我的晚餐

这幾天我的胃口又開始回落、但是沒胃口總要吃一点点😔

今早的只吃了少許、餘下的又給了鄰居、晚餐煮了酸梅麵豉蒸三文魚、云腿津白、煮完分了三份、自己吃一份、其餘的分了给两户鄰居、因為習慣了不吃隔夜的食物😚

这習慣從小就開始、改不了！

云腿菜炒飯&虾皮滾勝瓜湯

今早煮咗個飯、用朋友送的云腿加些菜粒炒咗碟飯、再用虾皮滾碗勝瓜湯就是😋😋😋

簡簡單單都唔錯🤔

金銀蛋炒青瓜虾仁

雪柜還有半條青瓜、切薄片、雞蛋分開蛋王同蛋白各加入少少生粉水、快手炒匀、拎起、青瓜加蒜粒、赞酒、加少少上湯炒至軟身、再加入巳拖過水之下虾仁、（下調味、少少盐、胡椒粉）、放回金銀蛋、最后用生粉水埋個薄獻、又搅掂😜

新做法都唔錯、做食物定要色、香、味俱備、缺一不可嫁👍😉

海味大雜會

人生匆匆、轉眼成空（这是我一路以來的金句）、見近日名人也好、朋友也好、都相继唔再玩落去、而且下個月自己又到咗「便利店」之年、都係有食就食、唔食就真係「罪大惡極」😂😂😂

見冰箱太多嘢、都係時候清一清、材料有：金蚝（先拖水再用薑汁爆吓）、冬菇先浸洗再蒸淋、花膠（其實都唔知係乜膠）先浸後出水、瑤柱先浸再蒸淋、發菜浸發後飛水

用油先爆香冬菇、金蚝、花膠、瑤柱、赞酒、落蚝油、雞湯、水、炆淋最後加入發菜煮片刻、打個獻、滴少少老抽（做色）、又搅掂😘😘😘

素鰻魚涼瓜煲

早前鄰居同我係大中華食過的「素鰻魚涼瓜煲」、我十分喜愛吃、雖然不知那素鰻魚是用什麼材料做、但靠想像我用了紫菜包住素雞、先炸後煎的方法、做之後切粗片、再煎吓兩面、之後用蒜头豆豉、先炆（醃過盐再冲過水之）涼瓜片、再加入煎過之素鰻魚、落調味（老抽、糖、蚝油、水）、炆片刻、再埋獻便可上煲😘

無题

点解咁寫？因為今晚亂搅一通、整咗碗都唔知比「乜名」佢嘅東西？😂

因前幾天見视频有個類似的示範、但又唔係好記得個名同材料、所以我靠記憶試吓做、但材料可能有出入、不過煮完又有意外嘅驚喜、味道真唔錯！

材料有：蒜茸、蕃茄、木耳絲、瑤柱絲、虾皮、雞蛋煮成嘅湯底、之後加入一開四嘅餃子皮、滾两滾便可進食😋😋😋

这碗新產品真係唔錯、可能有瑤柱同虾皮、所以幾鮮甜😚

簡易的西湖牛肉羹

之前好似做過一次、但實在唔多記得清楚、因近來發覺（尤其是中招之後）記憶明顯差了很多、有朋友講是叫「腦霧」喎、嘻嘻、『老母』就聽得多、「腦霧」就不知啦、所以我更加要寫多一些網誌、起碼知道自己昨天做過乜嘢嚟囉🤔

西湖牛肉羮的做法：

牛肉切粗粒、用胡椒粉、生粉先捞過後飛水（拖下就好）

之後用雞湯（我一半湯、一半水）、煮滾後用馬蹄粉推成羮（一定要用馬蹄粉推羮或翅之類、用生粉容易變回水狀、俗稱「番生」）

最後放回牛肉、滾起後熄火、加盐、推入蛋白、芫茜、便可盛起😚😉

快、靚、正❤️

西貢~北潭涌之夜

一個認識咗半個世紀的好朋友嘅生日、又怎可以唔去呢（雖然超遠）😉！

想當年同佢認識於英國倫敦的YWCA宿舍、之後在外合租了半間house直至回港（1973）、由當初佢拍拖直到結婚、退休、我們雖不常見、但友誼直到今天、她曾是我的煮食啟蒙老師（因認識佢之前我連煲水都唔識）🥱

