31.Dec.2017除夕午餐

今天吃这三碟。。。。。

炆柚皮
洋葱豬扒
烚椰菜花

30.Dec.2017的午餐

今天食。。。。。

荷豆炒素肉
油鴨炆芋头
羊肚菌果皮燉鷓鴣(太后的)

辣子雞丁

今日學人做碟外省餸。。。。

辣子雞丁

材料有。。。。

雞肶肉切粗粒

醃料有古月粉，盐，生粉
(飛水候用)

配料

乾辣椒，指天椒，洋葱粒，香芹，花生

調味

香醋，老抽，糖，

先用油爆乾葱片同料头，落雞肉，調味，最後臨熄火才加入花生便可上碟。

28。Dec。2017的午餐

今天午餐食。。。。。

麻辣雞翼尖
蒸金古
咸肉白菜仔

再做多碟咸肉菜飯比朋友。

2017的總結

還有四天2017將盡，懷着新的希望迎接2018的來臨。

嘅然還有四天就送走2017，當然來一吓總結啦，今年大致上身体還可以，除了頸上的小腫瘤(抽组織化驗過暫時不是cancer)外，其他小毛病還顶得住。

至於太后的身体，自從两年多前(跌斷過腳後)接手管理後，身体上的確是好了些(食方面及生常的生活上安排)，但机能上(就如老爺車一樣)無可能回復昔日咯。心智上當然一天差過一天，这是定律，無人可改變。

至於和家人的関係亦由於那假boss(印尼老工人)的不斷分化，巳經没法修好，不過亦预咗，一切聽由天意，不作強求。

朋友方面，就比較伤感，我的点心(九零年代)師傅九月時因病走了，一個好朋友亦因瘋狂的加租而月尾結業(佢的舖巳開了三十多年)，所以從此亦會少咗見面。

不過人生就是如此，一切都是定律。。。。。套用以前的金句。。。。豈能盡如人意，但求無愧於心。。。。只要拿出個>心<做人，2018將會是新的開始。

(圖片來自網絡)相信我这個真人点都好過机械人卦？

宵夜

有時亦要放縱一吓自己的。。。。。

所以昨天晚上食了白果腐竹糖水加白汁磨菇煙肉松露芝士on toast.

好有满足感呢！

27.Dec.2017的午餐

聖誕假期又over咗，一切回復正常的生活嘞。

今天食。。。。

南乳齋

蒸水蛋

釀荳卜

港式炸醬+担担麵

我今日又靠估，試吓做港式炸醬麵。。。。加入四川担担麵做麵底。。。

今次我用腩肉切粗粒，加入蒜茸，乾葱，辣醬，茄汁，老抽，糖，水，慢火煮成的炸醬汁。。。。之後配合担担麵。。。一於來一客fusion的港式配四川担担麵。

24.Dec.2017的午餐

今早有。。。。

蜜糖荳炒咸肉
蒸豆腐
鴨脷
豬皮炆雞

簡簡單單就算。。。。平安夜对我哋😅老人家，留在家就最平安嘞！

風光背後是平安。

Merry Christmas  and Happy New Year to everybody☺

小雪人

今年係电視學到的，不過咁麻烦的小食，都係唔多啱我这類粗枝大葉嘅人。

玩一年咁多啦。。。。哈哈！

蜜糖金蚝

今年試吓係金飯碗買咗半斤金蚝，貴就貴咗少少，但勝在質素好，又只係一年只食一次，平均廿蚊隻，昨天晚上炆咗三隻，今早整番一款蜜糖香煎，又别有一番风味。。。做法超簡單，解凍後用薑片少許酒蒸约10分钟，加入少少油在平底鑊煎至金黄色，再落少少蜜糖，兜匀便可上碟。

正所謂萬般帶不去，唯有食為先。。。。我的金句。。。。有食唔食。。。。罪大惡極。。。哈哈哈！

2017之冬至晚餐

而家就算冇人同太后做節，可以的話我都會叫亞嬸來陪佢食，因為食得一餐得一餐啦。

今日我只係对太后講叫亞嬸來陪佢吃飯，没有講做冬，费事佢又要我拜神啦。

反正間屋遲早都唔會再拜神，自己都一把年紀，唔做咯。。。。体力都唔掂嘞，做咗咁多年都要停吓來。

今晚食。。。。

栗子煲清補涼

客家炆魚仲

罐头蚝皇鮑魚冬菇發菜金蚝

白切雞

20.Dec.2017的午餐

今天食。。。

茄子炆鱸魚腩

豬乸菜(又名觀達菜)

