開心晏仔

今日留响屋企執吓屋兼休息吓！為咗唔待薄自己、一於食好d！……亞婆金句:每天愛自己多一点！

買咗两塊鹿兒島黑豚肉豬扒、首先用蒜塩醃吓佢、两边搽少許麵粉再煎熟、煮番d日式三宝(鰹魚汁/日式清酒/味淋)汁淋上面、跟白飯同烚椰莱、咁又一餐開心晏仔嘞。

青出於藍

我細佬的賓賓曾經拜我為師(廿幾年前)！哈哈、但後來佢地移民後返咗家鄉、而家回流又再返嚟做過、大大話話都好耐冇食過佢煮的嘢咯、今晚見放工無嘢做順便行落去黐餐啦。。。。点知原來要付出代價添！就係仆街囉。。。唉！希望下星期返到工吧！

四餸一湯

今晚煮飯的莱式係合掌瓜栗子湯、香橙骨、蒸水蛋、粉絲虾米津白同埋魚香茄子！

放工後行落去細佬到黐餐、点知又仆街、唉！都唔知下星期返唔返到工添。而家重鬼咁痛！

清淡的晚餐。。。魚皮餃湯米

自從謝記執笠後巳經好耐冇食過似樣的<魚皮餃>嘞！

今次係近年食到好少少質素的魚皮餃、簡簡單單煮碗湯米就一餐啦。

香芋椰汁糕

今日又去返工、做定咗碟飯後甜品比小妹妹食。

做法都好簡單、只不過係嘥時間、要一層雪完又一層、又唔可心急、对於我这心急鬼就烦一点。

大滿貫生日飯

今日適逢移民咗加拿大的表妹生日、佢約咗班舊同事食飯、婆婆有幸被邀請！去咗馬會的大滿貫食生日飯！

唔知係自己咀刁定而家的質素差咗、總覺好一般囉。Anyway反正至在聚吓舊、更難得佢地班舊同事咁多年重可以坐埋一齊、實在難得呀。

再次朋友聚餐

今日又去朋友到聚餐、每人煮一味、我的工作係甜品、所以做咗高Ling的棗皇糕、佢地都好滿意。

再見十九年！

原來早幾日我移咗民的表妹突然由加拿大返咗嚟渡假！十分意外。。。。。所以今日特登為佢搅咗餐大龍鳳、借用好朋友的地方煮餐嘢比佢歎吓啦。雖然唔係什麽好嘢、始終一份心意、因為就算我有多十九年命、睇怕都冇本事再煮咯！同時亦順道幫我的宝貝貓貓狗。。。。麈歸麈、土歸土、作一了段、再無牽掛。

住家飯

今晚趁朋友有車、車咗八宝鴨同其他食材去佢屋企先、準備星期日的大龍鳳、顺便係佢屋企食埋住家飯！返到屋企成十点半、不過由西貢返到自己屋企只係一小時半算快嘞。

香蒜帶子炒飯+金銀莱鴨腎湯

今日去完电脚、行過果欄有個老闆介紹我買咗盒紐西蘭車厘子返嚟比亞媽食、個個都買塔斯車厘子、但老闆話紐西蘭的抵食好多喎。

所以今晚我炒咗碗冷飯再跟碗金銀莱鴨腎湯！不過。。。。。原來煲一碗湯都唔易嫁。

球會午餐

朋友請食晏、今日去深水灣高球會、等婆婆又做吓上等人先！多謝晒。

清湯蝴蝶腩

由於我戒咗牛肉成二十年、但間中見到有人整清湯腩、個心又好想食、但点可以破戒呢？於是我用蝴蝶腩(近豬肺的部份)照足清湯腩的做法、又可品嚐吓囉！有時都覺得自己好為食呢！哈哈。

材料

蝴蝶腩一至两個
鹵水料10蚊
白蘿蔔白一條去皮切件
雞湯一公升

做法

首先將原塊蝴蝶腩加鹵水料煲至七成腍、拎走鹵水料及水、換過雞湯继績煲、蘿蔔件加糖飛過水後加入再煮至夠腍便可連湯一起上枱。

食起嚟都好似牛腩咁的！

金石良言

自從入咗le個網址、獲益良多、如果能每天都多看一遍、不但可減少個人的戾氣、亦能放下很多、对人对事亦會處之泰然、真的要講一句。。。。師傅明白了！

日式三宝煎魚扒

見完牙醫今晚唔敢食得咁雜、係铜锣湾買片三文魚扒用我的至愛。。。。日式三宝煎咗佢、跟d椰莱同白飯就算啦！感恩。

甘飯館午餐

朋友請食飯！今次試鏞記另起爐头的甘飯館、除咗燒鵝其他應該難我唔到囉！有点失望、亦雷声大、雨点小、聽講一碟燒鵝碟头飯要一百大洋呀。

金菇豬肉卷跟蛋炒飯

今日去Sogo買咗包金菇同豬腩片、加少少红蘿蔔絲捲成豬肉卷、煎香後再用日式三宝汁燴番佢、跟少少蛋炒飯、咁又一餐啦！

日式三宝汁
味淋/鰹魚汁/清酒……同一份量、平時用嚟醃豬扒、雞扒或三文魚都好正嫁、所以我叫佢做日式三宝囉。

再戰咖喱魚旦

自從九龍城那檔潮州魚旦執咗笠、我都好耐冇整我的皇牌咖喱魚旦咯、聽人介紹鴨脷洲有間叫波記的魚旦、所以順道走去買一斤番嚟試吓！

咖喱汁

印度咖喱粉/甜醬/沙嗲皇(之前介紹過的)

