煲仔飯之夜

噚晚化身做煲仔飯導遊、一行六人帶埋係澳洲同美國返嚟的blog友去試吓！

我登特叫老细煮咗煲私房多葱脆脆煲仔飯佢地歎(因為餐牌上冇的)。

大致上都幾滿意、每人都係一百個大洋咋。

咸魚醬炆冬瓜

噚日食剩咗少少冬瓜、中午又唔想出街、於是用咸魚醬炆埋佢、估唔到都幾夾喎。

再嚐孤獨老人餐

继噚日住家飯之後、今天就要再嚐孤獨老人餐咯。。。。

不過。。。。話雖如此、但亦可以食得好滿足嫁！

有游水班仔两味、蒸、同冬瓜班仔湯、九唔搭八醬蒸飛排。

住家飯

自從没有落去陪亞媽開餐後、差不多天每日都是食孤獨老人餐、難得昨晚有朋友請我食餐住家飯、感恩！

朋友的廚藝很好、煮了青瓜蟹我歎、又有客家荳腐同煎蛋餅！食完噚晚發萝都流口水呢。。。嘻嘻！

合桃黑糖鬆餅

早前朋友送咗d黑糖焗的合桃比我、食唔晒、就跟吓網友翠兒個食譜、焗幾個比個朋友仔食吓啦。

真係唔錯喎、又唔太甜。

慢性自殺餐

睇見個標題好嚇人啊。。。。。

其實講到底係高胆固醇的食物啫、哈哈、今餐係咸魚蒸玻璃肉同自家製的豬油捞飯。

以我这年紀加埋咁多病痛、所以这一餐絕对係慢性自殺餐啦！哈哈哈

星期天的炒飯。。。。(2)

继續食炒飯做晚餐(因為煮多咗)！

今次用咸魚醬加葱同蛋嚟炒、更加惹味呀、往年我自己煮的咸魚醬加埋瑤柱重好味、近年由於瑶柱的價格不停咁升、停做了。

759蒜茸雞翼+青芒沙律下午茶

早日買到759的蒜茸牛油、試過焗法包、唔錯、今日試吓用光波的焗法、跟青芒蘋果沙律做下午茶！都唔錯。

星期天的炒飯

今日見d赤米虾幾靓、買咗半斤整沙律、留起d炒飯食、材料有白飯、青芒果、赤米虾、粟米粒、蛋。

調味只係盐同魚露咋。

Kimchi煮三文魚头

噚日係争先(壽司專門店)買到個超抵的三文魚头、之前有網友介紹的、重平過百 X超市、十五蚊咋、又新鮮喎、可惜成日賣晒、只買過一次做盐燒、本來諗住煮咖喱、点知有人介紹我煮韓式、咁又試吓囉。。。。

材料

三文魚头一個斬四至五件
用薑汁、古月粉、塩、生粉先醃再走油(或者煎香)

其他配料

KIMCHI半碗
娃娃莱2棵

調味

糖、塩、辣椒醬、水、雞湯、

先煮配料、加回魚头、煮约五至八分鈡至入味、用生粉水埋獻。

滑肉炒米粉

今朝臨出街至記得停电一小時、嗱嗱臨送走晒d肉比人、点知重剩低包肉眼、一於炒碟滑肉米比人啦。

紫蕃薯麵包

今天又玩吓夏威夷紫心蕃薯！

配方又係亂搅一通、用麵粉、自發粉、糖、蛋、吉士粉、水、牛油

瑞士汁乳鴿

前两日為咗樽醬油、特登走咗去荃湾找那醬園。。。悦和！

今日立刻試吓用佢整瑞士汁乳鴿、覺得今次重好過用鉅利添。

由於今次d配料唔齊、我是但咋。。。

有老抽、生抽(两款都用悦和醬園)
西芹碎、薑葱、冰糖、紹酒、香葉、八角、水
份量是但咋

乳鴿飛水、以上煮至出味(大約20分鈡)、放回乳鴿慢火浸煮半小時(因乳鴿比較耐熟)、凍後斬件。

今次係煮咁耐嘢唯一的一次。。。獨食咋！

哈哈！

蘑菇煙肉碟头飯

噚日係fb見到有人post個食譜、見幾方便、於是今朝又做吓東施啦！

其實除咗蘑菇我用新鮮之外、全部配料同調味我都跟足、將d肉同菇粒煮至收乾水就可熄火、除左跟飯重可以放在法包上當小食。

婆婆金句

回头望一望。。。昨天巳走過。。。只要能放下。。。明天好易過！

星班魚片湯两食

今朝買到條特價的游水星班、雖然魚味唔夠、但勝在平、人地袋住先、我就一於食住先啦。。。。鬼知我幾時腦退化喎！

上午食湯米、今晚食湯飯、平過係街食啦、

九唔搭八醬蒸飛排

之前買咗包去皮的蒜头、怕唔放得耐、匆匆就煮咗個九唔搭八的醬、估唔到攞嚟蒸飛排、出奇地好味、我的配方如吓。。。。

材料

蒜茸、荳板醬、茄汁、糖、指天椒、甜莱甫(切碎)

之後加多碗蕃茄薯仔魚尾湯、簡直super！

紅酒燴雞

偶然見到Owenmama做的紅酒燴牛腩、心思思又想換吓整雞、我的配方如下。。。。

材料

雞半隻(可用法國黄春雞一只)

