節瓜支竹炆雞

今天終於去咗睇中醫、因為自從出關後、覺得有少許後遺症狀、喉沙、尤其是唔夠中气、根據醫師把脈後的見解、認為我暫不要補「肺」住、因為「濕」還重、所以叫我暫時只需要煲些生熟薏米水飲就夠、反而不要食梨、罗漢果、芝士、奶類等等！

我本人覺得是要夾醫生、所以會睇多一至兩次、看看夾唔夾！

今晚煮咗碟『節瓜支竹炆雞』就算.

咸魚白菜

以前窮人食的咸魚白菜、到咗今時今日、小小的一片馬友咸魚一点也不便宜呢、竟然是一只冰鮮雞的價錢（50蚊）

加多碗燉湯、今晚的晚餐都頗豐富吧😋😋😋

咸排骨花生蚝士粥

今日又食粥 ,明知升血糖,還是忍不住,但只吃了一 碗,其他送比鄰居😛

我的性格有時明知是不对,還是試一試,可能是太任性吧😅

幸福就是簡單

经過幾年的生活改變、尤其中完新冠之後的体會、簡單就是「幸福」的理解、現時我會更加珍惜目前所擁有的一切！

今早簡單的早餐就是魚腥草水、烚蛋、牛油芝麻包.

抗疫魚腥草桔餅水

中完招後煲番一些網上流行的保健水、经過資料搜查後、最終決定用这配方！

材料：魚腥草半斤、青欖適量、桔餅3個、雪梨干適量、加水適量、煲约45分钟

蒸魚午餐

曾经消失了一段時間的至愛午餐「蒸魚餐」終於回歸了、不過價錢亦漲了不少、但為了貪食又慳錢、只好分四餐吧！

加工炒米粉

今日回來時、買了盒什菜炒米粉、今晚加入虾皮、雞蛋、加工炒了这碟米粉、近來由於困得太耐、都冇乜心情煮太複雜嘅嘢.

免死金牌

誤打誤撞去咗「指定診所」睇醫生、到見到醫生才知这類診所是比還在確診期的人覆診、不過當他知道我的來意後、很樂意為我出咗封「免針纸三個月的信」、所以之後當然去搅埋头上的那「堆草」啦🤣🤣🤣

做完那「堆草」、除了個头輕咗、連個心都輕埋添！😘😘😘

白切雞菜飯

今天除了買石磨腸粉做午餐之外,還買了盒白切雞同小棠菜做「菜飯」.

所以今晚便食「白切雞菜飯」,在疫情未完全消失時,我都將會盡量留在房中吃,在沒有人在共用廚房時便匆匆煮好後拿回房中吃,冇必要都不會在廚房内除「口罩」,避免再「中獎」,為了不想房中存有食物的味道,我暫時都會盡量食得簡單一点😅

重獲自由的第一天（27.03.2022）

本來想等到明天（28号）才出門、但實在忍唔到、重新吸到新鮮空气、實在感恩❤️❤️❤️

巳经網上预约明天見醫生（指定診所）、看看怎樣才可申請到暫時「免針纸」的信、同時我何時才能打針！

今次染疫的病情算不太嚴重、後遗症暫時都不太明顯、感謝神的恩典💗💗💗

出關前的最后晚餐

明天便可出去啦、所以今晚摷雪柜剩底的肉碎、加入雞蛋、生菜、用豆板醬炒碟就算！

经過今次之後、發覺电飯煲真方便、雖然不完美、非常時期還可以的.😛😛😛

日式牛肉飯

今天是出關前夕、雪柜巳開始所剩無幾、還好重摷到少許肥牛、便用电飯煲做碟「日式牛肉飯」（當然比正常的做法差得遠、不過以目前的環境、只能將就一点就是😛

湛江雞湯河

距離出關的日子還有两天、心情興奮！

今晚搭鄰居買咗1/4湛江雞、河粉同生菜、煮了湯河做晚餐😋😋

电飯煲湯（日本烏冬）

本來原本是今早吃的、但突然韓國鄰居送了午餐給我、便留了做晚餐！

材料先用瑤柱、冬菇、墨魚丸（切片）做咗個湯底、之後加入少許日本烏冬、便成一碗美味的湯麵

韓國愛心午餐

本來今早煮定碗湯麵做午餐、点知韓國鄰居突然給我送上一份愛心的「韓式午餐」、真的很感動呢！

原來我真的擁有一班很愛護我的朋友及好鄰居啊！

我一定要好好珍惜❤️❤️❤️🙏

鄰居的愛心湯

这次两星期的家居隔離已進入尾声、到了星期日便可出関、日子雖然有点悶、但想到朋友們及鄰居的愛心、幫助、實在感激不巳！

日昨天晚上又收到一碗愛心湯、其中一位鄰居送上的蕃茄薯仔、南瓜及不知什麼材料的湯、除了好味外、亦有人情味呢.

