一餸飯

做人乜都要試吓，食過唔啱就至多冇下次啫。两天前行經何文田廣場街市，見有條很長的龍( 正值午飯時段）原來那些人排隊買一餸，兩餸飯，我見賣相都不俗，心諗揾日試吓先，今日下午刚好再經過，試吓買盒一餸(25蚊 )本來是「香檸炸雞」，但我要少飯走汁，返屋企自己配「粟米汁」同烚绍菜，都唔錯。

辟瘟香囊

有網友傳訊了一個徧方製做香囊的药材在YouTube 上用作辟瘟之用，不理是否有効，我今天都學人做了十個。一個隨身掛在手袋，另外的送给鄰居們，作為防疫之用，因近來太多變種病毒，都是安全一点吧。

厨餘湯米

月尾食得慳一点。。。。今期的廚餘都颇豐富。。。有菠菜苗，蕃茄，洋葱，排骨，雞搥。。立魚。煲完湯放個米粉就是。

沙嗲醬肥牛炒蛋麵

今晚摷埋雪柜的剩餘物资，加少許肥牛，用沙嗲醬炒碟蛋麵做晚餐就是。

香草黑椒三文魚扒配南瓜湯

昨晚很夜才吃。。。本來諗住食完咁大隻雞肶做下午茶唔食了。。。但又怕半夜肚餓，所以煎了塊预先醃過之三文魚扒跟绍菜，同埋一碗中午留下來的南瓜湯就算。

得閒啤一啤

。。。快樂過神仙。

今日全日樓上拆牆做裝修，嘈到头痛，所以行咗落山同鄰居買消毒药水，顺便買下午茶回家吃，在山脚下有間颇出各的小食店，有生炸雞肶賣（18蚊），十分好味，回家後從雪柜拎出最后的一罐啤酒(上次打边爐飲剩的 ）十分捨意呢。

中韓午餐

今天中午韓國鄰做「韓式壽司」，我就煲蕃茄南瓜排骨湯，再來一次中韓共共餐。我的中式湯有南瓜，蕃茄，洋葱，唐排骨。

碗仔翅「烏冬」

相信咁配搭我都比個「讚」自己啦。。。哈哈哈！

原因只有一個，今早煮多咗烏冬，當然唔想嘥嘢，咁啱今日又想整埋包素翅，所以便做出这碗。。。新產品囉。

韓國雜錦蘿蔔湯

今早又收到一碗韓國湯，所以煮了一個烏冬作為一人午餐就是。

材料有红／白蘿蔔，草菇，海帶，大葱，白果，日本同韓國魚片及魚旦。

共食晚餐

今晚本來是一人餐，点知鄰居(放假本來有约),突然回家一齊食，佢炆咗海參竹笙冬菇雞同灼菠菜苗，我就炒彩椒帶子同蒸麵醬三文魚头。。。食得十分開心。

整色整水系列之「雜錦湯米線」

唔知係唔係睇得多韓國鄰居煮嘢多，Le輪煮親嘢都七彩繽纷，今早又亂咁配搭一番，見雪柜有乜就落乜，所以这碗自創的「雜錦湯米線」都幾多料，主要材料米線之外，有三色椒，肉片，帶子，木耳絲，冬菇絲，粟米粒，煮完灑上紫菜碎同芝麻。。。。Well done。。。

接近完美的乳酪蛋糕

前两天的乳酪蛋糕焗衰咗，因為用錫纸蓋着，黏爛咗個蛋糕面。

今早重做了一次，雖然都是有少許爆面，但整体都算美觀。

这一次我用咗網上其中一個做法，材料有:

蛋3 只(分蛋黄同蛋白)

