雖然今晚未能去送別她、我在花店訂了一個花圈、作為送別她的心意、我們的數十年友情將隨着她的一縷輕煙而寫上「句號」😭
2022年6月30日 星期四
2022年6月29日 星期三
壞消息一個接一個
今晚刚好收到一個從小玩到大嘅好朋友離開的消息、她先生刚通知我明天是守夜、但因疫情之原因、叫我不要去(因自己的年纪亦大)、唉!相信我今天晚上一定會失眠、回想同她的点点滴滴、八九年曾去加拿大探訪她的往事、一下子湧上心头!
这個從小學到中學的兒時玩伴、雖然有段時間我們失去联系、但從她回歸香港後我們再次的相遇、曾有段時間(大概08至10年)常结伴去澳門遊玩、之後由於在2010年後母親開始患病、我們又再次失联、不過这幾年間都知道她身体開始不太好、估不到这幾年原來她患上食道癌(根據她先生的引述)、本想日後去墳場拜祭吓她、但據她先生說她的遗願是將骨灰撒落海😭
現在只能心中祈求天父能引領她的靈魂返回天家🙏!
人生就是这般的無奈、这两年間先後走了不少親朋戚友😔
(圖片取自網絡)
老正同學會的聚會
我們幾個「老顽童」雖然認識不是很多年、但個個都是「為食貓」、早年成立了這個「老頑童吃喝玩樂组」久不久便出去聚一聚、可惜近年疫情的關係、有一位流落在澳洲、不知歸期、又有一個突然在二月蒙主寵召!
唉!世事難料、所以今天我們相約在 『I square 』的彩福飲茶聚吓、目的是見得一次得一次、珍惜我們的相遇相知😉
今天的出品唔錯、盼望好快再有見面的机會❤️🙏
欖菜魚塊炒西蘭花
今日約了幾個『老頑童』去飲茶、自疫情爆發之後、我們甚少聚會、趁今天幾個有空、找緊机會見一吓、珍惜的是「見面」、食反是其次啊!🤔
所以一早幫鄰居做了这個餸、好讓她帶返工吃!
先灼吓西蘭花(油、塩、味)、拎起候用、煎吓魚塊、加入欖菜(潮州人用的)、回鑊西蘭花、打個薄獻即成😋😋😋
2022年6月28日 星期二
廚餘雞煲
今天收到order去飲茶、所以一早预備定的食物又要搅搅佢嘞!
雪柜的廚餘有少許翠玉瓜、雞肶菇、红蘿蔔、同幾嚿雞件、我今次用咗做麵豉湯的湯包嚟做個醬料、炆完試咗一口才是比鄰居、味道唔差、但味道比較濃咗少少、但還可接受🤔
2022年6月27日 星期一
全日都是食、食、食
一早返醫院抽血、之後落咗筲箕灣同表姐飲茶、去了『明星金閣』、点心都ok、價錢亦算平、值得再去嘅🤔
到咗今晚有朋友請食飯、我們一行三人、去咗那間十分難訂位的大排檔風味館食飯、今次係我搬了過來差不多四年的第二次幫襯、雖然今次的「拔絲咕咾肉」有点失水準、但整体嚟講都值得再去嘅、他們在七月將會搬去隔離街的大舖、期待到時「咕咾肉」回復當年的水準吧!
2022年6月26日 星期日
西班牙漿果梅头扒
下午落咗去(平時買開)的凍肉公司找尋这種梅头扒(據聞是黑毛豬的一種、用粟米飼養的豚肉)、我又學人試吓煎嚟食、店長说不用加什麼調味、只用盐、黑椒碎醃片刻便可煎熟、跟白飯或蔬菜!
我今次除咗配少少白飯、再加一些烚過之翠玉瓜、紅蘿蔔、雞肶菇
不過食完之後覺得不似我之前所盼望的效果、大致上可以講ok、肉質帶爽身、对我嚟講似乎硬了少許😚
2022年6月25日 星期六
謊言的世界
不知什麼時候我們这個世界變得如此的荒謬、有時真的分不出什麼是真、什麼是假?
可能我的年代资訊沒有现在的發達、人心亦簡單很多、不過亦可以話自己一路活得「太單純」!
現在每天的新聞都是出爾反爾、明明一時話沉沒了的船、一下子又可以起死回生?好彩地自己年紀不用再面对这些謊言太久、可憐的是我們的下一代、將要面对这樣的世界、可悲😔
願萬能的神能拯救我們這些罪人吧!
🙏
(圖片取自網絡)
2022年6月24日 星期五
飲茶日
今早同鄰居去商場的酒樓午餐、之前新開時去過一次、但覺得「真把鬼」!
