2017年9月30日 星期六

生日願望

今年没有慶祝,只留在家中陪太后渡過,到了我的年紀,没病没痛,巳是最大的恩典。

心願只希望陪多佢幾年,希望她的腦退化不要惡化得太快,總算盡咗承諾就是。

鵝头

又試机

今次用鵝


鵝头

今次用咗碟鵝头來試机

2017年9月17日 星期日

爆珠大莱糕

大莱糕本來是平平無奇的童年回憶、但加了台灣的爆爆珠、又是另一風味吧!

亞婆麻辣囗水雞

今日做開大菜糕、剩低少許大莱、來一客亞婆囗水雞啦、冇份量、冇食譜、亂咁配搭、好食就得。。。。嘻嘻!


而家做人做事、乜都隨心、咁樣會開心d!



2017年9月15日 星期五

五仁中式月餅

本來今年唔整月餅、早两天有朋友問起去那裡買五仁饀、突然諗起太后的至愛、做番幾隻啦、明年都唔知有冇机會食到啦。

食譜都係在網上左摷又改咋、因做不及糖漿、買咗轉化糖漿、都勉強收貨吧。

2017年9月14日 星期四

蜂巢虾仁蛋

今日炒乾身咗又比個新名佢。。。。蜂巢虾仁蛋!

哈哈哈。。。衰咗又揾藉口扮新囗味、我跟家中的印佣學的。

彩虹椰奶凍

早两日係九龍城買的爆珠又大派用場。

昨天用椰奶同魚膠粉做咗d奶凍、一於做幾杯來玩吓啦。



2017年9月13日 星期三

炆龍躉腩

中午去灣仔買有机青瓜比太后今晚食顺便買咗嚿龍躉腩、見雪柜重有少少鮮冬菇、炆咗佢啦。


做法同以往一樣、先醃、上粉、炸完再炆、最後加入蚝油、老抽、糖、兜至汁收即可上碟。

2017年9月10日 星期日

椰汁煎堆仔

做完糖不甩見重有粉剩低、不如做埋椰汁煎堆仔啦。

尤於我冇份量、做完好似唔夠甜喎。

2017年9月8日 星期五

久違了。。。糖不甩

細細個的時候、冇乜好嘢食、用糯米粉搓成的小丸子、加入片糖煮成的糖漿、再淋上花生芝麻糖食、巳樂得大半天啦!

隨着時代發達、人的生活好咗、咀巴自然食得招積、这些童年時的甜品都冇乜人食咯、今日心思思又懷舊吓。

2017年9月6日 星期三

寧缺勿濫

我素來做人的宗旨都抱着这態度、与其勉強、情願不要。

新工人來了第六天、老pat pat又開始佢>虾人<的本色、衰在今次遇着個容易哭的菲佣、我雖不斷提醒佢、屋企清潔的情序只有我能落order、否則我若發现佢不聽order做事、我實發癫。唔想佢行同一條路(以前舊菲佣)、管理这一門學問係難、所以我從九零年代巳停用两個全職工人、可是現今自己体力不继、只能監察、本來舊的菲佣好好、巳經習惯了、十分self aware、可惜顶唔順老臣子的人前人後两個樣的双面人、我一出街就点紅点綠、要聽從佢order、自己就做老細。

我对我細佬講、叫佢自己睇番cctv.我冇可能長期唔出街噃!巳經返唔到工、冇收入、再落去真係會發癫嫁。


乜和平共處係咁難的咩???


(圖片來自網絡)

2017年9月5日 星期二

亞婆小食

今晚又玩吓街头小食。。。。

咖喱魚旦
沙薑雞腳

魚旦配方(許記炸魚旦)、出水後加入沙茶皇、咖喱粉、柱候醬混合之醬汁

沙薑雞脚配方、出水後加入沙薑、塩焗四季粉、糖、水

栗子炆雞

今天要去觀塘補回上次拍那條片的收音、所以煮定一味餸比太后食lunch才出去。

街市有好靚之桂林錐(栗子之一種)、所以炆少少雞啦、材料除雞同栗子外、加入柱候醬來炆、十分惹味。

2017年9月4日 星期一

立場

今天又要呻吓苦水、因為新工人又開始頂唔順我的脾气。

但对於一個没有self aware(consciousness)的人、若然唔一開始嚴格執行、以後更難調教的。

所以換电話同換工人一樣、大家都要重新適應、十分困難。



2017年9月3日 星期日

富貴版之琵琶豆腐

今日唔用鯪魚肉、改用虾膠同墨魚膠、芫茜、豆腐、蛋、做的琵琶豆腐、先放搽過油之匙蒸熟、再用鑊煎香两面、加蚝油生粉水埋獻、放入巳煮好之绍莱面即成。


2017年9月2日 星期六

咖喱雞

今晚煮碟超好味又簡單的咖喱雞。

材料

雞半隻

用糖、生抽、盐、古月粉、生粉先醃吓

洋葱、印度咖喱粉、雞湯、椰漿(最後才落)

先用油爆洋葱、雞、落咖喱粉、爆香後才落湯、煮至雞熟才落椰漿、最後收淨少許汁才熄火上碟。

2017年9月1日 星期五

芋蓉焗西米布甸

很久之前曾經做過的中式甜品、今日見做咗d芋蓉、試吓做幾杯啦!

可能太耐冇整過、今次有d失手添、好似唔夠杰身呢。



Related Posts Plugin for WordPress, Blogger...