糖10 克

乳酪2 少杯

粟米油少許

蛋黄加入糖，乳酪，油，搅匀，篩入约23  克麵粉

蛋白加入 约5克糖，1滴白醋打至企身候用。

先放入一少部份巳打至企身的蛋白入蛋黄料捞勻，其餘之蛋白用覆入的方法快速將两種材料混合，再放入巳预熱150度约30分鈡。

豐富的午餐

今早食得十分豐富，鄰居蒸湛江雞(半只),   我整咗中式牛柳，虾醬蒸爽肉，灼菜。

花生眉豆雞腳湯

昨天晚上很夜才煲好这湯，所以凍咗之後放雪柜，今早才飲。

这湯曾是母親的至愛，我平時除咗以上的材料會加入蚝士，發菜添，不過刚好食晒蚝士，今次除咗冬菇，眉豆，排骨，雞腳，只加入發菜。

晚餐(24.04.2021)

今晚買齊料煲花生眉豆冬菇雞腳湯，点知浸多咗冬菇同買多咗雞腳，反正今晚唔知食乜好，就留起幾隻冬菇同雞腳，炆咗嚟今晚做餸啦。

自制「日韓湯烏冬」

我今晚食得簡單点，落山下買咗包稻庭鸟冬，加幾片肥牛，一只蛋，木耳絲，葱花少少紫菜。湯底係昆布汁加雞湯。

是是但但又一餐。

两全其美的人生？

今天從「臉書」上睇到有位網友的孫女由佢出生到現在巳開始上學，突然有感而發，其實人的一生中基於某些原因，往往錯失了很多美丽的日子，有些人為口奔馳，往往錯失了子女的成長過程，有些人為了自己的家庭，亦往往錯失了回饋对父母的照顧。。。當然有個别的例子( 不負責任与不孝)。

以往年青時没有領悟这些道理。。唯一知道的。。。怎樣的父母，便會孕育出他們的下一代这句至理明言。

人生没有「後悔药」，還好我在母親臨走前的數年，開悟了，總算不做個「不孝的人」，亦覺此生無憾。。。現今亦可快樂渡餘生。

我借用了「常覺」師姐的帖子作為總結

涼瓜牛肉

今天用咗係肉檔買的牛柳嚟炒涼瓜，果然好食好多，肉質腍滑，配上蒜头豆豉一起炒，送飯一流呢。

麻辣酸薑皮蛋

这個開胃小食冇做好多年，今早見到雪柜有四只早輪在上環那間好出名買的亞婆流心皮蛋同酸薑(近年再没有自己醃製子薑嘞) 。

我的麻辣汁可配青瓜絲，粉皮，甚至雞絲等等，熱天十分惹味，汁的材料主要來自蒜茸，芫茜，鎮江醋或陳醋，麻辣醬，生抽，糖，份量照自己個人口味調製。

通常 我會將蒜茸同芫茜切碎後，用「凍熟水」洗過後隔去水份才捞入其他汁料(这樣比較衛生)

腩肉叉燒

在網上見有人用腩肉做叉燒，會甘香d，一來可能嚿腩肉唔靚，亦可能不知怎樣焗，所以又衰咗。

我又會再比多次机會自己再做，希望會成功。

昨天從加拿大傳來一個壞消息，太后的「唉吔細佬」又走了，雖然佢巳經93歲，不過聽起上來總是有点「不捨」，本以為他移居家拿大之後會有机會見多一面，可惜缘份唔到我們控制。。。祝願他一路好走，能在唔同的空間同母親相遇就是。

今日我再做多次，醒目咗，先將腩肉煲腍身一点可去焗，効果好好多(21.04.2021)

另類菜飯

前幾天係網上學到这個菜飯，我又跟吓風，唯一欠缺的就是「竹筍」，為了唔想嘥嘢，费事買咗包「竹筍」用少少又要留在雪柜「等運到」。。今次的材料除咗有咸肉，小棠菜，還有鲜蘑菇，（ 本來有竹筍，但冇落，自己改咗落少少青岛貝) 主要的分別是用「豬油」嚟炒。

