土鱿冬菇豬肉两食

個人十分喜歡这味餸、但近年由於胆固醇的問題、少吃咗土鱿、昨晚做了一個肉餅、今早又釀了一個節瓜、還是吃不完、所以我平時好怕煮一人餐的！

現在我每天都奉行少吃多餐😅

魚露豬扒+菜飯

因為雪柜沒有香茅、故此今天只做咗兩片魚露豬扒、加菜飯做午餐就是！

由於近日疫情還未消退、每天在家中很悶、每天的指定動作就是煮午飯、睡、上網打机、再煮晚飯、所以很早便睡、但往往去到半夜便醒、所以睡眠質素很差😥

椰菜炒牛河

半磅牛肉、半斤湯河、一個人可分两餐吃、今早食咗一半、今晚換轉另一方法食埋佢：就係用蚝油同老抽炒埋佢做晚餐囉！

牛肉$26、河粉$4、韭菜同椰菜都$5、所以今日两餐夾埋真係好抵😊

韭菜滑牛湯河

昨天還是很熱、今早一起身見又落雨、當然气温立刻凍番晒、咁点會唔容易病呢？

所以早點吃完又瞓過、一於變只槽肥豬🤣🤣🤣

KFC蘑菇飯之A貨版

我個人並不喜歡食炸雞、但对蘑菇飯情有獨鍾、所以上網摷咗個做法、一於今晚整碟A貨嘅蘑菇飯！

材料有：啡蘑菇、牛油、麵粉、蒜茸、黑椒、牛肉湯

做完試食都覺得有八成似、但感覺太齋、所以焗咗塊雞扒切两加埋落去食🤔

糖醋骨

今次的糖醋骨不用走油、只用一字骨加入大量之薑片爆香、贊酒後加入陳醋、生抽、老抽、水、片糖、小火炆約45分钟至一小時左右、最後大火收乾汁液、上碟後裝飾、糖醋骨其實好食是炆完之後的薑片😛

齊齊開餐（Feb.24.2020）

今晚鄰居放假、上午我出動去買餸、今晚的菜式係：潮式蒸烏头（亂咁攪）、蚝油草菇煮肉碎、蕃茄豆腐紅衫魚湯、通常佢放假我多數一齊食、一來可以食多点、二來有伴冇咁悶囉😅

自己蒸的烏头、好味又抵食、成條都只係$30、成餐餸大約$100、平均每人$50左右、抵囉！

牙痛餐

今天還是有点痛、所以煲多次白粥、今次加碟炒米粉添（材料有：虾米、韭菜、紅蘿蔔、金菇、火腿絲）😋😋😋

金菇牛肉卷跟意粉

今早由於牙痛之關係、只煲咗白粥跟腐乳同咸旦食！

食完止痛餅好似好了一點、今晚就做個金菇牛肉卷跟意粉、希望明天再冇牙痛啦、而且咁嘅環境、若然真的牙痛都冇醫生睇啦😷

昨夜的晚餐（Feb.22.2020)

昨晚又早吃飯都是食埋雪柜早醃定之豬扒粒、不過今次用大葱嚟煮、同時飯後飲了碗中午煮定之糖水、点知今早起身就出事嘞...（牙痛）！

这非常時期、又怎能去看牙醫呢？

都係嗱嗱食粒止痛药先吧😅

簡約的獅子头

这碟獅子头做法十分簡單、只有免治豬肉（要多少少肥肉）加片白麵包（浸濕揸碎）、加埋調味：盐、古月粉、生抽、老抽、糖、雞粉、生粉向同一方向攪至起膠、弄成球狀、放雪柜雪過夜

*同時攪肉時可加入薑米*不喜歡可免

先將肉丸略煎過、放入深碟中（注入上湯）燉約45分钟至一小時左右（我用高速煲15分钟便ok)

