得需要珍惜多一点！

螺头雞殼煲雪耳

今天又係幫友人煲湯的日子、le款湯秋涼夠清潤、又滋烳。

雞殼、螺头、豬肉、南北杏、果皮、雪耳(要買漳州爽口的)

以上出水後煲2.5個钟便OK！

松子芝麻酥

用合桃酥的配方、做少少松子芝麻酥！

好好味。。。。

材料

1.低粉100gm

2.粟粉1湯匙

3.發粉1茶匙

4.松子及芝麻50gm

5.蛋清一個(蛋白)

6.軟牛油65gm

蛋黄用作搽面

以上item1至6、輕手搓成粉糰、分割成小丸子、搓圓按扁、搽上蛋黄漿、再放芝麻及一粒松子在面、用光波180度焗約10分钟便成。

南柯原是萝

唔知是否人越近死亡、思路越見清澈。。。。加減人生正正反映出。。。就算財富如何的增加。。。但生命就每天的遞减、甚至健康亦如是、無論生前如何的風光、死後當睡在冰冷的棺木上、自然一目了然、先父從病至死的十多年過程中令我啟發出很多大道理、莫非人真的要經歷過才會睇得通、看得懂？

生命何價？從下面網絡的圖片、你(妳)又能顿悟嗎？。。。其所謂南柯原一萝。。。。萝醒見青天！

有信仰的一句話。。。天父面前、人人平等。

多謝又收看我的廢話啦。。。。。

(網絡圖片)

石崇魚湯

近年这魚超級貴、由以前的八九蚊両加到(高峰期)四百幾蚊/斤！

近日友人做完手術、今天幫佢煲咗这湯、以前家父每星期我必煲給佢飲、可惜太后不喜、所以近年少煲咗啦。

我一般只加准山、恣實、果皮、白合同豬巳足夠、常飲健皮、又有營養、手術後康復之湯水。

南乳齋

係我自細食到老的一碟素菜、自細每年年初一的午飯一定食的、傳統朝齋晚雜由外婆時代巳習惯晒、所以就算平時平日我偶然都會煮來吃的。

至於配料很隨意、但粉絲、金針、云耳同南乳就是主角、其他例如冬菇、白菜、波波之類、有時會轉吓用紹莱(黄牙白)、荳卜、或草菇。

香煎琵琶荳腐

早前上門教煮映熊仔七味版師傅教咗le款順德莱、但我唔like鯪魚肉、改咗用虾膠同墨魚膠、唔落煙肉、但超級好味囉。

我的做法如下。。。。

布包荳腐一件
虾膠同墨魚膠各四両
香茜裝飾

調味。。。Pepper、盐、蛋、雞粉、生粉

湯匙搽油將材料放入蒸熟、甩模後上粉漿同蛋慢火煎香

個人囗味加入水、老抽、香葱回鑊

同場加映熊仔版

上海云吞

今次係北角振南買的上海云吞皮夠薄同滑、所以做咗一碟送比人。

我的饀料有梅头肉(要自己剁才好食)、白莱、冬菇、薑米、滑蛋(le個做法係以前一位天津姑娘教我做餃子加入的)調味有古月粉、大量麻油、盐、糖、雞粉同生粉。

煮好的云吞淋上蒜茸陳醋汁、超級好味。

全虾餐

今朝買到平虾、煮咗籠仔蒸虾飯同咖喱虾！

先蒸好飯、加入虾蒸七至八分钟、加入金銀蒜同葱花、熄火焗多五分鈡、淋上熟油同豉油便Ok。

咖喱虾先走油、爆香干葱片、加入咖喱醬同水煮片刻、回鑊虾及椰汁、落調味、一滚起便熄火。

提早過節

昨晚同太后提早過節、約了亞嬸母女二人、多些人高興d、本來想帶佢去海怡的上海姥姥試新嘢、但由於天气唔好、改咗去屋企附近的店食四川辣雞煲、今時今日食完都冇記憶、只不過自己還有記憶盡本份而矣。

近日佢個仔同佢報咗名去利國偉日間護理中心返學、一星期两天、除咗有物理治療之後、起碼有d活動、唔駛好似老豆當日咁係屋企坐監至死。

除咗有做蛋糕(只係做搅吓粉活動吓隻手 、重會油吓颜色添。

七味雞

有人從日本送來一包七味粉、我今次用日式三宝(味淋、清酒、鰹魚汁)加埋七味粉醃雞一小時左右、再用光波焗、上碟後再灑上黑白芝麻做裝飾。

効果不俗、很好吃、不過少吃多滋味、多吃壞肚皮呀。

潇灑走一回

不經不覺原來我寫blog巳經有六個年头嘞、回首過去的六年、由本來(早巳執筆忘字)的人、巳漸漸記番起有些早巳遺忘的生字、感恩！

与此同時亦有幸認識到很有網友、雖然有些遠至外地、但亦無減友誼、亦多得不少網友的開解(偶然吐吓心中的苦瀝)、更聽聽我的廢話、在黄昏的歲月中、有幸你們的陪伴、上天總算待我不薄吧。

由當初的亞虎至今之谷歌、屈指一算都寫過不下幾百網誌(雖然大多數都是垃圾)、嘻嘻、問番轉头都唔記得寫過乜、過目即忘係我跟太后學的、亦如葉倩文的一首歌。。。潇灑走過一回就是了。。。。

芝麻脆餅

多謝網友好介紹！

上咗fb的老餅整老餅、啱晒我le類老餅玩。。。。好好味、原來麵粉蒸過才差麵糰、做出會脆身d、學海無涯、又識多樣嘢啦。

 

(食譜取自老餅整老餅)