原本想唔去、後尾鄰居的朋友想去試吓、諗住这是最后的一次、好彩最后都唔差(可能換了廚房)吧😅
不過有新的發現、原來而家送餐服務都開始轉用「机械車」、相信不久的將來會越來越多人失業嘞🤔
大勢所趨、睇嚟我們这些亞婆要將要被「淘汰」啦、算吧、反正同後生都有「代溝」以前我常对着母親講、点知現在是比人说有「代溝」、唉!風水輪流轉🤣
又有新騙案
今早在YouTube 到聽到兩宗新騙案、一個是77歲的老婆婆同一個43的IT男、分別墮入「網戀」Oh😱真係impossible
第一、年屆77歲都可以咁黐線
第二、身為IT男相信學歷都唔差
真以為是睇緊戲?
第一單可能老人家缺乏家人的關心、應該同男女之「戀情」沒有關係、容易墮入「別人関心」的陷阱、還可理解
但第二單、就真的令人「咋舌」、边有咁「大隻蛤乸隨街跳」吖的完美故事、除非是中了降头吧!
可能以前被騙得多(但絕不是網戀)嫁、早巳百毒不侵😅😉
乜住公屋都可以咁富贵嘅?
(借圖片攝於YouTube)
講嚟講去都是一個字:「貪」
講完😅
勝瓜云耳炒生魚片
昨天晚上食埋剩低的半截勝瓜、同生魚片😚
我用咗云耳同红蘿蔔嚟配搭、無論颜色、味道都十分滿意、所以不快的心情一掃而空、記得最近曾認識的一位朋友提醒我「与生俱來」的性格真係改不了🤣
Never mind 这才是真的我吧😜
2022年6月23日 星期四
特色的甜品
當我無聊的時候、腦子就左想右想的想想怎樣制造一些新奇的食物、尤其是甜品!🤔
今次我用咗芒果啫喱嚟配白涼粉、之後再淋些黑糖漿、睇嚟颜色唔錯、口感亦唔差、唯一要改進的就是白涼粉下次可加多一些水來做、因為今次口感是硬咗少少😚
今天的我推倒昨天的我
前幾天還說緊別了依然相信.....以後有缘可再聚😔
但現實歸現實....珍宝海上食府...真的永別了😭
这幾天收到不少朋友的WhatsApp (他們都知道它曾是父親(第一代)的心血、替我難過、但我对他們說、無論第一代或第二代的創辦人早巳離世、这個结局是必然的、難過只是这樣的結局是有点殘忍(應該說是不得善終)、但又如何呢?
这幾年的變化亦是無法理性地去解讀、好像自己一樣、一次又一次地去相信这世界一定有「真誠」、不過同樣地一次又一次的失望、有時真的懷疑自己的「智商」是否正常🤣🤣🤣
(圖片借取東網)
2022年6月22日 星期三
2022年6月20日 星期一
滑蛋虾仁飯
昨晚睡得不好、但今天還是睡不到、头痛沒有了、但總覺有点不妥、不過還是不要再想落去、越想越驚🥱
今晚唔想花心思去於煮什麼、是是但但煮個「滑蛋虾仁飯」就是😔
今早還好好地的情緒、突然又波動、希望今晚個头不要再痛就好、真的能一睡不起就最perfect、亞媽當年有我、若今次自己有事就死得、唉!唔諗唔諗......🥱
平凡的食譜(薯仔炆腩肉)
今天一睜開双眼、原來昨晚沒死到添(因昨天整夜個头十分痛、有種觸電的咁痛、心諗、千祈不要「死一半」就好嘞).....即係中風囉、若真如此就連自殺都冇本事啦😔
講完傻話又嚟講吓今早食乜先🤔
雪柜有包腩肉、一個薯仔、咁就用最方便的方法炆咗佢、影完相就比鄰居帶飯返工囉!
將腩肉先煲至半腍、跟住用薯仔、老抽、糖、少少柱候醬、水炆至收剩少少汁便ok.
蕃薯餅
前兩天買落的印尼甜蕃薯、今早見有心情便整了幾個蕃薯餅給鄰居、自己只試了一口就算、因為下星期要抽血、再下星期要同醫生見面、費事比佢鬧😅
我終於下定決心不再上IG、因為不喜欢、而且「like」我的人多數是fb的朋友、所以可有可無、而且最近有不太開心的经歷、一刀切便是!
近年個性格比較不再「婆婆媽媽」拖泥帶水、以前的性格不太好、太心軟、有改變是好的😉
2022年6月19日 星期日
双蛋三文魚炒飯
昨天為了要參加教會的一個團契、所以回家後匆匆炒了一個飯食就算!
