今天的生日午＆晚餐

中午食好d，有魚，雞，湯，菜，生日蛋糕，睌上食埋d冷飯（用小棠菜，蛋，葱，比目魚粒嚟炒）

Happy Birthday to myself

大難不死，必有後福😇💖🥳

哈哈哈💋💋💋

福大命大的靚婆婆

差点過不到今年的生日啊🌚

咁我咁福大命大，点都買番張六合彩先😝

六合彩都冇咁易中、竟然踏中送貨人留下的豬油、搅到成身成衭都是白濛濛的豬油、好彩手袋頂一頂、救咗一命咋、嚇到個送货亞叔、除埋件衫比我抹走身上的「豬油」、不過的士亞伯個坐位就比我的豬油搅到花面貓咁咯、真係唔好意思添🤦

生日午餐在「陶苑」

沒見面差不多两年的朋友、好有心地過來請我食午餐、不是有飲有食是朋友、友情是在乎「雪中送炭」的意義！

娓娓道談自己過去的兩年生活的改變、大家都認同是「回不到過去」的感受😢

很感恩還有關注的好朋友💞

生日晚餐

自從搬了過來後，这两年我的契细佬一定同我過生日，今晚佢又全家過來同我预祝生日，令我十分感動。

食完晚飯車我回家時還送了一盒迷你流心奶皇月餅添，真係好開心，雖然这两年沒有太后在身边，好彩還有一班好鄰居同知心的朋友，不覺節日的孤單。

菜甫虾米蒜茸醬

之前做過一次的開胃醬，用嚟煮菜或跟捞麵食，十分惹味，網上有售由五十幾至九十幾蚊不等，自己做方便又隨自己喜愛加入不同的配料，我这次的只有菜甫，虾米，辣椒，蒜茸，平時我用手剁，今次太懒，用咗搅拌机。

豬油肉碎窩蛋飯

本來今日食完下午茶，見重係好飽，本想唔食晚飯的。

但諗諗吓又驚半夜肚餓瞓唔到，反正又整咗「豬油」，一於炒少少肉碎，加隻窩蛋，蒸半碗白飯啦。

迷你合桃酥

今天自己練咗d豬油，用咗一些嚟做迷你合桃酥。

我今次的配方如下:

低粉150gm

合桃打成碎90gm

糖70gm

發粉1－1/2茶匙

食用梳打1茶匙

練豬油约30gm

蛋王1只搽面用

白芝麻（用來灑面）

以上搓成粉糰再分割成小丸子，搓圆後搽上蛋王再灑上白芝麻，再预熱焗爐150度焗约10至12分鈡。

肉碎魚肚炆節瓜

自從發現咗有急凍、巳浸發好的魚肚賣後、我的冰格長期有一包存貨、方便隨時可煮餸用！

今天用了幾塊嚟炆節瓜、我加咗肉碎、青島貝一齊炆、送飯一流呢🤤

疫情下變咗口罩黨

經過咗差不多一年時間的帶着口罩示人，基本上都唔記得自己的本來面目，由最初期的呼吸困難，到咗今天巳經巳習以為常，甚至帶着來睡覺(在醫院時）都不覺辛苦，可能到咗有一天不用再帶口罩時反而不習慣呢！

🤣🤣🤣

亂棍打死牛魔王

哈哈哈🤣🤣🤣

個名好特別呀！

除咗牛肉條，有蘑菇片，红蘿蔔片，同埋韮菜花。

蒸魚午餐

好耐冇入街市買餸了、趁住拎被去自助洗同乾的空檔、加上太掛住d海魚、胆粗粗入一轉、速去速走、買咗一斤小黄花、午餐蒸咗四條、小露筍炒肉片、两匙白飯🤤

由於小黃花好新鮮、食得好開心呢🤤🤤🤤

香蔥肉絲炒粗（蛋）麵

近日迷上食蛋麵、無論放湯定炒、因為一個蛋麵加埋配料我都食唔晒、所以今晚只加少少肉絲、紅蘿蔔、2只蘑菇、炒完已經好大碟嘞😅

我最終都只係食咗2/3咋😢

炒椰菜花

聽聞椰菜花有慢升糖指數、試吓切碎椰菜花、加入雞蛋、牛肉粒、當炒飯咁炒、剛好有两湯匙白飯食剩、一於加埋落炒、咁又一碟新菜式啦😂😂😂

日本仿翅（碗仔翅）

自從响應環保（加上窮）的關係，巳經十多年沒有吃真翅，發覺这仿翅不但平，又極似真翅，我好多時拎嚟做碗仔翅，又试過做炒桂花翅（蟹肉或瑤柱加銀芽乾炒的），做完好多時呃到那些平時少吃真翅的人呢🤣🤣🤣