謝謝❤️🙏

电飯煲叉燒炒飯

昨天還有叉燒食剩、所以今早用咗电飯煲加入叉燒同蛋、做了一碗簡單的炒飯食！

雖然現在唔出得去廚房、只得電飯煲作為唯一的煮食工具、若要求不高、勉強亦可做到美味的食物.

叉燒煎蛋飯

今晚有鄰居送了盒「陳記肥叉燒」給我、我煎了一個荷包蛋、一於整碟「叉蛋碟头飯」就算😘

疫情下的隔離「生活感言」

從確診後倒數、相信下星期一（28号）我可以出關了、困在家的日子雖不好過、但亦令我思巧許多以前從未想過的事、亦啟發我对未來的盼望、只要活着的每一天、不論是喜与悲、巳经是神「最大的恩賜」🙏

過去的、永遠回不了头、未來的永遠是個謎、我們只能『珍惜今天』能擁有的一切！

沒有美食可提供、只能提供一下我的「心声」、希望不要打擾各位的心情吧🙋💁嘻嘻❤️

蕃茄肉碎雞蛋飯

今早由电飯煲製作的午餐唔錯、雪柜有一只蕃茄、肉碎、雞蛋、我便製作了这美味的午餐、首先在电飯煲煎蛋、再加入肉碎、蕃茄、糖、醋、水、煮到差不多沒有水份、再配半碗白飯即成！

美食回歸

不久之前我曾在自己的文章講過、現在我的生活不追求大富大貴、華衣美服、但「食」对我嚟講還是有要求的！

前幾天鄰居曾替我買了那些現在十分流行的两餸、三餸飯、我真的食不慣、可能自己能煮的原故、所以現在隔離的日子中、我情願吃碗簡單的湯粉、咸魚蒸飯、都不願吃那些（自覺）不好吃的现成餸、（似乎好衰格）！

今天要求鄰居给我買了半隻白切雞、可吃兩餐、覺好比較好一点吧😛

中招後的第八天

本月11号檢測、12号收到訊息話確診、同日去打18xxxx5報告、所得答覆話可「家居隔離」、並承诺會在一星期內有檢測包送上（但至今未收到）、16号再收到訊息講要download申請隔離令、但不懂操作、只能再打18xxxx5咨詢、但所得答覆我的個案不需要、但到了19号在YouTube 上得悉隔離令是必需的、因為関係到出関後申請「暫免針纸」之事、唯有再打18xxxx5 咨詢、今次另一位同事答我这是不对的部門、要我打去2125xxxx再咨询、搅到真的「金星四起」、只能再打過、今次應电話的同事很耐心的解答这個矇查查的婆婆一切疑問、承諾我重新記錄我的個案、希望他今次真的能夠幫到我吧！

心諗自問都是個有少少聰明（哈、自己話咋）的婆婆、但屋苑有不少長者什麼也不懂而又確診咗、誰能幫助他們呢？这個社會真可悲😭😭😭

瑤柱魚蓉粥

今早見雪箱有條原本拎嚟蒸嘅黄腳立、現在蒸魚麻煩、所以用电飯煲先浸熟條魚、拆肉、再用瑤柱煲碗「瑤柱魚蓉粥」做午餐！

日本湯麵

現在只能在房中煮食、一般嚟講都盡量簡單、否則两星期後我房中那些煮食味道將會「揮之不去」！

今晚食日本湯麵、幾片豚肉加幾條菠菜.

「白飯魚干蒸飯」

鄰居送了少量「白飯魚乾」給我 、今早蒸咗少許白飯、加入豬油及豉油、比起那些两餸飯強得多、相信出關後我的煮餸方針會改一下、簡單方便就好了！

外援湯包

星期一契細佬給我的外援食物中有兩個湯包、今晚開咗一盒係「杏汁豬肺湯」、當然同自己煲的差好遠、但非常時期總好過冇囉！

但今日中午鄰居幫我買的两全餸飯就真係好差、唉！我情願日日食咸魚咯😅

愛心湯

今日中午又收到一碗鄰居的愛心湯『雪耳鮮准山蓮子百合』

在染疫的自我隔離日子中、体會到原來自己的人緣的確唔錯、这幾天除了有鄰居幫我買食物之外、重有愛心湯供應、實在窩心❤️❤️❤️

蕃茄雞蛋湯飯

今日全日掛住打电話去消防局查詢関於昨天收到的msg要登入營做隔離之事、可惜由上午八時到下午二時都打唔通、最終想起有位網友個先生是做消防嘅、才知需要「入營」是那些圍封的大廈、但長者over70是不用入營做隔離的、立刻安樂晒！

所以今晚煮咗碗『蕃茄雞蛋湯』食就算.

