滑蛋帶子煎米粉

昨天晚上用了冰箱的剩餘物資、做了这碟煎米粉、自己只吃了一小碗、其他比咗鄰居食😊

近來的胃口一日差過一日、可能同腸胃的變異有關、不過都唔去check啦、反正check到有問題時都唔會去醫🤔

蚝油齋

近日係fb嘅group到睇到Simon師傅提到為什麼好多人煮齋煮到太淋同太多水、原因是我地大多數什麼菜同料都一齊落去煮、所以做完除咗太淋、顏色更不美觀

他建議每種材料分開煮、最後才全部兜埋

首先红蘿蔔片同甜豆加鹽油水拖過、鮮枝竹略煎、云耳同蟲草花先浸後飛水、粉絲浸完加油略炒過、黃芽白用蒜茸略炒、之後加入云耳、蟲草花、支竹、粉絲、水、蚝油、糖、最後加入甜豆、红蘿蔔片、埋薄獻後加入豉油同麻油、熄火上碟

邊邊夜

今晚和鄰居打边爐、我們三人都食唔晒、雖然食物不多、但還是只吃了1/3左右、最終其他两人分别打包餘下的食物

受洗後的第一次做『事奉』

昨天是返教會崇拜的日子、亦是受洗後第一次做「事奉的工作」、我昨天是做招待（因為喜欢做過迎賓、又钟意講嘢）、这工作最適合我

同時送了一小罐新年的小禮物給教會的其中一位姊妹、開心♥️

南乳芋头炆排骨

剛在雪柜睇到重有少少排骨同芋头、把心一横、一於整咗嚟送比人食🥰

先用南乳醬（自己再調教過味的）、加油同蒜茸爆過排骨同芋头、赞酒、加入老抽、糖、水炆至淋、埋獻、上碟、又一碟好好送飯的餸😅

教會寫「揮春」活動

原來今日教會有『寫揮春活動』剛剛行了過去寫番新的對联、2023同今年都是自創金句、除咗好創意亦帶出現在居住的屋苑名稱

嘻嘻~是否覺得亞婆有少少聰明呢?🥰

順便帶咗少少新的產品(迷你一口合桃酥）比他們試食、（其實想他們做我的「白老鼠」吧🤣🤣🤣

觀塘下午茶聚

今天試新嘢、有間新開的酒樓、約了兩位朋友去下午茶、食物都唔錯、值得再去

#星海

#觀塘

#鱷魚恤大厦二樓

飲完行经裕民坊见有新年的檔口、行了一圈、沒有特別感興趣的東西要買、所以打道回府😅

奄仔蟹粉絲煲

今早執到平嘢、食完早餐逛街市、竟然比我用$50執到2只剛剛凍到「仙遊」的奄仔蟹

回心一諗、見好冇食過蟹（因怕咬崩牙）、又試吓啦😝

將蟹洗淨斬開、撲上粉略走油、落薑片加上湯煨煮一下粉絲、加入走過油之蟹、略煮、加入蚝油、塩、收火上煲

柚子蜜金蚝

今年買了六只金蚝、價錢是去年的差不多、昨天用了一個新的方法去做、首先將金蚝加薑片略蒸、之後煎至两边金黄、再兜入柚子蜜便可上碟

白汁芝士蘑菇酥盒

之前朋友幫我買咗幾個酥盒、趁今日天气凍唔出街、在家煮白汁蘑菇餡、放入盒裡、加少少芝士碎、用气炸窩焗10分钟、趁熱當下午茶食🤤🤤🤤

屯門~跳虱市場半天行（清涼法苑）

應承咗朋友替她看檔三小時、这是我人生的第一次、他們今次的活動比較特別、叫『不如問亞婆』内容大概是將兩代的關係互相分享、針對現今年青的一輩對人生、人際關係、同我們这一輩的有何分別、我都是头次和年青朋友互動、对我講是一種新鮮的嘗試、我亦從自己的角度同他們分析、所以我十分期待有下次的分享

今次我從另一檔學習如何制做環保洗潔精添😊😊

原來這地方我在七十年代常常和母親來拜佛吃齋菜、不知那些「米仔蘭」（植物）是否還存在呢、那些清香的味道至今還存在我的記憶中🤔

1

東華三院的獨居長者~盆菜宴

早前東華的義工打电话比我、同我報名參加東華的團年盆菜宴、咁啱又抽到、我見收费唔贵（$30）、又咁近、所以參加了、今日便去參加这盆菜宴、一共開了10圍、全部都是獨居的『老友記』