同場加映。。。瑤柱肉碎釀節瓜，最後淋上個玻璃獻就ok😋😋😋

咖喱雜菜

前幾日同朋友行新開的Soda Mall。買咗樽泰國的黄咖喱，今日試做咖喱雜菜，有椰菜花，西蘭花，薯仔，紅蘿蔔，本來打算做葡汁的，但發覺放有黄薑粉，等下一次吧。

食後感，那泰國咖喱醬都唔錯，幾香添。

莱肉云吞

好耐冇整上海云吞，昨天見有西洋菜賣，諗住整番幾只食吓 (本來我不太喜歡上海云吞皮，因為覺那些皮好厚)偶然一次都ok。

点知可能不是季節，西洋菜「老過我」，所以最後用机打爛才包。下次會試吓用薺菜嚟包。

葡國雞粒飯

由於牙齒開始變差，而家整葡國雞一律採用雞肶切粗粒，薯仔同红蘿蔔亦一樣，一來容易食，亦維持自己喜愛的味道，不失為一個好方法。

首先將全部材料切粗粒，落牛油炒香，加入咖喱醬(取代黄羗粉)，加入麵粉兜匀，加入水，椰漿，調味，當薯仔夠腍時，汁液開始變杰身，熄火後加入淡奶，再铺上幾片牛油，放焗爐焗香便可跟白飯或意粉。

香煎咖喱雞扒飯

今晚夜了一点食飯，因為很晏才吃下午茶，本來諗住唔食添，但驚半夜可能會肚餓，便是但拎塊雞扒用前幾天買的泰國黄咖喱醃片刻，蒸碗飯同两嚿西蘭花／椰菜花伴吓碟就算。

酸辣湯

今天再做多次，终於成功了，可以收工(4.18.2021)

我從未試過做酸辣湯，今早上網睇睇，試吓學做一次，不過我的刀工麻麻，做完後總覺味道同顏色欠了一些。

我今次的材料有:豬肉絲，木耳絲，冬菇絲，冬筍絲，薑絲，豆腐切絲，由於沒有買到豬红，我用咗金菇代替，同蛋。

最後用咗陳醋，鎮江醋，少少老抽(做色)，辣油同麻油。

A貨俄國牛柳絲飯

今日全日都係A貨餐，晚餐又嚟碟俄國牛柳絲飯，當然又係A货版。

不過下次决定要買靚牛柳做至得，因為超市的平價牛柳食到牙都甩呢😂😂😂

A貨苔條黄魚

雖然我是廣東人，但卻十分喜愛上海菜，好似燻魚，嫩雞煨麵，酸辣湯，同今天試做的苔條黄魚等等。

雖然賣相唔多似，但味道都有九成似。

煎同蒸的餃子

昨天買咗半斤皮做咗 两打餃子比朋友，今日又將剩低的皮同餡包埋佢。原來半斤皮可做到48只。

鄰居食後的口感，大致都認為煎的香口好多，但蒸都好食，不過個人認為蒸嘅同放湯的都是自己「搓的皮」好食好多。

冰花馬蹄露

天气開始熱，昨天突然想口腔甜一吓（雖然糖尿）不過時勢唔好，想做就去食，都係個句：食咗至算，唯有煮得少甜就是。

平價「中式牛柳」

以前亞媽的口头蝉： 一分錢，一分貨，今日用嚟形容我这碟「中式牛柳」沒有錯，因為我今日是用超市的平價牛柳做，相比之下用嚿靚嘅牛柳，做出嚟一定好食好多，不過現時靚嘅牛柳所費不菲，都係過吓「口㽼」就是。

