五指毛桃煲印度椰子烏雞湯

今日係2020年的最后一湯，我十分喜愛「五指毛桃」的那個味，加埋印度椰子煲起上來更加有陣椰香味。

同場加影「流淚麵粉」做的麵包，可能天气太凍，發咗大半日都唔多掂，等下次冇咁凍再試過。😅

嚴寒天气下之2020除夕

2020年將盡，今天巳是最後的一天，在嚴寒之下（8度）全副武裝出動去買餸，現在發覺最便宜係食雞，所以走了去超市買咗两隻「冰鮮雞」，今早食「雞粥」，今晚食臘腸蒸雞飯，这便是我的除夕餐了。

《一则有趣的题外話》:

昨晚又有一個夢境的回憶，今次我夢見父親同（2母）一齊出現在夢境中，再加多一位久未見面的朋友，夢中大概是我們一齊出現在某一個場合，但離開時我同父親乘搭同一條船離去，莫非帶出我的未來將會是同「父親」在一起？有趣呢。

🤣🤣🤣

食物「交換日」

天气突然變凍、家中還有糯米一包、於是整咗糯米飯、刚好韓國鄰居又做咗家鄉湯年糕、所以我地互相交換食物、來一次crossover!

佢的家鄉湯年十分多料、工序亦十分多、淨係煮個湯底都成十樣材料、比我們的廣東餸還複雜、所以每次佢都花數小時去準備一星期的食物（因佢還有part time 工作、只是近來疫情関係、餐飲業晚上六時後只做外賣）、近幾星期佢都冇返工、多咗留在家中整韓國家鄉食物、我從中看到佢的食物比我想像中複雜很多呢😄

花墟短遊

今日朋友車我去「花墟」短遊，因佢去買蘭花，我亦學人買咗盆「空气草」回家吊在窗外，贪佢不用淋水。之後去深水埗「樹記」買腐竹煲糖水，最后去上海街買「流淚粉」整麵包（聞說这麵粉做出很軟熟的質感）

靚婆婆芋头糕

年纪大咗只會一年做一次「新年糕」，上次做完蘿蔔糕，昨天做底芋头糕，尚欠馬蹄糕便可收工嘞。

今次我買咗半边芋头，一半切粒，一半加水打茸。

粘米粉约180gm

芋茸連水约3碗

五香粉炒過芋头粒

臘腸一條蒸熟後切薄片（指甲片)

青岛貝蒸淋撕開

虾米仔浸過後用油爆吓

粘米粉加入芋茸水開勻，加入調味後捞入配料（自己試味，我沒有份量，因各人口味而定)

捞勻後煮至微杰，放蒸糕盆內大火蒸约45分鈡，凍後切片煎香即成。

今次的配方十分滿意。

剪髮

由於下星期要覆診，趁抽完血顺便回舊居附近理髮店去剪髮，我是個念舊的人，而且剪開合心水，不會隨便轉理髮師。

今次剪完又要两至三

個月再去啦。

和鄰居一齊開餐

昨天韓國鄰居買咗一大包豬骨，叫我今早同佢一齊煲湯，並叫埋另外的三位鄰居一起食午餐，所以我今早七点起身同韓國鄰居分別各煲一煲湯（因為有五個人飲，一煲唔夠）,

湯料有:紅蘿蔔，粟子，粟米，沙參，玉竹，白合，雪耳，蜜棗，南北杏，豬骨）

另外再炒两碟粉：魚鬆芽菜炒河粉，沙嗲豬肉绍菜炆米

*可能太好鑊气，搅到炒粉時公用廚房的煙霧感應器都响起來 ，要麻烦管理員上來熄掣呢🤣🤣🤣

Boxing Day的午餐

今日煲咗小米粥（蕃薯＋紫准山)同埋燻魚做午餐。

我是没有做個正宗的燻魚，只靠一位上海朋友口術大概的配方，是但的做吓嚟食。。。大概是用五香粉，盐，老抽，酒醃過切厚片的鯇魚中段，之後上粉炸熟，之後放入煮過之汁（薑，䓤，芫茜，酒，糖，老抽，花椒八角）川過（浸吓)，之後拎起放入碟中便成。