本以為自己老、点先坐我我隔離的竟然是92歲的婆婆、佢十分健康、冇乜病痛、甚至連三高都沒有、真羨慕佢😊

原來四年前曾舉辦過、之後因疫情巳停了三年、今年再次舉辦、都十分熱鬧、希望明年還有机會參加吧🤔

賀年小食之~笑口棗

今年第一次做贺年小食~笑口棗

这一次做了兩輪、第一輪可能太耐冇做、有少少失敗、第二輪好似掂、但又好似過了少少火、你話呢？

『偽』KFC蘑菇飯

我平時对KFC的食物不感興趣、唯獨『蘑菇飯』、雖然我沒有食谱、但上網摷了一輪、覺得这個食谱最接近

本來食谱是用啡蘑菇、但我費事去超市買、因為啡蘑菇是外國货、比較貴、又唔知做得对不对、所以慳慳地在街市買些白蘑菇就算

今次我用咗XO(牛湯宝）做個颜色、加入麵捞、黑椒而成的、味道都接近😝

菜飯+素魚塊

之前買落的素魚塊、好似食嚟食去都未完、嬲嬲地今日煮些瑤柱菜飯、再煎两塊跟嚟食、一來可慳錢、二來又可KO埋d貨尾佢啦😅

金沙芫茜咸旦餃子

今日買咗$10/6只咸旦、突發其想搅搅新配搭、用芫茜、咸旦、肉碎做餡、包了一些餃子、煎好後再用熟咸旦加牛油做成金沙、做幾只不一樣的餃子嚟食下、果然很香、不過只此一次、不好再吃、因為怕胆固醇超標呀😅

咖喱雜菜

近來越來越不想吃太多肉、今日簡單煮兜「咖喱雜菜煲」就算

材料：西蘭花、椰菜花、薯仔、红蘿蔔、茄子

切好先拖水、之後用牛油爆過雜菜、加入咖喱醬、兜下後加水、調味、煮到剛好、加入椰汁、生粉水即成

牛肉炒河~兩種做法

今早買咗$53牛肉、$15河粉、$5銀芽、分咗两餐

今早係濕炒

今晚係乾炒

兩款都好食

當然每次我都要同鄰居分享才吃得完🤤🤤🤤

簡單一人午餐&晚餐

今天要去脱牙、所以就食得簡單一点

午餐：

有冬菇馬蹄蒸肉餅

粉絲瑤柱煮節瓜

晚餐：

就由於脱完牙不可以食太硬的東西、所以外賣了焗薯同忌廉周打蜆湯

同鄰居住家晚餐

鄰居的家姐由國內來了玩两天、今晚我們一起在家煮飯仔、普通的家常飯、有蒸魚、蒸雞、芽菜炒韭菜、蚝油罐头鮑魚煮生菜、瑤柱粉絲煮節瓜

食完飯之後她們出去上山頂遊玩、我就负责洗碗

炭燒雞串

今早同朋友係「愛民邨」食完早餐、逛咗一輪商場、在360有这些雞串賣、買咗1pack試吓、用咗气炸窩嚟做、味道颇佳、而且又不貴、好似$56/2pack 、每pack有10串

咸湯丸

今天在fb出咗篇『咸湯丸』的帖子、唔想重複再寫、懒懒地copy過來就算🤪

滑蛋瑤柱扒豆腐

今早起身有点牙痛、不知是牙齒定牙肉痛、所以諗吓不如煮碟不用咀嚼的食物做午餐啦、近來周圍打探那裡有「軟餐」的课程、相信很快便需要到自己啦😊

今日煮这碟餸都好方便、先蒸吓豆腐（切碎）、再放入巳蒸過及撕開的瑤柱（加雞清湯）煮片刻、埋獻、推入蛋漿即成

開心果一口酥

新的一年當然要開開心心♥️♥️♥️

所以今早做了一些『開心果一口酥』派街坊

做法同腰果酥一樣

果仁100gm、炒芝麻適量

麵粉200gm

糖40-45gm、少少盐

油（我用花生油）大約75至80gm左右、是乎能否搓成丸子就

我用气炸窩190度左右局約15分钟

做出來唔甜又鬆化、是近來成功的一口酥🤔

2024年元旦日的午/晚餐

作為2024年的1月1日、我全日都食咖喱

中午的咖喱是『素菜燴素鹅』

晚上就煮碟『椰汁青咖喱雞肶』