拎出後將湯汁用生粉水埋獻淋在肉丸上、伴入小棠菜進食、不過我今次伴入炆過之冬菇魚肚一起食👇

宵夜精選

Le輪就算唔失眠都晚晚奉信咗『木蝨教』、即是瞓一個钟又醒一次、醒完可能要等成個钟才可再入睡、一句到尾睡眠質素差得很、加上可能一早食晚飯的原故、所以往往到咗半夜就肚餓、所以炒定碟宵夜以防太肚餓睡不到（不過只是偶然一次、自十多年前開始我巳戒掉「食宵夜」这壞習慣）👇

蕃茄荳腐虾丸煲

話說上網學咗le個煲仔菜（我沒有煲仔、只有用深碗上桌）、这是一個平價菜式、因為只用超市的平價急凍白虾做成虾丸（味道自然不可同新鮮虾相比）！

材料十分簡單：一包白虾做成的虾膠、蕃茄一個去皮切粒、薑片適量、蒸煮豆腐一小盒切粒

做法：用薑片起鑊、放入蕃茄粒煮片刻、之後豆腐粒、最後加入調味（盐、糖、雞粉）、少少水、再放入巳做成之虾丸、滚片刻後加入少許生粉水、熄火後加入少少香芹粒做裝飾就是👇

世事豈能盡如人意

以前讀書時代、往往有無盡的理想、夢想、但隨着年紀老咗、現在回头看看、有多少能夠真的實現呢？

最後的願望、本以為母親離開後再無什何牽掛、可以安享以後的幾年、怎料到去年的運動、今年的世紀疫症、把整個願望打垮了、現在更沒有任何人能獨善其身、因為这世紀大疫症巳散播在世界的每一個角落、既然暫事沒有任何药物可根治、但求自身的抵抗力可克服、正如圖中（两年前的我）又誰料到今天的處境呢？至親的人、你們可慶幸離開得及時嗎？

希望天堂能相見🙏🙏🙏

Feb.19.2020午餐&晚餐

今天由於有要事外出乘搭公車（这是近兩月來的第一次、（感覺上好似搵命博咁）、不要笑我呀、因為而家的疫情大家都不知道誰是播毒者囉、唉！

今天的午餐先搵間沒太多人的食店、一個人座在自成一角的位置、怱怱吃了一頓客飯、这餐都算便宜、加埋碗熱豆漿都只係$65.

到了回程時、怱怱走上街市買了條平平地的所謂游水養魚（黃腳立）煮了餐「海鮮一人前」的晚餐給自己、祝願今天千萬不要「中獎」、哈哈哈、現在每天都要瘋言瘋語才可渡過每一天.

薯仔洋葱炆玻璃肉

昨晚食個一人餐、今次用碟头型式、改用兜兜上、有朋友問我什麼是玻璃肉？（其實只是豬肉的其中一個部位、好似在豬脾之間、帶有肥瘦兩層、食起來爽脆）😋

我今次切片用洋蔥絲、薯仔切片、用蚝油

糖、老抽加水煮到汁液收乾就是！

剩餘物資（節瓜、冬菇、云耳炒龍躉肉）

之前曾買過一塊近龍躉翅边的肉、上次用蒜茸蒸咗一半、剩低的另一半放在冰格、今朝拎出來煮埋佢嚟食、有網友問我点解個雪柜咁多「宝物」？我笑笑口回答因為每次龍躉肉起碼都要買半至十兩、但我只得一個人、所以每次我都會分两次吃、其實自己食量唔多、現在更奉行少食多餐、往往比人的感覺係好似好富貴咁啫🤣🤣🤣我只係偶然為之、而且食对我嚟講係永遠放在「第一位」😋😋😋

去瘟疫的傳說

我不是導人迷信、亦不是作什麼假消息

可當笑話一則、無伤大雅啫🤣🤣🤣🤣🤷

食隻雞蛋又唔會死人嘅？

迷你版的簡單午餐

今早又係買餸日、由於今早得自己一個食、所以煮咗個迷你版的午餐：盅头雞飯&粉絲煮椰菜😋😋😋


一则題外話：原來而家打劫唔會幫襯金舖、而轉咗去超市打劫「厕纸」😮😮😮


真係人都癲🤣🤣🤣

今天的午餐（Feb.16.2020)

