糖醋骨

今早做了碟糖醋骨、材料十分簡單、主料係一字排、兩條骨斬開三至四段、先用薑片煎香、贊酒、之後加入陳醋、片糖、茄汁、老抽、水、滚後用中火炆至汁液收到杰身、最後灑入葱花便熄火🤤

紅荳清心丸糖水

因為今日要返醫院抽血（準備下星期覆診）、回程時在土瓜灣食完午餐才回家、不過而家習慣了自己煮、發覺外面的食物真的唔好食囉、好彩不是每天啫！

回來後睡了兩小時（因為現在每晚都失眠、一般來講每日下午都要補眠两三小時才掂）😳

起身後見雪柜還剩低少許清心丸、反正今天已抽完血、一於煲少少糖水食吓、这是一個新的配搭、估唔到又幾夾呢😛

全魚餐

今早用龍躉骨滚草菇絲瓜肉片湯、再加碟粉絲蟲草花云耳蒸龍躉片、清清地都唔錯呢🤤🤤🤤

遲來的端午節晚餐

自從年初契哥往生之後、再沒有到過華貴邨、今晚同幾個契姊弟妹在「喜悅」吃頓遲來的端午節晚餐、而家能聚就聚一吓、因為世事無常、下一個可能是自己都未定🤔

今晚是AA制、每人都只係$120/位、雖然只是一般大路的出品、我們都唱談甚歡幾小時、曾幾何時去年契哥還同席間、現在巳不存在了、所以我們都應珍惜每一次相聚的時刻呢！

潮州粥的午餐

今朝是但煮了潮州粥配隔夜的梅菜蒸茄子、順便煮多碟榄菜腩肉煮青瓜、鄰居煮了薯仔炆排骨同埋香芹炆魚（佢用來帶飯返工食的）

端午節之共食餐（25.6.2020）

本來今天都唔想做節、不過始終都叫做大節、煮完巳好飽、只飲了碗湯就算😳

今天的菜式：老桑枝粉葛鲮魚（聽聞去濕及对飛蚊症有幫助）、梅菜蒸茄子、鮑魚炆雞、冬菇馬蹄蒸肉餅

甜品系列之清心丸

这一款潮州糖水是我喜愛之一、但近年因受糖尿影响巳甚少煮嘞、加上政府講過制作清心丸要加某些防腐劑之類、所以現時甚少地方有得賣!

今次煮了碗加料的綠豆清丸糖水、除了用開边綠豆同清心丸之外、還加入馬蹄片同蛋花添、我今次煮得好淡口、因為下星期又要抽血驗糖尿指數🙏

大三圓的午餐

今天中午應朋友約、去銅鑼灣金朝陽的「大三圓」粵菜食中午飯、这個朋友知道我現時的狀況、好多時都請我吃飯、十分感恩（不是因為有飲有食至咁講）、記得以前外婆曾經講過、錦上添花易、雪中送炭難、对於這種朋友、是「感恩」的🙏

今天我們吃的是個二人套餐、十分豐富、食完我行了一陣便回家、因為我的黄腫腳還未好、痛了差不多三個月呢😭

揮之不去之懷念

今天（農曆五月初三）是外婆的生忌、以前在舊居我每年都買定燒肉同生果供奉她的照片、但自從搬走後已沒有了、去年我還可以到墳場拜拜她同母親、今年腳患未愈、可能要明年才可以再去嘞😥

下個月將會是母親的生忌、她倆是我生命中最親和最愛的、希望她們在另一個空間過得快樂吧🌷🌷🌷

永遠懷念妳們💞

冬菇雞片煎麵

平時去開去酒樓飲茶都喜歡叫碟煎麵或煎米粉食、至於配料亦多元化、有時係肉絲、有時係虾球、今次在雪柜拎包雞柳、再浸幾只冬菇、加多两三條菜遠、便做成这碟煎麵做晚餐啦、雖然工序就多咗少少、但对於食我始終係有要求嘅🌷🌷🌷