不一樣的聖誕晚餐（2020）

今年的聖誕節只能留在家中渡過，晚上同两位鄰居一齊食飯，簡單地各人出一味餸，我的就是今早用鲮魚肉釀的三色椒同茄子，另一位就出隻冰鮮「湛江雞」，再另一位就出帶子炒青瓜同灼皇帝菜。

豚肉片炒三色椒露筍

自從改變咗買肉的方式後，好多時在凍肉舖買急凍的豚肉片，個人比較鍾情帶肥的豚肉腩片，但鄰居就喜歡梅头肉片多点，我今早用嚟炒三色椒同露筍，覺得炒完顏色十分美丽，連食慾都大增呢。

炒公仔麵

之前買落的公仔麵(蟹王麵）試過放湯不大好食，所以今次用咗沙嗲醬，蚝油，老抽，麻油，急凍虾仁，韭莱，芽菜炒嚟食，反而覺得効果唔錯呢。

母親两週年纪念日

本來還有二十天才到母親離世的日子（1.14.2021）基於現時疫情十分之嚴峻，到時唔知情况會演變成点，一定未能去得到墳場探訪，今天趁臨近聖誕，走咗去銅鑼湾利園的COVA買包佢至愛的朱古力放在佢相片前（比佢聞吓吧）！

正如我所講，要做的在世時巳做足晒，現在所做的都只是表達吓思念的情懷，現在回想起佢都算有福嘞，若然去年中或今年至離開，肯定「倒瀉籮蟹」

午餐（23、12、2020）

昨天買的雞，今朝是第二份，用沙嗲醬混入蚝油，老抽，炆薯仔雞背。煮咗碗十殼米飯，咁又一餐啦。

准杞燉湯

昨天買了隻「平價雞」在超市買的農家雞（鄰居教曉我食的）。

以前從未試過買，因為覺得咁平可能有問题，但諗深一層，時勢唔好，慳得就慳，估唔到又幾好食呢，斬開雞分三份，翼+肶用來蒸，雞背用來炆薯仔，而「雞胸」就用來加入「准山，杞子，豬展，急凍螺头，花膠仔」燉湯，味道唔錯呢😀

我的抗疫三宝

前两日走咗去醫療公司買咗「抗疫三宝」血壓計，体温机同血含氧机。

根據朋友对我講，血含氧机对於我这類長期病患者尤為重要，還記得母親當年最後一次入醫院都是因為量不到她的血含氧指數才知道危險，所以我都决定買一個隨身帶着，以防不测。

我的聖誕礼物（2020）

自從搬了過來長者中心，幸好遇到一班很好的鄰居，互相幫忙，感到十分幸運。

今天竟然收到一位年長過我的鄰居，親手编織了一件背心給我做💝聖誕礼物，覺得很窩心，自己就沒有本事給她回贈礼物，唯一可做的就煮到好食的東西時，給她品嚐吓吧😊😊😊

芝士白汁焗飯

昨天做了碟芝士白汁焗飯。

那白汁照平時做法:麵粉＋牛油（麵捞），慢慢分別加入雞清湯同鮮奶，變成白汁後，再加入出了水的急凍虾仁同菠菜，之後加入芝士粉，再舖在白飯上面，入焗爐焗至住焦香便成。

夢境回憶之（2）

近來不斷有唔同之人物進入我夢境中，又令我勾起舊日嘅回憶，昨夜出現在我夢景境中竟然是我的外藉舊老板，他於去年（2019）往生了。

今天說的不是夢景境（因為一醒來巳忘記晒全部的内容）。。。。說的是和他的点滴。。他是個英國人，那時亦是我由英國回港後的第一份工，記得當時那間公司是做外的中介公司，俗稱broker，來往的是銀行及其他有關金融的買賣，所以工餘的時候，他會帶同我和另一位女同事(因為全公司只得2個女仔，其他全是男同事）去浦bar。