疫情之前每逢佢生日在必在外慶祝、如今只能在她家中食了😚

今晚全部都是認識咗超過四十年以上的朋友、難得濟濟一堂😘

蚝油花生雞腳

今晚有飯局、所以要預先檢測才出發、早上買了冰鮮雞腳、用嚟炆花生、簡單的做法：蚝油、生抽、老抽、糖、水、炆約40分钟左右、不要太淋、但又不可太硬、都係自己執生啦🤫

原來自己雖然老、但還是有颗「童真」的心、昨天路過湾仔買的手袋扣、好得意！😜

芫茜、雞肶、雞湯日本麵

不知怎樣这两天突然又失去食慾、所以今晚嘗試用雞殼煲個湯底、再加入芫茜、雞肶、煮碗日本麵、睇吓可否提昇番「食慾」🤔

近來的情緒陰晴不定、好像突然失去咗目標、不知是否同近兩年太多朋友的離開有關、雖然每天都对自己講「活在當下」、但實踐起來確不容易！

相信只有每天的「禱告」才能舒緩一吓波動的情緒.

簡單午餐

由於一早過咗香港去打針（最後的一針）、回家後快快手煮好簡單嘅午餐、香煎黄花仔、瑤柱瘦肉煮節瓜同少少黎麥飯（鄰居比的）

蟲草花蒸雞

今次用咗四隻冰鮮雞翼、少量蟲草花、云耳（貓耳朵）、杞子、红棗嚟蒸、雞翼切數段、先用薑汁、古月粉、塩、蚝油、少少生抽、糖、生粉、油（顺次序落）醃過、蟲草花、云耳、紅棗先浸後飛水、冲洗後加入洗過之杞子、用油爆過、赞酒、捞入調過味之雞雞、隔水蒸熟便可！😋😋😋

豐富又滿足嘅「落風球午餐」😛

相信好多要番工嘅打工仔都好失望、因為八号風球要除下了、包括我的鄰居（原本昨天晚上打麻雀至今早、諗住又可放一天假）哈哈！我成日都講世事難料嫁啦！🥱

一早起身煲咗個「白果腐竹豬肚湯」、加多碟「涼瓜炒魚扣」之前有人講咗这不是「龍躉扣」喎、是但啦、總知好食就得🤔

以前豬肚冇人要、而家平時平日都要$50/個、新年期間更要$100/個添、好彩鄰居幫我清洗咋、（因太麻烦）、否则我就唔煲添😜

又係打風之下嘅晚餐

早前至講緊冇胃口、今日黐咗線、食唔停、一早煮咗碟「家常燒茄子」、下午又食咗隻「乳鴿送啤酒」、今晚又同鄰居開餐（不過煮完各自拎回家食）、安全d🤔

今晚煎咗「黄花仔」再將今早剩低的「家常汁」煮番放在魚面上（好味）、菠菜、今早剩低的家常燒茄子、外購的椰子花膠湯、真係好豐富囉！

家常燒茄子

这個是我從視頻中偷師的、但由於是個大陸视频、味道方面偏向油多、咸、辣、不過我全部都減、減、減、現在食起來比較容易接受！

做法：

茄子一條切成長條

先浸後出水（飛水）、之後搓乾候用

準備好蒜茸（剁得不要太爛）、青红椒切圈圈、用滚油淋過、加入生抽、糖、蚝油）、之後將茄子回鑊、赞酒、放入巳調好之醬汁、加少少水煮片刻至汁液收乾、最后加入葱花便可上碟😋😋