Happy Father Day💞💞💞

星期日之共食午餐（21.06.2020）

今天的共食午餐有：蒸黃花魚、節瓜青島貝煮粉絲、同埋早幾天煲湯剩低的鮮准山（加些冬菇、肉片、紅椒、炒埋嚟食）😋😋😋

椒絲大豆芽配豬腩肉片

今天落咗去深水埗買按摩鎗(朋友介紹、見平平地試吓啦、希望幫到只腳冇咁痛、顺便買番支柺杖😅

因為中午食得好飽、所以炒咗碟大豆芽配潮州粥、点知？水少變咗爛飯添😄

特式炒薯粒配油盐飯

以前母親在世時很喜歡吃「油塩飯」、这是個自幼吃大的窮人飯（洗淨白米後加入油同盐一起煲、因為細時物资少、这種飯煲完有味不用加餸）、是一種童年的回憶吧🤔

同時見昨天有煙鴨胸剩低、所以自創了碟特式的炒薯粒配这飯（材料有：炸過之薯仔粒、煙鴨胸切粒、香芹粒、葱粒、指天椒切粒、煎香蛋切粒）、味道都唔錯嫁🤣🤣🤣

昨天的全日麵食餐（18.06.2020）

昨天中午食了碗「湯烏冬」
晚上食咗碟「黑椒煙鴨胸炒意粉」

可能近日天气好熱、完全沒有食慾、唉、真不知如何是好嘞😭

晚上的

南乳焗雞肶&素湯

昨天在土瓜灣買咗兩隻冰鮮雞肶、今早用南乳、糖、老抽、酒醃咗一個钟、之後用焗爐焗完再斬件、加埋個素湯、便有個唔錯的午餐啦😳

素湯的材料有：鮮准山、紅蘿蔔、椰果、粟米、同埋杞子

瓜粒湯飯

昨天晚上煮了個瓜粒湯飯、材料有冬瓜粒、瘦肉粒、鮮虾、冬菇、瑤柱、煮完後放入白飯、再灑入芫茜、蔥花、唐芹粒即成一碗美味的夏日湯飯！

越剪越短

早两日落土瓜灣剪髮、自從四月份幫襯咗個新髮型師後、覺得都ok（雖然不及以往幫襯開十幾年的髮型師咁滿意)、但而加搬了去九龍、來來回回都太麻烦嘞、人始終都要改變吓嘅、算啦、反正都不是十八廿二咯😅

簡易魯肉飯

因為材料不足、只做咗個簡易版的魯肉飯

材料：

較肥的免治肉
炸香干葱片
蒜茸
冬菇粒(蒸熟後切粒)

調味：
老抽、蚝油、糖、醬油膏、水

共食午餐（16.06.2020）

話咁快又到咗星期一、由於今天沒外出買餸、是但摷雪柜睇吓有乜食乜啦！

我就煮咗蟲草花云蒸雞、鄰居就叫我同佢煮青瓜排骨同煎沙追魚、咁又有快樂午餐吃了🤣🤣🤣

星期天的共食餐

由於今早還未落晒所有的風球、故此沒有外出吃早餐、今天就早点吃午餐！

是日的午餐有：蒸黃腳立、素肉碎炒欖菜冬菇四季豆、節瓜蚝士眉豆湯、鮮露筍炒雞片

素食篇之：素豬扒定食

今早突然記得有包素豬扒在冰格、所以灼咗少少四季豆、炒滑蛋、同埋少許飯糰、做個素豬扒定食😂

乾炒特級虾子麵

今晚再接再勵唔食飯、用咗一個「陳明記」的特級虾子粗麵嚟乾炒、沒加任何肉、滾開麵餅後加入蚝油同老抽一齊炒、最后再加入虾子、兜匀便上碟

粥麵午餐

今早煲了黃花魚茸粥加韮菜蛋炒米做午餐😋


黃花魚煎完拆肉加入瑤柱煲成魚茸粥、韮菜切粒、加入蛋粒炒米粉、最後灑入炒香芝麻即成！

香芒鮮奶糕

今日試做一款香芒鮮奶糕

材料十分簡單、零失敗😋

鮮奶550ml
鱼膠粉18克
白糖30克
芒果一個

做法：

先將芒果起肉切粒、放在器皿中、鮮奶加入糖及魚膠粉煮至微滚、隔渣候凍後放入巳有芒果粒器皿內、放雪柜雪至形成糕狀、切件便可

黑椒虾

昨天買咗半斤中虾、用黑椒洋蔥的方法嚟做、十分惹味😋😋😋

方法十分簡單、煎香調過味之中虾（盐、酒、古月粉）、回鑊洋蔥、紅椒粒、灑上黑椒碎就是

魚香茄子之（麻辣版）

自從腳患後、甚少吃辣的食物、為咗早点消滅晒 d醬汁唯有盡量煮晒、今早煮咗個麻辣版嘅魚香茄子、煮完後送咗比d保安食😊

材料有茄子切條、肉碎、蒜茸、炸乾葱片
調味有豆板醬、麻辣醬、老抽、糖、少少水、煮完熄火後加入少許陳醋同麻油

心得：茄子不用飛水或走油、只用乾炒（不加油）的方法炒軟身先

梅香咸魚肉碎爛飯

这是個我自幼很喜歡吃的飯、隨着年紀大咗、加上現時奉行健康飲食文化、巳經很久沒有吃了！

今天突然心血來潮、一於放縱一吓吧🤔

全日麵食餐

今日全日唔食飯、早上墨魚丸湯米粉、晚上沙爹炸魚旦捞虾子麵、不過近日胃口真麻麻、一個麵餅都食唔到、唉！

還好昨天仆完街後、腫了一大嚿的腳拗、搽咗幾次跌打酒之後、竟然消咗腫、不過舊患的腳踭還未好、今早抽咗少少的超市日用品、由何文田廣場行到返屋苑巳頗吃力、唔到自己唔認老囉、回想當日大抽小抽（由舊居的超市到屋企、路程比現在遠超五六倍的路程、還面不改容）、只能講句：時不与我吧😥

