我的晚餐（Jan.30.2020)

而家咁嘅時勢、有得食好食嘞、今天的菜心巳經$30/斤（有些街市聽聞$100/斤添）、唔知重以為用緊日本錢、除咗冇晒口罩、酒精搓手液之類產品、黐線到好多超市連米都賣晒、那些药房甚至半夜有人排隊等開門買口罩😷😷😷

唉！都係食咗至算咯🤔

人不犯我、我不犯人

我從來只談飲食、自己的私事、对於社會的政見、從不切定立場、因為每個人都有自己的立場、例如食物、我喜歡濃、別人喜歡淡味、是沒有对与錯之分、但在我post亂咁鬧人就令我光火、只有絕交

香港人、自求多福

羅文以前有首歌（家變）、歌詞其中有一句：「變幻才是永恆」、不過这個變幻的付出是否大了一些呢？

自97回歸後、心中預咗係有所改變、當時心中諗到咗2047我早已不存在这世界上、誰料到只過了一半（還未到）、巳變到如此不堪、太后之事令我醒覺到原來一路都生活在这「騙子的社會」中、有時真不知是「天真」定「愚蠢」

雖然我沒有任何信仰、但有時無論佛教、天主、甚至基督都有一定的至理名言、Anyway、天祐香港吧！

Ps：原來今天剛好是搬過來的一週年、時間飛逝

年初三（赤口日）

昨晚隔離師奶回港後、今早自律地对我說这星期各自煮飯食、自我隔離、若人人如她这世界減少傳染、可惜一般人都太自私、至形成今次的大感染😷😷😷

今早落土瓜灣買餸、水靜河飛、我速去速回、午餐食蒸魚同蒜茸蒸茄子、今晚就用剩下之茄子炆埋另外的半條魚！

『老少平安』之開年日

做了六十多年人、從未見過咁蕭條的街道、今外出買早餐時竟發覺街上空無一人（加上今天下着微微雨）、唔知以為是去咗外太空添😮

昨天巳沒有外出一整天、今天若不是沒有了糧食都不打算往外走、現在似乎最安全的地方就是留在家中、但若一旦成為疫埠、睇嚟就算唔外出都餓死吧、这個土生土長的地方令人感到好悲哀！

今天趁着開年日、準備個『老少平安』嚟食吓、希望今年大家都平平安安啦！

大年初一

在此同各位拜年、希望個個身体健康、快快樂樂地渡過这個不甚太平嘅『鼠年』💞💞💞

自制麵筋

昨天上網揾到一個簡單做麵筋的食譜（來自網友Ling)、所需材料只有三樣：
高筋麵粉600克
盐3克
水約330克

做法先將以上全部搓成粉糰、用布蓋上靜止30分钟、之後放入清水浸過面、等候三小時、再用水冲洗（边冲边搓、去除白色、直至水開始清澈）剩下粉米糰約1/3左右、揸乾水份後放雪柜1/2小時、之後拎出再揸多一次後、分別切成小塊、用油炸過、便成麵筋、之後可隨自己喜歡的味道做甜酸、咖喱或蚝油齋！

今次我做了蚝油味道的齋👍👍👍

澳洲安格斯牛肉两吃

近來細菌横行、雖然窮窮地都唔想食咁多 「大陸」嘢、雞蛋肉類盡量食外國急凍、今早買咗包澳洲牛肉、分別午餐用咖喱煮、今晚就食蕃茄意粉、反正一個人食唔多、唔係驚死、係驚死唔去瞓在醫院就大鑊（太后的情況比我啟示太深刻）若有事時最好似外婆、半小時搅掂就好咯！

莙薘菜（又名豬乸菜）

这菜我從少食到大、細時亞婆用豬油（自己煮制）加豆豉蒜茸同指天椒煮、很美味、通常只有冬天才有得賣、去年太后『回魂夜』（刚好同一天在靈堂守孝夜）、我亦煮了供奉她、今天我見街市有得賣、故此又再煮多一次作為一種懷念啦！

預防肺炎湯水

早两天又係網上學到这個湯水、可素亦可葷、主料係「五指毛桃」、配料係粟米、鮮准山、栗子、花生同紅棗、今次我加入少許瘦肉、個湯飲完好舒服、唔理是否有用、當保健未嘗不可吧！

因近日的肺炎陰影、攪到人心惶惶、唉、希望沙士不要重臨就好啦.不要靠政府、一於靠自己、

萬事小心就是🤔

星期六的午餐

下星期一隔離師奶回鄉渡歲、所以今天我地食好d、一早落街市買咗龍躉肉、滾過蕃茄薯仔湯、做碟手撕雞（個汁好正）、只係用咗盐焗雞粉（四季牌）、用麻油開勻、淋入滚油便成！
加碟灼鮮露筍、同埋自家制的梅子醬蒸魚卜（放荳卜在碟底、吸埋d汁好惹味）😋😋😋