共享午餐

今天鄰居煲鮑魚，海参  螺片，药材：（蓮子，茨實，果皮)湯，我就炒咗两碟米粉(鮮冬菇，銀芽，青島貝，红蘿蔔 。

蒜茸豆豉蒸三文魚头

而家蒸大魚头很贵，而且又冇半個賣，近日發現街市有一包包的斬件三文魚头賣，十分經濟，今晚这包只係$23，我都差点食唔晒。

再加多碗外購嘅粉葛赤小豆鲮魚湯，大滿足。

滑嘟嘟嘅「玉子肉碎豆腐」

今早又食碟头飯，煮咗碟豆腐，因為近日牙齒又開始有点痛，唔想再剝牙，冇錢鑲牙，政府又冇免费牙科睇呢。再止唔到痛又要動用到今年的醫療卷嘞。

咖喱牛肉飯

今晚一個人食，都唔知食乜好，不如煮碟咖喱牛肉碟头飯就算。

我这個咖喱配方是用嚟做咖喱魚旦的做法，有咖喱醬，沙嗲醬，同海鮮醬混合嚟開成的，加埋糖，老抽，豉油，所以十分醒神。

全魚餐

今晚用埋上次的南瓜，走咗落街市買蕃茄，同一盒碎三文魚头（＄25)，滚個南瓜蕃茄魚湯，再蒸條刚睡着的黄腳立(＄27／两條)，十分經濟，成餐都唔駛五十蚊。

我越嚟越佩服自己控制蒸黄脚立的時間，刚離骨，滑一滑。

一個「舊皮包」的故事

一段封塵巳久的回憶竟然由这個「舊皮包」在腦海中重啟。

估唔到上次搬屋時無意中隨着雜物一起搬了過來，皮包依舊完整，但早巳面目全非，不但內外老化，金屬的扣子亦退色，畢竟巳廿多年了。。依稀往事，突然歷歷在目，每一句臨別的說話我還記得清清楚楚，这是一件「最後」的禮物，亦是當年令我心中淌血的一件禮物，不過事隔多年，心中亦再無恨意。。。「活在當下」是我现在的心情。。。。这皮包將會成為「大口仔」的晚餐。😅

米芝蓮云吞

有朋友介绍在新蒲崗有間米芝蓮介绍過的云吞麵舖，那天同老友相聚後走去買了生的云吞及水餃回家，今天當午餐吃。

食後感:

個人感覺比想像中差少少，但亦有昔日的口感，因為不會只有虾，還有豬肉同大地魚碎，而且皮薄及「风尾」包法，但水餃就不是心中预期，而且皮厚，加上两者的大地魚碎有少少骨，美中不足也。

但日後還會再去試吓豬油捞麵及豬手，再加評論。

(以上純屬個人意見)

加料(玉子豆腐)滑蛋牛肉飯

今晚食碟头飯，本來只係滑蛋牛肉，但前两天買咗盒玉子豆腐，又試吓加埋落去一齊煮，反正玉子豆腐同滑蛋差不多一樣颜色。

剩餘物資之午餐

今早摷雪柜，發现幾樣食物在冰格內，為了一個字「慳」，一於煮埋佢。

所以便煮咗下列两碟餸:

蕃茄煮馬友魚

麵醬煮肉碎四季豆

不一樣的早餐

今天食得特别一点，就是自家鸳鸯配「拿破崙」餅，雖然我的朋友說贵了一点，但若心中所愛，偶然一次亦不為過吧。

現在我唯一的嗜好就是煮同食，所以我若能力許可之下就會品嚐一吓自己喜歡的食物。。。餘生亦無憾。。哈哈哈!

虾醬雞翼

自昨天同三個老友記食盡新蒲崗之後（先去譽港湾食素下午茶，再去買朋友介绍的米芝蓮云吞，最后去埋以前學過蛋糕的師傅開的饼店買拿破崙蛋糕)，晚上巳再没有食嘢了，近年胃變细咗，每次食完勁勁的，点都飽一两天，所以今日炸了幾只「虾醬雞翼」，影完相分了给鄰居，只留低三只比自己就是。

平，靚，正，剪髮樂

自從過年前剪完头髮之後，轉眼間又長了，今次選擇了一間快剪(这是近年香港十分流行的平價剪髮舖，一般都是＄50至＄70之間)我曾經試過一至兩間，都「不大滿意」，今次费事搭車返回舊店的髮型屋去，又胆粗粗再試多次一間新開的，估唔到今次雖然只係＄50，但都颇為滿意呢。