另外乾葱茸/雞湯/老抽/糖/盐/生粉水

炸魚旦一定要飛吓水才用、之後隔去水份、用油先爆乾葱茸、咖喱汁、回鑊魚旦、贊酒、湯、煮约十多分钟、最後加入老抽、調味、生粉水就可上碟。

最后加多碗魚餃米湯粉！但始終食唔番山窿謝記的味道、因為食到的魚皮餃還未食到謝記的囗感同味道。

白汁雞皇飯

我從來都唔食超市米、一來大包一個人要食好耐、我鈡意食雜貨舖的米、可惜而家小商户買少見少、全完冇生存的空間。

噚日係北角近天后站比我揾到重生存緊的雜貨舖、於是嗱嗱臨買咗三斤絲苗白米、好有飯味。所以今朝煮碟白汁雞皇飯食吓先！

材料

雞肶一隻去骨去皮切粗粒
其他配料。。。甜紅椒同洋葱切粒

做法

先用少少油炒香雞粒同配料、加入牛油同麵粉、边推边分别加入鮮奶同雞湯、直至滑身成白汁後、加入塩、熄火加入少少蛋黄同鮮忌廉、再淋在白飯上、一碟巧巧味的白汁雞皇飯出場嘞。

蟹柳椰莱炒米粉

今日去街去到夜麻麻、lunch係耀華街又食得好飽、返到屋企炒咗碟蟹柳椰莱米粉就算咯。

又去派街坊

真係而家冇廚房用就麻鬼煩、要等亞媽出街至可以去佢個廚房搅搅貢、但個死印姐又玩到個廚房油立立、比着以前我話事、晨早比我剷咗返印尼啦。

搅到噚日的蓮藕糕計錯數、好似食橡皮糖咁、谷鬼气今日再蒸過！加多份砵酒蘑菇炆豬軟骨！好彩今日冇失手啫。

蓮藕糕

本來諗住用蓮藕粉嚟做的、但点知揾極都揾唔到、唯有今次用馬蹄粉頂住先啦！

材料

蓮藕一段刨碎

馬蹄粉一小盒250gm
水750ml開粉用

另外750gm加入蔗糖375gm煮糖水
油一湯匙

做法

將水先煮溶糖、加入油、再用水750gm嚟開粉、加入蓮藕碎、之後混合两份水边煮边搅至杰身、再放入錫紙盆蒸约半小時便OK。

發莱蚝士豬骨粥

噚日係翠園食完le個粥、今日照煲一次、我用豬軟骨、好好味、希望今次唔好比人話唔環保、其實而家边有真發莱吖！

有机鯇魚

今日同朋友飲完茶、佢地介紹咗我買有机鯇魚、我於是走去湾仔逛下、買咗嚿有机鯇魚腩、雖然貴少少、但唔知是否心理作用、似乎少了泥味、我用咗梅莱嚟蒸、再烚咗碟芥蘭。簡單又一餐。

感恩！

砵酒橙汁焗豬柳

我見blog友TNP整得咁靚、又學人做吓東施先！

做完個賣相都唔錯囉。

超正的蘑菇汁豬扒飯

估唔到做咗两日廚娘又比我學到嘢添！

今日回復閒人、整番碟超好味的蘑菇汁豬扒飯歎吓先。

平時我只知牛肉才要打水、原來那家人的姨婆教我豬肉亦一樣、真多謝佢的教導呢！

豬扒两片
先用刀拍鬆、加入盐、雞粉、生粉、水、先浸約水份吸納入猪扒的肉處、之後隔去多餘再加入蛋白、煎熟。

蘑菇汁

自家做的鮮茄酱、蘑菇碎、洋葱碎、牛油、蒜盐、紅椒粉、麵粉

做法……先用牛油炒香洋葱碎、蘑菇碎、麵粉、加入其他、慢火煮至出味、杰身、淋在煎好之豬扒上、跟白飯！正。

移民。。。。路茫茫

近日好多人都重提起两個字(移民)、回望八九年亦曾經有個这念头、但这念头只係一閃即逝。因為曾經在外國住過幾年的我。。。。始終覺得龍床不及狗竇、而且在外边做三等公民。。。總覺有寄人籬下之感覺。对於我这心無大志之人嚟講還是对这生於斯、長於斯、最終亦會死於斯。。。。香港。

相信有部位早巳移民之人、就算心存後悔、奈何早年巳變賣家園、回流亦無望！現今世界各地亦正值多事之秋、所謂心安立命、見仁見志啦。

麥米粥

今晚搭錯車、竟然最終要搭的士返屋企！冲完涼煲咗le個先父最鈡意食的糖水！突然好懷念細時的生活片段。

簡單的碟头飯

買花姑娘插竹葉、由於今日有嘢做、是但整個簡單的碟头飯就算！

佢就係炸魚手指跟茄汁荳囉。

味千拉麵

星期天唔煮啦！去咗食味千拉麵、不過噚日做咗個咖啡椰汁糕、但做得麻麻、賣相唔靚仔、食就唔錯、做唔難但分色考耐性、我冇囉。

芋虾夾

最近有親戚係大陸做咗一批芋虾夾、我幫佢買咗两個、全部人手做、物料係銅的、十分實用、之前係上海街找了很久都找不到！今年新年可大派用埸啦。