當時美丽華酒店的「刘伶bar」同銅鑼湾的「captain’s bar」不知留下了多少脚毛。

後來我轉工後一路和他及他的家庭都保持联络直至若干年後他全家回歸家鄉（英國），他退休後移居法國都一直有联络，可惜最终都未能如願去法國探望佢（本來打算太后往生後我便去法國一遊並探訪这個好老闆，可惜再無緣相見了）

三色飯配外購老火湯

昨晚實在太凍了，所以煲了碗三色飯加碗外購的老火湯，有時自己煲一來太贵，二來又飲唔晒，三來老火湯又不適宜老人家多飲，所以間中外購亦是不錯的選擇吧。

今次所購的好似有椰子，粟米，豬肉，红蘿蔔同鲜准山。若然買套票的形式，平均大约＄36左右，單買就＄43（那店叫靚湯宝宝，是我覺但唔錯同幾真材实料的一間）

糯米飯

應承咗鄰居幫佢整糯米飯、一早起身先蒸飯、再切料头同各種配料、（糯米隔夜先浸、瑤柱亦一樣）！

今早蒸糯米時加入盐、油同昨夜浸好之瑤柱（撕開）絲、蒸好後鬆開放涼候用、用油爆香干葱、其他配料（虾米、臘腸、冬菇、加入蚝油、捞入巳蒸好糯米飯、用筷子捞勻配料、灑入少量上湯便可上碟、最后灑上蛋你、炒過之花生同葱粒便成！

住家叻沙米粉

昨晚急急往超市買齊料（一於穿到好似打生化戰咁，速去速回），返回家立刻冲涼，之後開始煮碗我至爱嘅「叻沙」做晚餐。

这包星加坡叻沙是我最喜爱的，但就不喜歡那拉麵，故此自己改用咗「米粉」加埋喜爱的虾，魚片，同荳卜。

寒冬下之午餐

今日超凍、加上屋苑前兩天有人確診了、雖然不同电梯（因為是A座高層）、昨天衛生署都派咗工作人員來消毒走廊及電梯、搅到我的心情甚為不安、所以都不敢出外購物😷

所以只能摷吓雪柜有什麼的煮、見乜煮乜囉🤔

豉汁腩片炒翠玉瓜

早两天從凍肉舖買咗半磅用來打边爐的「腩片」、昨晚試用嚟炒翠玉瓜、估唔到個効果都錯喎👍

可能我加咗豉汁的原故、炒完攞嚟送飯、覺得十分惹味呢！

法式蜜糖芥末焗雞翼

我十分喜愛这蜜糖芥末、平時喜歡用來焗「春雞」、但由於現時食量大減、所以今次買咗pack冰鮮的雞中翼預先一晚先醃、在醃雞翼時、底面各界一刀（方便入味）、將法式蜜糖芥末加入日式料理酒、糖、日式豉油、將雞翼醃一晚、预熱焗爐200度、放入雞翼、先焗一面至焦焦地、反轉再焗埋另一面便成！

夢境之回憶

近日不知為什麼在夢境出現之人物甚廣、昨晚夢中出現的竟然是母親的故友（黎太）、她是漁民出生、亦是街坊、在四十多年前（大約七零年代）、在我家对面有間在海边搭成的「排檔」、她是個煮食高手、每天晚上在海边的排檔上經營粉麵、最拿手是用手打魚肉做的魚扎（用生菜或韭菜包扎住）、現在想起嚟都回味無窮

🤤🤤🤤

那年代的人有「食宵夜」的習慣、每天晚上十点幾就會聚集在她的檔口上「吹水」及食「宵夜」

偶然的夢境總會勾起一段段温馨嘅回憶、不期然又想起母親了😢

真的好懷念那段難忘的日子💕

（相片來自網絡）

馬來炒鬼刁

今日學人炒碟唔正宗嘅「馬來炒鬼刁」，我亂咁撞咋，靠記憶在街食過，大概的配料有虾仁，叉燒，蛋，洋葱，銀芽，本來冇咖喱醬的，但我鈡意個色靚d，變咗好似炒星洲炒米咁，唏。。。是但啦!