今天不用外出買餸、是但摷吓個雪柜、有乜就食乜、終於比我搵到一只薯仔、少少肉碎、小量雜菜、一小嚿豬肉、半條馬友、所以串成这午餐！

最然每碟都是迷你裝、但都好豐富呢

可憐的香港人

一個咁發達嘅社會、勢估唔到會淪落到連某一些東南亞國家都不如：（係百冇）乜都搶餐懵、皆因市民对個政府完全失去信心！

这世界真係沒有最衰、至有更衰的吧、以下便是我今天的見聞（基本上自去年運動開始不久巳沒有落去旺角逛逛）、不過又估唔到今日還是十分旺、雖不至人山人海、但比我預期的幾多人流、我買完布口罩便怱怱行番上山咯🚶

蘑菇肥牛两吃

由於近日疫情日趨嚴重、很少外出購物、加上銀根缺乏、電費又貴到飛起（今期电费要成$600）、好彩有政府資助、不過現在政府对市民愛理不理的政策、下次再有沒有補貼都成問題、而且我們这類長者、又冇生產能力、都係慳住駛好啦！

今天用咗肥牛加蘑菇、分别煮咗中式同西式的午餐及晚餐、一次煮定慳電費😥

Feb.13.2020(午&晚餐)

Le輪胃口非常麻麻、時好時壞、今早摷埋雪柜的剩餘物資（個湯除外：冬瓜乾草菇肉片湯）、同鄰居一齊食、晚上因為佢要返工、是但煮咗碟云吞撈麵就算（不過都只係吃了1/3）唉、心情真係好影响胃口嫁👇

Feb.12.2020(午&晚餐）

成個星期都冇乜胃口（成日驚中咗招）、但諗深一層、都唔驚得咁多、以前有句話：應死唔駛病！

好啦、反正以前後生睇過紫微斗數、話我應該有七十幾、咁点都重有幾年玩吓嘅🤔

午餐同隔離一齊開餐、今晚就煮一人餐

從網上學回來的抗炎水+晚餐

不論真定假、飲完真係幾舒服、所費不多：材料有魚腥草、青欖、竹蔗、南北杏、桔餅、煲咗一小時左右、不用加糖、少少甜👇

之後再食得清清地
放幾片南瓜在碟底、上面係冬菇馬蹄蒸肉餅

做鬼好過做人

而家日日係咁驚、巳经無必要都唔出街、公車又冇搭、買餸速去速回、回家後又要由头洗到落腳、重衰過沙士時代、日日在惶恐中渡過（雖然自己未試過三年零八個月）、但想像中都快要來😠😠😠

搅到個個快黐線、疴完驚中招、唔疴又唔得、做人点解咁辛苦啫？？？人類做埋咁多衰嘢、可能係天遣吧？係就快d嚟、咪日日有新招啦😷😷😷

就快18區都變淘大

齊齊開餐（Feb.10.2020)

今晚同隔離一齊開餐、但这两天由於身体不適、我煮完都冇乜胃口、只是青蜒点水式的吃了少許、早幾天肚疴完、昨天又有点呼吸不順（希望只是不習慣戴口罩的關係）、不是中招就好嘞！因為現在人心惶惶、唉😞

今晚隔離買龍躉比我炒西芹、煲咗個蟲草花豬展湯、我就出個雞片鮮竹煮豆腐、但煮完都吃不落！

十年前的某一天

深宵的一個失眠日子、令我想起十年前的二月（剛好是農曆新年）是我失去陪伴咗十七年嘅狗狗亞Sam離世的月份😭

在同一年亦是我開始學人寫網誌、因為那時每天都流着眼淚、朋友就建議我寫網誌、一來可以打發吓時間來忘記伤痛、二來又可以記錄吓自己每天所發生過之点点滴滴、作為日後的回憶（其實我小學時曾一度學人寫日記、後來發覺一旦被人看到自己心中的秘密、所以最後都放棄了）！