契細佬送來的救援食物

今天收到一份窩心的礼物、契細佬夫婦特登駕車送來很多生果、食物、同湯包、十分感動呢！

原來人在逆境才知道誰人对自己最好、可能这就是叫「雪中送炭」吧

点都好啦、在这艱難的時刻、有人關心是件令人感動的事❤️

熱辣辣的臘腸飯

今天是自我隔離的第二天、慶幸還有碗熱辣辣的臘腸飯食、實屬感恩！

昨晚就煮咗碗湯河做晚餐、雖然簡單、始終在自己家中隔離、相信点都好過被送入營卦？

起碼還可以煲劇、上網、相信两星期很快過去的、而且還可慳些錢、不用亂花d無謂錢吧😘

隔離第一天的暖心午餐

今天鄰居送來窩心的午餐、腸粉加豆漿、感動到想哭、原來自己的人缘都唔差、一早有鄰居幫我買麵包做早餐、現在另一位鄰居又送上午餐、真係好窩心、謝謝妳們❤️🙏

終於輪到我中「头獎」

一路担心的事終於發生了、原本諗住下星期打針、所以昨天去檢測、点知今天的回覆係「中咗獎」、唉、而家好彩唔駛入「集中營」、只在家中自我隔離、所以未來的两星期只能由即食麵陪伴我！

豉汁涼瓜炒肥牛

这碟餸用來送飯十分惹味！

首先將涼瓜切薄片、先用盐醃吓、再用水沖洗後揸乾、再加入糖再飛吓水、之後隔去水份候用.

將蒜茸豆豉用油爆香、加入涼瓜片炒吓、替酒、加入肥牛片、炒片刻、快手兜勻、赞入少少上湯、老抽、便可上碟😃

蓮藕抗疫湯

不知什麼時候又有報導「蓮藕」对抗疫有幫助、我又姑且信下啦、今早落山買咗蓮藕、栗子、紅蘿蔔、眉豆、豬肉、果皮、煲咗这個抗疫湯、有冇功力就唔知、但煲完試咗少少、覺得碗湯好甜就真嘅！

魚湯墨魚丸米粉

胃口還是麻麻、今早落去做檢測、因為下星期二便要打第一針、心情忐忑不巳、為咗確定沒有中招、只好去檢測一下、若不幸有「陽性」確診、便要取消了！

回家途中買了红衫魚同蕃茄、煮了魚湯、今晚便用了幾粒墨魚丸同生菜、煮咗碗湯就算、不過只吃了半碗巳沒胃口继续食下去😔

蓮藕餃子

早前在網上訂購咗一些餃子、質素都唔錯、今早煮了幾隻蓮藕餃子、幾特別！

蘿蔔炆魚

雪箱有幾片馬友魚、所以我用蘿蔔、香芹、豆豉、炆咗嚟食！

可能近日胃口麻麻、只吃了少許便不吃了！

蒸魚晚餐

好耐冇食蒸水蛋、今晚食蒸魚、肉碎蒸水蛋、菜心😘

煲粥炒粉午餐

今早見冇乜胃口、是但煮碗鴨腎瑤柱粥同炒碟菜粒肉碎米粉就算！

遠在纽西蘭的網友、同他閒談開、原來他太太「中咗獎」、其實他們巳打咗两針、還是中獎、有時真的諗吓、那為什麼要打呢？現在世界紛亂、每天都有不好的事發生、想必天地間的「神」震怒、要我們这些大罪的人受到懲罰吧！

在朋友的IG 中睇到以下的一張照片    覺得好有趣!

 （截圖分享一下）

蜜糖雞翼

这雞翼是從凍肉舖購買的、因為近來少咗興趣去研究新菜式、主要是心情欠佳、加上疫情每天都有不好的消息傳來、相信沒有幾多人有好的心情吧！

雖然是外購的雞翼、但調味方面也不差、一包有七只、我煎好後送了三只给鄰居食、自己食四只巳经很飽了😅

金菇牛肉卷

似乎很久沒有整過这餸、今早見有包金菇、所以用肥牛捲幾條做午餐！

我加入鳗鱼汁同昆布豉油做調味、效果都不俗.

罐头鮑魚扒菜心

鄰居送了罐头鮑魚比我、我加入肉片、來扒碟菜心、同白飯一起吃！

今天的菜心很便宜、$30/3斤.

有味飯

疫情嚴峻、每天都担心幾時會「中獎」、刚從街上回家、因要拎床單去烘乾、在街上某大厦門口、睇到「黑箱車」停在路边、睇嚟又係疫情中的受害者、而家分分中死咗都不知屍体在何處、現實中我真的有朋友嘅親人在護老院染疫後、在醫院去世、但至今屍体還下落不明、唉、真的是死都不得安寧😭

今早簡單煮碗有味飯就算吧、材料有瑤柱、冬菇、臘腸、肉碎！