三号風球下之打边爐晚餐

今天Helloween 正日、我地d老嘢冇得浦、唯有在家「烚吓烚吓啦！

约咗兩位鄰居在家打边爐、加上三号風球（現在的天气十分反常、11月重打風、黐線嘅）

在家慶祝Helloween 、又安全又可大吃一頓（其實现在九大簋都冇本事食啦）🤔

双虾（虾仁&虾籽）煮荳腐

今天用了虾仁同虾籽嚟煮豆腐、取代了滑蛋！

由於今早巳吃了一次飯、今晚就煮個米粉就算！

近幾天的血糖看似正常、早上空腹都只是6.1~7左右、下午吃完飯兩三小時有7~8左右、但血壓近二十天偏低（大概90至109左右）、唔知正唔正常？

唉！唔理啦、越緊張越衰、是但啦🤔

蟲草花蒸雞

今早崇拜時有教友送了包「咸魚仔」比我、我回家後蒸了少少嚟食、十分淡口、多謝佢❤️

可能以前住慣漁村的關係（南區）、加上先母十分喜愛吃这種魚仔、現在搬離該區、好少見到有得賣啦🤔

另外出去時已煮定飯及蒸定碟餸、所以很快便可開飯咯😉

蜜糖小蛋糕

下午做了四個「蜜糖小蛋糕」、少甜、做法又簡單、做完吃了一個、其餘送了比鄰居😋

材料：

自發粉45g

糖10gm

蜜糖大約2湯匙

蛋2只

Baking powder 1/2茶匙

鮮奶20gm

牛油溶液大約2湯匙

做法：

全部混合搅至沒有粉粒、最后才落牛油溶液、预熱爐180至200度、焗約15至20分钟

😚😚😚

椰汁咖喱雞

見好耐冇整咖喱雞、点知原來平時買開的这款「平價雞」、在这半年間靜悄悄地加了差不多成「10蚊雞」呀🥲

現在百物都加、加、加、生活越來越艱難啦、無可奈何吧😉

為咗配合168食療的方法、我一於奉行到醫生的日子、希望我的血糖會好一点吧😚

云吞湯粉&陳皮燉雪梨

今晚包咗少量云吞、分咗一些比鄰居、自己留起幾隻煮碗粉食就算、另外見近日秋天很乾燥、用陳皮燉咗一碗少甜嘅『陳皮燉雪梨』潤一潤😅

馬拉盞煮的~晚餐

今晚唔煮飯、只用咗之前煮的「馬拉盞」做咗两碟餸、一碟係煎鮫魚仔、（煎好魚才赞酒同落馬拉/葱花）、另一碟係炒芥蘭（不過芥蘭就一定要用油盐水先灼過才炒）、否则會太硬！

簡約共食午餐

今日的午餐有豆腐蒸蛋、蒸黃腳立、蜆乾滚節瓜湯、雞湯煮菜、加多两湯匙白米飯、同鄰居一齊開餐、感恩❤️

滑蛋虾仁炒麵

雪柜重有半個炒麵餅、於是浸了幾只急凍虾、加只蛋、一於整碟滑蛋虾仁炒麵、今日好早就食晚餐、希望明天空腹個血糖(靚仔）一点啦😄

原來昨天全日無吃飯、今早血糖得5.8、十分~靚仔😅

早餐兼同鄰居買魚

今早落山食早餐兼同鄰居買魚、原本想買「青根」、可惜全街市都冇得賣、（魚販說船未返）、只好買了兩條黄花、兩條馬友（當然是養魚、若是海魚會是天價）、$110🤔

再多買一條涼瓜同一條節瓜、贵嗎？以前的我從不想過「價錢」的問題、現在學會「精算細算」、好像有点遲吧🤪

物價現在悄悄地加了不少、就算包平時賣$5/包的米粉亦加了$1、早餐都加了$3、日子越來越艱難吧😚

唉、好在就快不用過🤣🤣🤣

燉湯&晚餐

今早只飲了碗燉湯、因朋友送了一些羊肚菌、冬天燉湯比較合適、我用羊肚菌、加入雞肉、螺片、同紅棗、所以一点油也沒有🤔

到咗晚上煮了碗湯粉、加入幾片煙鴨胸就算、希望到12月前糖尿指數好一点、交盆靚數比醫生睇😚

「另外的粉葛鯪魚湯是昨天晚上的外購湯」

過去与執着

以前的我是個「執着」的人、無論对人或对事、自從有咗信仰之後、慢慢地釋放自己、我曾经引用「一根火柴」來形容自己、只要一遇到火就立即燃燒起來、最近發覺自己好像變了用水「浸過」的火柴、遇到火亦燃燒不起來、深信这是神的力量、我表妹最近对我说只要將「舊我」放下、才能「重生」為人、當然現在還在學習中、希望值着天父的愛能令我徹徹底底地改造成為一個新的人吧！