隨着年紀漸漸老去、思維亦有所改變、因為當有朝一日不在存在这世界時、還有我的作品（食物的照片）同我的回憶留存着、今晚我又從我的回憶中找回和Sam Sam往日溫馨的片段

（这相照片是牠死前三個月所拍攝的）👆

齊齊開餐（Feb.8.2020）

今天同隔離師奶一齊開餐、我負責煮、佢出料、我地一人一份、十分安全！

一則題外話：

近日香港搶口罩之餘、又開始搶厕紙、真係人都癫、好衰唔衰这幾天個肚不停「肚疴」、所以今早我都加入「黐線」行列、搶番一條看吓門口先、冇口罩至多唔出街啫、冇厕纸唔通唔去厕所咩🤣🤣🤣

蕃茄紹菜湯（云吞&豬腩片湯麵）

由於今日不是買餸日、所以簡單滚咗個蕃茄紹菜湯、今朝食云吞、而今晚就食豬腩片湯麵就是！

非常時期、連落街買餸是都高風險、其實而家真係好似坐監咁囉😥

点估得到原來而家做『香港人』係咁可悲呢！

2020.2.6日的午&晚餐

今天心情十分低落、回想2019同2020年間相继走了两位至親、十分伤感、第一個是母親當天事出突發故未能見她最後一面、而昨天亦因自己身体不適、來不及見自己親大佬最後一面、感到十分遺憾！

在此只能望他一路好走、不要再受痛苦😭

今天的午餐同晚餐都是簡簡單單就是嘞.

Tuna FIsh 意粉

通常同樣的食物我不喜歡同一日食的（雖然係衰格咗少少）、無法啦、鬼叫亞媽蹤慣我咩（人地咁話嘅）！费事網友又話我唔貼题😂

👇請繼續向下看

昨晚見冇乜存貨、只好摷吓有什麼可煮、最終比我發現有罐Tuna Fish係柜桶底.......於是乎就煮咗碟快速意粉、聽聞洋葱可殺菌、所以特別加多d落去炒😅

冇什麼特别的方法嚟煮、只係將洋蔥用少量牛油爆香、加入意粉同 🐟、再加少少上湯煮一陣、熄火後灑入黑椒碎就是😋😋😋

茄子蒸排骨+豬油捞飯

就算有工人駛又如何？從來煮果個都係我、点都好過d人到咗『中年』至學做人同學煮飯吧🤷

請不要「惹怒我」、現在的我不再做駝鳥😠

人不犯我、我不犯人（下集）

晨早溜溜、從手机中收到一個轉載的錄像由海外的一位（所謂是姊妹）的人whatsapp過來、我只是回答咗一句：「謝謝、生死对我巳不重要」、点知換來是一段教訓的說話、原文大概是指摘我當年若好好照顧好母親、今天我還有大屋住、有佣人用、不看尤自可、一看真的怒火湧上來（本來早巳平復的火山、一次過爆發了）😠😠😠

平是沒有联系的、一來便教訓、我即時回覆、說若是假關心而乘机給我教訓、心領了、隨即刪除了她🤷这插圖來自whatsapp、相信十分適合來形容这件事、同我今次的標题、我由始至終都是個「愛恨分明」的人、誰对我真的好我還是分得清🤔

Feb.1.2020（午&晚餐）

2020的一月份話咁快就過咗、今天是2月的第一天、似乎疫情沒有完結的消息、反而由於在各方面都缺乏口罩之下、政府部門要在家工作、超市狂搶食物、街市蔬菜日日海鮮價、由今天開始有很多銀行都唔開、都唔知点攞錢添！

所以由今天開始睇嚟都要慳住駛、今朝買咗包黑豚肉片分兩餐食、今早食日式肉片加蛋飯、今晚就食肉片炒米粉