齋期全日素

唔覺唔覺又三月初一……時間話咁快又到哥哥的死忌(4月1號愚人節啦……明天！)

今日好彩老人痴呆病冇發作……所以全日素……

午餐係素炒雜錦

晚餐係沙茶雜菇炆素鵝(雞肶菇/茶樹菇)

素湯係有红蘿白/雪耳/蓮子白合/馬蹄/腰果

759芝士午餐肉麵包

好耐冇做麵包……今日見有罐759的韓國芝士午餐肉……不如……

材料:

高筋250 克
奶粉15克
吉士粉10克
乾酵母4克
雞蛋1隻
糖25克
鲜奶大約120克
軟牛油15克

午餐肉適量……切條

做法:

首先將高筋開穴……中間放糖……奶粉……吉士粉……雞蛋……用少許鮮奶先開溶乾酵母……慢慢再加入鲜奶搓成粉糰………手勢好似洗衫來回地搓……最後加入軟牛油搓至滑身……放在暖的地方等發酵至兩倍大……之後拎出放氣……再分割成八份大小雙若…做型後等第二次發酵……最後掃上蛋漿……放入預熱200度之焗爐焗約12至15分钟。各人焗爐的度數不同……自己調節為準！

水果軟糖

今曰跟人口水尾……做咗碟新鮮生果榨汁加魚膠粉的軟糖送比小朋友……有芒果……西瓜……藍莓……全冇色素！

多謝鎮友Joyce Yung 的食譜

材料:

任何果肉150gm(淨肉)
用50gm熟水打茸
用100gm水煮溶60至80gm糖
再坐溶30gm魚膠粉

之後max以上全部材料……放入盒雪凍之後切粒再轆過椰絲

沙茶乾炒肉片河/ 沙茶牛河

噚日發神經走去買咗10/樽沙茶皇……今日嚟沙茶豬牛餐先……首先煮碟乾炒沙茶肉片河比自己做午餐…………再煮多碟沙茶牛河比亞媽食！又乾又濕各自精彩啦。

不過買河粉時一定要講明係放湯定炒……否則買錯就炒唔到喇……而且炒前一定要撕開每條粉……否到上唔到色嫁！

馬來咖吷

有網友比咗個我的至愛食譜……馬來咖吷！

雖然做完对手好攰……但值得……不過偶然一次半次好喇……勁唔健康。

材料:

蛋(全蛋)/糖/椰汁……各一杯

斑蘭葉一朿

做法:

全部搅匀後……坐熱水(不要滚)……大約80至90度……不停边搅边推……直至深色同杰身為止……需要一至一小時半才OK。

温馨提示……尤於有椰汁……每次不要做太多……同時凍後要放雪柜

沙茶皇炒豬腩片

早前買的沙茶皇……好好味！

今日用豬腩片嚟炒……加埋粟米仔同露筍……配搭啱啱好。

客家黄酒煮雞之A貨版

嘻！我噚日去咗新界一天遊……收鑊甚豐……有齋食……又有群記豬手……荳腐花……最重要係買到客家黄酒……等我又做番碟A貨先。

材料:

雞半隻斬件

醃料:

薑汁/古月粉/盐/豉油/黄酒/生粉

另外準備另外一杯黄酒嚟煮雞

其他配料:

紅棗/云耳(我用貓耳朵……因為爽口d)/薑片

做法:

1/首先將醃料醃雞1/2小時

2/先用油爆香薑片……云耳……红棗……雞件

3/當雞微黄時加入一杯黄酒

4/煮约10至15分钟至雞熟透便可上碟

温馨提示……le碟雞不用加水……如買唔到客家黄酒……可用糯米酒或花彫代替……但尤於客家黄酒帶甜身……如果用其他便可加入適量之冰糖碎！

厨餘菜式

今日整理雪柜……實在太多嘢嘞……摷吓摷吓又比我整咗兩碟餸……

第一碟叫貓耳朵鮑汁爆双丸

第二碟叫手打豬肉丸釀海参

估唔到有時摷雪柜都會發現有宝物呢。

粒粒芒果布甸

噚日係煮食搅搅镇學左le個粒粒芒果布甸……真係好正……無論囗感同質感都一流！

材料

芒果2個去皮切粒
部份用嚟打汁(大約一碗……不要加水打)
芒果jelly粉一盒
蛋王一個(我用意大利蛋安全d )
鮮奶200ml(我用3.7)
熱水一碗
魚膠4克

