迷你捞起

一億的盼望。。。。。

雖然過完年、為了明天的萝想、一於做碟迷你捞起啦！

材料有。。。。蛋絲、木耳絲、日式海苔絲、紅籮蔔絲、芋絲、三文魚切絲

醬汁

日式柚子醋、日式芥末、鰹魚汁、麻油
芝麻灑面

素釀雞翼

今日整咗d素釀雞翼比朋友！

材料有。。。木耳絲、粟米仔、韓國粉絲、紅蘿蔔絲

調味有。。。蚝油、糖、雞粉

將雞翼去骨、釀入以上材料、用豉油同蜜糖搽過、再用光波焗熟。

心態

今日有fb朋友講起对於網友的留言、佢話曾經好地地的交談會突然一百八十度之轉變、佢用以下一段詩來形容此刻心情、我亦回覆另一首詩作為回應、我個人覺得任何一種關係、總有結朿的一天、而且可能亦有本身自家的煩腦、所以不必太上心、隨緣就是。。。。

 

 

厨餘湯

一碗超正的㕑餘湯！

係我摷摷埋埋雪柜的垃圾做成的。。。。有雞骨、紅棗、瘦肉、杞子、冬菇、花膠糕。。。。。

 

 

 

紫薯糕

今日用隻夏威夷的紫心蕃薯做底紫薯糕！

材料

紫心蕃薯一個煮腍用1000ml水打爛
木薯粉180gm
糯米粉20gm
粘米粉40gm
糖200g

開匀後加入一湯匙粟米油

可分層蒸熟或放入小杯仔蒸熟

錯愛

今天係FB寫咗段嘢、係我綜合到这两次治療的成果、原來我還未係。。。。人地話我患。。。的燥狂症同自己話的抑鬱症、只係暫時去到係唔正常的環境而形成的壓力、換句說話係我將一碗本來巳裝滿飯的碗再不停再加入餸莱。。。。。

(圖片取自網絡)

炒長遠。。。(炒假桂花翅)

Le碟係大荣華的招牌莱！

材料

粉絲先浸後剪短

瑶柱、浸完後蒸腍撕開

蛋打散拂過

調味

盐、雞粉、油

炒至乾身

唔嘥d金箔、一於用盡佢。。。

金萡蔗汁糕

唉！如果連煮吓嘢的心情都冇埋、相信我都命不久嘞！噚晚太后又發癫、成晚話瞓開的梳化不是佢瞓開的、要搅低櫈、但乘脚的腳踏又唔like、大佬呀、係連接着的、本來瞓得好地地、遲早自己都癫埋。

整番碟蔗汁糕解吓鬱结先。

婆婆特式小食。。。芋絲煎墨魚虾餅

今日又玩吓新煮意！

用墨魚膠同虾膠加入芋絲搅匀、可做球型、又可按平、再轆過芋絲、半煎炸、之後可跟雞醬或七味粉。。。。好惹味。

善待自己。。。

这幾十年都糊糊塗塗地做人、自九七年經過大變遷、終於明白到原來一路以來、忘卻了自己、加上之後的十幾年、人老咗、亦開竅、不再執着、開始放下(當然還未完全做得到)、誰是誰非、一笑泯恩仇、因為什麽緣也好、當塵歸麈、土歸土、又何來恩怨呢？

所以終於。。。。。。

每天提醒吓自己。。。。作為今後做人的坐右銘！

(網絡圖片)

呼吸吓新鮮空气的。。。。午餐

本來諗住出吓街買張一億的六合彩、顺便鬆吓气、点知都係避不過死人印尼妹的奪命追魂call。。。。。當然又係搅唔掂太后的新年後遺症。。。。利是、利是啦、唉。。。。晚上就話比殺手(安眠药)、日光日白又点吖？唯有、同佢個仔双量過之後、决定換幾百蚊比佢又玩過封利是遊戲囉、有時諗深層都唔知佢可憐定自己可憐？

