2016除夕的晚餐

今晚亦有一則笑話添！

因為買了太后至愛的燒腩仔同觀達莱(又名豬乸莱)、但佢堅持自己煮(以前佢做大厨、其他執碼係我地做)、見2016最後一晚順吓佢意啦。。。。点知煮完就出事啦。。。。碟菜d油重多過碟莱。。。。唉！点知食的時候我問佢有冇搅錯呀、落咁多油？佢答我。。。。我幾時有入過廚房啫、我立刻0晒嘴。。

除夕的午餐

今天是2016的最後一天、什麽地方都不去、在家陪吓太后食飯啦。

酸梅麵豉蒸大魚头

今日買咗個大魚头、一半用來滚白菜湯、另一半用酸梅麵豉蒸。

好惹味！

咖喱雜菜

嘅然記得食素、晚餐就煮定煲咖喱雜莱吧。反正昨天在西貢買咗條幾正的法包！一於上午中式素菜、晚上就西式啦。

素食日之南乳齋

話咁快又一年將盡、今日巳經係農曆十二月初一、我通常都忘記初一同十五的齋期、抱住平常心、記得就食吧、唔想再加深自己腦部的負担喇。

今日是是但但煮碟南乳齋就是。

西貢blog 聚(2016)

一年一次的blog聚本來是去鴨脷洲食的、但原來去開的那檔休息、所以改咗去西貢食(由網友EE做响導囉)！哈哈

今次超抵、六人餐加碟自來魚兼咖啡波蘿包做下午茶、承惠每位250、簡直正啦。

雪花朱古力曲奇

雖然過咗聖誕、係Fb見到網友整得咁靚、上網摷到個食譜、我又跟風走一轉。

我加加減減就做成咁的貓樣、都唔錯嫁。

我找回的食譜份量如下。。。。。

Boxing Day Lunch

日日煮飯好似細時玩煮飯仔咁、樣樣少少、其實幾難煮嫁。

我唔介意煮大鑊飯、但份量小真係難為亞婆呢！

魚骨两吃

有時一個人平平地都可以食一餐、比個飯盒重經濟！

魚骨两條20蚊
西洋菜半斤8蚊
便可做出西洋莱滚魚骨湯
蒜头荳豉蒸魚骨

快、靚、正！

平過去大X活呀。

平安夜的晚餐

今年破格地煮西餐比太后食、簡簡單單焗隻>亞婆燒雞<、蘋果沙律、蒜茸包、意粉、烚菜、蘑菇湯！

明年都唔知有冇机會再煮、活在當下就是！

煲仔系列之豬潤啫啫肉排

網友如心叫我做啫啫煲、一於做番煲啦、今次試吓用食用梳打醃吓再啤水才加調味、做出嚟唔嚡囗、正！

平價花蟹

今早又買到平花蟹、一於來一個一蟹两吃。。。。。咖喱同拆蟹肉(打算做蟹肉批同中式蟹肉餅)╮(╯_╰)╭

一百五十蚊有九隻、真係超筍呢！

栗子雞煲

雪柜有三隻雞翼同少許栗子、加少許干葱、煮個煲仔莱。

雞翼先用糖、老抽、生粉醃吓
栗子用水先煲淋、用干葱起镬、爆香雞翼、加回栗子、用煲過栗子之水加入炆至汁液淨下少少、加少許蚝油及生粉水埋獻、之後放入芫茜葱焗下便OK！

风梨卷

那天入荃灣拍攝雜誌照片、順道買個做风梨卷的模、昨天煮好风梨餡、今天玩吓啦！

可能未能掌握到竅門、做得不甚美觀、只可套用一句。。。。尚未成功、還需努力。

西洋莱羅漢水

今日冬至……之前做咗、所以只係煲番d羅漢水嚟潤吓、因近日囗嚨唔多舒服。

有西洋莱、無花果、南北杏、羅漢果、煲約1-1/2小時便Ok。

2016之做冬晚餐

今晚提早做冬、有蒸魚、西洋莱湯、燒肉、雞、金蚝炆冬菇發莱、灼莱、。

迷你版杏仁餅

今天做了少許比人、因為佢超愛吃、没有澳門的咁專業、但作為業餘的亦可收貨。

特别配方如下

杏仁粉50gm
開边綠豆粉50gm(用作包糉那種)
麵粉50gm
糖粉50gm

盐1/8茶匙
發粉1/3茶匙
梳打粉1/3 茶匙

杏仁碎50gm

固体莱油约1/2杯

以上粉篩過、加入固体莱油及杏仁碎搓過、像沙粒般、放入木製模内壓實後、甩模、用光波180度焗约8分钟、冷卻後放密實盒便可。

罐头南非鮑

今日同朋友炆咗两罐南非鮑、做法都只係用雞脚同腩排、煲约一小時再用蚝油老抽打番個獻就是、簡單又好味。

小棉襖

今年玩吓新嘢、就是玩手造小棉襖、雖然四十多年前曾玩過栽剪、但早巳忘記得一乾二淨、今次先由最小(六個月size)玩起·、下次玩幾歲、最後(希望)做件比自己、一於由淺至深！