做法:

1)將芒果jelly粉捞入魚膠粉……蛋王……搅匀

2)之後加入熟水一碗……之後坐熱水不停搅

3)慢慢將芒果汁分幾次加入(不要加水)

4)放入模之後雪10分钟後……加入芒果肉

5)放回雪柜雪一晚

6)甩模後可切嚟食

温馨提示:如果想用匙食可減魚膠的份量

食譜出自煮食搅搅镇版主Queenie

台湾肉燥

前幾日係九龍城買咗做台湾肉燥的材料……今朝又嚟玩番轉……本來想加埋冬菇碎……但諗諗吓冬菇容易变……所以最後都冇加到囉！

材料:

豬腩肉搅碎半斤

台湾関廟麵一朿(可用上海白麵代替)

肉燥的做法有油葱酥(可用炸亁葱代替)……鹵肉粉(台湾舖有售……冇都OK……但有就似d)……壺底油(即油膏)……冇就用老抽加糖代替……先用油爆香肉碎……加油葱酥……壺底油……炒香後加水……煮到汁液收乾……凍後入樽放雪柜……食時跟飯或麵之類。

客家碌鵝

Le隻客家碌鹅係我係2010年食過之後揾到的食譜……但都唔記得從甚麽途徑得知……anyway……大概如下:

材料:

獅头鵝大約under6斤重

蒜头100gm/乾葱100gm……切茸

醬料:

生抽400ml/南乳130gm/磨豉醬70gm/米酒2ml(1/2支)/糖250gm

做法:

1/將鵝飛水

2/用油爆香蒜头……乾葱……加入鵝煎至金黄色

3/醬料捞匀倒入(2)中……煮滚後收細火……冚蓋……煮约45至50分钟

4/之後反轉再煮多45至50分鈡……其間要不停轉動鵝身……將汁淋在鵝身……直至全身上色……熟後等凍咗斬件上碟

温馨提示……最好放竹笪在鑊底以防黏底……注意全部没有水份……只有米酒。

亞婆自家制豬肉丸

記得後生時係中環(唔記得個名添)……總知皇后戲院对面……唔知乜乜邨的肉丸粥好食到而家重記得……每次手打肉丸粥比(先父)食時……佢都話又唔爽又腍！總知唔正啦……於是四出找尋做法……可惜成功之日一碗有八成似的豬肉丸粥只能在靈堂上比佢食……無奈！

材料:梅头豬肉(要肥d同最好有筋的)一斤搅成免治豬肉

調味:

盐8克/糖8克/生粉16克/食粉(soda)6克(用雞湯先開匀才加入)

以上各調味用冰水(我用雪凍雞湯)大約一杯開匀再同梅头免治肉搅匀

最後加入大約一茶匙枧水(用嚟做梘水糭那些梘水……雜货舖有得賣)……又係要用一湯匙水先開匀

以上醃好之豬肉向同一方向搅……放雪柜一晚再撻至起膠……之後唧出肉丸並用大滚水煮熟放雪柜……隨時攞出嚟用。

我今次加入冬菇粒……不過冬菇容易變……最好快食完……否则可加入头莱碎OK！

亞婆混醬炆飛排

我好醜……但好食……尤其是送飯……本來今日做完物理治療想係健味豬到買梅头肉做豬肉丸……点知原來要訂的……唯有買咗半斤飛排(排骨)炆啦……咁就整le個混醬嘞……我用咗方太的陳年舊餸再……左加加……又加加……

材料:

飛排

混醬……份量因自己囗味調教

蘑豉/麻醬/虾醬/糖/老抽……用酒開匀

做法:

