2016年5月31日 星期二

情緒又失控

我昨天又比太后的貼身。。。李連英攪到又情緒失控、事緣昨天太后去做物理治療、比預期的遲咗番、打电話比印佣、一心想知有何事發生、佢竟然唔聽我电話、直到我打完电話比佢老細(my brother)至聽、跟住大大声对我講話佢個电話係袋、但点解我細佬打完比佢就聽到吖?

基本上佢全日机不離手、只不過佢唔聽、自從太后出事後、佢由太后代言人變回工人巳好唔like、更加上我对佢以往幾年背住我家人留太后在家而外出賣私幫而話要告發移民局、早心存不忿。

若不是太后時日無多、而自己又力不從心、以我性格早巳被我叮走。所以什麽人也好、無論对他們幾好、若不心存感恩、話之理係工人定親人、一概如是!

至尾一句、雖然太后並不最鍚我(但病發前曾經愛錫過我)只要有人失職、我一定冇面比。



2016年5月30日 星期一

慳家之選。。。。黑木耳醋香雞球

前幾日做咗碟涼拌黑木耳比太后、但唔記得喎、驚食壞佢、又唔想嘥嘢、所以用少少雞件炆咗佢。。。。估唔到又出奇地夾呀。







2016年5月29日 星期日

超好味之流心芝士撻

今日過鴨脷洲買魚、顺便探吓個契細佬、原來佢間cake shop出咗個新產品。。。。流心芝士撻!

本來我对近來大熱之芝士撻抱住失望的態度、推不過佢盛意拳拳、免為其難地試一個。。。。竟然有意外的驚喜添。

我素來对食物之高要求、係人都知、從不賣帳、那怕是誰吖。

好似今日係鴨脷洲買咗隻走地冰鮮雞、一心想整海南雞飯、鬼知衰過d急凍雞、重要95蚊、唉。。。。老襯至多做一次、冇下次囉。

再三介紹。。。。流心芝士撻、一定會encore。






新髮型

唉!本來都冇諗住去剪髮、点知落到太后處、佢不停叫我買桔、换神红、又話冇錢封利是、搅到要扮。。。。運桔。。。。即閃!

行過髮型屋、一於剪晒d烦腦絲去啦。。。。。

明知le樣係佢的病症、但當自己心烦時。。。。加上身体不適、有時真係好難顶、為有避。。。。避。。。避!

这種心情只有家中有这類的病人才會体會到的。

希望这新髮型能帶給我新希望吧。


得閒又賣吓廣告啦

瑞士汁乳鴿

好耐冇整過、今日想用埋留在冰箱的瑞士汁、所以又做两隻比人。

重覆製作我的瑞士汁配方

老抽
生抽

各一份(如一杯、各一杯)
我用悦和醬料舖的貨。。。覺得最好味

其他有疏菜各少許、例如红蘿白、香芹(or西芹)、洋葱、八角少許、大量冰糖。。。。煮成瑞士汁

可隔去渣用作浸雞翼、乳鴿之類

份量自己調教自己喜愛之味道。

每次用完後、滚番留用(放冰箱)、我通常每份用三四次便扔走、是乎份量多少。




2016年5月28日 星期六

亞婆光波洋葱鴨

見網友整燒鴨、等我又玩番轉另類光波洋葱鴨先!

材料

最好用急凍鴨、今次我用街市的冰鮮、感覺上用來燉或炆會適合d!

醃料有荳板醬、糖、老抽、茄汁、醋、雞粉、盐。。。以上全部捞匀搽鴨全身、盆底放大量洋葱、用光波烤熟( 各人爐火不同、自己調教)。。。。我今次用180度底面烤20分鈡、再轉230度又係底面10分钟左右。






2016年5月27日 星期五

病人午、晚餐

噚日唔知係唔係同太后飲茶食咗d炒粉太油、晚上疴到七彩、今朝重有少少發燒添。

終於交咗幾嚿水學费比醫生!

所以中午食碗白粥同腸仔包就算、今晚食碗肉絲湯河











雞絲撈虾子粗麵

之前我係九龍城買的虾子麵大派用場!

昨晚先用香茅加蒜茸浸雞、拆肉、之後舖在巳煮過之虾子麵上、加麻油同蒸魚豉油便可享用。







2016年5月26日 星期四

婆婆之皇牌咖喱魚旦

自從九龍城那檔魚旦執咗之後、買唔到好食的魚旦、我就冇乜做過、我对食物之要求係。。。。零缺莫濫!

嘅然今次買到好食(啱自己囗味)的魚旦、又做番次啦。。。唯一可惜的。。。今次買唔到沙爹皇













2016年5月25日 星期三

尋宝記之。。。。適來園魚旦

之前有人送咗d正斗魚旦我試、一試難忘、今日見隻黄腫脚冇咁痛、特登走咗去尋宝、今時今日好食的魚旦難求、以我咁咀刁的人、我都可以比85分以上、算係唔差嘞、買完一路行返佐敦搭970、就一定唔放過果欄的紐西蘭蘋果同蘇記云吞啦。

哈哈!有時做長者都唔錯、两蚊車票、由香港仔去到九龍、都咪話唔抵囉。









去年的子薑食譜

一年一度的子薑季節又嚟嘞。。。。今年冇乜心情整、唯有摷番舊年的食譜頂住先。

還有一事、由於近日电腦瓜咗、未能盡睇留言、电話又黐黐地(好似我咁)、可能漏咗回覆、請各位見諒!









2016年5月24日 星期二

士多啤梨雞扒三色飯

噚晚做咗幾樽士多啤梨醬嚟食英式鬆餅、所以今晚試吓做碟士多啤梨雞扒跟三色飯。。。。不過。。。。由於似太后、食慣新鮮肉、急凍肉始終唔係我杯茶。。。。唉!真係好衰格囉。

睇怕第日等餓死啦。。。。嘻嘻!








豬手两吃

今早買咗隻豬手、分開两種做法。。。。太后的用南乳花生炆、自己的用梅子炆、各有特色。。。。。尤其是梅子(是自己調制的梅子醬、用來蒸排骨同做梅子蒸白鱔、花蟹十分惹味)!







2016年5月23日 星期一

慳皮午餐之砵仔蒸雞飯

我家的两個太后真是人間極品、一個慳慳慳。。。。一個就嘥嘥嘥、而始作蛹者就飛咗去歎世界!

連我個心理治療師都話我能頂到今天冇黐線都算EQ高。。。。不過。。。。老實講、我覺得自己都有時心理唔多正常嫁。

唉!唯有自己食埋東太后唔吼d嘢啦、le個世界大把人冇得食嫁。






亞婆A貨熊仔曲奇。。。之四式

噚晚買咗個新罐、今次試吓做四款。。。。咖啡、檸檬、朱古力同綠茶味、除咗賣相衰d之外、其他味道都脆囗都好掂。









2016年5月22日 星期日

福建炒飯之。。。。亞婆版

近日愛上炒这類飯、濕濕地易入囗!

今次先做碟平民版、有虾粒、雞粒、莱粒、冬菇粒。

用雞湯、蚝油、老抽、生粉水埋獻、淋上巳用蛋炒過之飯便是。






Related Posts Plugin for WordPress, Blogger...