Amen❤️

最近在fb看到一段文章、覺得唔錯、在这裡分享一吓

（圖片取自網络）

腩肉炆咸酸菜

昨天買了包腩肉、同咸酸菜、

今晚煮定明天吃、會入味一点、先將腩肉切薄片、用蚝油同老抽醃吓、咸酸菜白鑊烘乾身（加入少少糖）拎起候用😅

先用蒜片煎香腩肉片、加入咸酸菜、炒片刻、加入水炆煮至收汁😚

星期日的午餐&晚餐

今天是教會的119周年堂慶、所以两堂崇拜主日一起做、有詩歌同嘉賓分享、而且很多人參与、十分熱鬧、各人都抱着敬愛之心、多謝天父给我們一路的保守❤️

今早出門前已預備好午飯、所以回家後可立即享用、午餐是虾醬豬肉拼粉絲節瓜🤔

晚餐就食埋冰箱最后一包的鮟康魚、今次用咗欖菜蚝油嚟炒、再拼西蘭花、十分滿足😄

屋苑一日遊

今日參加咗一些團体搅的屋苑一日遊、行程先去虎豹樂園（好似11月就執笠）不過冇嘢睇、之後去銅鑼灣食素「自助餐」、最后一站上山顶參觀臘像館、回到九龍再去辦事處拎礼物、我自己那份比埋契妹（因為她們都參加咗）、行程唔錯、自搬嚟九龍後第一次參加这類「耆英」一日遊🤣🤣🤣

蟲仔麵包&沙嗲雞串

今日手痕痕又玩番一轉麵包、其實近年都好少整麵包、因為这一項是我最弱的、因為心急的人大多數會失敗嘅🤪

又買咗两隻雞肶起肉、做番十串八串雞肉沙嗲、我只用現成的沙嗲醬加少少咖喱醬一起醃、再串起竹簽、放焗爐焗約十多分钟便成😉

乜醬燒焗排骨

噚日買咗排西班牙豬仔排骨、自創咗個醃料、原本昨晚焗嚟食、但昨天整天外出、所以留番今早先焗半條、另外半條留比一位鄰居今晚才焗比佢食😅

估唔到個醃料又唔錯喎、焗完自己都覺得超好味、等我留起個食譜先🥲

親戚聚會

難得到咗这年紀還可以同契妹們聚首一堂、相約係杏花邨飲下午茶、稻香的出品唔差、亦幾抵、我們一行五人飲咗$300+、之後再上她家中閒談一番、最后再去大快活食埋晚飯才回家、開開心心又一晚❤️❤️❤️

喜滿樓菜館~土瓜灣

今晚同两位鄰居落咗去土瓜灣安徽道的樂「滿樓菜館」食晚飯、我們点咗佢嘅招牌菜、（芝麻雞）、咕咾肉同涼瓜炆倉魚、好好味！

埋單三百幾、都唔算貴、可接受🤤🤤🤤

之後重過去对面那間餃子店買咗盒生餃子回家（$60/20只）

午餐同晚餐

唔知係昨日食得清定加多250gm嘅糖尿药的關係、竟然今晨空腹6.1同下午三時再驗7.1（午飯後三小時）、如果每天都是这度數就perfect 咯😅

今天的午餐同晚餐都係亂咁配搭

中午那餐我叫「炒雜碎」乜都有、（翠玉瓜、洋蔥、指天椒、云耳、雞柳）用蒜豆豉炒

晚餐重搅笑、叫「是Q但菠蘿甜酸骨」、因為個汁我亂咁溝、不過好食、為咗血糖的保持、我只食咗一嚿骨同一嚿菠蘿咋

🤣🤣🤣

控制血糖的早、午&晚餐

近日血糖比較唔穩定、所以開始食「麥皮」早餐、雖然我曾经試過、但最終還是放棄了、不過透過現在有信仰的力量、希望能堅持耐少少、起碼可以堅持到十二月（覆診心臟）見醫生、看看血糖如何吧！

不過到咗午餐時段、不想食得太清、所以做個咖喱南瓜三文魚骨跟法包

晚上就真係要清d、用鰹魚汁做湯底、翠玉瓜絲、冬菇絲、雞柳、韓國麵

昨天晚上的南瓜小米粥

由昨晚開始準備食得健康一点、希望在十二月覆診前搅掂我的血糖指數维持在六度的水平、不過我这「為食鬼」唔知能否可以堅持得到呢😅

星期日的午餐

由於今天要返教會、崇拜完又要上「初信班」、所以昨晚做定個炆蓮藕、回家後蒸埋上次剩低的鮟康魚再加碟菜、同鄰居一齊開餐囉😛😘

「真真正正」的學懂感恩

我從小就受到父母親的影响、以善心待人、但當時還不太明白何謂「感恩」这两個字、不知從何年何月開始我開始对「感恩」有所了解、但還不太清楚！🤔

心中的種子（現在深信是基督一早巳種下）現在開始萌芽、我開始懂得做人應有「憐憫」及如何才是有顆「感恩」之心❤️

更加明白到一切的幸福不是必然的、苦难亦是一種对我的歷練、人生中「神」早巳為我安排好、將來我只要將一切交托於祂便可以🙏

（圖片取自網络））

滋潤糖水

早前係fb又學到这個糖水、最適合秋天乾燥的天气飲、雖然近來我的血糖上上落落、但侯完我只飲了「一小碗」、其他分晒比鄰居！😅

这糖水的材粉包括有、雪耳、西米、紅棗、杞子、冰糖、水、煮好後加入鮮奶、一滚起便可熄火😋😋😋

簡約的晚餐

為咗糖尿的指數能保持平均、这两星期要乖乖地唔要亂食嘢、盡量少油、所以今晚用鰹魚汁做湯底、煮了碗稻庭手打麵、再配碟夜香花炒帶子蛋、同少少炸魚仔

😚😚😚

大魚腩勝瓜夜香花湯

昨天去觀塘買文昌雞的時候、見到有(夜香花)賣、買了一袋（$20）、今早試吓用大魚腩(煎吓)再加入草菇、勝瓜、滚個湯、一於食吓湯飯就算🤤

昨天早上先去飲茶、再去觀塘街市对面買「文昌雞」、那間舖的文昌雞真係好好食、我的鄰居個個都讚好食😚