終於比我揾到網友Maggie(車車亞媽)的好介紹。。。。唔錯、可惜太飽食唔落d甜品、下次啦！

法式焦糖燉蛋

Le輪好魔鬼、做完心太軟、再搅個法式焦糖燉蛋！

材料

蛋黄2個

鮮忌亷200ml

云尼嗱香油數滴

黄沙糖1湯匙

拂匀分别放两小杯中、隔水焗約1/2小時、拎出後灑上黄糖、用火鎗燒焦面便可跟生果吃。

 

 

素咖喱

元宵佳節煮番碟素咖喱做晚餐！

材料

素雞、薯仔、麵根

咖喱醬

素雞、薯仔、同麵根飛水後用咖喱醬煮好、加入椰漿便熄火、跟白飯。

 

 

 

 

流心的。。。心太軟

今天用少甜之方法焗咗两個心太軟、刚好没有靚生果伴碟、失敗咗d囉！

材料

朱古力125gm
牛油125gm
全蛋3只
蛋王1只
糖45gm
唂咕粉15gm
低粉70gm
發粉5gm

做法

1...牛油同朱古力坐溶

2....全蛋、蛋黄、糖、沸匀

3....低粉、發粉、同唂咕粉篩過、加入(1 and 2)、搅至無粉粒、分别放入矽膠模杯仔

我今次用光波230、焗約4分钟

視乎各人的焗火、而且我今次做起即焗、未雪過、所以自己要試爐

以上份量可做到八至九小杯。

咕咾魚球

今晚清雪柜、發現重有幾嚿龍躉魚塊、開咗罐菠蘿、做碟咕咾魚球！

材料

魚塊

甜酸汁

茄汁、糖、醋、老抽

魚塊加醃料(古月粉、盐、雞粉、蛋、生粉)

炸完魚塊回镬汁料同菠蘿、收汁後便上碟。

蜜糖煎金蚝

過年前買落d金蚝、今日煎埋去送比朋友個亞媽、尤於佢有糖尿、所以我用龍舌糖漿代替、一來冇咁甜、二來唔駛令到佢d血糖標升、安全d。

做法超簡單、飛完水後、用慢火煎香两面、再灑入龍舌糖漿、兜匀便可上碟。

雞肶菇炆肉眼根

本來係打算用虾醬蒸肉眼根的……点知打開雪柜摷唔到、只有三隻雞肶菇剩低、只好。。。

材料

肉眼根(豬扒後面那條筋、以前冇人食、下欄)

