婆婆家常餸之脆麵虾醬雞

今日覆診完見有時間約咗個師傅電吓條頸(因為見食咗幾日止痛葯個头重痛).......如果再唔得就唔知点攪嘞！

雞肶2隻起皮起骨用虾醬.....糖.....生粉醃過夜

炒麵餅飛水後剪碎炸香放碟底

將炸過之雞件兜勻便上碟



係一碟香口又好食之自創菜式....送酒送飯都一流呀。

婆婆家常菜之老翻四杯雞

婆婆個朋友早幾日煮咗le隻四杯雞......得佢口述又試吓做隻「老翻」......何謂四杯呢？

雞(新鮮1隻)

四杯:

糖1杯(我改咗3/4杯...另外用1/4杯老抽代替)
生抽1杯
酒1杯
水1杯
薑葱各適量

做法:

將雞洗淨後飛水再浸冰水(目的係令雞皮脆身d)

用少少油先爆香薑葱

之後煮滾4杯汁將雞放入再慢火碌吓碌吓

大約碌45分鈡左右......凍後斬件再淋回剩低之汁便OK

婆婆東南亞菜之韓式金沙骨

上次Doublema返嚟帶咗我去尖沙咀的韓國街行咗一轉......買咗一樽醃肉醬......噚日攞咗塊金沙骨嚟醃咗一晚........今日用焗爐焗咗佢.......一於跟意粉嚟食啦.....甜甜地辣辣地都幾惹味嫁。

婆婆家常餸之釀荳卜

今日試吓釀個特色d的荳卜.....

材料:

荳卜數隻一開二

餡料:

免治豬肉同虾膠(用麥片/鹽/古月粉/麻油攪到起膠)

裝飾:

咸旦黄1個

汁料:

雞油/清雞湯/生粉水

做法

1).....荳卜開边後釀入餡料

2).....放上少許咸旦黄在肉面大火蒸約10分鈡

3).....煮滚汁料淋面便OK

婆婆蛋糕篇之綠茶cupcakes！

今日睇完心臟科都下午点幾鈡........返到屋企煲完個魚湯就開始整cupcakes.......le次係綠茶味........唧花係用cream cheese加檸檬汁溝成.....再灑d彩珠仔做裝飾.....睇起都幾靚吖！

婆婆湯水篇之椰子煲雞

烏雞煲椰子啱而家的天氣.......我加埋紅蘿白添.......好正.....又甜又補而不燥.......good！

婆婆点心篇之脆炸金球

前兩日用剩d虾膠同炒麵......用埋整碟小食啦！

起咗個靚靚名叫「脆炸金球」.......d麵餅飛完水一定要剪碎至可以轆入虾膠球嚟炸.....手要濕才容易上麵碎......否則炸時容易甩嫁。

婆婆点心篇之A貨生煎菜肉包

前幾日見到blog友高Ling整咗d菜肉生煎包.......心思思又做copy cat.....点知煎的時候太大火......變咗印度style.......(好似去完印度返嚟咁囉)....哈哈！.........le隻係最靚仔我至敢post出嚟咋.......d肉餡有高麗菜......半肥瘦.....虾膠......薑米......都幾成功.....個包皮都唔錯......下次再要試過至得

婆婆粥粉飯麵之彩椒帶子鴛鴦麵

嘻.....嘻.....噚日剩低咗d米粉同炒麵........我今日又發揮慳家本領......加咗彩椒同帶子......用蒜头荳豉煮咗碟鴛鴦麵.......尤於我學人炸成麵餅咁......所以肥咗d........下次會試吓用焗爐焗香佢......相信一定健康d囉！

婆婆東南亞菜之叻沙

東南亞菜之中叻沙係我的至愛......不過自從血壓高同胆固醇有咗之後就少食咗嘞......不過早幾日係City Super買咗包叻沙醬.....心思思又想食吓.........啱啱今朝買咗2斤中虾嚟打虾膠.....用咗d殼嚟煮湯底.......d海鮮料有鮮魷魚.....虾.....帶子.....魚片.....荳卜......銀芽....米粉......之後放咗茜茜係面.......又幾似嫁！