忘記了手撕雞添、再補番長相

腰果酥

今日再接再勵、继續焗「腰果酥」😋😋😋

相对嚟講我都係比喜歡昨天的「花生酥」、可能口感做唔到我平時食開的、相信要再研究、研究一番😛😛😛

花生酥

今日这小食頗成功（個人認為）、程序同合桃酥的做法差不多、好好味！

我的份量如下：

麵粉130gm
發粉同食用蘇打粉各1/2茶匙
（以上全部混合篩過）
糖約63gm -  65gm
豬油（今次自己整)**可用固体菜油代
花生醬（我用粗粒）約65gm

以上全部搓成粉糰、分割成小粒再搓成球、壓扁後掃上蛋漿、放半边花生在上面、預熱焗爐150至160 度左右、上下火**(各焗爐火路不同、自己執生）**

焗約20分钟左右

游水黃花

可能自細食慣魚、每餐都無魚不歡、今早在街市買咗两條游水黃花（應該是養魚、因海黃花都唔記得多少年沒吃過）、見佢平平地$58/兩條、抵食啦！

再煲個鸭腎西洋菜湯、又可早晚都有魚、菜、同湯嘞.

母親的忌辰（Jan.14.2020)

去年的今天、相依咗六十多年的母親捨我而去、遺憾的未能在她臨終時陪伴在她身边、可能係命中註定吧！

以往她在世時（最後的數年）、常常都頗有怨言（因為當時真的有点心力交瘁）、自她離去後那種不捨之情亦未能隨着時間的逝去而淡忘、雖然自問对她的付出問心無愧（在她病發的初期、沒錯曾对她誤解、因當時不知是她病情的原故）、最終亦醒覺、之後彼此之關係亦可「重回正軌」、還記得外婆在世時常常掛在边的兩句話：只有今生、沒有來世🤔

永遠的懷念、母親💞

刚好今天亦先父的生忌、可惜未能給他上香、現在只好眺遠的紀念吧

（圖片來自網絡）

芋絲餅

尋尋找找終於比我今天揾到这個正確的做法👍

我每次去酒樓都一定會叫这点心、雖然明知年纪大咗、芋头这類食品都少食為妙、不過話分两头、每樣事情也好、食物也好、只要適可而止、亦未嘗不可！

週末的午餐

近來头头碰着黑、先比人呃錢（好彩唔多、但都激气）、今早继而「仆街」（因今早太大意唔記得戴眼鏡就出街）、食完早餐臨走時（可能冇眼鏡）仆咗係地到、瘀到痺囉😭

今天的午餐有節瓜煮瑤柱仔、蒸馬友、栗子炆玻璃肉（这隻豬肉好爽口、通常切片炒菜或炆栗子、蓮藕片等等）

笑口棗

我都好多年冇炸新春小食、今日心血來潮、上網摷到一個幾易嘅食譜、來自網紅『張媽媽』的手藝、唔錯呢！

配方如下：

麵粉（低根）半磅(約300gm)
發粉1/2茶匙
食用蘇打1/4茶匙

蛋一只
糖90gm
油同水各適量

白芝麻約1/2杯（先浸水後再隔去水份）

做法：

蛋+糖搅勻、加入適量油同水再混合麵粉（先將發粉同蘇打粉混入麵粉中）、輕手搓成粉糰蓋上濕布醒約20分钟、之後搓成長條再分割成小粒、搓成波波轆上濕芝麻、中火炸至金黃便可上碟、凍後放在玻璃或密實盒中存放.

南乳齋

差不多年幾冇煮過这味齋、以前太后好多時叫我煮比佢食（那時還未入院）、自去年十一月左右入院後巳不能再吞嚥、之後我基本上完全冇再煮過.（最後一次係煮去靈堂）😭

以前煮的南乳齋很多材料、還加入云耳同蟲草花添、今次巳經簡化咗好多😅

特式馬蹄糕

本來今年並不打算做任何糕点、因從去年開始任何節日对我都冇影响、只是昨天本來想煮碗甜湯（馬蹄露）食吓、点知食唔晒、便將餘下的糖水製成糕点！

今次这馬蹄糕加入咗一種（唔知乜）的薯、口感就似鮮准山、聽講止咳喎、咁就做一次（白老鼠）啦.

