除夕晚餐（2022）

食得簡單一点、買咗隻平雞、今晚食幾嚿「滑雞韓國麵」、留番一些明日蒸雞飯😅

順便煮幾粒自制的「麻蓉餡」湯丸、取過意头「圓圓滿滿」、雖然不太流沙、但都ok😋😋😋

苦盡甘來（苦瓜炒肉片）

今日係2022最后的一天、過了今晚便是2023年、盼望新的一年有新的開始、疫症遠離我們、求天父继續「保守」着每一個人、不論是否基督徒🙏🙏🙏

这疫情困擾着大家三年多、希望新的一年一切能回復正常、祝願世界和平、值着这碟『苦盡甘來』结束我們的厄運就是🤔

一人边爐餐

一早出咗街、因屋苑全日冇電、上午的契妹/姐飲茶、下午在吉吉島逛、逛完又在「大快活」下午茶、分手後搭車回家途中又被「大家樂」的一人边爐餐吸引到、所以試吓囉！

估唔到味道及價錢都可以接受、全日瘋狂地食、食、食、因為「一月」後將會少一些出街、一切都是未知數、唯有自求多福吧😅

不用再『嘟』的早餐

今天是個特別的日子、本來平平無奇的早餐、為了慶祝不用再『嘟嘟嘟』的日子、一定要留低这記憶🎉🎉🎉

不知未來的日子如何都好、今日終於结束这三年來的「惡夢」😉

鲮魚肉釀青紅椒

昨天下午行经街市、是有大隻長身的青紅椒、於是買了每樣一只、回家後釀咗前日剩低的魚肉、釀完見有很多嚿、所以就唔食飯囉😉

可能爐火大了一些、煎完好似燶咗少少、反正是自己食、冇問題啦😅

南瓜瑤柱菜飯

今早要返「查经班」、所以一早做定碗飯才出去、回家後便可以即食午餐、加埋昨天留下的一嚿「虾子柚皮」配合一起食

做法很簡單：

先蒸淋瑤柱撕開候用

再蒸淋南瓜叉爛候用

以上两種材料同米一起煲飯（比平時少一些水、因為南瓜有水份）

小棠菜切碎加盐用油炒熟

當煲好飯時才將小棠菜加入混合一起（这樣才保持青綠色）

虾子柚皮

今年一直買唔到「沙田柚」、所以沒有做過、前幾日係超市買到兩個、試吓做番次、不過唔敢期望過高、浸了两天水、今日去街市買齊料、開工大吉、搅了幾小時、終於完工、今次自己感覺不太滿意、但鄰居就話好食喎🤔

全程首先刨皮、浸水两天、渣乾水後飛水再渣乾（目的去澀味）、之後用鲮魚骨煮湯（我加咗少少青島貝）、之後隔渣留湯、放回煲裡加入柚皮、魚湯、豬油（自己整）、煨至入味及鬆化、用蚝油、虾子、老抽、糖、少少魚湯打個獻淋在柚皮面便成😉

Boxing Day Party

每年我總會去朋友亞嫂屋企過聖誕、有時是25号、有時是26号、经過幾年疫情的停辦、今年再去、選擇了午餐「派对」🥰

由於她亞嫂是學校的家政老師、所以西式的食物特別正、最後甜品是意大利蛋糕😛

洗礼日（主日學崇拜）

今天是一年一度的洗禮日、有新的弟兄同姊妹參与、雖然我明年才會洗禮、但亦想知道是什麼樣的程序、原來都很簡單、只需要回答牧師的幾個問題、當然第一個問題是：承不承認自己是個「罪人」啦！（我就算未信主之前亦巳知道自己是個罪人）🤔

回家後吃了一早準備定的四季盐焗粉醃過「電飯煲雞」、少少灼菜、十分好吃😋

平安夜的佈道會

今年第一次參加教會的『平安夜』佈道會、目的是想增加对教會的認識！

回家後同鄰居一起吃個「簡單的晚餐」~ 一樂也❤️

其實簡單就是幸福 ~ 祝願世界和平、疫情早日完结🙏

美心的「長者」晚餐

之前食過美心的海南雞飯做晚餐、今天見收工時途经美心快餐、心思思又想試吓另一款蒸魚餐、鼓汁蒸黄立䱽加盅燉湯、減完「長者」的優惠、承惠（$59.9）、賣相ok、味道可接受、反正我都食唔晒、费事再入廚房搅一餐死啦🤭

冬至午餐

本來今天同鄰居一起過節、但由於这两天好攰、今年唔自己煮、相約一齊落「龍宝」一起食午餐當「過節」

我們三人每人（$120）、十分抵、又唔駛煮餐死、而且明天一早又要入天水圍、所以休多一点吧🤔

強記美食

很久以前曾是母親和我的至愛「強记美食」（以前是在灣仔馬師道的路边小舖）、原來巳经搬進入洛克道的一間正式舖、昨天晚上偶然路经見到、當然外賣我的至愛的「糯米飯」再加多碗「碗仔翅」啦！