其他配料

红蘿白碎/西芹碎/紫洋葱碎/香葉/蒜茸/紅酒/茄膏

我今次用提子油煮、先爆香雞、拎起

再用油爆料、加入茄膏、放回雞、加水炆約15分钟、加入红酒、再炆多半小時、放碟上淋回汁液、跟意粉或飯食。

素午餐肉炒飯

今日全日素、晚上用素午餐肉、蛋、素XO、同甜菜甫炒碟少少红米飯、少油又好味。

素冷麵

話咁快又到咗三月初一嘞！

今日整個素冷麵吧。。。。

材料

上海麵一扎

青瓜半條切絲

配料有。。。甜菜甫/馬碲/红蘿蔔/冬菇/雪耳/五香荳腐干/香莱(芫茜)

調味。。。 蚝油/老抽/糖/水/麻油( 熄火後才落)

做法

先將配料切碎加入調味煮好候用、再用水灼好上海麵放入碟中、铺上切絲的青瓜、再放上巳煮好之素肉碎、淋上麻油、最後完工。

健康版鹵肉飯

早幾天係FB見到有人做咗個健康版的鹵肉飯、我一於跟吓風。。。。

材料

梅头豬肉/冬菇/吊片(魷魚)/蒜茸/雪耳

以上全部剁碎候用

調味

壺底油(我諗係台湾蚝油)/老抽/糖/水
慢火炆腍、熄火後加入麻油、可跟三色飯。

泰式柚子虾沙律

噚日買到泰國柚子同台湾的芭樂(我地叫番石榴)、加咗d中虾！好食。

個汁除咗有魚露、白醋、雞醬、我加咗椰糖水、蒜茸、芫茜、指天椒、青檸汁、好好味。。。。yummy！

現成葡汁

近日超市有隻現成葡汁、買咗樽試吓煮雞！

可能近來食得淡囗d、覺得重囗味一点、但对於返工一族、不失為方便餐。我今次見有椰絲剩、加咗一齊煮雞、增加香味。

椰香西米糕

噚日係網見到有網友做这糕、雖然做得冇咁靚同颜色唔夠、而且我買唔到新鮮椰絲、不過A貨算係咁嘞！

多謝網友kitwai2723.blogspot.com的分享。

亞婆星洲炒米

我諗星加坡本身可能冇le款炒米、不過我由細食到大、我唔喜歡用叉燒、改用雞肉同虾啫。

希望我d朋友都喜歡啦。

乾炒肉片河

今日試吓用瑞士汁乾炒肉片河、可能掌握唔到個火路、炒得唔夠乾身、希望下次會炒得好d啦。

快樂的一天

今天心情靚！可能同剪晒d煩惱絲有關卦。

一早炒咗碟乾炒肉片河比人、但唔夠我個荷包乾囉。

再整咗幾個雜锦甜包、(其實想用埋d粉咋)、希望冇食壞人啦、哈哈！

大雜會捞麵

一碟充滿愛心兼人情味的午餐完成了！

今日剪去留咗大半年的頭髮、換上個清爽的男人裝。

Le碟咁充滿愛心的捞麵有朋友送的竹昇麵、十二月送的花膠(切咗絲)、自家煮的XO醬、通血管的白背木耳絲、加埋冬菇絲同虾子、齋睇都正呀。

游水魚晚餐

原來幸福係要自己比的！

我今晚又發揮每天愛自己多一点的本能。。。。清蒸杉斑、灼生莱、少少飯、沒有鮑参海味、但簡單的魚同莱巳經覺得好幸福、感恩！

自家猪仔包+泰式沙律午餐

近來愛上咗整咸包、今朝做完豬仔包、夾塊豬柳漢堡扒、加多少少泰式沙律、真係正呀。

魚湯云吞竹昇麵

今晚用紅衫魚(加咗個蕃茄去腥)煮碗魚湯！淥咗幾只蘇記云吞同竹昇麵、灑d虾子又一餐嘞！要常感恩。。。。

同場加影幾隻台式燥肉包(今日中午做比朋友的)。

難過。。。。。

昨天從朋友口中得悉父親的一位朋友早幾天仙遊了。感到十分難過、这位老人家不單止係父親的朋友、亦是一位老街坊、一個小學同學的父親、雖然佢年近百歲、無論思路及自理能力都比我高、每次在街上遇上時、佢還声如洪鐘、但正如佛家有句話、人生在世只不過三萬年、人。。。。總會有離去的一天。。。希望佢一路好走、在天國(因近來信了主)遙看他的家人及守護還在世的妻子吧！

十分感謝他當年(十年前父親離世時)還拿着拐杖來送父親最後的一程、这種人情味現今社會巳很難得。唉！God bless him！

YMCA裝修後的自助午餐

咁啱有blog友係美國返咗嚟、約咗係窩打老道的YMCA食自助餐、我地一行七人、嘻嘻哈哈又聚吓、歡笑一番。

裝修後的自助餐由本來的178/位加到248/位、折扣後都235/位、不過比起大酒店都平好多。反正我地班老人家(我話自己咋。。哈哈) 又唔食得幾多、當然十二月一食完又雞咁脚返去做爺容包啦。

希望Winnie臨走前有時問間再聚多次吧！

亞婆台式肉燥飯

今日去開油麻地電脚、順便去永安買齊d配料、煮個亞婆自創的台式肉燥飯！

做法超簡單、只要跟齊d。。。step by step、先用油爆香紅椒、蒜茸、肉碎、鹵肉粉、壺底油、老抽、糖、乾葱片、水、炆至汁收杰身、大約個半小時、熄火。可跟米粉或飯食。