南乳齋

生菜

自制芝麻湯圆

持續气温下降，見凍凍地自制紅糖薑茶黑芝麻餡湯圆，熱量高唔敢食太多，两粒啦。

可惜第一次整芝麻餡，做不到流心的芝麻餡。我今次用咗簡易的做法，只用鮮蘑黑芝麻粉加煮好的糖膠撈成。

等我再研究吓点做成流心先。

19.Dec.2017 的午餐

今日菜單有。。。。。

麻辣西芹炒雞柳(自己的)
梅慕冬菇蒸肉餅
蚝油西芹炒肥牛(太后的)
雞脚

聖誕小食之松露芝士焗雞翼

買咗松露芝士，當然物盡其用啦。。。。。整完意粉就做款小食。。。。雞翼！

雞翼(我用冰鲜的)一開三

先用少許盐，羗汁醃十五分钟，加入刨過之松露芝士再醃半小時，预熱焗爐200度，焗香两面即成可口之party 😄小食。

入焗爐前再灑上一些芝士碎在雞翼面，色，香，味一流。

17.Dec.2017的午餐

今天自己食咸肉菜飯，太后食蒸游水黄花(當然係養魚)、松露芝士焗雞翼，筍虾。。。。燉牛展湯。

对腦退化病人進一步的了解

太后的病唔經唔覺地將邁進第八個年头。我亦由從前不認識这病到现在每天都理解多一点。。。。以前有句話。。。。久病成醫，相信是同一道理卦。

從近日她的言行中，發覺佢經常提起巳過世的亞媽(我外婆)同老公(先父)從而發現相信影响佢至深的是这两個人(因為過世的又何止两人呢？)在太后的心底我相信最掛念還是这二人。

相信無論一個人當記憶盡失，還記得某個人時(不理是否還存在)，相信一定曾經对佢影响最深的。。。。例如每天佢都提及的年初一，亦是可能係佢認為最歡樂的日子。。。。。腦退化这種病对佢最大的好處是令佢遺忘这一生最痛苦的往事，未嘗不是件好事，只可惜作為佢身边的人就要承受这種壓力。

所以。。。。可以的話，盡力而為，百年之後，回首今天亦無悔。

(圖片來自網絡)

白汁松露芝士焗意粉

買咗松露芝士，先來客焗意粉。

材料

扁意粉
蘑菇，煙肉粒
松露芝士白汁
。。。。。。。。
白汁(麵粉，牛油，雞湯，鲜奶，慢火煮成白汁)再推入
松露芝士(刨碎)適量

做法

扁意粉用水煮约六至七分钟，隔水後捞入少許粟米油候用。

牛油炒香蘑菇及煙肉粒，放入意粉，炒片刻，加入松露芝士白汁捞勻後，放焗盒後再灑上松露芝士碎焗至微焦便享用。

16.Dec.2017的午餐

今早太后的姨甥同個女來探佢，顺便叫她們陪佢吃一顿午餐啦。

没有刻意的食物，只有家常便飯。。。。

蒸黄花魚
菜胆雞
炆筍虾(太后的至愛)
栗子炆雞
燉牛展湯

自己食松露芝士扁意粉

不一樣的豉油皇炒麵

今日玩吓新嘢。。。。豉油皇炒麵加入金菇，蛋絲，蟹肉同埋黑白芝麻。。。。。又幾OK 情。

14.Dec.2017的午餐

今早食荷葉飯，彷翅(雞絲)，同埋蒸鯭仔。。。。簡簡單單就是。自己就食湯米線。

觀点与角度的問题

最近我反思这問题是否如英文的那句>every story have two side<同一意思？

每個人因為立場不同，自然对事的睇會不同，同樣地因為要維護自身利益關係，同樣的一件事就會變作两個不同的版本。

本身自問是個簡單的人，但處於这個你虞我詐的社會中，永遠是失败的一個，所以很早巳消失在職場中，不過現實的中活當中亦無可避免。本來以為只要真心待人，換來的只是無情的冷对，儍仔一名。。。。。点都好啦。。。。。分化这两個字又教識咗我認清人性之醜惡，以前有句話。。。。活到老。。。學到老。。。。原來亦可應用在任何生活的细節上呢！