婆婆家常餸之黑椒虾乾炒韓菇旺菜

嘻.....噚日浸多咗虾乾.....見雪柜有包旺菜(黄芽白)...加埋少少韓菇......用黑椒炒咗佢......估唔到又幾好味喎........下次再去長洲一定要再買虾乾.......真係好靚又鮮味.......貴些少都抵嫁！

婆婆点心篇之咸潮州粿

死嘞......整潮州粿整上癮添.......今日le款係咸的......顏色就淡色d........因為我的潮州朋友話我太深色喎........今次個餡係糯米........冬菇......虾米......花生碎........我朋友話佢地潮州人用鹵水醋或桔油跟嚟食.....最好煎吓喎！

婆婆蒸飯之虾乾咸魚

今日午餐蒸咗個虾乾咸魚飯嚟食........虾乾同梅香咸魚係上次响長洲買的......朋友介紹係當地人自家曬........絕不含防腐劑......好正！

蒸飯一定要用滾水加入洗過之白米嚟蒸......同時要比平時煮飯少d水......蒸完後加大量葱花焗三分鈡......再用筷子鬆開d飯才吃........加入少許熟油同豉油......一流。

婆婆点心篇之潮州甜棵

噚日巡blog見到blog友「半日安」做咗d潮州紅桃粿.....啱啱我又買咗個得意木模.....多得佢提点我浸油.....所以漏夜浸到今朝立刻去試(因為我係心急鬼」一定唔等得......就手有開边綠荳.....立刻開工做左幾隻甜粿......好正.....多謝blog友個食譜......真好玩呀！

婆婆蛋糕篇之cup cakes！

今晚心思思又玩吓cup cakes........蛋糕用普通戚風的做法......分蛋做.....至於唧花用cream cheese加糖同牛油打起......綠色用斑蘭香精.......粉紅用士多啤梨香精....今次都做得算OK啦！

婆婆之攪攪震西餐

早輪整咗d豉油麴......噚日醃咗件無雌極素的雞扒......今晚煮咗少少意粉跟食......唔中唔西的意粉....食落都唔錯嫁......至於豉油麴我用咗100gm米麴嚟浸250gm日本淡豉油.....加少少糖添！

婆婆曲奇篇之攪笑嘩鬼杏仁餅

今朝果幾隻做得太肉酸......今晚再試多次....變咗攪笑版添.....哈哈....

材料:

軟身牛油180gm
糖粉60至65gm

低粉(麵粉)200gm
粟粉70gm
梳打粉(soda)大約1/2茶匙至3/4茶匙
鹽1/4茶匙
杏仁粉(或碎)70gm
斑蘭香精少許

做法:

1).....先將軟身牛油同糖粉打至浮身

2).....全部粉類篩過再混合(item.1)

3).....將1/4份加入斑蘭精(或用其他食用色素)

4).....用吸模吸出所要之形狀

5).....有顏色之粉糰用唧袋唧出得意之裝飾

6).....放入預熱170度之焗爐焗約15分鈡

婆婆素菜篇之素意粉&素湯

話咁快又到咗九月十五......今日又係齋期......我d唉吔素食者又學人食吓素啦........煲咗個素湯....有云南菇菇......雜荳.......紅蘿白.....栗子同果皮........超甜呀......至於午餐就煮咗碟素煙肉金菇黑椒意粉......都好滿足........日日有得咁食.......好感恩咯！

婆婆蛋糕篇之糖薑Muffin

本來朋友仔介紹我買「醋薑」做le個Muffin.......但我買唔到........唯有用咗「話梅糖薑」嚟做啦....估唔到又唔錯喎........我今次用......