滑蛋牛肉豆腐飯（碟头飯）

近日好似胃口好一点、今早煮咗这個碟头飯、老人家同小朋友都啱食😉

做法簡單：

盒裝豆腐先切大粒略拖水（即係飛水）

牛肉切小塊加入蚝油、胡椒粉、生抽、生粉、醃吓（又係飛水）、拖一拖好喇

之後加入巳有油之鑊略炒、加埋豆腐粒、贊酒、加入雞湯、生粉水推成杰身、熄火前加入拂過之蛋漿

又搅掂👏👏👏

可放在白飯或煎米粉上面跟食😘

何謂完美的人生？

人的一生早由出生巳訂下來、以前沒有宗教信仰時只知「今生的因是前世的果報」、但現在相信是「天父」給每一個人來到世上的「使命」、我相信我的「使命」巳完成、所以餘下的日子只要我能解除心中的疑慮、能百分之一百相信我心中的「神」、距離返回「天家」的路應不遠🙏

個人的性格從不勉強別人同自己有一同的信仰、因為全能的「神」自有祂的安排、正如自己一樣、可能祂一早在我心中埋下了「種籽」、當我完成我的「使命」時、種籽自然地「開花」、相信只等待「果子」的出現吧！

相信每一個人心中所盼望、有美好的童年、生活無憂的成長過程、美滿幸福的婚姻生活、到了晚年兒孫滿堂、但这一切並不是每一個人都能得到的、但現在我相信只有全能的「主耶穌基督」能給予我們返回「永恆樂土」的希望、这便是我盼望的「完美人生」🙏

（圖片來的網络）

大中華素食（油麻地~西贡街）

今天下午同另一位鄰居去咗食下午茶（素食）、这間的出品唔差、我們叫咗兩碟壽司、一個煲仔苦瓜炆鱔、一個咕咾肉、下午茶時段2-5（半價+2）、所以全部唔駛$200！👇😋😋😋

「塩可頌」麵包+沙律豬扒

今日又發癫、見fb有人做这隻麵包（其實我都未學過、唔知乜東東嚟）、加上近年冇整麵包好耐、好似有点失準添、是但啦、反正自己食、話之佢🤔😛🤣

湯河晚餐

下午同鄰居落山去大家X食咗個下午茶、返到屋到咗晚飯時間都未餓 、是但地煮咗半碗「魚腐湯河」就當一餐囉😋

如果唔係因為晚上臨瞓前要食药的原故、是可以不吃的🤔

自從改咗隻新胃药之後、食慾還未正常番、希望遲些會好一点吧！

今晚臨睡前學吓如何「靈修」（其實我還未了解清楚何謂「靈修」嫁）、等我試吓上網查一查決定如何做😚

豬扒碟头飯

一早去教會、再上埋信仰探索班、回到屋企巳十一点幾、好彩一早煲定飯、又醃定豬扒、所以好快就有午餐吃😋😋😋👇

迷你合桃曲奇

今日做咗2打「迷你合桃曲奇」比鄰居、材料同以往差不多、尤於鄰居是個八十多歲的亞婆（比我還大十歲）、所以我今次用菜油代替牛油、應該健康一点、但相对就冇咁香囉😅

材料：

低粉120gm

粟粉1湯匙

發粉1/2茶匙+食用soda1/2茶匙

糖粉55gm

合桃碎的50至60gm

白芝麻少許

蛋液約25gm

菜油約65gm

另蛋王少許（用來掃面）

合桃碎少許（放曲奇面）

做法： 以上全部材料搓成粉糰、放在一旁靜止半小時

预熱焗爐200度、焗約12至15分钟

（是乎各人屋企的焗爐度數而定、自己執生）😛

红咖喱三文魚鮫

前兩天係街市買三文魚头時、同時買咗包三文魚鮫、趁今日有少少食慾（好似咋）、不如就做番煲「咖喱三文魚鮫」吧😉

其實煮完還未食、希望今天好一些胃口啦、否则日日瘦落去、最後變成我亞媽臨走前咁嘅樣就死得咯😔

昨晚的佈道會有個笑話、牧師講每次佢去醫院做「善終」洗礼、那患者好快就走得、嗯！諗諗吓下次病的時候搵佢洗礼、咁就可以去快d去啦😅

做法簡單: 首先煎香三文魚鮫（用盐、古月粉、生粉先醃） 、拎起、爆香洋葱、赞酒、放入红咖喱醬、加少量椰汁、兜勻加湯同水、再放入巳煎過之三文魚鲛（不要太耐、容易爛晒）下調味、少少糖、魚露、少少盐、最后再加入椰汁、熄火便可上煲仔、可跟白飯或法包😋😋😋