傳染病重臨香江

自03年沙士之後、安逸咗16年、点知又再起風云、雖然現階段未殺到埋身、但回想當年的一役、死咗成三百人、所以現在一聽到「傳染病」三個字、就如「驚弓之鳥」.
近年全世界都天災不斷、恐怕天滅这世界不遠咯！

这幾天買不到口罩、聽說全港都賣斷市、終於下午搭車過灣仔、好彩比我搶到兩盒、（當然又是double平日的價錢啦）、唉、咁都冇計啫！

茄子炆魚腐

前日買咗$10鲮魚肉、今早用埋雪柜的豆腐、一只蛋、同埋芫茜葱、做咗幾個魚腐、炆咗两條幼身的茄子（我覺得通常幼身的好食d）！

甜薯小食（煎軟餅及糖不甩）

早前買了两個澳洲蕃薯、做了少許蕃薯餡、昨天做了些煎軟餅、今天將剩下的餡做埋糖不甩！
口感同甜度都唔錯、不過明天覆診時若要抽血的話、一定比醫生鬧死嘞😛

一件題外話、今早有個特別嘅whatsapp、原來係以前幫我（以前的）屋企裝修的老細whatsapp比我、問我近況如何又住在那裡？唔知是否近日睇得新聞多、我回覆佢.....（我地d「大陸term」低端之人、唔通會有豪宅住咩？）....嚇到佢不再覆我.
自從我比人鬧過唔分「莊閒」之後、我嘅自我保護能力加強左、每當有些好耐沒有联络的人突然找我、我會用陰謀論去諗每一個可能、聽來好似好衰咁、但現時我會对每個人........

抱住高度戒心、因為實在太多表裡不一的人存在🤔

炒蘿蔔糕（星洲版）

昨天買了一條韓國大根（白蔔蔔）、聽聞是有机、是否如此就不能証實😍

今次我的份量同做法如下：

蘿蔔去皮後淨重約900gm
冬菇、瑤柱、细虾米適量
乾葱茸约2茶匙

粉漿

粉米粉150gm
粟粉50gm
水（包括刨完蘿蔔之水約）200gm

做法：

將蘿蔔後皮後、一半切粗條、一半打成茸（搅拌机）、之後揸乾水候用、落油先炒干葱、配料、蘿蔔條、茸、加入調味（古月粉、盐、糖、雞粉）、再加入巳開之粉漿边搅边煮、煮杰身後放進巳搽油之盆大火蒸约一小時.

凍後切粗粒、加入（自制）XO醬炒勻可上碟（正式食過的星洲版炒蘿蔔糕是沒有配料、所以这是（A 貨版）😛

昔日之情懷

继上一篇的回憶、今個post又懷緬一吓做中學生同拍拖時代的「鐵板餐」.

事源於昨天在fb介紹現時我住的那一區有無數抵食之食店、故此今天特登行落去找到其中一間類似「波士頓」的古老餐廳、重温昔日的情懷、我相信近这三十多年我巳沒有再食過鐵板餐嘞！**（之前曾經戒了牛肉廿多年）

當然以这樣的價錢、不可能有太大的期望、我之所以試食都只想拾回那些年的青葱歲月😂😂😂

珍貴的回憶

这張照片今天又再在我的fb中彈了出來、還記得去年我準備搬遷時將大量的照片燒去（那時突然醒覺要學會.....斷、捨、離）、只將認為有需要的留在身边.

圖中的小女孩相信如今巳步入中年（因那年大約是七十年代中期、一次的探訪遠嫁德國的中學同學（她女兒）、刚好那年佢先生在菲律賓工作）、不過那次之後便失联、舊的記憶、偶然浮現、感到無限的唏噓😅

椰菜肉碎炒油麵

这個麵比較油一点、但偶然一次都未嘗不可！

油麵約半斤
免治豬肉適量（加生抽、糖、生粉、水醃吓）
椰菜切粗絲

調味汁：老抽、糖、麻油、*滴豬油*（加入可令顏色靚d、若未能購買到可用印尼的甜豉油ABC代替）、少少水

先落少許油同干蔥片炒免治豬肉、加入椰菜絲炒到半軟身、再加入油麵用筷子兜勻、最後加入调味汁再捞勻便可上碟🤣

鮮茄意粉

这個鮮茄意粉可配搭很多肉類或海鮮、今天我用咗「有机」的雞肶肉、其實可用煙肉、豬扒、牛肉等等！

主要是個鮮茄汁的做法、我今次用咗三個大蕃茄（去皮）、半個洋蔥、茄汁、茄膏、糖、盐煮成的、（最後用搅拌机打爛）、剩下的可放在保鮮盒再放入冰箱（隨時可拎出來配搭任何肉類或海鮮）、十分方便.

2020的第一餐

今天又有遊行、所以還是留在家中最安全、祝願新的一年再沒有流血的事件又發生、彩虹🌈再次降臨这城市吧！