首先用蒜片起鑊……爆排骨……落混醬……兜匀後加水……炆至排骨腍……大約1/2小時……大火收汁……熄火加入葱段……上碟！

同塲加映……亞婆秘制馬拉盞炒飯……好香！

亞婆馬拉盏

今日做咗十幾樽冇整好耐的秘制亞婆馬拉盞！

因為實在太多工序……不過……又真係超好味……又多用途喎……我有個醫生朋友佢本身係馬來西亞華僑……佢都十分锺意食(雖然我的馬拉盞不是正宗的)……OK……癈話少講……

材料:

1/蒜茸100克
2/乾葱茸100克
3/指天指茸50克
4/虾米(浸腍後)切成茸200克
5/虾醬100克
6/虾糕100克
7/花生醬100 克
8/糖100克
9/雞粉2湯匙
10/荳板醬2至3湯匙

花生油適量(我用咗差不多3/4樽)因為要大量油浸住才不容易壞)

做法:

首先落油依次序落以上各配料……慢火边煮边推動(最好用 non stick煲煮……唔容易黏底)……大概煮約1/2小時左右……煮完放凉後入樽……放雪柜可處存大約一至兩個月。

温馨提示:

玻璃樽用熱水浸過再放焗爐100度吹乾才入馬拉盏……同時以上的馬拉盞可炒莱……飯……煮豆腐……甚至好似XO醬咁用嫁。

香草焗米鴨

噚日做完中式……今曰又嚟玩吓西式……le半隻鴨係跟blog友Flora的食譜變化出來的……因為香料唔齊……是是但但亂咁搅……材料有鴨1/2隻……醃料有……什香草……黑椒……海盐……蕃茜……檸檬葉……老抽……醃過夜。配菜……薯仔……紅蘿白……洋葱。

預熱焗爐200至230度……焗盆底放配莱……放鴨在面……底部向上先焗大約40分钟……反皮向上再焗多30分钟左右！

亞婆梅子鴨

今日比blog友問起梅子酱……又突然想整返d看吓門口添！整完順便整番半隻鴨啦……le樽梅子醬好多用途嫁……攞嚟蒸排骨就好似酒楼那些咁……每年近清明我見d鴨靚……我一定整一次梅子鴨……一次陳鴨的！

首先講吓梅子醬的做法:

蒜肉150 克……打成茸
梅子(淨肉去核)250克……打成茸
冰糖(大約300克加水1杯去煲梅子核……唔好嘥d味啫)……有人喜歡用片糖
茄汁150至200
白醋50克/塩少少

用油少少先煮吓蒜茸……落梅子茸……茄汁……煲完核之糖水(約1杯)……最後加醋……(自己試味)……OK就熄火……凍後入樽放雪柜……可以存放大约3個月……所以我每次都做这份量……蒸大魚头可加少許椒絲添。

梅子鴨的做法:

鴨半隻……將鴨用盐擦過……冲水……抹乾……用老抽上色………落油………用nonstick pan煎到微黄……拎起……擦上(底面)大約三至四湯匙梅子醬……醃約一小時……放深盆隔水燉一小時左右(是乎鸭之大細同自己食得幾腍而定)……夠鈡拎出候凍斬件……放回汁液煮杰加老抽(教色)……用生粉水埋獻隔渣淋在鴨面上。

素咕咾肉

適逢二月十五齋期……食番碟齋先！

材料:

炸麵根(用嚟煮酸齋那種麵根)數嚿
三色椒
洋葱

甜酸汁:

李派林喼汁/白醋/糖/盐/老抽/茄汁/水(份量隨自己口味)

其他:

蛋汁/粟粉

做法:

首先三色椒同洋葱切角炒至半熱拎起

炸麵根一開四上蛋漿及粟粉炸至硬身

甜酸汁煮滚後放入三色椒……炸麵根(素咕咾肉)……快手兜至汁收乾……熄火上碟。

注意:全碟的重点係個汁不能太多……否则會腍身……自己控制……少可以加……但太多收唔番