不過食後發覺除了價錢贵咗、食物質素亦下降了不少、所以應該是最后的一次幫襯了、唉！失望🤔

两餸飯之崛起

今晚無意中係fb見有人講起这一個話題、这幾年的疫情原故、原來不知不覺中这一種風气形成了、坊間有不少这類的食物店舖、但味道同質素十分參差不齊、我試食過幾間（個人口味覺得）、有些得個樣、味道不好、試過當中有一兩間色、香、味俱存、雖然各人口味不同、不過有些真的很難食嫁😅

点都好啦、在这艱難的日子中、有份「家的感覺」也是唔錯的選擇、有時对於不善煮食的朋友、重拾「家庭餸」的感覺總好過那些西式的便當嘅🤭

（以上全是個人的感覺而矣）

（圖片來自網络）

午餐&晚餐（19.12.2022）

今日午餐同晚餐都在外边吃、因為今天覆診很忙🤔

中午係上海街吃了一碟慢煮牛肉丼

晚上係大家樂吃了咖喱牛腩飯

不過都麻麻

共食午餐

今天韓國鄰居放假、所以我幫佢煲湯、佢就煮她的韓國黑豆飯、同菜、煎三文魚骨、我就煮咗個雞蛋肉碎豆腐煲、連同我隔離那位大陸鄰居一齊食、樂也融融、鄰居和睦是很重要的😄

超级養顏的糖水

早前又係fb處學到这糖水、話說在这寒冷的日子裡面吃一碗好過貼幾片面膜喎（應該是搅笑的吧）！

材料除了主角木瓜、還有雪耳、杞子、红棗、百合、當然唔少得「鮮奶」啦❤️

飲完真係好滋潤呢😄

咸旦肉餅山+菜飯

今日超级凍、重要係好大風添、原本唔打算出街、但因要買鮮奶、所以匆匆去廣場買了回家、速去速回都感到好凍、加上近期每日都「低温」、更加不想外出了🥲

今天的午餐係咸旦肉餅山加碗菜飯、十分滿足😄

臘味飯+燉湯

今晚凍凍地同鄰居蒸兜臘味飯（臘腸+鵝肝腸+臘鴨肶）、加碗燉湯（雞肉、日月魚、紅棗、百合、合桃、圓肉、杞子、腰果、海參）、再加碟生菜、不過我只吃了很少臘味（每樣一嚿）、加碗湯同少少生菜咋😅

嫩雞煨麵

今晚同鄰居做了碗嫩雞煨麵（平時多數用上海麵做的、但我唔喜欢上海麵、因為好腍身、所以改用准山麵做）

这一次物盡其用（一只雞、昨天用咗肶同翼做纸包雞、今日用雞胸切粒同小棠菜一齊配麵食、雞殼用嚟做個湯底）、十分抵食、成隻雞$38、個到咁多款式、自己都要寫個「服字」🤔

牛油白蜆貝殼粉

今早係Taste 買咗包急凍嘅牛油白蜆（唔算贵$38）、返屋企先煮咗一些貝殼粉、再將那牛油白蜆加埋入去煮片刻、加入牛油、蒜茸、雞清湯、黑椒、煮完放入煲仔上桌、唔錯😋

颐東下午茶

之前表妹從加拿大托教友帶了「利是」回來比我、礼上往來、我又托他們帶回小小礼物返加拿大比表妹、所以今日下午約了去鳳城的舊址（現在叫颐東）下午茶、顺便给他們夫婦二人送上自家做的纸包雞同乳鴿作為謝意🤔

希望他們喜欢我的出品吧😄

偽腰果酥

前两天買咗「丽姐私房曲奇」、我靠想像跟着嚟做、今次應該有七成相似、等我继续努力去改進、相信總會有一天能成功的、永不放棄💪💪💪

今次我做咗兩打（24粒）、用低粉120gm、少少盐同糖、植物菜油大約50gm 、發粉1/4茶匙、食用蘇打1/4茶匙、搓成小圓粒、搽上蛋漿同腰果放面、用330華氏焗約15至17分钟

沙嗲魷魚

之前係一間牛雜麵店買咗樽「很正的沙嗲醬」（佢地自己炒的、可惜现巳结業、用完冇得食喇）、今早突然想吃沙嗲魷魚、走落街市買两只水魷、点知原來好贵喎、两只水魷竟然要$60蚊、做完都唔係好大碟、如果係街食都唔知要賣幾錢一碟咯！🤔

而家乜鬼都贵到飛起、生活越來越難過🥲

斑蘭咖吔

第一次學人做、唔知成功与否、因個人喜欢用嚟搽麵包、曾经有一個「超正」的食谱、可惜搬屋時遺失了、靠記憶試做一次、今晚雪完明天開估、若成功就分享做法同份量🤭

往事如煙的日子

今早fb又了彈出的舊照、那年每星期同母親出巡去理髮舖洗头兼修甲扮靚靚、原來已是六年前嘅事咯、轉眼間母親亦離開差了不多三/四年🥲

回望過去是唏嘘的、好彩可以陪伴着她走過最后的幾年、希望她在天國能和外婆團聚（雖然她們並沒有信主）

菜飯+五香排骨

一早出去買齊料、今早出去崇拜前滚定個湯（鲩魚尾鲮魚球）大芥菜、菜飯、五香炸排骨🤔

回家後加入大芥菜、炸埋排骨就立刻開飯🤤🤤🤤