APM利苑点心午餐

• 本來平時巳經少出街、加上腳伤未痊更加唔會出街去遠的地方、但由於約了朋友交收一份文件（她在觀塘工作）只好明知落雨都照去、点知一外出便出事了、意外通常一不離二、二不離三、第一單是唔記得帶口罩（從未試過）、沿途在車上只好用毛巾掩面直至落車、本想去K仔買、点知沒有單獨一個賣、一買便要10個/$80（破財）、第二單更伤、竟然叉錯腳摔了一交（可能天雨路滑）、幸好有位好心的年青人扶了我起身、為防再有二不離三、一吃完午飯立刻乘車回家、搽了跌打酒、希望明天不會再痛吧😥
• 
  
• 希望衰運快些遠離我🙏
• 
  
  

冬菇炆爽肉片

為咗清雪柜、今晚炆咗碟冬菇爽肉片、再加埋紹菜一齊炆添😋

之後煲咗少少飯、飯面加咗d餸再焗多一陣、之後變咗美味的煲仔飯！

特式虾子麵

很久沒有去陳明記買虾子麵、估唔到現在除咗包裝美觀外、連價錢都美觀（貴）埋添、原本去年買開$80/斤升到現在的$98/斤呢🤑

同時發覺現在九龍城的店舖及街市熱鬧得很、每間都人山人海、昨天除了買咗一斤虾子麵之外、還在街市裡面買咗半磅墨魚膠$80/磅（自己回家後做了墨魚丸）、還買了半磅德興的炸魚蛋！

所以今早煮了碗比較「特式」的虾子麵做午餐😋

午餐（06.06.2020）

今天煲了個湯（節瓜、瑤柱、眉豆、蚝士、豬骨）、同埋煮了冬菇肉絲扒西蘭花苗

簡簡單單又一餐

双色椰汁紅豆糕

其實这甜糕有唔同的方法做、有用魚膠粉做、亦有用粟粉做的、今次我採用粟粉的方法、因為容易点、但口感就沒有用魚膠粉做的好吃😛

揚州炒飯

今天的午餐是揚州炒飯

材料十分簡單：白飯、虾仁、叉燒、蛋
調味只有塩、生抽

今天的共食午餐

三十一年前的今天、是個難忘的日子（當時還算年青的我、當然有種針不拮到肉不知痛的感覺）、不論當日是誰对誰錯、今天的我、心情就如身在火海中、不過自知一把年紀、冇錢亦冇健康、唯有等待和母親早点團聚的一天吧🚶

今天的共食餐👇
蒸魚、茄子雞片、青瓜排骨、粉絲節瓜

甜品篇之糖不甩

雖然今次做的沒有花生、但都唔錯、每天留在家中沒事做、實在太無聊、做了幾粒簡易的糖不甩做下午茶（太多的糯米对骨唔好、加上太多糖又对糖尿不好、只能偶然做幾粒用來影吓相、做完只食咗2粒咋😋

午餐（06.03.2020）

今早的午餐有：蒸馬友、青瓜煮雞、豆腐蒸蛋、今晚就食日式湯烏冬😊

晚餐（日式湯烏冬）

麻婆豆腐之（雞肉版）

平時做麻婆豆腐通常用肉碎、但今次是用雞胸肉切粒做的😊

如果唔食得辣的朋友們、可用蚝油同老抽代替豆板醬、这是個用來跟白飯食的好味餸呢！

做法十分簡單、首將雞胸肉切粗粒後用塩、糖、古月粉醃過、最後才捞入生粉（目的是使生粉包住調味、不致流失）、之後將百福蒸煮豆腐切粒、一同飛水、拎起候用、之後用油爆香蒜片（不要太耐、否则變燶）、立刻放回飛過水之雞肉粒同豆腐粒、再放入豆板醬或蚝油、老抽、糖、少少水、煮片刻便可上碟（可加入葱粒）

甜酸魚塊

之前買過这急凍魚塊、見不貴而又唔腥、所以今天用了一半做甜酸魚塊來吃、只上了脆漿、炸完炒香大葱、回鑊甜酸汁及魚塊、快手兜匀即成！