其實而家老花又深、一針一針的去連合都幾嘥眼力嫁。

晚餐

今日去咗親戚家中作客、晚餐豐富、有自備的蒸大魚腩、話梅豬手、潤腸釀乳鴿、親戚煲咗紅蘿蔔同西洋菜湯、同虾醬雞翼。

盡情食完便回家睇大結局。

補肝湯

噚日燉咗这湯補吓個肝！

材料有。。。。

豬
蟲草花
茨實
玉竹、百合、淮山
蜜棗

好好味！

煲仔飯系列之正斗釀乳鴿

自從le幾日电視又有烹飪節目(亞爺廚房)、又偷到師喇！

近期的亞爺廚房、(本人覺得冠絕以往的烹飪節目)、可能是同自己年紀近卦。

以下的一款煲仔飯係用鮮潤腸釀入BB鴿、再加羗蒜乾葱茸加入(玫瑰露不要太早落)醃吓、再放入煲仔飯(刚收水就要加入)、慢火焗至飯及鴿熟、放上芫茜葱、再淋上煮過之豉油(老、生、抽加糖)便成。

温馨提示。。。。年紀大不可多吃、少吃多滋味！

2016的回顧

今年提早回顧過去2016的点点滴滴、相信2016係我自1997以來最充實的一年、尤其自從有机會參加咗一個銀髮模特兒訓練班後、不慬擴濶視野、更認識到一班充滿正能量的新朋友、令到我不再做井底之蛙。

回望過往的日子將大部的人生專注在太后身上、而分略了自己、希望在往後剩餘(不太多)的日子、好好地重新掌握在自己手中、便於願足矣！

重申对於太后的関注我亦無怨無悔、因為沒有她的善心、亦沒有我的存在、我亦會继續对外婆及先父的承諾好好地侍奉至她們再團聚。

希望在未來2017能重拾信心、相信自己的明天會更精彩。。。。感恩！

 (圖片來自網絡)

(獨一無二的礼物)

香芋糯米糍

今晚要去聖誕>趴地<

所以做佐40粒新產品。。。。。芋头糯米糍。

芋头切片加糖、椰汁、蒸腍後再壓爛再搓成餡。

而皮就一如以往。。。。

糯米粉150gm
糖50gm
椰汁200ml
水25ml
盐1/8 茶匙

以上捞匀過濾再蒸约20分钟、分割成30gm一粒再包入约20gm的芋头餡(此份量可做10粒左右)、包入饀之後再轆過乾椰絲。

廚餘之選

今晚le碟係噚日用剩之蟹粉、荳卜、同琶琶荳腐料、於是將佢釀咗入荳卜中、蒸完再用蟹粉煮個獻扒在面就是啦。

廚娘之作(8)

聖誕快到、、煮埋今晚、臨别秋波、煮餐豐富d！

今晚食。。。。

南乳齋
琵琶荳腐
蕃茄薯仔煲魚骨
豆豉蒜茸蒸排骨
泰式肉碎生莱包
蟹粉扒滑蛋

廚娘之作(7)

今晚食得好簡單、粟米肉粒碟头飯、同鯇魚尾節瓜湯！

放下心结

回想三十多年前同太后曾經看過相(睇相)、那相仕曾预言她大歸之時是冬季、大约十一月(農曆)、近日她的疯言疯語频密了(雖然佢的病理應如此、但有些言論有時亦颇清楚)、話雖如此、天意難違、就算應对了又如何？人生七十古來稀、况且佢年近九十、雖此生不是大富大贵、但所享用過亦好過好多大富之人、理應没有遺憾吧！

既來之、则安之亦是我近年对人对事之心態、正所謂兵來將擋、土來水掩、深信天無絕人之路。。。。。。一切隨緣就是！

深信黑夜過後、黎明必來。。。。。

(圖片來自網絡)

星期日之午、晚餐

今日唔駛做廚娘、午餐同太后外出食米線、晚上在家吃！

(可以的話盡量多帶佢多点外出、希望減慢佢的腦退化病情！)

晚餐就有蒸金古(我至愛魚之一)、買咗豉油雞肶同鴨下巴比佢、再煮多味生菜就是嘞。

(晚餐)

廚娘之作(6)

今晚係大閘蟹同煲仔飯之夜、有北菇滑雞飯、窩蛋牛肉飯、咸魚肉片飯。