雜糧（迷你Pizza）

今晚又試吓食雜糧、中午做咗個麵糰、係雪柜摷咗d火腿、蘑菇、芝士、一於做個迷你Pizza當晚餐 😄

蚝油牛肉碟头飯

这两天的食慾又麻麻、所以盡量不吃太飽、今日只準備了少量的白飯、炒咗少少蚝油牛肉同烚咗半個椰菜花就算👇

虾記的腸粉

個人十分喜歡食腸粉、可惜一路以來最失敗就是始終做不到、所以只好尋求好食的腸粉、土瓜灣北帝街有間老字號的粉麵廠、門口常常有蒸好的腸粉賣、我今天特登帶備膠盒落去買咗$40腸粉返屋企慢慢歎、加埋很好食的麻醬豉油、真的是很好味呢👏👏👏

薯仔炆排骨

見好耐冇煮这個餸食、今早拎咗一只大薯仔、一包金沙骨、用自己調教的醬（蒜茸、老抽、柱候醬、蚝油、糖、各少許）、用酒開勻！

炆定做今天的一人午餐👇

網友高Ling的咸薄撐

早两天網友「高Ling」在臉書上載咗個咸薄撐的食譜，所以今日胆粗粗又跟吓風。

個薄撐果然好好食，尤其是煎完個边边十分香脆。

蒜茸牛油汁焗比目魚

今早食比目魚跟少少扁意粉，事源個雪柜開得太凍，所以很多蔬菜配料變晒冰（包括红蘿蔔，洋葱，檸檬），為咗唔嘥嘢，唯有用咗嚟放在焗盆上，放上搽咗牛油蒜茸汁同黑椒碎嘅魚塊，焗咗嚟跟意粉做午餐囉。

好鄰居

昨晚我的韓國鄰居又给了碗「不知名」的湯给我飲，其中包括三種不同的魚（大眼雞，三文魚，鱸魚）蕃茄薯仔，大葱，洋葱，栗子，鮑魚＋？？。

因為每次佢煲的湯都千奇百怪，我一定見到佢落咗乜才敢飲，因為有次我見佢想落「花椒八角」，嚇得我立刻stop咗佢😲

雖然佢的湯怪怪，但今次又幾好飲，而且搬了來後，好幸運地遇到幾個互相幫忙的好鄰居，相信是母親留给我最后的礼物！

感恩＾＾

咖喱雞飯

昨晚煮定個「楊協成」咖喱醬的咖喱雞，雖然嚿雞扒係急凍貨，但相信自己做的点都好食過快餐店那些出品吧😅

煲粥炒麵晚餐

昨晚煮個發菜蚝士豬骨粥、再加碟銀芽豉油皇炒麵、唔錯！

個麵我是用（土瓜灣的虾記麵廠）嘅蛋麵炒的、平時用來炒麵的麵餅太大、所以我多數喜歡用蛋麵炒🤤

溫馨提示：無論加入發菜的粥或湯、同炆冬菇之類都是最後的十五分钟

才好加入、因為發菜本身不能煮太耐😊

水晶皮素粉菓

前幾日係YouTube睇到條片教整这個水晶皮素粉菓、今日試吓、点知原來個「水晶皮」都唔容易搅、幾經辛苦、大汗滴細汗、終於整咗12隻賣相唔靚的素粉菓、雖然辛苦、但個皮真係好正囉👏👏👏

