2018年3月30日 星期五

金沙玉子荳腐虾球鮮鱿

今天又試吓係Facebook 到學到的菜式,唔錯,好味。。。但只可淺嚐,因為咸旦王同海鮮都高胆固醇。

2018年3月29日 星期四

又中又西的午餐(3。29。2018)

今早自己食西式,太后食中式午餐。。。。

自己食。。。。牛扒雞肉三色飯

太后食。。。。七彩炒薯絲,蒸黑立,咖喱排骨,煎蛋角

2018年3月28日 星期三

March. 28.2018的午餐

上次煲淨的响螺在冰柜,所以今朝加埋蟲草花同瘦肉,燉埋碗湯比太后。

其他的餸有蒸水蛋,鹵水鵝頸同『炒埋一碟』。。。即是(翠肉瓜,金菇,豬腩肉)。。。。。哈哈哈!

2018年3月27日 星期二

蟲草花云耳炆雞

今天來一客突破,加入粉絲一齊炆。。。。好好味呢。。。。

蟲草花,云耳同紅棗先浸後飛水

雞件用糖,蚝油,生粉醃過

用羌片同干葱先爆料头同雞,焦焦地便贊酒,加適量水,炆至雞熟,加入浸軟之粉絲,煮片刻便上碟。

2018年3月26日 星期一

March. 26.2018午餐

好耐冇煲羅宋湯。。。今日煲番次先。。。。跟法包。。。再加幾嚿紙包雞。。。一於中西合壁。。。。

2018年3月25日 星期日

March.25.2018(週日)的午餐

噚晚太多飯剩,為咗唔嘥。。。炒碟Xo虾仁炒飯,再加碟紅燒大魚腩。。。。咁又一餐咯。

2018年3月24日 星期六

March.24.2018的午餐

今天食。。。

Xo醬韮黃炒滑蛋

西洋菜滚魚骨湯

酸梅麵豉蒸魚卜

冬菇魷魚蒸肉餅

2018年3月22日 星期四

2018年3月21日 星期三

March.21.2018的午餐

今天煮咗釀茄子。。。紹菜煮魚肉。。。。XO醬爆中虾。。。。煲咗個蟲草花响螺湯。



十年之啟示

以前聽長輩曾講過,人的一生有十年大運,亦有十年衰運。

最近回顧一吓,十年的大運未知過了与否,但衰運就應驗在这十年,既然命中注定,亦不能避免,就只有無奈接受。

希望在人間,我是個樂觀派的人,深信只要一息尚存。。。。。。明天永遠是光明的。


(圖片來自網絡)

2018年3月20日 星期二

馬拉盞之夜

前幾日煮咗幾樽亞婆密製馬拉盞。。。。於是炒咗一碟飯同埋爆鮮鱿。

我的配方有。。。。

虾醬
虾膏
虾米
蒜茸
乾葱茸
紅椒
花生醬

雞粉

用來炒菜同炒飯都好正嫁。

2018年3月19日 星期一

March.19.2018的午餐

今日食豉汁蒸盲鰽,蒜茸蒸金菇,同埋盐焗粉蒸雞。

雖然係養魚,但三十蚊有條游水魚都抵嫁。

用四季粉來蒸雞,啱啱好。

金菇咁蒸法真係好好味。

2018年3月18日 星期日

2018年3月15日 星期四

日式碟头飯

今日玩吓日式碟头飯先。

朋友教咗我整溏蛋,原來超容易。

用味淋同醬油煎咗幾片豬腩肉,再跟只溏心蛋,好正!

2018年3月12日 星期一

韭菜豬肉餃

今日手痕痕,自己搓咗少少皮包韭菜煎餃嚟食,雖然煎得唔靚,勝在真材實料,面且好juicy 。

我只用柳梅(自己剁)
滑蛋
韮菜

調味一般豉油,豆粉,糖,古月粉同麻油。

搓粉的皮先用暖水開,後加凍水,搓滑後醒约半小時便可分割小粒包。

2018年3月10日 星期六

March. 10.2018的晚餐

終於敵唔過印姐的超級細菌,自從上星期日放完假回來後,大感冒,巳經由星期三晚開始叫佢不要當更(通常我同佢每人一边(晚上),係廳瞓,看住太后)由賓賓頂上,但始終每日關埋一齊在室內,都難逃一劫。唉。。。。。今日終於都要睇醫生。打咗預防針都中招,可想而知d菌幾勁吖,希望太后咪中招就咯。

今晚煮咗葱油雞肶
粉絲椰菜
同埋竹荳腐

2018年3月9日 星期五

荷荳欖菜XO炒肉眼根

今日又試新嘢。。。。

材料

荷蘭荳
雞肶菇
肉眼根
欖菜
XO醬
蒜片

荷荳,雞肶菇,肉眼根飛水

用蒜片起鑊,先炒肉眼根,欖菜,回鑊荷豆,雞肶菇,加入XO醬,調味,贊酒灑入約一湯匙水,兜勻便可上碟。

2018年3月8日 星期四

黑白芝麻杏仁曲奇

我今日又亂搅一餐自家配方的曲奇。

材料

麵粉170gm
粟粉10gm
糖粉70gm
杏仁粉70gm
牛油70gm
發粉1/4茶匙
食用梳打粉1/4茶匙

以上全部混合搓勻,轆薄吸模,预熱焗爐焗至兩面熟便成。

2018年3月7日 星期三

March. 7.2018的午餐

今日的午餐食。。。。

游水黄花魚

南乳齋。。。同埋。。。

咸旦肉碎蒸蛋。

2018年3月6日 星期二

March.6.2018的午餐

其實做人可以好簡單,两餐一宿,但求温飽。

今天食芥菜豆腐滾魚湯,蒸游水石九公同埋蟲草花云耳蒸牛肉。

2018年3月5日 星期一

March.5.2018的午餐

今日食。。。。白飯魚煎蛋,炒粒粒,亞参醬雞翼(太辣,比咗工人食),同埋冬瓜肉片草菇滚湯。

2018年3月4日 星期日

March. 4.2018的午餐

今日人整五香芋头腐皮卷(有芋头,肉碎,馬蹄)卷好蒸熟上粉半煎炸。

再蒸碟蟲草花云耳蒸雞肶

同埋烚少少椰菜花

簡單又一餐。

2018年3月3日 星期六

白木耳涼拌青瓜絲

早輪買咗幾两白木耳,昨天試吓浸發後切絲同加埋青瓜絲涼拌,跟日式芝麻醬齊食,好好味。

2018年3月2日 星期五

元宵佳節樂悠悠

今天是新十五,亦是宵佳節。。。

在此祝願各位網友元宵節快樂。。。。身体健康!

2018年3月1日 星期四

March. 1.2018的午餐

今朝去咗鴨脷洲買魚,好抵。。。50蚊九條釣口青根,醃咸咗部份煎,部份用來蒸。原本以40蚊買咗兜白飯魚,点知煎完至發覺有一半係虾皮,但都OK 吖。

昨天的粉葛太大,只用咗一半嚟煲水,今日用埋另一半煲鲮魚豬尾骨,一於双管齊下的去濕。

Related Posts Plugin for WordPress, Blogger...