好食就得吧。。。。。

週末的午餐

今天的天气突然凍了、不想外出買餸、所以幫鄰居煲湯兼煮飯（佢去行山）、賺了一餐免費午餐！

我們的餸菜有：粟米红蘿蔔栗子雪耳煲湯、粉絲瘦肉煮紹菜、芥蘭头臘腸炒飯

沙爹混合醬炆薯片柳梅

自從上次在間牛腩麵舖買咗樽「沙爹醬」後，一路都未試過，今日見有個薯仔，切片後先浸水，加入柳梅肉片，一於炆碟餸嚟食吓先。

個混合醬有沙爹醬，蚝油，糖，老抽，酒，水。

炆完加入香芹粒做装飾。

蒸蘿蔔糕

去年停工一年、沒有蒸任何糕過年、其實今年都不打算蒸任何糕点、只是近來每次去酒樓都愛上order蒸嘅蘿蔔糕同芋头糕、不過近日疫情關係、不單止唔敢上茶樓、連出街買餸都速去速回啦、加上蒸嘅蘿蔔糕同芋头糕亦不是間間酒樓有得賣、要食咩就自己蒸吧😊

今早見有個蘿蔔係雪柜、煮餸又食唔晒、不如蒸半個份量、滿足吓自己啦！

簡單的晚餐

今天又整咗＄500「骨伤手療」的治療，跟據醫師对我分析，我的腳痛源自「根」的問题，若只做針炙只能治標，不治本，况且我本身有糖尿及高血壓，針炙始终是（入侵性）治療，不太好喎。

不過我暫時都不打算继續治療，等下個月再發放醫療卷才考慮吧！

今晚用南瓜加叉燒蛋炒飯再加多碗粟米羹就算。

晚餐（共煮分食）

这幾天鄰居放大假，故此一齊煮，但煮完就分開食（因疫情的原故）

今晚有咖喱雞，龍躉勝瓜滚湯，同埋蒜茸蒸茄子。

彩椒炒墨魚

昨晚鄰居買咗三色椒同墨魚，叫我幫佢炒碟餸做睌餐。

我用了每色（紅，黄，绿）各半隻，切粗條，墨魚半只切塊界花。

墨魚界花後飛水候用，先用蒜片爆香墨魚片，加入三色椒，蚝油，糖，盐，快手兜勻，贊酒，少量生粉水埋獻。

陳皮乳鴿+中式奶油津白

这個好好送飯的乳鴿我久唔久都會煮吓嚟食、加上近日乳鴿大平賣、昨天$35（兩隻）、由於乳鴿胆固高、我都不經常食😳

方法十分簡單、先浸果皮絲、切定两粒干葱头、乳鸽洗淨斬件、用酒、老抽、蚝油、塩、最後生粉先醃約半小時、爆香干葱、果皮、乳鴿、赞酒、加入刚蓋過面的水、炆乳至汁杰身、加入辣椒粒、熄火、上碟🤤