香煎比目魚配沙律

这是今早的午餐，先用日式三宝（鲣魚汁，味淋，清酒）醃魚，之後煎香就是。

沙律有蘋果，薯仔，烚蛋，菠蘿

七彩翠肉瓜炒肉片

由我第一天學烹飪開始、師傅教落食物除了要好食之外、色、香、味、缺一不可😛

我的雪柜常常有唔同顏色的蔬菜做料头、方便隨時拎起來加重食物的颜色！

「色亅是食物的第一関、首先吸引人的食慾是十分重要的、其次是「香亅、最後當然「味亅啦💞

健康冇油湯米粉

今日食得健康d、冬菇先煲成湯底、將瘦肉絲、翠肉瓜絲飛吓水、再放回冬菇湯內、加入巳出水之米粉、再滾起時加入塩便可熄火！

檸檬杏仁曲奇

昨天在無聊的心情下又跟咗一個煮食網的檸檬杏仁曲奇食谱、大致上都唔錯、焗完口感幾好（雖然未食過原作者的出品）！

現在每天都嘗試唔同種類的食譜（只要不花太多錢）🤤

煙腩蒜茸牛油汁扁意粉

一連幾天食飯，所以今早煮咗碟扁意粉做午餐，做法簡單，將意粉煮八至十分钟，過冷河，煙腩切條，白鑊炒至微黃，落油再炒，加入扁意粉炒吓，加入约2匙蒜茸牛油汁，兜匀便可上碟。

從生看死的心情

近日似乎看通某一樣事、之前曾經講過很很害怕作某些檢查、但諗深一層、反正他日死後都會被解剖、為甚麽不可以用自己「巳死」的心態🌚☠️去面對、或者可克服驚恐的心情吧！

对於生死現在有点另一種睇法、回想起當年外婆離世時我陪伴着她、父親在醫院走時亦剛好在他身边、可惜到母親臨終時（一個朝夕相伴最長時間的親人）反而未能趕及送她最后一程、心中一直耿耿於懷、前幾天突然記起外婆在世時的一句話：『人未註生先註死』 好似釋懷了🤔

好似最近一位網友不是靜悄悄地「獨自」離開咩？

魚肚炆雞

其實煮一人餐實在很困難、今晚食埋剩低的魚肚同雞、上次用蒸的方法、今次就加多少少魚肚（我至愛）、用炆的方法煮埋佢、半碗飯只吃一半、睇怕就嚟升仙嘞🤦

特別的配搭：午餐

由於今早屋苑冇水、所以早一点食午餐、特別配搭的粥（有雪耳、鮮百合、沙蟲、青島貝）、炒咗碟米粉（有節瓜絲、红蘿蔔絲同瘦肉）、味道清清地、都算健康😳

冬菇馬蹄蒸肉餅（豬肉山）

早前有快餐店推出这「豬肉山」、不過很快便消失咗！（香港人真花心呀）😂

今晚我又即興玩番舖先、見有幾粒馬蹄剩低、加些冬菇、整個肉餅、再用個深碗蒸、之後反扣出碟（由於健康的問題、我没有加到咸旦王）！

共煮分食餐

今天再次同鄰居共煮分食餐（上星期從醫院回來後、自我隔離一星期）、每人煮兩味、再分別各有各食！

一樂也💞

苦中作樂的心態

自從由醫院回家後、心情一路都不太安好、好像一個等候判刑的犯人😢

朋友們都加以安慰、叫我不用太担心、因為檢查的结果未必如我想像中的咁差、其實我对死亡並不恐懼、驚的只是住醫院、一想起父母留院其間的種種片段、心中就感到害怕！

現在唯一可以做的、就是每天忙碌地製作不同的食物、暫時忘卻所担心的事🤔

近日還迷上製作fb搅笑的头像👇

蒸棉花雞(睌餐)