材料:

全蛋5只
糖80gm
鮮奶80至90gm
自發粉90gm
話梅糖薑適量(切碎)
橄欖油適量

首先將薑切碎候用
雞蛋用分蛋法沸打
蛋白加入1/3份糖先打起
蛋黄加2/3份糖同鮮奶攪勻
加入油
先將自發粉篩入加入並將1/3份巳打起之蛋白fold入
之後輕手加入薑碎並將餘下之2/3蛋白fold入再做入杯仔
放入預熱180度之焗爐焗約12分鈡便OK

以上份量可做大約15小杯muffin仔

婆婆麵包篇之南瓜荳沙包

噚日同朋友仔行咗成日九龍城.......尋咗好多宝.....有云南的菇菇........有潮洲韭菜粿......又有荳沙......又有加拿大青口........所以今日先做咗幾隻南瓜荳沙麵包......聽朋友講d荳沙好正......等我試吓先......

婆婆家常餸之栗子炆排骨

今日約左兩個識左成40年的老友見面.......我地去咗利舞台的利宝閣飲特價下午茶.....真係好抵.......食到飽飽都唔駛200蚊.........其中一位朋友個賓賓返咗家鄉.......所以冇工人.....我就買咗d「桂林蕊」用柱候醬炆咗碟排骨比佢啦.........另一位有賓賓就唔駛......於是就比咗個「南瓜荳沙麵包」佢試吓囉......d荳沙又係响九龍城個街市到買嫁。

婆婆家常餸之清湯蝴蝶腩

一路聽人講得多「蝴蝶腩」都唔知乜東東.........原來係豬嚟喎.......聽聞一碗都好貴......又好食又爽口.......今朝見肉枱有得賣......又平.......8蚊一塊.....於是買咗3塊用清湯腩個做法.......加埋白蘿白一齊食........又可以唔食牛都有食清湯腩的口感呀！

婆婆老翻菜之日式芥末脆脆雞

今日又做【copy cat】......May姐有請官恩娜的菜式幾吸引.....我改左少少用唔同的方法嚟醃雞....其他一樣......估唔到又唔錯喎！

材料:

雞肶起骨1隻

青瓜數片

芝麻裝飾用

醃雞料:

豉油麴(自己做的).....米麴加豉油發酵後用嚟醃肉
少許味淋

日式芥末加BB沙律cream混合撈勻用

做法:

雞肶起骨後加醃料醃1/2小時
用牛油煎熟(上左)粟粉之雞扒(要細火...否則容易燶中心未熟)
之後切件放上青瓜片上
再唧上日式芥末mix沙律醬在雞件上

請客可作為头盤

婆婆瘋言瘋語之重陽隨想！

前兩天獨自走上墳場拜祭我先父的親生母親及我的外婆........雖然只有鮮花及自己焗的蛋糕仔.....(因為冇本事拎太多嘢嘞).......拜完之後坐了一會.......環顧四周......無限感慨.......多少昔日曾經生存過的人長眠於此.......世間萬物........由生而死.....只不過短短的幾十年(有d甚至更短)......繁華春夢一轉即逝.......試問又有誰還記得你或妳曾經存在過呢？......突然我又諗起先父曾經講過的一句話:「人走茶涼」.......現在諗番起.......真的明白了.....現在唯有每天都提醒自己........佛家有云:【菩提本無樹......明鏡亦非臺.......本來無一物........何處惹塵埃】.......世間上的一切一切尤如春夢一場....話之係一國元首定平民百姓.........當行完人生路時......都只不過白骨一副......什麽事都不要太執着......隨緣吧！

嘻嘻......廢話我又噏完........心情又鬆咗.......多謝收看！

婆婆甜品篇之馬荳糕

早輪買咗個狗狗矽膠模......今日試吓整馬荳糕先.........今次le個做法係除咗用粟粉......我重加埋魚膠粉.......我希望食起口感好d........等我試咗至話比你地知啦......嘻嘻！

婆婆的老翻拉麵

之前係Sogo買咗le嚿日式叉燒........我今日又整番碗近來大熱的豬骨拉麵......麵就係亞信屋到買的九洲拉麵.......有豬骨湯包........煮好加幾片日式叉燒同冬筍.....再灑番d芝麻同紫菜絲......咁又變咗碗「老翻」日本拉麵嘞！又經濟又幾似樣嫁。

婆婆之廚餘炒飯

今次le碟又係用廚餘嚟炒飯........有南瓜.......煙肉.........蟹籽......蛋......又一碟唔錯的午餐啦！