津白加入上湯煮腍、放入鮮奶、用生粉水埋獻、、最後加入火腿茸便上碟👇

午餐12。07。2020

今日見隻脚冇咁痛，所以拎雪格入面的「假水鸭」出嚟煲咗佢，点解我講「假水鸭」呢，因為上次我買的外國野生嘅水鸭都要168蚊，但今次叫雞檔代買竟然两隻都唔駛百二

蚊，而目見個樣子似「未成年」的米鸭。

我用伏神，蓮子，百合，元肉加豬展嚟。

加碟煎封䱽魚同素肉絲煮菠菜。

煮食爐（壽中正寝）

估唔到朋友送给我入伙的第一件电器，今天终於「壽中正寝」，两年都捱唔到😒

这两個月真難過，又剝牙🦷，又要整腳🦶，重要連煮食爐都瓜埋，唉。。。2020唔該快些速速走啦

生亦何欢。。。

。。。死亦何悲。。。人生在世，若生於動盪的社會中。。。我反而羡慕那些早離世的朋友們。

現今世界纷亂，疫症横行，人們活在不快樂的時空中，莫非正如聖經的预言，大審判即將來臨？

個人是無神論者，但深信的就是每當世界太多災難發生時，可能是上天給世人的预警，若世人來不及覺醒，將會受到一定的懲罰。

祝願世人能及早回头，一世自然平安。

無論多少的金錢、亦不能令人避過災禍吧？

（圖片來自網络）

週末的午餐

以為休息咗幾日、今日可以落街去銀行及睇醫生啦😭

点知今早重痛咗、真懷疑可能是骨裂咗呢！

但現在落街買餸都唔得、又点去睇醫生呢.

最后都要麻烦鄰居同我買餸、今早的午餐係：蕃茄煮魚、蒸水蛋、煮菠菜！

粟米椰汁糕

昨天用椰汁糕的方法做了一底「粟米椰汁糕」

一樣的配方:

粟米粒適量（我用急凍的，先飛水）

椰漿400ml

盒裝鮮奶250ml

水250ml

糖125gm

魚膠粉26gm

做法:

水加糖煮溶，加入鮮奶，椰漿，最後加入巳预先坐溶之魚膠溶液，過濾後放入玻璃容皿內，等约半小時放入粟米粒，再放雪柜雪三至四時便可進食。

蕃茄薯仔炆雞

雪柜有一個薯仔同蕃茄，我拎咗嚟炆用剩的雞件。

今日腳痛都冇乜心机煮嘢食，用咗跌打酒包住隻腳一整天，好似冇咁痛，若然明天還痛的話就唔睇醫生都唔得啦。

瑤柱肉絲炆米粉

今早浸到些青島貝、加些肉絲、紹菜（切絲）炆碟米粉做午餐！

人黑就点小心都冇用、本來自四月就開始腳痛（腳眼的部位）、本來有段時間都好咗好多、但近日又痛番（始終都是舊患）、巳經盡量外出時唔行太多路、点知昨天買完餸落車時（通常巴士的落車位十分高）、一踏落地的一剎那、突然唔知是否「拗柴」定什麼、痛到連隻腳踏在地上都痛🤦🤦🤦

如果明天還是这樣子、都要去針炙下嘞😭😭😭

豉汁蒸䱽魚

昨天買花蟹時顺便買咗條䱽魚，分两餐蒸嚟食。

第一餐用爆過之豆豉醬嚟蒸，我通常那些醬汁（例如豉汁，麵醬，梅子醬之類）一定爆過才用來蒸食物，这是學烹飪時學番來的。

畫虎畫皮難畫骨

这是句「老生常談」的說話，但時至今天，知人口面不知心我還是看不清，你以為一直是朋友的「所謂」朋友，倒头來直至不再往來時可能還不知是否「曾經」是朋友？有時不知別人的演技高明或是自己的無知，不過人心難測，对我來講，真真假假巳不重要，因為一切都如南柯一夢，發完便算了。

（圖片來自網络）

咸魚青瓜炆花蟹

这個餸我沒有整好幾年啦。本來我打算用「三点蟹」代替花蟹的（因為一來平d，二來那些殼冇咁硬）。

这個食譜是我朋友個仔教我的，首先將蟹上粉煎熟，拎起，落薑片爆香青瓜片，加入巳蒸熟之梅香咸魚茸，回镬花蟹，贊酒，加入少量雞湯煮至青瓜片至腍身，汁液收杰便可上碟。

瑤柱菜飯配蒜茸雞肶

今時今日嘅香港、巳經去到花開十八區（疫情）、就算冇癌症、都唔知幾時中头獎、所以留守屋企暫時叫做安全点、如果不幸買餸都中招、咁即係夠钟去報到吧🤔

今早買咗pack雞肶分兩餐、今早跟菜飯、今晚炆薯仔！