雞肶菇2至3隻、切厚片再飛水

蒜茸、辣椒、

調味

蚝油、老抽、糖、雞粉、盐、水

做法

用油先爆蒜片、辣椒、肉、雞肶菇、調味、赞酒、落水、炆到汁液收到少許便 OK。

婆婆的左宗棠雞

停咗一日又手痕、見血壓正常番又煮碟自創之左宗棠雞。。。。

材料

去皮雞胸同雞肶各一

切塊加醃料醃10分钟

有豉油、古月粉、盐、蛋、最後上生粉炸熟候用

調味

有茄汁、黄糖、陳醋、老抽、豆板酱、黄酒

其他有蒜片、辣椒乾

回鑊兜匀上晒汁便OK

柱侯醬炆花生雞脚

今日要同太后去見醫生、睇吓d血壓药是否唔啱佢、出院後精神時好時壞、血壓又忽高忽低、都係小心d。

材料

雞脚、花生……飛水後候用

調味

老抽、冰糖、柱侯醬、芝麻醬、水、

另外、蒜片

炆好便上碟。

懒人碟头飯

是但焗两片豬柳漢堡、再跟白飯同節瓜就算。

鴨脷洲。。。Prime Shop的豬漢堡真係唔錯嫁！

開飯。。。。

今朝方便餐。。。。

買咗盒759現成白飯、同蒸碟豉汁蒸腩排！

白飯魚厨餘炒飯

今日煎完白飯魚、所以有得剩、就炒碟飯做晚餐！

材料

白飯、白飯魚煎蛋、蘑菇、節瓜粒、

調味

魚露、甜豉油、盐

炒埋一碟就OK！

無花果柚子汁沙律

去完見太后個家庭醫、回程買咗d沙律莱、所以食草。。。。

今次用柚子醋、無花果同腰果碎！

My late dinner。。。。

同太后出院返埋皇宮、再去醫院交费兼攞药、返到屋企巳經八点幾、嗱嗱臨滚個湯、煮碟香茅雞扒飯就算咯！

下星期再要返去抽血驗酵素、明早重要睇佢食血壓药同胃药、講真、果两條友(工人)我就信唔過嘞。有時朋友問我有工人都要自己睇？講到尾工人只係輔助吓、有小朋友同老人家始終親力親為會少d意外嘅。

太后又入廠

唉！人地公公出宮、我亞太后就入廠、噚晚係我le生人(暫時)第二次坐救護車。。。。因為佢噚晚食食吓飯又話心囗痛、本來我都當佢又係狼來了、但後來同佢量血壓、突然去到198/95  、嚇了一跳、所以每十分鈡量多次、後尾見去到204、佢個仔叫我call白車囉。

係醫院佢又嘔、本來照過又話冇嘢、但醫生見佢咁老、留院觀察再驗血、兜兜轉轉搅到十一点幾至返歸、臨走前佢還講心口唔舒服、但血壓巳回落至177/68 。

Le两日發覺佢的腦退化明顯又嚴重咗、分分鈡講住冇錢包利是(明明成盒擺在佢面前)、搅到我都癫埋。本來下星期一覆診時諗住問醫生可否加药、突然又發生咗le單嘢。。。。。

唉！聽天意啦。。。。我都筋疲力盡、無能為力嘞。

發財豬手

食完發財豬手、希望横財就手、唔洗同政府伸手。。。。。

 

 

材料

 

 

豬手一隻斬件

冬菇、蚝士、發莱

 

 

調味

 

 

柱侯醬、甜麵醬、麻醬、老抽、冰糖、酒、水

豬手飛水、搽老抽、用油煎吥、拎起候用

調味捞匀、加蒜头用油爆吓

冬菇浸軟同蚝士飛水候用

發莱浸完水拎起。。。。煮好後才下

 

 

做法

 

 

將調味汁爆完落晒全部材料、爆香後加水炆至豬手腍、加入發莱炆多十分钟左右、加入蚝油便可上碟。

 

 

芝士炸虾丸

今晚炸碟虾丸做小食！

材料

虾膠、墨魚膠、帶子粒、香芹碎、紅蘿蔔茸、芝士粒

做法

以上搅成膠、搓成丸狀、中間包入芝士粒、中火炸好上碟。

 

 

 

 

 

超值的蒸魚晚餐

以為過完年太后唔會再講包利是。。。点知？好似比人落咗降头咁。。。。。唉！点算呢？？？？？

 

 

無理由晚晚比安眠葯佢食啫、佢話想哭、我就想死添。

 

 

講還講、都係歎吓先。。。。平時一碟蒸魚餐、成六七十蚊都係用死魚、但自己蒸就算係養魚、·点都係游水噃。今晚le餐都只係六十蚊、抵！

 

 

幾時都要愛自己多一点、否则變成亞媽咁、有幾多錢都嘥气。

 

 

 

 

 

新春福袋。。。袋袋黄金

新春當然做d好意头嘅嘢啦。。。。

我的福袋做法如下:

材料

日本油揚一包三個(開二變六個)

餡料有……韓國粉絲、冬菇、紅蘿蔔、香芹、帶子

調味

生抽、蚝油、糖、

先煮好餡、放入袋中、用灼過之九莱扎着袋囗、蒸约10分鈡、放碟中、伴入蚝油獻、灑上七味粉！

清清地唔錯嫁。