今晚蒸咗碟棉花雞(魚肚冬菇蒸雞)，加多半碗白飯。

食完飯後甜品有碗蛋花馬碲露。

雜糧午餐

秋雨綿綿，令人心情也受到影响，今早整了幾只煎韮菜餃同埋迷你腸仔包食就算嘞。近日運動量不足，都係食少少為佳。

最近發覺焗爐的溫度不太好，每每麵包都焗得唔靚（太燶），等有錢都要換過一個有內置風扇的。

蔥油塩焗雞肶扒

網友雀后早兩天做過这雞肶扒、今天我用沙薑粉醃了半天、再撲上蕃薯粉煎香雞肶扒、切件、後再淋上滾油煮之薑葱蒜茸、十分惹味😋

比目西京燒

今天食得特别些，昨天從土瓜湾的凍肉公司買咗包比目魚(原來比銀雪魚還貴呢）！

用西京麵豉加味淋將比目魚醃過夜，预熱焗爐將魚扒焗至两面焦黄，可跟沙律醬食，不過我今次烚咗少少豆角跟飯食。

青春無敵的婆婆

今天fb又彈出張陳年舊照、原來这是當年第一次做伴娘的照片、看着發黃的照片、深思着當日的情景（不過無法勾起任何的片段）、不竟巳是五十多年前的往事了、而相中的男主角亦離開了这塵世😢

近日频频回憶着往事、雖不是每件都記得清清楚楚、但部分還有零零碎碎的記憶、相信暫時還未患上「腦退化」吧、哈哈😁

張媽媽的菠蘿包

今晚無聊上網發現「張媽媽」的菠蘿包十分簡易，不需要臭粉。

所以做了幾個做早餐，雖然賣相唔靚仔，但十分之好食。

龍躉骨煲准山恣實湯

最近開始每個月我會煲一次「老火湯」同蒸一次游水魚、因為年纪大咗不能飲太多老火湯、一來唔健康、二來貴、三來一條友又唔飲得咁多、所以我煲完就分享比幾個鄰居！

今次的龍躉骨加埋豬扒骨同幾樣

药材、都幾好飲、至於今晚就會蒸條黑立做晚餐😊

十年河東.....

....十年河西、这两句說話、是我近日從網絡中學回來的！ 原來这两句說話是反影出：我們現在生活上的轉變🤔

以前外婆有句說話成日掛在口边：花無百日紅、當時年幼、並沒有领悟、現在回想過來、原來是一種警示😳  

做物主是公平的、試問人的一生怎可能永遠都是順風顺水？有得便必有失、個人認為：人無論面对順景或逆景、都應處之泰然、因為黑暗之後、必有黎明🙏

菜遠雞柳碟头飯

自從醫院回來後，胃口一直麻麻，食唔落，可能是那排石药的影响。

今朝食咗半碗飯，剩低半碗又唔想晚晚食炒飯，所以由冰箱拎咗少許雞柳，再加d菜心，煮咗碟餸扒在飯面就算啦。

西湖牛肉羹

見好耐冇整過西湖牛肉羹，所以今早煮少少嚟食，心情雖然唔多靚，但煮食对我嚟講一点都不能「馬虎」。

自從食排石药以來，这幾天的血壓一路都偏低(姑娘早巳講明），所以近日都盡量不外出。

網誌生涯的十週年回顧

原來屈指一算、不經不覺我由開始學人寫網誌巳有十年之久、回想當初開始寫的時候、原意是想舒發心中的不快、与此同時亦想將平時喜愛的烹飪菜式留作記念（雖然自問不是專家、但比很多人多了少少心得吧）！ 過去的十年道盡心中的甜酸苦辣、其實每個人的人生、匆匆只是數十個寒暑、好彩的或可行到八九十歲、亦不乏有英年早逝的、所以自問能夠行得到今天的歲數亦覺滿足了🙏 曾經有久未联络的的朋友問我：妳这十年過得如何？我只是笑笑地回答、去我的網誌看一看吧、自有答案🤔 由於近來有多位網友離世、他日偶然想起往日的点滴時、亦可重溫佢地的網誌懷念一番💐

綿綿不絕的壞消息

近來似乎只有壞消息不斷的發放、真令人心情大受影响、自幾天前自己身体的問題、今早零晨時分又收到一個令我十分唔開心嘅消息：網友龍哥、往生了、7号那天還在fb睇到他的帖子 😢原來他9号那天睡夢中離世 龍哥是我第一批在網络中認識到的朋友、雖然只見過數面、但常互動、本來諗住疫情過後再去探他、因他十分喜愛我的食物、可惜再無机會、但願佢離苦得樂、再不用受身体上的痛苦吧。

 龍哥、一路好走!