只要不忘初心。。。。心中的彩虹永遠存在着。

(圖片取自網絡)

梅子蒸鴨

Le 輪見好耐冇整過梅子鴨，一於做番半隻啦。

我的係簡易版。。。。

材料

米鴨半隻，先用老抽搽勻全身，用鑊煎香。

梅子料

酸梅半斤，去核，加入蒜茸，片糖，老抽，水煮成汁，鋪在鴨南大火蒸约一個半钟，凍後斬件，用蒸完之汁隔渣打獻，再淋上面就是。

13。Dec。2017的午餐

自昨天開始鬧人(因為今早又鬧人，都唔知講過無數次，暖爐唔可以用拖板，過熱會引致火警，两條友互相推卸責任，搅到火都離)及日常生活的po文巳由这裡發報，辛苦这裡的網友眼晴受罪啦。而家减少咗上Facebook嘞。

今天的午餐係

芫茜虾餅
游水沙鯭仔，炒肥牛
同埋。。。。
節瓜

簡單又令太后容易食。。。今晚炆咗半边梅子鴨

12.12.2017的午餐

由今天開始不post 嘢上Facebook,因為發覺近來脸書多咗閒雜人，故此不再post上去啦。

今天的午餐有。。。。

咖喱雞
粉絲節瓜
燉黨参北旗牛展湯比太后
叉燒，蛋，芫茜葱炒飯

四季盐焗粉焗雞

今日印姐放假，例牌又要當更，今朝炒咗炸菜花生粒粒，豬皮，蘿蔔比太后。

今晚用四季盐焗粉焗番半隻雞就算，同場加映芒果果凍。

炆青島乾鮑

上星期係街市買咗包青島乾鮑，雖然細細地，發起都唔差，一包有十四隻，只是280，同近日大熱的平價即食罐头鮑差不多大細，我見價錢都合理，又試吓炆嚟比太后食，話晒都係乾鮑啦。

我今次只用雞殼同雞脚煲腍，最後用蚝油同老抽教色水咋。而且煲的時候重有碗好正的鮑魚雞湯飲呢！

腦退化先兆？

近日發覺記性越嚟越差，精神彷彿，心不在焉，晚上又常失眠，昨天無lala 又以為遗失銀包同身份証，搅到又要去警局備案，又上網预约補领身份証。。。。。最终竟然係洗衣机上面的某個位置找到。。。。。唉。。。。完全冇晒記憶点解會放在那裡。

以前我買到新衫係唔會立刻穿着的。。。。而家都係咪嘞。。。。。容乜易明早起身望吓個鏡。。。會問吓这是乜水嚟嫁？哈哈哈。。。。曾經穿過，起碼從不穿過啦。

今天的午餐(12.06.2017)

有。。。。

蓮藕栗子紅蘿蔔煲豬尾骨

麻辣魚旦

竹笙瑶柱草菇荳腐

花生雞脚

灼菜

冬天煲多些蓮藕栗子湯好有益嫁。

米芝蓮的車仔麵

小時侯有碗車仔麵，樂上半天，時至今天，一出名巳經係叫米芝蓮。。。。今天特登搭車去深水埗品嚐大排長龍的車仔麵。

去到福榮街，同一條街竟然有三間『文記』車仔麵舖，等了差不多半小時才可入座，三餸(蘿蔔，豬腸，水鱿)油麵，加多樽荳漿，承惠48個大洋。

蘿蔔清甜，鱿魚夠辣，豬腸冇異味但唔夠腍，大致上不過不失，点都好，試過就算，不值再去囉。

焗燒肉

今早係街市見到嚿肥瘦均匀的腩肉，所以决定又玩吓啦。。。。効果都OK,所以自己比自己70分啦。

其實燒肉除咗要買到嚿靚肉之外，重要係拮皮時定要拮得均匀，而且要密習，否则焗完d皮有些脆同有些腍。

而且一定要飛吓水嚿肉，先用玫瑰露同五香粉，盐醃吓嚿肉(起碼半日至過夜)再焗前用白醋搽吓塊皮。

预熬焗爐200度，先焗熟底部，將反面，用面火焗至皮脆身。

蛇宴

昨晚約了班朋友在洋務商會食蛇宴，竟然幸運地抽到四獎，雖然只是包湯料，希望改寫吓这幾年的霉運吧。

芋头炆雞

今朝見芋头好靚，買咗半嚿用來炆雞翼，加埋椰汁好正。之後做多幾杯圓杞子果凍做甜品添。

龍骨(龍躉骨)煲清補涼湯

昨天路過北角買到两條龍骨，今天煲咗個清補涼湯。。。。

材料有。。。。。

果皮
豬肉
清補涼
龍骨(龍躉骨)