蒜头豆豉炆苦瓜/釀豆卜

食咗两日新胃药、好似好咗少少、起碼冇反胃同顶住頂住、但胃口還未見正常番、相信都要假以時日嘅！

今晚應咗承教會的朋友去參加他們的「佈道會」、我大鄉里未去過、咁又試吓囉😛

其實我都係最近上網去查吓什麼是「聖靈」同什麼是「屬靈」才知什麼意思咋😚

所以又幫鄰居煮定一個餸才出去😉

白汁蘑菇菠菜意粉（蒟蒻効果）

等咗幾個月终於今天去咗檢查我的「骨質疏鬆」指數、意外地和我15年前一樣、沒有「變差」到、如無意外未來的三年（未死的話）應該不用再驗喎🤔

莫非真是神的恩典？因為現在我每天都禱告、求神賜我有「健康的身体」（只是我個人的感想而矣）、我還未係基督徒🙏😅

回家後快快手地煮了碟意粉、先炒麵捞（牛油、麵粉、鮮奶、雞湯）、加入炒過之蘑菇片、灼熟之菠菜（切段及榨乾水）最後加入芝士及出過水之意粉、兜勻便可😋😋😋

糖醋腩肉

今天開始新的胃药、睇多幾日看有沒有幫助先、所以这幾天唔敢亂食嘢住、「手痕時」只好幫鄰煮吓餸囉！

今早幫鄰居煮这餸、之前是煮過的、不過是「腩排」、但今次是「腩肉」、其實方法都一樣、首先將肉飛水、先用少少油炒溶冰糖（打碎）、再落薑片（帶皮）、（多少少薑）、之後落腩肉、赞酒、落調味（生抽、老抽、水）、（水要蓋過肉面）、炆到汁液剩下少少時、加入陳醋便可上碟😋😋😋

这個餸的賣点是「薑」、因為『薑』吸晒d味道很惹味同好食！

睇完街症之後的晚餐

我的朋友睇到我食糯米飯一定又鬧我、明知個胃近來不好、還夠胆死食😅

因為昨晚睇完「夜診」、加上又落雨、回家後懒得再煮、只好翻熱一小碗（準備明天替朋友做的糯米卷）下午時巳做好的糯米飯、後果當然是唔舒服啦、真话該！😔

话說真和那醫生有缘（因為政府診所無可能重遇同一位醫生）、我第一次去中九龍醫院睇夜症是他、今是裝修後的第二次又是他、心中巳感不妙（因為上次因心跳同血壓不正常、問他可否減药、点知佢的答案：答咗等如冇答、终於搅到我要用醫療卷睇私家嚟解決那問題）心諗、今次又係佢：大鑊嘞、最后好彩佢都肯給我換過另一隻「胃药」、希望今次能比我渡過这四個月啦（因為心臟覆診要到12月才可再見專科醫生😭

一句講晒：香港做窮人真不易、尤其是我們这類有長期病的窮長者囉😷

最終只能禱告天父、讓一切交托給祂就是、啊們！🙏

三文魚头湯（偽家嫂魚头湯米）

我是個多心的人、因為今早在街市買了一份好抵的三文魚头、一時想做咖哩、一時又想做盐燒、最後都決定煲蕃茄、薯仔、洋葱湯🤔

本來諗住煮一半、因為一個人實在飲唔晒、但又唔想剩低的放雪柜、我是不喜欢食重覆食物嘅人嚟、最后都是煲晒、給鄰居分享把😋😋😋

超市的平價雞

近年我的思维真的改變了、不知何故、老咗？環境變遷？定有了信仰？

点都好、只要是變得好就冇所謂、因為什麼珍饈美食也嚐過、華丽美衣亦穿過、这一切一切會煙消云散、到最後都只是夢一場🤔

今天就用一隻最平的雞做出一碟不太差的蒸雞、（其實當年在英國吃的雞差不多吧）、四季盐焗粉是我最愛的一隻牌子嘅盐焗粉、用来醃雞放焗爐焗重正呀😘😋