今次的配搭版颇為特別、亦算高胆固醇、偶然一次便可、但不應常吃🤔
我用了咸旦(先蒸後切粗粒)、雞蛋拂完炒過候用、三文魚切粒、白飯一碗、最後準備一些海苔碎
做法:先炒三文魚粒、加入白飯炒至鬆身、加入蒸過之咸旦粒、雞蛋、加入調味(少少塩、豉油)、最后麗上海苔碎便可上碟!😋
是不是很彩色呢😉
2022年6月18日 星期六
迷你冬瓜盅
今早無端端買咗個迷你冬瓜、本來諗住滾個瓜粒湯就算、突然傻傻地想學做冬瓜盅、原來勁麻煩的、首先要開咗冬瓜嘅『天靈蓋』、又要挖冬瓜入面的瓜肉、再搽上塩、味、酒、在內面、醃約45分钟令瓜肉入味、之後用熱水洗過、放入清雞湯(方便版)、燉約1至1小時半、最後放入飛過水之餡料(我今次只用虾肉、蟹肉、草菇、雞肉)再放入瓜內再燉多15分钟、便可上枱
这是我自創的方便版、雖然今次大手筆買咗只蟹嚟拆肉、係有点肉痛、但以我的性格、為咗要食得完美、又真係黐咗少少線嘅🤣🤣🤣
算吧!民以食為先😋😋😋
2022年6月17日 星期五
2022年6月16日 星期四
冬瓜炆雞
其實这醬汁亦不是真的自創嘅、有次在fb 見到類似、唏!所谓來來去去都是那些调味、只是怎樣配搭吧!
今次我用咗盐焗雞粉、加入蚝油、老抽、糖、指天椒、混合一齊、先將冬瓜用水煮至半腍、拎起候用、再爆醃過生粉之雞件、贊酒、將醬汁放落去、加入冬瓜、炆至汁液剩低少少便可上碟或沙煲、搅掂😛
現在未食、睇相色同香就冇問题、食完再報告😉
別了依然相信....
...以後有缘再聚!
这两句話我從fb中的文章中睇到嘅、從中啟發到我对分離的盼望、記得很久以前一個在英國認識到的朋友、自回港後失联、估唔到某年某月我們竟然再次重遇到、所以「缘份」冥冥中早巳有所安排的🤔
回想起我曾经為了宗教的問題放棄咗一段颇長的感情(當然不是主因)、但估不到多年後的我、又竟然因缘際會之下接受这「宗教」、不是冥冥中的安排嗎?加上这幾年世界所發生的事、令人对人对事都有所改變、但願以後的一切都向着好的方向吧🙏
(借圖)
2022年6月15日 星期三
芝士奶油大虾焗長通粉
一早起床摷雪柜、發覺有幾只急凍中虾同mozzarella 芝士、所以成就咗这碟東西中午吃😋😋😋
近來不停鑽研以前未煮過的菜式、加以再改良、可能太無聊吧!
以前幫人煮食時曾試過一個月都可以不重覆菜式、其實本身只愛煮不會吃太多的人、尤其是現在年纪大了、抱着保重身体尤如孝順「荷包」的心態、更加小心😅
这個做法簡單:
首先下解凍虾、撲吓盐同乾粉、半煎炸候用
用炒麵捞(牛油、盐、麵粉之後加入雞湯同鮮奶)的方法、過濾後便成白汁
加入巳煮至半腍的長通粉兜勻、加入mozzarella 芝士、放入焗盆、放上中虾、再淋上餘下之白汁、上面再加一些芝士、放焗爐焗至焦焦地便ok😋😋😋
懷念的童年
今天又摷出我年幼時一張發黃了的照片、勾起無限回憶、相信这張是攝於當年大约四五歲、地点是香港仔工業學校对出的小瀑布附近(唔肯定?)🤔
那時天真爛漫的自己、生活雖不富裕、但有一般孩童的生活、外婆的溺愛、現在回想起還是甜絲絲的😘
無憂無慮的童年生活、相信是每一個人心中的盼望、有時回憶亦是一種樂趣😉
2022年6月14日 星期二
2022年6月13日 星期一
翠玉瓜支竹牛肉
昨天買咗很多蔬菜、所以今天要继续消滅佢、希望今天食得晒、夏天很難儲存蔬菜😂
用咗炸支竹、同牛肉、整碟翠玉瓜炆支竹、之後兜入用麻辣醬炒過之牛肉、都幾惹味!
之後又食唔晒d支竹同牛肉、諗諗計再變一碟舊餸新煮意、變、變、變、變咗碟「甜酸支竹牛肉」:支竹同牛肉切粗粒、加入蕃茄洋蔥粒、埋過甜酸獻、用嚟送潮州粥真係絕配呢😋😋😋
哈哈、婆婆係唔係好叻女呢?
偽上海全家福
这個上海菜是新年上海人必食的意头菜、應該係代表全家人齊齊整整一起渡歲卦?❤️
可惜太多材料、為了一試不值買这麼多材料吧、所以我做了这個「偽版」、材料用雞殼做湯底、有上海咸肉、腐竹、红蘿蔔、娃娃菜、當然唔少得主角「蛋餃」啦
我覺得都ok嘅😋😋😋
2022年6月12日 星期日
2022年6月11日 星期六
訂閱:
文章 (Atom)