夠钟？？？

唉。。。有d葯食食吓就冇乜効用。。。。本來这半年都叫做瞓得幾粒钟。。。。鬼知近日太后食咗葯都只瞓得两三粒鐘，最慘就係好似日間咁講三講四的說不停(全部都係廢話)、唔答又唔得，咁搅法遲早自己都黐埋線。。。。。所以我成日对d人講。。。。你地未行過别人行過的路。。。。。shut up!

快速煲粥法

有朋友問我点解可以煲粥綿，原因只有一個，就是係臉書學回來的。。。。首先將米洗淨，用盒仔或保鮮袋包好，分别放在冰格上(分量自己調教)。

每次煲粥時，準備好所需之材料，先煲好材料至出味，加入巳從冰格拎出之米，再放入煲内，大约二十分金中便可加盐熄火了。

今天的是鴨腎瑶柱咸肉粥。

蓮藕栗子紅蘿蔔煲豬尾骨

最近係臉書得悉秋冬最好吃栗子蓮藕湯。。。。所以今日煲了这個湯。。。。十分美味。

材料

蓮藕
栗子
紅蘿蔔
豬尾骨

煲约二至二小時半便OK。

Life must go on。。。。

曾經。。。

快樂過
幸福過
失落過
抑鬱過
伤痛過

都一一行過了。。。。突然回首。。。。life is short。。。。life must go on!

我要我的人生，操縱在自己的手裡，無論未來的路還剩餘多少。。。。要令自己快樂地去面对。

感恩

原來这世界上很多人不懂感恩这两個字。。。。。昨天晚上我家工人的handler來settle  印佣同賓姐之間的問题，有人面对面都可以睜大眼講大話自己從來冇bully 别人。。。。簡直係天大的笑話。。。。不過竟然有人信喎。。。。。其實主要的係有人唔想承担責任。。。不過点都好啦。。。。我只有用自己的方法去維持日後有可能發生的事故，求人不如求己吧。

厨餘炒飯

今日見雪柜又有厨餘剩。。。。所以又炒埋一碟比朋友！

白汁蟹肉蘑菇意粉

今晚見重有蘑菇同蟹肉淨低，煮咗碟意粉就算。但由於这两天气温驟降，個心有少少翳翳地，都唔知有冇mood食添。

蟹肉扒荳腐

今天買了两隻花蟹拆肉，用來煮了個白汁蘑菇，準備拎嚟做意粉。

留起部份煮碟荳腐比太后做午餐。

白汁蘑菇湯

學吓人玩拍片，睇吓上載得唔得先。。。。都終都post 唔到上來。。。。只識上載去G+咋。

涼瓜炆䱽魚

而家d 䱽魚超貴，不論粉䱽，黑䱽，燕䱽定英䱽都一樣貴。

成百蚊一條手掌咁大的燕䱽魚都成六七十蚊/條。。。。真係貴到你唔信囉。

今朝用蒜头豆豉涼瓜嚟炆，送飯一流嫁。

欖菜边荳

做法同欖菜差不多，効果唔差。滑d,口感冇四季荳咁鞋口。

一人前之菜胆雞(肶)

昨天去完打流感針同預防生蛇針後，坐地铁去搵食(網友介紹的皮薄小籠包)。

回家後還好飽，但睇完八点半的劇集見有少少餓，便做碟一人前的菜胆雞(肶)😄

驚太夜吃飯糖尿指數又升，只吃餸，沒吃到飯。

亞婆炒鬼刁

無la la 抽起條根，學人炒鬼刁，是是但但炒埋一碟就算係。。。。有蛋，叉燒，洋葱，虾，冇用黃薑粉，只用咖喱醬代替。